Ia Aʻoaʻo Lau Fanau

Se Malo o le a Suia le Lalolagi Atoa

PE E te iloa o le ā lea Malo?— * O le Malo lea na aʻoaʻo e Iesu i tatou e tatalo ai. Na ia aʻoaʻo i tatou e tatalo i le Atua: “Ia oo mai lou malo.” (Mataio 6:9, 10) Ua lata i le 2,000 tausaga o tatalo soo o Iesu i le Atua ia oo mai Lona Malo. Pe na e tatalo ia oo mai lenā Malo?—

Ina ia iloa le mea e taʻu o le malo, e tatau ona e iloa le mea e taʻu o le tupu. O le tupu o se tagata lea e pule. O le atunuu e na te pulea, e taʻu o ona eleele. O eleele o le Malo o le Atua e aofia ai le lalolagi atoa. Pe a oo mai le Malo o le Atua, o le a olioli tagata uma o le lalolagi i faamanuiaga o le a aumaia e lana pulega.

O le Malo o le Atua o se pulega i le lagi. I le Isaia 9:6, o loo talanoa ai le Tusi Paia e uiga i le Tupu o lenei malo. Mātau le mea ua taʻua e uiga iā te ia: “Ua fanau mai mo i tatou le tama, . . . ma o le a i luga o lona tauʻau le pulega a se perenise. O le a faaigoa o ia . . . o le Perenise o le Filemu.”

Pe e te iloa le mea e taʻu o le perenise?— Ioe, o le atalii o se tupu. O ai le Tupu silisili ese i le lagi?— E saʻo oe pe a e fai mai o Ieova. Ua taʻua o ia i le Tusi Paia “o Lē e Silisili Ese i le lalolagi uma.” (Salamo 83:18) E masani ona taʻua Iesu i le Tusi Paia “o le Alo o le Atua.” O se tasi o māfuaaga ona o Ieova na faia Iesu. O Ieova o le Tamā moni lea o Iesu.—Luka 1:34, 35; Ioane 1:34, 49; 3:17; 11:27; 20:31; Galuega 9:20.

O le Malo o le Atua lea na aʻoaʻo e Iesu i tatou e tatalo ai, o se pulega faapitoa. O le “pulega a se perenise,” auā ua faia e Ieova lona Alo o Iesu, ma Pule po o le Tupu o le Malo. Ae pe e te iloa e iai nisi o le a filifilia e pule faatasi ma Iesu o ni tupu i le Malo o lona Tamā?— Seʻi o tatou talanoa e uiga iā i latou na.

A o leʻi maliu Iesu, na ia taʻu atu i ona aposetolo faamaoni o le a alu i “le maota” o lona Tamā i le lagi. Na fetalai o ia: “Ou te alu e sauni se nofoaga mo outou . . . ina ia iai foʻi outou i le mea ou te iai.” (Ioane 14:1-3) O le ā sou iloa, o ā mea o le a fai e aposetolo ma isi ua  filifilia i le lagi faatasi ma Iesu?— “E pule i latou o ni tupu faatasi ma ia.” Ua taʻua foʻi i le Tusi Paia le aofaʻi o i latou o le a pule o ni tupu faatasi ma Iesu. E 144,000.—Faaaliga 14:1, 3; 20:6.

O le ā sou manatu, o le a faapeʻī le lalolagi pe a pule le Perenise o le Filemu ma lana ʻaufilifilia e 144,000?— O le a matagofie! O le a lē toe iai ni taua. O le a ola filemu meaola ma isi meaola, faapea foʻi i tatou. E leai se tasi e maʻi pe oti. O le a pupula mata o ē tauaso, faalogo taliga o ē tutuli, ma osooso le pipili e pei o le ʻaila. O le a anoanoaʻi meaʻai i le lalolagi mo tagata uma. Ma o tagata uma o le a alofa le tasi i le isi, e pei ona aʻoaʻo e Iesu ona soo e fai. (Ioane 13:34, 35) Seʻi o tatou faitau i mau nei mai i le tusi o Isaia, ma iloa ai mea matagofie o le a tutupu.—Isaia 2:4; 11:6-11; 25:8; 33:24; 35:5, 6; 65:21-24.

Talu mai le taimi na aʻoaʻo ai e Iesu tagata e tatalo “ia oo mai lou malo,” e faitau miliona tagata ua aʻoaʻoina e uiga i lenā Malo. Ua suia o latou olaga i lenei poto. Ua lē o toe umi ona olioli lea o tagata uma o loo auauna iā Ieova le Atua ma lana Tupu filifilia, o Iesu Keriso, i le filemu, soifua mālōlōina lelei ma le fiafia, pe a oo mai lenā Malo ma suitulaga i malo uma o le lalolagi.—Ioane 17:3.

[Faaopoopoga i lalo]

FESILI:

▪ Aiseā ua taʻu ai le Malo o le Atua o le “pulega a se perenise”?

▪ O ai o le a pule ma Iesu i le Malo o lona Tamā?

▪ O le ā faapeʻī le lalolagi pe a pule mai le perenise o Iesu?