Ia Mafuta Atu i le Atua

“Ona E Maua Lea o Ia”

1 NOFOAIGA A TUPU 28:9

PE E te iloa le Atua? E lē faigofie ona tali lenā fesili. O le iloa moni o le Atua, e aofia ai le iloa lelei o lona finagalo ma ona ala. Ona mafai lea ona tatou atiaʻe se faiā māfana ma ia ma taaʻina ai o tatou olaga atoa. Pe e mafai ona māfana atu se tasi i le Atua? Afai e mafai, e faapefea? E maua le tali i le fautuaga a le tupu o Tavita i lona atalii o Solomona i le 1 Nofoaiga a Tupu 28:9.

Seʻi faaata i lou mafaufau le mea o loo tupu. Ua toeitiiti atoa le 40 tausaga o nofotupu Tavita i Isaraelu, ma o lana pulega na manuia ai le nuu. E talavou lava Solomona, ma e lē o toe umi ona soloaʻi ane lea o ia i le nofoālii. (1 Nofoaiga a Tupu 29:1) O le ā le fautuaga mulimuli a Tavita i lona atalii?

O mea e tele na oo i le auaunaga a Tavita i le Atua na ia faapea atu ai: “Solomona e, loʻu atalii, ia e iloa le Atua o lou tamā.” E mautinoa e loloto atu le uiga o upu a Tavita i lo o le upu iloa, ona o loo tapuaʻi Solomona iā Ieova le Atua o loo tapuaʻi i ai lona tamā. I lea vaitaimi, e tusa ma le tasi vaetolu o tusi o le Tusi Paia Eperu ua uma ona tusia, ma e mautinoa na iloa e Solomona mea ua tusia ai e faatatau i le Atua. Na fai mai se tagata tomai i le uiga o le upu Eperu “iloa,” e mafai foʻi ona uiga “i se uō e sili ona māfana.” Ioe, na manaʻo Tavita ia atiaʻe e lona atalii se faiā māfana ma le Atua, e pei o lana faiā ma le Atua.

O le a taʻitaʻia e lea faiā māfana manatu o Solomona ma le auala e ola ai. Na timaʻi atu Tavita i lona atalii: “Ia auauna atu iā te ia ma le lotoatoa ma le lotofiafia.” Mātau mai, na muamua ona faatonuina Solomona ia iloa le Atua, ona faatoʻā faatonu ai lea e auauna iā te Ia, auā o le iloa lelei o le Atua e uunaʻia ai o ia e auauna iā te Ia. E lē tatau ona auauna ma le faalotolotolua iā te ia. (Salamo 12:2; 119:113) Ae ua augani atu Tavita i lona atalii, ia auauna ma le lotoatoa ma le lotofiafia i le Atua.

Aiseā na fautua atu ai Tavita i lona atalii, ia saʻo le uunaʻiga o le loto e tapuaʻi ai? Ua ia faamatala mai: “Auā e suʻesuʻe e Ieova loto uma lava, e silafia foʻi e ia o mafaufauga ma faanaunauga uma.” E lē talia e le Atua le auaunaga a Solomona pe afai e faia ona o lona tamā, auā o loo saʻili le Atua i ē e auauna ma le lotoatoa iā te Ia.

Faamata e mulimuli Solomona i le faaaʻoaʻoga a lona tamā ma faalatalata atu iā Ieova? O le filifiliga lenā e fitoitonu iā Solomona. Ae na faapea atu Tavita i lona atalii: “Afai e te saʻili iā te ia, ona e maua lea o ia; ae afai e te tuua o ia, ona tuulafoaʻi lea o oe e ia e faavavau.” Ina ia avea o sē e tapuaʻi le Atua ma faalatalata atu iā te ia, sa tatau iā Solomona ona taumafai malosi ia iloa lelei Ieova. *

O fautuaga faatamā a Tavita, ua faamautinoa mai ai e finagalo Ieova ia tatou faalatalata atu iā te ia. Ae ina ia māfana atu iā te ia, e manaʻomia ona tatou “saʻili iā te ia,” i le suʻesuʻe loloto i lana Afioga ma ia iloa lelei o ia. O lea, e uunaʻia ai i tatou e auauna iā te ia ma le lotoatoa ma le lotofiafia. O le finagalo lenā o Ieova, ma o le mea foʻi lenā e tatau ona faia e ona tagata mo Ia.—Mataio 22:37.

[Faaopoopoga i lalo]