Faamāfanafana i Ē Faavauvau, e Pei Ona Faia e Iesu

NA MAʻI tigāina Lasalo, o sē e sau mai i Petania. Na auina atu e ona tuafāfine o Mareta ma Maria ni avefeʻau i la latou uō pele o Iesu. Peitaʻi na oti Lasalo ona o lona maʻi. A o taoto i le tuugamau, na asiasi atu uō ma tuaoi iā Mareta ma Maria “e faamāfanafana” iā i laʻua. (Ioane 11:19) Ua taunuu Iesu i Petania ma ua alu atu e vaai ana uō pele. O le iloiloina o ana fetalaiga ma mea na ia faia, e tatou te aʻoaʻoina ai auala e faamāfanafana ai i ē faavauvau.

E Tāua Lou Faatasi Atu

E lua aso na malaga ai Iesu i Petania, e sopoʻia le vaitafe o Ioritana ma aʻeaʻe atu i auala fepiʻopiʻoaʻi mai i Ieriko. Ua alu atu vave Mareta e faafeiloaʻi Iesu i le faatausiʻusiʻuga o le nuu. Mulimuli ane, ina ua faalogo Maria ua sau Iesu, sa televave atu foʻi e faafeiloaʻi iā te ia. (Ioane 10:40-42; 11:6, 17-20, 28, 29) O le faatasi atu o Iesu e mautinoa o se matuā faamāfanafanaga i lenei ʻauso e toʻalua.

 I aso foʻi nei, e faamāfanafanaina ē o loo faavauvau i lo tatou faatasi atu. Ua faapea mai Scott ma Lydia, o ē na oti i se faalavelave faafuaseʻi la la tama tama e ono tausaga o Theo: “Na ma mananaʻo i o ma aiga ma uō e faatasi ma i maʻua. Na latou ō mai saʻo i le falemaʻi i le leva o le pō.” O ā ni a latou tala na fai atu? “E ma te leʻi tau manaʻomia ni tala. Ua lava lo latou faatasi mai e iloa ai lo latou manatu mai.”

Ua taʻua i le Tusi Paia ina ua silasila atu Iesu o loo fetagisi tagata ona ua oti Lasalo, na “ootia lona finagalo” ma “tagi.” (Ioane 11:33-35, 38) E leʻi manatu Iesu o se luma pe a tagi se tamāloa i luma o isi. Na silafia e ia lo latou tigā ma faalogona i le maliu o sē e pele. O le ā se lesona mo i tatou? Pe a asiasi atu i ē o loo faavauvau, e lē tatau ona tatou matamumuli e fetagisi ma ē o loo fetagisi. (Roma 12:15) Ae aua foʻi e te taumafai e faatagi lē o loo faavauvau. E mananaʻo nisi e fetagisi pe a na o i latou.

Ia Faalogologo ma le Alofa

Atonu sa nofosauni Iesu e fai atu ni upu faamāfanafana iā Mareta ma Maria, ae na ia tuu atu iā i laʻua e talanoa muamua mai. (Ioane 11:20, 21, 32) Ina ua la talanoa ma Mareta, na ia fai atu se fesili ma faalogo atu.—Ioane 11:25-27.

E faaalia lou naunau moni e ala i le faalogologo lelei. Ina ia faamāfanafana i ē o loo faavauvau, e ao ona tatou faalogologo lelei. E iloa le faalogologo lelei i le fai atu o ni fesili, e mafai ai e ē o loo faavauvau ona faailoa mai o latou lagona. Peitaʻi, ia faaeteete, aua e te faamalosia i latou e talanoa mai pe afai e lē o fia talanoa. Atonu ua lē lavavā ma fia mālōlō.

E ono matuā vaivai ē o loo faanoanoa, ma toe taʻua mea ua uma ona taʻua. O isi e faailoa mai o latou lagona lē fiafia. Na faapea uma atu Maria ma Mareta iā Iesu: “Le Alii e, ana e iai i inei, semanū e lē oti loʻu tuagane.” (Ioane 11:21, 32) O le ā na faia e Iesu? Sa faalogologo ma le onosaʻi ma le alofa. E na te leʻi taʻuina atu iā i laʻua o la lagona e tatau ona iai. E lē taumatea na silafia e Iesu e ono tutupu aʻe ni lagona malolosi ma tigā.

Pe afai e te lē o mautinoa se tala e fai atu pe a asiasi atu i ē o loo faavauvau, e te ono faapea atu, “O le ā le mea ua tupu?” Ona e matuā uaʻi atu lea i le tali. Ia faalogologo lelei. Ia vaai saʻo atu i le tagata ma taumafai e malamalama i ona faalogona.

E lē faigofie ona iloa faalogona o tagata faavauvau. Ua fai mai Lydia: “Na fesuisuiaʻi o ma lagona. O nisi taimi sa na ona ma fetagisi ina ua asiasi mai tagata. Sa ma mananaʻo i isi ia faalaeiau mai iā i maʻua. Sa matuā taumafai a ma uō e malamalama i o ma faalogona.”

Sa lelei ona faia faapea e Iesu. Na ia silafia e tofu le tagata ma “lona lava malaia ma lona tigā.” (2 Nofoaiga a Tupu 6:29) Na eseese tali na avatu e Iesu i faafeiloaʻiga a le ʻauso e toʻalua. Sa talanoa pea Mareta, o lea sa talanoa atu ai foʻi Iesu. Ae e leʻi umi ona talanoa Iesu iā Maria ona na tagi. (Ioane 11:20-28, 32-35) O le ā se lesona mai i lana faaaʻoaʻoga? Atonu e sili ona lelei pe a tuu atu i lē o loo faavauvau e na te taʻitaʻia le talanoaga. Pe a e faalogologo  atu a o faailoa mai o latou lagona faavauvau, e ono matuā faamāfanafanaina ai i latou.

Upu e Mālōlō Ai

E leʻi faitioina e Iesu Maria ma Mareta pe lē fiafia iā i laʻua ina ua la fai mai: “Ana e iai i inei.” Na faamāfanafana atu Iesu iā Mareta: “O le a toetū lou tuagane.” (Ioane 11:23) O na fetalaiga a Iesu na fesoasoani iā Mareta e taulaʻi atu ai i le lumanaʻi, ma faamanatu atu ai iā te ia e iai le faamoemoe.

Pe a talanoa atu i ē o loo faavauvau, ia manatua e telē se aafiaga o ni nai faaupuga faamaoni ma faalaeiau. E mafai ona fai atu pe tusia i lalo ni upu faamāfanafana. Talu ai e mafai ona faitau ma toe faitau tusi, e umi la se taimi e faamāfanafanaina ai mai i na tusi. Ina ua mavae le iva masina talu ona maliu le tane a Kath, o Bob, na ia toe faitauina tusi uma na ia mauaina. Na fai mai o ia: “Na ou iloa ua matuā fesoasoani na tusi iā te aʻu. O le taimi lenā na faamāfanafanaina ai aʻu.”

O ā ni mea e te ono taʻua i se tusi faamāfanafana? E mafai ona e tusi e faatatau i lē ua maliu, o se mea na tupu iā te oulua, po o sona uiga e te fiafia i ai. Ua fai mai Kath: “O faamatalaga mananaia e uiga iā Bob ma ona uiga, na ou ata toe tagi ai. O tala mālie e uiga iā te ia na ou ataata ai, ma ou manatua ai taimi na ma fiafia faatasi ai. O le tele o tusi ia e matuā pele iā te aʻu, sa tusia ai ni mau mai i le Tusi Paia.”

Avatu se Fesoasoani Aogā

Ina ia fesoasoani i le aiga o Lasalo, na faia e Iesu se mea e lē mafai ona tatou faia. Na ia toe faatūina Lasalo mai i le oti. (Ioane 11:43, 44) Ae e iai mea aogā e mafai ona tatou faia, e pei o le saunia o se meaʻai, ofo atu e nonofo i lou fale tagata e asiasi mai, fai le tagamea, vaai le fanau, fai faatau pe faaaogā foʻi lau taavale e feoaʻi ai. E mautinoa e matuā talisapaia e ē o loo faavauvau ni gaoioiga alofa.

E ono mananaʻo foʻi ē o loo faavauvau ia iai se taimi e na o i latou ai. Ae e mafai lava ona e tausolomua e fesootaʻi atu iā i latou. Ua fai mai se tinā faavauvau: “E leai se aso maʻoti e teʻa ai le faavauvau, po o se aso e toe fiafia ai.” E taumafai nisi e manatua ē o loo faavauvau i ni aso tāua, e pei o le aso na faaipoipo ai pe maliu ai lē e pele. Pe a e faaavanoa atu oe i na taimi, o le a avea oe ma aumea e tāua tele i taimi o faigatā.—Faataoto 17:17.

Na aofia ai i le faamāfanafanaga a Iesu le faamoemoe lea na ia taʻu atu i ona soo: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.” (Ioane 11:11) Na faamautinoa atu e Iesu i ona soo o le a toetutū mai ē ua maliliu. Na fesili atu o ia iā Mareta: “Pe e te talitonu i lenei mea?” Na tali mai Mareta: “Ioe, le Alii e.”—Ioane 11:24-27.

Pe e te talitonu o le a toe faatutū e Iesu ē ua maliliu? Pe afai o lea, faamatala atu lenei faamoemoe matagofie i ē o loo faavauvau. Avatu iā i latou ni fesoasoani aogā. O le a faamāfanafanaina i latou i au upu ma gaoioiga.—1 Ioane 3:18.

[Faafanua i le itulau 9]

(Tagaʻi i le lomiga mo le ata atoa)

SAMARIA

PEREA

Ieriko

Ierusalema

Petania

Vaitafe o Ioritana

Sami Oona