Auala e 4

Filifili Lelei Au Uō

O LE Ā LE AʻOAʻOGA A LE TUSI PAIA? “O lē e savali ma tagata atamamai, e atamai ai o ia.”—Faataoto 13:20.

AISEĀ E FAIGATĀ AI? O a tatou uō o le a tumau ai pe aveesea ai foʻi lo tatou lotomalie. E mafai e o latou uiga ma a latou talanoaga ona aafia ai lo tatou manatu i le olaga.—1 Korinito 15:33.

O se faataʻitaʻiga, manatu i le tala i le Tusi Paia i tamāloloa e toʻa 12, na toe foʻi mai i se malaga na alu i Kanana. O le toʻatele o i latou na “faamatala mai pea tala leaga i le fanauga a Isaraelu e uiga i le atunuu na latou ō atu faalilolilo e mataʻi.” Peitaʻi, na taʻu atu e ni tane se toʻalua tala lelei e uiga i le atunuu o Kanana, ma na la taʻua “e matuā lelei lava.” Ae na aafia le nuu atoa i uiga lē lelei o tamāloloa e toʻa sefulu. Ua taʻua i le tala: “Ona alalaga lea o le faapotopotoga uma . . . ua muimui le fanauga a Isaraelu uma.”—Numera 13:30–14:9.

I aso foʻi nei, e toʻatele tagata ua “muimui ma faitio i o latou lava olaga.” (Iuta 16) E faigatā tele ona lotomalie pea pe afai e faauō i tagata e matuā lē faamalieina.

O LE Ā E TE FAIA? Manatu i a outou talanoaga ma au uō. Pe e masani ona gugutu mai au uō e uiga i mea ua latou maua, pe e tomumumu lava e uiga i mea e latou te lē o maua? Ae o le ā le ituaiga uō e iai oe? Pe e te taumafai e fai se mea e lotoleaga ai au uō iā te oe, pe e te faalaeiau ia lotomalilie i mea ua latou maua?

Manatu iā Tavita o lē na filifilia e avea ma tupu, ma Ionatana le atalii o le tupu o Saulo. Sa fesolasolataʻi Tavita i le toafa. Sa popole le tupu o Saulo ina neʻi fai Tavita ma tupu e sui iā te ia, ma na manaʻo ia oti Tavita. E ui sa mafai ona avea Ionatana ma tupu e sosoo ai, ae sa fai o ia ma uō vavalalata a Tavita. Sa iloa e Ionatana ua tofia e le Atua Tavita e fai ma tupu e sosoo ai, ma sa lotomalie e lagolagoina lana uō.—1 Samuelu 19:1, 2; 20:30-33; 23:14-18.

E tatau ona iai ni au uō faapena, o ē e taumafai ia lotomalilie ma mananaʻo e fai le mea e sili ona lelei mo oe. (Faataoto 17:17) Ae ina ia maua ni uō faapena, e tatau foʻi ona e faaalia na uiga.—Filipi 2:3, 4.

[Ata i le itulau 7]

Po o faatumauina pe aveesea e au uō lou lotomalie?