E Faapefea Ona E Manumalo i Lagona Lē Fiafia?

PE NA iai se taimi na e tauivi ai ma ni lagona lē fiafia? E toetoe lava o tagata uma ua oo iai na lagona. Ua faateleina i aso nei faafitauli tau tamaoaiga, faiga sauā ma le lē tonu. E lētioa a toʻatele tagata ua lofitūina i le faanoanoa, matuā nofosala ma le manatu o le tagata iā te ia e lē aogā.

E telē se aafiaga o na lagona. E mafai ona aveesea ai lo tatou mautinoa, tomai e mafaufau ai ma le olioli. Ua taʻua i le Tusi Paia: “Po ua e lotovaivai ea i le aso o le puapuaga? O le a itiiti lou malosi.” (Faataoto 24:10) E tatou te manaʻomia le malosi ina ia faatino ai pea o tatou tiute i lenei lalolagi leaga. O lea la, e tāua tele ona tatou manumalo i lagona lē fiafia. *

Ua aumaia i le Tusi Paia nisi o fesoasoani aogā e faafetaiaʻia ai lagona lē fiafia. E lē finagalo Ieova le Atua, o Lē na faia mea ma tausia ola uma, ina ia lofitūina oe i le atuatuvale ma le manatu ua siliga se faamoemoe. (Salamo 36:9) O lea la, seʻi o tatou iloilo auala e tolu mai i lana Afioga ina ia manumalo i lagona lē fiafia.

Ia Iloa e Manatu Mai le Atua Iā te Oe

E manatu nisi tagata o loo pisi tele le Atua ma e leai sona taimi e uaʻi mai ai i o latou faalogona. Po o lou manatu lenā? Ua faamautinoa mai e le Tusi Paia, e manatu mai le Atua i o tatou faalogona. Na taʻua e le faisalamo: “E latalata mai Ieova iā i latou o ē e loto momomo; ma e faaola e ia i latou o ē ua loto nutimomoia.” (Salamo 34:18) Maʻeu le faamāfanafanaina i le iloa, e latalata mai le Pule Silisili Ese pe a tatou puapuagatia!

E alofa le Atua ma e lē taumamao o ia. Ua taʻua i le Tusi Paia “o le Atua o le alofa lava ia.” (1 Ioane 4:8) E alofa o ia i tagata ma manatu mamafa i ē o loo puapuaga. Ina ua nofo pologa Isaraelu i Aikupito i le tusa ma le 3,500 tausaga ua mavae, na fetalai o ia: “Ua ou iloa lava le sauāina o loʻu nuu o loo i Aikupito, ma ua ou faalogo i lo latou ōi ona o ē e tutuli faamalosi i latou e faia galuega; ua ou iloa puapuaga o loo mafatia ai i latou. Ou te alu ifo e laveaʻi iā i latou.”—Esoto 3:7, 8.

E silafia lelei e le Atua o tatou lagona, auā “o ia na faia i tatou, ae e lē o i tatou lava.” (Salamo 100:3) O lea, e tusa lava pe tatou te manatu e lē o malamalama isi tagata iā i tatou, ae e mautinoa e silafia lelei e le Atua i tatou. Ua taʻua i le Afioga a le Atua: “E lē vaai le Atua e pei o le vaai a tagata, auā o le tagata e vaai i le tino; a o Ieova e vaai i le loto.” (1 Samuelu 16:7) E oo lava i o tatou lagona i totonu o le loto, e silafia e le Atua.

E silafia foʻi e Ieova o tatou sesē ma vaivaiga. Ae e faafetai ona e mafai ona faamagalo e lo tatou Atua alofa. Na faapea mai le tusitala o Tavita: “E pei ona alofa mutimutivale o le tamā i lana fanau, e faapea foʻi ona faaalia e Ieova le alofa mutimutivale iā i latou e matataʻu iā te ia. Auā ua silafia lelei e ia le mea na faia ai i tatou, ua ia manatua o le efuefu lava i tatou.” (Salamo 103:13, 14) E lē pei le silasila a le Atua iā i tatou o la tatou vaai. E  silasila o ia i mea lelei ma faagalo mea sesē, pe afai e tatou te salamō i a tatou agasala.—Salamo 139:1-3, 23, 24.

O lea, pe a lofitūina i tatou i lagona e lē aogā, e ao ona tatou tauivi e manumalo i na lagona. E tatau ona manatua le auala e silasila ai le Atua iā i tatou.—1 Ioane 3:20.

Atiaʻe se Faauōga Vavalalata ma le Atua

O le ā le aogā o le vaai iā i tatou e pei o le silasila a le Atua iā i tatou? O le a faigofie ai ona tatou uia le isi laasaga ina ia manumalo ai i lagona lē fiafia, o le atiaʻe lea o se faauōga vavalalata ma le Atua. Pe mafai ona faia lenā laasaga?

E naunau lo tatou Tamā alofa o Ieova le Atua, e fesoasoani mai iā i tatou e atiaʻe se faauōga vavalalata ma ia. Ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) Seʻi manatu i le mea lenei: E ui e tatou te vaivai ma agasala, ae e mafai ona tatou maua se faauōga māfana ma le Pule Silisili Ese o le aoao o mea.

Ina ia tatou iloa lelei le Atua, ua ia faailoa mai o ia i le Tusi Paia. E tatou te iloa uiga matagofie o le Atua e ala i le faitauina e lē aunoa o le Tusi Paia. * Pe a manatunatu loloto i lenā poto, o le a atili ai ona tatou vavalalata atu iā Ieova. O le a tatou iloa lelei ai le ituaiga Atua moni e iai o ia, o se Tamā alofa ma agalelei.

E iai nisi aogā o le manatunatu loloto i mea e tatou te faitau ai i le Tusi Paia. E tatou te mafuta vavalalata atu i lo tatou Tamā i le lagi, i le faaoo lea o lona finagalo i o tatou mafaufau ma loto, ma faaaogā e faasaʻo, faamāfanafana ma taʻitaʻia ai. E sili ona manaʻomia ona tatou faia faapea pe a tauivi ma manatu ma lagona e faalavelavea ai. Ua faapea mai le faisalamo: “Ina ua tele popolega o loʻu loto, na fiafia loʻu loto ona o au faamāfanafanaga.” (Salamo 94:19) E mafai ona matuā faamāfanafanaina i le Afioga a le Atua. Pe afai e tatou te talia ma le lotomaulalo lana feʻau o le upu moni, e ono faasolosolo mālie ona suia o tatou lagona lē fiafia i le faamāfanafanaga ma le toʻafilemu lea e na o le Atua e na te aumaia. O lea la, e faamāfanafana e Ieova i tatou e pei ona faamāfanafana e se matua alofa sana tama ua lavea pe tagi.

O se isi auala e avea ai i tatou ma uō a le Atua, o le talanoa atu pea lea iā te ia. Ua taʻua manino i le Tusi Paia, “po o ā lava mea tatou te talosaga atu ai e tusa ma lona finagalo, e faafofoga mai lava [le Atua] iā i tatou.” (1 Ioane 5:14) Po o ā lava o tatou popolega, e mafai ona tatou tatalo atu i le Atua ma talosagaina lana fesoasoani. Pe afai e faailoa atu i le Atua mea o loo i o tatou loto, e tatou te maua  le toʻafilemu. Na tusi Paulo: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.”—Filipi 4:6, 7.

A o e tausisi i se faasologa o le faitauina o le Tusi Paia, manatunatu loloto ma tatalo, e lē taumatea o le a e iloa ua e atiaʻe se faauōga māfana ma lou Tamā i le lagi. O le a mātua fesoasoani lenā faauōga iā i tatou e teena ai lagona lē fiafia. O le ā se isi fesoasoani?

Taulaʻi i se Faamoemoe Mautinoa i le Lumanaʻi

E mafai ona tatou mafaufau pea i mea lelei, e ui i ni tulaga e sili ona faigatā. Aiseā? Ua tuuina mai e le Atua iā i tatou se faamoemoe mautinoa i le lumanaʻi. Na aotele e le aposetolo o Peteru lenei faamoemoe i upu nei: ‘E tatou te faatalitali i le lagi fou ma le lalolagi fou, e tusa ma le folafolaga a le Atua, e mau ai le amiotonu.’ (2 Peteru 3:13) O le ā le uiga?

O le faaupuga “lagi fou” e faasino atu i se malo, o le Malo faalelagi lea o le Atua ua pulea e Iesu Keriso. E faasino atu le faaupuga “lalolagi fou” i tagata amiotonu ua finagalo malie i ai le Atua, o ē o le a ola i lenei lalolagi. I le pulega a le “lagi fou,” o le a saʻoloto ai tagata e ola i le lalolagi mai i mea uma e faapogaia ai lagona lē fiafia. E tusa ai o tagata faamaoni o le a ola i lenā taimi, ua taʻua i le Tusi Paia, o le a “soloiesea foʻi [e le Atua] loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”—Faaaliga 21:4.

E mautinoa e te ioe mai e mananaia ma faalaeiau na manatu. O le māfuaaga lea ua taʻua ai i le Tusi Paia le faamoemoe matagofie i le lumanaʻi ua saunia e le Atua mo Kerisiano moni, o “le faamoemoe fiafia.” (Tito 2:13) Pe afai e tatou te taulaʻi atu i folafolaga a le Atua  mo le lumanaʻi o tagata, ma pogai e maufaatuatuaina ai na folafolaga, o le a tatou teena manatu lē fiafia.—Filipi 4:8.

Ua faatusa e le Tusi Paia lo tatou faamoemoe o le faaolataga i se puloutau. (1 Tesalonia 5:8) I aso anamua, e lē mafai ona alu se fitafita i le taua e aunoa ma lona puloutau. E na te iloa o le a puipuia ai lona ulu mai i ni tā, ma see ese ai ni ū lea e fana mai. E pei ona puipuia le ulu i se puloutau, e faapea foʻi ona puipuia le mafaufau i le faamoemoe. Pe a tatou mafaufau i manatu ia e faatupu ai le faamoemoe, e mafai ona aveese ai o tatou lagona lē fiafia po o le soona popole.

E mafai la ona e manumalo i lagona lē fiafia! Mafaufau i le auala e silasila ai le Atua iā te oe, ia mafuta vavalalata atu iā te ia, ma taulaʻi atu i lou faamoemoe i le lumanaʻi. Ona e faatalitali atu lea i le aso o le a tafiesea ai e faavavau lagona lē fiafia!—Salamo 37:29.

[Faaopoopoga i lalo]

[Faamatalaga faaopoopo i le itulau 19]

“Ua ou iloa puapuaga o loo mafatia ai i latou.”—ESOTO 3:7, 8

[Faamatalaga faaopoopo i le itulau 20]

“Ina ua tele popolega o loʻu loto, na fiafia loʻu loto ona o au faamāfanafanaga.”—SALAMO 94:19

[Faamatalaga faaopoopo i le itulau 21]

“Ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.”-FILIPI 4:7

[Pusa/Ata i le itulau 21]

Mau Faamāfanafanaloto e Uiga iā Ieova le Atua

“O Ieova, o le Atua e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni.”—ESOTO 34:6.

“E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.”—2 NOFOAIGA A TUPU 16:9.

“E latalata mai Ieova iā i latou o ē e loto momomo; ma e faaola e ia i latou o ē ua loto nutimomoia.”—SALAMO 34:18.

“Ieova e, o oe e lelei ma ua e nofosauni e faamagalo.”—SALAMO 86:5.

“E agalelei Ieova i mea uma lava, e alofa mutimutivale foʻi o ia i ana galuega uma.” —SALAMO 145:9.

“O aʻu o Ieova lou Atua, o loo uuina lou lima taumatau, o Lē e fai atu iā te oe, ‘Aua e te fefe. Ou te fesoasoani iā te oe.’”—ISAIA 41:13.

“Ia viia . . . le Tamā o le alofa mutimutivale, ma le Atua o faamāfanafanaga uma.” —2 KORINITO 1:3.

“Ua tatou mautinoa i o tatou loto e alofa o ia iā i tatou e tusa lava po o ā mea e faasala ai i tatou e o tatou loto, auā e sili atu le Atua i o tatou loto, e na te silafia foʻi mea uma lava.”—1 IOANE 3:19, 20.

[Pusa/Ata i le itulau 22]

Ua Latou Taulau e Tauivi ma Lagona Lē Fiafia

“E lē mafai e loʻu tamā ona ola e aunoa ma le ʻava malosi, ma na ou matuā mafatia ai ona o ia. Na umi se taimi o lofitūina aʻu i lagona ou te lē aogā. Ae ina ua ou suʻesuʻeina le Tusi Paia ma se Molimau a Ieova, na ou aʻoaʻoina ai le faamoemoe i le ola e faavavau i le lalolagi. Ua matuā faafiafiaina aʻu ona o lenei faamoemoe. Ua avea le faitauina o le Tusi Paia o se mea masani i loʻu olaga. O taimi uma ou te tuu le Tusi Paia i oʻu autafa. Pe a lofitūina aʻu i lagona lē fiafia, ou te suʻe i le Tusi Paia ma faitau ni mau faamāfanafanaloto. O le faitau e faatatau i uiga mananaia o le Atua, ua ou iloa ai e tāua tele aʻu i lana silafaga.”—Kieta, se fafine e 33 tausaga. *

“Sa ou inu ʻava malosi i aso uma, faaaogā mariuana ma isi fualaau faasāina, ma sinifi le kelū. Sa avea aʻu ma tagata ʻaisi ona ua toetoe o mea uma na iā te aʻu ua leai atu. Ae ina ua ou suʻesuʻeina le Tusi Paia ma Molimau a Ieova, na matuā suia loʻu olaga atoa. Na ou maua se mafutaga māfana ma le Atua. E ui lava foʻi o loo oʻu tauivi pea ma lagona o le nofosala ma lē aogā, ae ua ou iloa faalagolago atu i le alofa mutimutivale ma le agalelei o le Atua. Ou te mautinoa e aumaia e le Atua iā te aʻu le malosi e manumalo ai i lagona lē fiafia. O le iloaina o le upu moni o le Tusi Paia, o le mea lea e sili ona lelei ua tupu i loʻu olaga.” —Pelenato, se tane e 37 tausaga.

“Mai lava i loʻu laʻitiiti, e masani ona ou faatusatusa aʻu i loʻu tuagane matua. O taimi uma ou te manatu ai e sili o ia iā te aʻu. O loo oʻu lagona pea le lē mautonu ma manatu e leai ni oʻu tomai. Ae ou te lē faavaivai ai. Ou te tatalo e lē aunoa iā Ieova, ma ua ia fesoasoani mai iā te aʻu ia manumalo i lagona ou te lē agavaa. O se faamāfanafanaga le iloaina, e alofa moni lava ma manatu mai le Atua iā te aʻu!”—Loreta, se fafine e 45 tausaga.

[Faaopoopoga i lalo]