Auala 1

Naunau i Tagata, Ae e Lē o Tupe ma ʻOa

O LE Ā LE AʻOAʻOGA A LE TUSI PAIA? “O le manaʻo tele i tupe o le pogai lea o mea leaga eseese uma.”—1 Timoteo 6:10.

AISEĀ E FAIGATĀ AI? Ua uunaʻia e le ʻaufaifaasalalauga i tatou ia lē lotomalilie i mea ua maua. Ua latou mananaʻo ia tatou galulue i taimi uma ina ia maua ni tupe, ona faatau ai lea o mea fou ma lelei. O le tupe e taufaaʻoleʻole ma e faigofie ona tatou naunau i ai. Ae ua lapataʻia i le Tusi Paia, o le tagata e fia mauʻoa e lē taitai ona faamalieina. Na tusi le tupu o Solomona: “O lē e fiafia i siliva, e lē faamalieina i siliva, o lē e fiafia i le ʻoa e lē faamalieina i ana tupe maua.”—Failauga 5:10.

O LE Ā E TE FAIA? Ia faaaʻoaʻo iā Iesu ma naunau i tagata ae e lē o meafaitino. Na lotomalie Iesu e lafoaʻia mea uma na ia maua, e oo lava i lona soifua, ona sa alofa i tagata. (Ioane 15:13) Na fetalai o ia: “E sili le fiafia e maua i le foaʻi atu i lo o le talia mai.” (Galuega 20:35) Pe a fai ma a tatou masani le ofo atu o o tatou taimi ma alāmanuia mo isi, o le a tali mai foʻi faapena tagata. Na fetalai Iesu: “Ia outou foaʻi atu pea, ona foaʻi mai lea o tagata iā te outou.” (Luka 6:38) O ē ua pupū atu i le saʻilia o tupe ma ʻoa, ua feagai ma tigā ma mafatiaga. (1 Timoteo 6:9, 10) Ae e maua le faamalieina moni i le alofa atu ma le alofagia.

Aiseā e lē toe iloilo ai pe mafai ona faafaigofie lou olaga? Pe mafai ona faaitiitia au meatotino po o mea e te manaʻo e faatau? Pe a faia faapea, e te iloa ai ua lava lou taimi ma le malosi e fai ai mea e sili ona tāua i le olaga, o le fesoasoani atu lea i tagata ma auauna i le Atua, o lē na foaʻiina mai mea uma ua e maua.—Mataio 6:24; Galuega 17:28.

[Ata i le itulau 4]

“Ia outou foaʻi atu pea, ona foaʻi mai lea o tagata iā te outou”