E Mafai e le Tusi Paia Ona Suia Olaga

NA MAFAI faapefea ona sui le olaga o sē na avea ma fitafita o le ʻaufouvale ma le ʻaugāoi? Aiseā ua suia ai e se tamaʻitaʻi e siamupini i le tae kwon do ona sini i le olaga? Na faapefea ona tauia taumafaiga alofa a se tamā i lona atalii? E maua le tali pe a faitau i tala nei.

“E ui sa leaga loʻu olaga, a o lea ua ou fiafia.”—GARRY P. AMBROCIO

TAUSAGA: 47

ATUNUU: FILIPAINA

TALAAGA: FITAFITA O LE ʻAUFOUVALE

OLAGA SA IAI:Na ou ola aʻe i se tamaʻi taulaga e taʻua o Vintar. O le vanu laugatasi na matou nonofo ai, sa siʻomia i mauga lanulauʻava, o vaitafe manino, ma le ʻea mamā. Ae e ui i lea siʻomaga filemu, e leʻi faigofie lo matou olaga, ona sa gaoia e tagata a matou lafumanu ma mea mai i lo matou fale.

I le taimi a o oʻu talavou, sa tele ina matou inu pia ma ulaula ma aʻu uō, ma gaoia foʻi tupe e faaauau ai aʻu masaniga leaga. Na oo lava ina ou gaoia mama auro ma mea faapena a le tinā o loʻu tinā. E tele taimi e fasi faamoʻamoʻa ai aʻu e le vaegaau, ona e masalosalo ou te auai i le vaega fouvale e taʻua o le New People’s Army (NPA). O lea na ou filifili ai loa e ʻau i le ʻaufouvale. E lima tausaga o matou nonofo ma fitafita NPA i atumauga, ma sa faigatā le olaga. E lē tasi se mea e matou te nonofo ai. Na oo mai loʻu fiu e ola fesolasolataʻi i atumauga, ma ou siilima ai loa i le kovana o le nuu o Ilocos Norte. Na ia faia lelei aʻu ma fesoasoani mai ia maua saʻu galuega lelei, ae e leʻi suia ai laʻu masani o le talepe fale ma faamataʻu tagata.

SUIA E LE TUSI PAIA LOʻU OLAGA:Sa ma faigaluega faatasi ma se fafine Molimau a Ieova e igoa iā Loida. O ia na ma feiloaʻi ai ma Jovencio, ma na ia faia laʻu suʻesuʻega faale-Tusi Paia. Ae na tumau pea laʻu amio tuai. E masani ona ula laʻu tapaa ae leʻi alu atu Jovencio e fai laʻu suʻesuʻega, ma e leʻi tuua foʻi aʻu faiga solitulafono. Na iʻu ina maua aʻu e leoleo, ma e 11 masina na ou falepuipui ai. I lenā taimi, sa ou talosaga atu iā Ieova e fesoasoani mai, ma ia faamagalo aʻu. Na ou ōle atu foʻi ia taʻitaʻia ma faamalosia aʻu e lona agaga paia.

Mulimuli ane, na asia aʻu e se Molimau a Ieova i le falepuipui, ma aumai saʻu Tusi Paia. Na ou faitau i ai ma iloa ai, e alofa mutimutivale Ieova, ma e na te faamagaloina agasala, o lea, ua ou maua ai le avanoa e aʻoaʻo ai e faatatau i ona ala. Na ou ʻaiʻoi atu iā te ia e fesoasoani mai ina ia tuu aʻu masaniga leaga. Na aogā iā te aʻu mea na ou faitau ai i le Faataoto 27:11. Na ou manatu i lenā mau e  peiseaʻī o loo talanoa saʻo mai Ieova iā te aʻu, ona o loo faapea mai: “Loʻu atalii e, ia atamai oe ma faafiafia loʻu loto, ona ou mautali ai lea i lē o loo taufaifai mai.”

Ina ua ou magalo mai i le falepuipui, na toe faaauau laʻu suʻesuʻega ma Molimau a Ieova, ma auai i sauniga, ma faatatau taʻiala o le Tusi Paia i loʻu olaga. Na iʻu ina mafai ona tuu aʻu masaniga leaga ona o le fesoasoani a Ieova. O lea, na tuuina atu ai loa loʻu ola iā te ia.

AOGĀ IĀ TE AʻU:E ui sa leaga loʻu olaga, a o lea ua ou fiafia. E ui sa fai aʻu ma pologa i masaniga leaga, a o lenei ua avea ma tagata fou. (Kolose 3:9, 10) Ua ou maua nei le faaeaga o le aufaatasi ma tagata mamā o Ieova, ma fesoasoani i isi ia iloa lo tatou Atua o Ieova, o Lē e ona le malosi uma lava.

“Sa ou manaʻo e avea aʻu ma sui o Pasili.”—JULIANA APARECIDA SANTANA ESCUDEIRO

TAUSAGA: 31

ATUNUU: PASILI

TALAAGA: TOMAI I LE TAE KWON DO

OLAGA SA IAI:Na ou ola aʻe i le nuu o Londrina. E ui ina matitiva le toʻatele o lo matou nuu, ae sa filemu ma mamā. I le sefulu o oʻu tausaga, na fai mai ai loʻu tuagane e matua iā te aʻu, e ma te ō i le tae kwon do, o se taaloga faa-Korea e tai pei o le karate. E leʻi manaʻo loʻu tamā ou te alu ai, ae na tuu lava aʻu e fai le mea ou te loto i ai.

Sa ou toleni malosi, ma e tele tauvaga o le tae kwon do na ou siamupini ai i le setete o Parana. Mulimuli ane, na ou siamupini i lo matou atunuu, ma i le 1993, na ou siamupini ai i Pasili atoa. Sa ou fia tauvā i siamupini faavaomalo, ae e matitiva si oʻu aiga ma e latou te lē gafatia loʻu auai atu i tauvaga i fafo.

Na ou talotalo ia faia le tae kwon do i taaloga o le Olimepeka, ma o le mea lenā na tupu. Sa ou manaʻo e avea aʻu ma sui o Pasili i Taaloga o le Olimepeka, o lea na ou toleni malosi ai ma maua le lagolagosua a nisi e faatupe ai aʻu taumafaiga. Na mafai ai foʻi ona ou tauvā i Falani, Vietiname, Korea i Saute, Iapani, ma Taaloga a Amerika i Saute. Na sosoo ai ma loʻu tauvā i le Pan American Games, ma o le lelei o laʻu taalo, na tofia ai aʻu o se tasi o tagata e toʻatolu e tauvā i taaloga i Santo Domingo, i le Dominican Republic i le 2003.

SUIA E LE TUSI PAIA LOʻU OLAGA:I le 2001, na matou feiloaʻi ai ma Molimau a Ieova, ma na faia ai la ma suʻesuʻega faale-Tusi Paia ma laʻu uō tama. I le taimi muamua, ou te leʻi naunau tele i ai, ona sa tele ina ou lē lavā, ma ou te tautulemoe a o faia le suʻesuʻega. Ae sa pāʻia loʻu loto i mea na ou aʻoaʻoina, ma na manino lea tulaga i le mea na tupu i se tauvaga tele na ou auai.

Ona o lea ua filifilia aʻu i le ʻau e tauvā i le Pan American Games, sa mananaʻo ai taʻitaʻi o le tae kwon do, ou te sauni e tauvā muamua i se isi tauvaga. Ina ua oo i le taimi ou te  taalo ai, sa ou tū poupou, ua ou lē fia taalo. Na teʻi lava ua ou manatua i lea taimi, e lē tatau ona fufusu Kerisiano ma isi, e tusa lava po o se taaloga! Na ou manatua ai le poloaʻiga i le Tusi Paia, ia “e alofa atu i lou tuaoi e pei o oe lava iā te oe.” (Mataio 19:19) Na ou liliu ma savali ese ou te leʻi toe fia taalo, a ua na o le sioa mai o le aofia, e lē talitonu i le mea ua tupu.

Ina ua ou foʻi i le fale, sa ou nofo ma mafaufau i le mea o le a fai i loʻu olaga. Na ou tago atu i le polosiua a Molimau a Ieova, o loo faamatala ai mea e manaʻomia e le Atua mai iā i tatou. Na ou tau ai i se faamatalaga i le Salamo 11:5, o loo faapea mai e faatatau iā Ieova: “E inosia lava e Ia le tagata e fiafia i le faasauā.” Na tau tonu na upu i loʻu mafaufau ma ou filifili ai loa e tuu le tae kwon do.

Sa lē fiafia taʻitaʻi o le tae kwon do. Sa taumafai e toe sui loʻu mafaufau i le fai mai, o aʻu lava e sili i le atunuu i lea taaloga, ma o lea ua lata ina ou tauvā i le Olimepeka. Ae e leʻi suia ai laʻu faaiʻuga.

O le taimi lea ua uma ona ma faaipoipo ma laʻu uō, ma ua auai o ia i le galuega talaʻi a Molimau. E foʻi mai i le talaʻiga ma lona fiafia tele, ma faamatala mai a latou talanoaga ma tagata. Na ou iloa e tatau ona sui loʻu olaga, pe a ou fia maua le faaeaga o le auai i le talaʻiga. Na ave laʻu tusi faamavae i le lotu sa ou iai muamua, ma mulimuli ane, ua ou agavaa ai e papatiso o se Molimau.

AOGĀ IĀ TE AʻU:Ua matuā fiafia ma autasi lo ma aiga ma laʻu tane, ona e ma te taumafai e faatatau taʻiala o le Tusi Paia i la ma faaipoipoga. Ou te fiafia e lagolago laʻu tane a o faatino ona tiute i le tausia o la matou faapotopotoga. Sa ono mafai ona ou tauivi pea ia maua saʻu pine auro ma lauiloa ai aʻu. Ae ua ou mautinoa, e leai se mea e ofo mai e lenei lalolagi e tutusa ma le faaeaga o le auauna iā Ieova le Atua.

‘Na faamoemoe pea loʻu tamā ia suia loʻu olaga.’—INGO ZIMMERMANN

TAUSAGA: 44

ATUNUU: SIAMANI

TALAAGA: SIKULATĪ I SE FALESIVA

OLAGA SA IAI:Na ou ola aʻe i Gelsenkirchen, o se taulaga e eli ai le koale, ma e eseese tapuaʻiga a oʻu mātua. O loʻu tamā e Molimau a Ieova. Ae sa tetee loʻu tinā i ana taumafaiga e aʻoaʻo i matou le fanau i ona talitonuga. E faigaluega o ia o se aveloli i le sefulu itula i le aso, pe sili atu foʻi. E usu i le lua po o le tolu i le vaveao i le galuega, ae e toʻaga foʻi e aʻoaʻo i matou e uiga i le Atua. Peitaʻi, ou te leʻi talisapaia ana taumafaiga.

I le 15 o oʻu tausaga, na ou lē toe fia alu ai i sauniga na ave i ai aʻu e loʻu tamā. I le tausaga na sosoo ai, sa ou auai i se kalapu fusu. O tausaga e lua na sosoo ai, sa ou faia ai mea na lē fiafia ai loʻu tamā, ma ua ou salamō ai. I le 18 o oʻu tausaga na ou tuua ai loa lo matou aiga.

Sa ou fiafia tele i taaloga, ma e faaono ona ou toleni i le vaiaso i fusuaga ma le siisii mea mamafa. I faaiʻuga o vaiaso, e matou te ō ai  ma aʻu uō i falesiva. I se tasi aso, na ma fufusu ai ma se alii faamisa, ae o le mea fua lava si alii iā te aʻu. Sa iloa mai e lē e ona le falesiva ma manaʻo loa ou te faigaluega o se sikulatī i lona falesiva. Na ala ona ou faigaluega ai, ona e lelei le totogi.

I faaiʻuga o vaiaso, ou te tū ai i le faitotoʻa o le falesiva, ma vaai po o ai e taga ona alu i totonu ae po o ai foʻi e lē faatagaina. E pisi tele laʻu galuega ona e oo i le 1,000 tagata e ō mai i le fale kalapu. E tele ai foʻi ma le tauaʻimisa, ma e faamataʻu ai aʻu e tagata i fana ma atigifagu taʻei. O nisi o tagata ou te lē faatagaina pe tutuliese, e faatalitali mai i fafo e fia faaoolima iā te aʻu. O le taimi lenā faatoʻā 20 oʻu tausaga, ma sa ou manatu, ou te mafaia mea uma. Auā na tumu aʻu i le faasausili, fiapoto, fia toa, ma le faauamaaa.

SUIA E LE TUSI PAIA LOʻU OLAGA:Na tumau pea le faamoemoe o loʻu tamā ia suia loʻu olaga. Sa ia lafo mai Olomatamata ma Ala Mai! * i le mea sa ou nofo ai. Ae na faaputuputu i loʻu potu ou te leʻi faitauina. I se tasi aso, na ou matamata ai i nisi o mekasini. O mataupu na ou faitau ai e faatatau i suiga o le a iai i faiga faapolotiki, tamaoaiga, ma lotu, na ou vili ai loa i loʻu tuafafine ma lona toʻalua e Molimau a Ieova. Na ou talia la la ofo e matou te suʻesuʻe faatasi i le Tusi Paia.

O le mataupu silisili o loo i le Kalatia 6:7, na uunaʻia ai aʻu e suia loʻu olaga. Na ou iloa mai i mea na tutupu, o aʻu gaoioiga, upu, ma filifiliga e faia i le taimi nei, e aafia ai loʻu lumanaʻi. Na faalaeiauina foʻi aʻu i le valaaulia o loo i le Isaia 1:18, e faapea: “Ua fetalai mai Ieova: ‘Inā ō mai ia outou, seʻi o tatou talanoa faatasi, ina ia faaleleia la outou faiā ma aʻu. E ui lava ina e pei o le ʻie mūmū sesega a outou agasala, ae o le a paʻepaʻe e pei o le kiona.’” Na aogā lenā mau iā te aʻu ou te suʻesuʻe ai, ma tuu ese ai faalogona e faapea, ou te lē aogā ma e lē mafai ona ou toe foʻi iā Ieova.

E ui ina faigatā, ae e leʻi atoa le ono masina a ua suia loʻu olaga. Sa ou lafoaʻia le olaga leaga ma aʻu uō lē lelei sa iai, ma sa ou faamatala i aʻu uō, o lea ua ou suʻesuʻe le Tusi Paia, ma faamatala i ai mea na ou aʻoaʻoina. Na ʻaloʻalo mamao i latou mai iā te aʻu ma faaigoa aʻu o le patele. Na fesoasoani loʻu tuafafine e suʻe se isi aʻu galuega lelei.

Na amata foʻi ona ou auai i sauniga i le Maota mo Sauniga lea e ō i ai loʻu tuafafine ma lona toʻalua, e ui e 19 maila (30 km) le mamao. E iai le Maota mo Sauniga e lata i loʻu fale, ae ou te mā e feiloaʻi i tagata na ou masani ai a o ou laʻitiiti. Ou te matamuli foʻi e talaʻi i le vaipanoa sa ou nofo ai. Sa ou popole neʻi ma fetaui ma se isi na ou tuliesea mai i le falesiva, po o se isi na ou ave i ai fualaau faasāina. Ae sa ou faatatauina se lesona na ou aʻoaʻoina a o ou toleni mo fusuaga e faapea, o mea e sili ona faigatā, o mea na e tatau ona fai. O lea, ina ua ou agavaa e talaʻi, sa ou talaʻi loa i le tele na mafai ai.

O se isi foʻi luʻi sa ma feagai, o loʻu lē fiafia lea e faitau pe suʻesuʻe. Ae na ou iloa, afai ou te manaʻo ia malosi loʻu faatuatua, e tatau ona ou faamasani e suʻesuʻe loloto i upu moni o le Tusi Paia. Na ou iloa e tutusa lava le suʻesuʻe ma le siisii mea mamafa, e manaʻomia ona fai se taumafaiga ina ia malosi ai.

AOGĀ IĀ TE AʻU:O se isi aogā o le suia o loʻu olaga, ona o loo ou ola pea! E manaʻomia pea ona ou pulea aʻu lava, ia ou lē toe foʻi i uiga tuai. Ae ua fiafia lo ma aiga ma si aʻu avā, o sē e ese le manaia o ona uiga faa-Kerisiano. Ua ou maua uō moni i Molimau a Ieova, ma ou te talitonu atoatoa iā i latou. Ua lima nei tausaga talu ona maliu si oʻu tamā, ae muamua atu, na fiafia o ia ina ua ou toe foʻi mai i le upu moni.

[Faaopoopoga i lalo]