Pe e Alofa Moni le Atua iā te Oe?

PE E alofagia oe? Pe e te manatu i nisi taimi e leai se isi e alofa iā te oe? Talu ai e pisi tele tagata e saʻilia a latou lava mea, e faigofie ai lava ona e manatu e te faatauvaa ma e leai sou aogā. Ua moni ai le Tusi Paia e uiga i o tatou aso, ua leai se alofa i tagata ona ua manatu mo lo latou lava lelei.—2 Timoteo 3:1, 2.

Ua iai i tagata uma lava le faanaunauga e alofa ma ia alofagia, e tusa po o le ā le matua, aganuu, gagana po o le lanu. E tusa ai ma ni lipoti, ua faia faapitoa o tatou tino ina ia lagona le alofa ma le faapelepeleina. E sili atu ona silafia e Ieova le Atua, o lē na faia i tatou, lo tatou faanaunauga ia alofagia ma talisapaia. O le ā sou lagona pe a Ia fetalai mai e tāua oe iā te ia? E mautinoa o se faalauiloaga sili e te mauaina. Pe e moni e fiafia Ieova i tagata faimea sesē? Pe e naunau mai o ia i loʻu nei tagata? Afai o lea, o le ā e faia e se tagata ina ia alofagia ai e le Atua?

E Alofa Mai Ieova

O le 3,000 tausaga ua mavae, na faatumulia ai i le mataʻu se faisalamo sa tapuaʻi i le Atua, ina ua ia vaaia le matagofie o fetu i le pō. E leʻi masalosalo o ia i le mamalu lē mafaatusalia o Lē na faia nei fetu e lē mafaitaulia. Na manatunatu o ia i le silisili ese o Ieova ma le faatauvaa o le tagata, ma faaalia ai lona maofa tele ona o le alofa mai o Ieova: “Ina ua ou vaai atu i lou lagi, o galuega a ou tamatamaʻilima, o le masina ma fetu na e saunia, o ai ea le tagata faatauvaa ua e manatu mai i ai, ma le atalii o le tagata ua e tausia ai o ia?” (Salamo 8:3, 4) E faigofie lava ona manatu e mamao ese Lē Silisili Ese ma e tele naʻuā ana galuega, o lea e lē manatu mai ai i tagata faimea sesē. Peitaʻi, na iloa e le faisalamo e ui ina faatauvaa le tagata ma puupuu lona olaga, ae e tāua o ia i le Atua.

Sa faamautinoa mai foʻi e se isi faisalamo: “E fiafia Ieova iā i latou e matataʻu iā te ia, o i latou e faatalitali atu i lona alofa faamaoni.” (Salamo 147:11) E manaia tele manatu o nei salamo e lua. E ui lava i le tulaga maualuga o Ieova, e lē  faapea ai e na ona ia silafia mai o tagata, ae e na te ‘tausia foʻi i latou’ ma ‘fiafia iā i latou.’

Ua faamaonia atili lenei manatu i se valoaga a le Tusi Paia ua faamatalaina ai mea o loo tutupu i o tatou aso. E ala mai i le perofeta o Hakai, na faailoa mai ai e Ieova o le a talaʻia le tala lelei o le Malo o le Atua i le lalolagi aoao. O ā iʻuga? O se tasi nei o iʻuga: “Ona ō mai ai lea o mea ua manaʻomia mai i atunuu uma; ou te faatumuina lenei fale i le mamalu.”—Hakai 2:7.

O “mea ua manaʻomia” lea ua aoaoina mai i atunuu uma, e lē o ni ʻoa faaletino. (Hakai 2:8) E lē o siliva ma auro e faafiafiaina ai le finagalo o Ieova. Ae e fiafia o ia i tagata o loo tapuaʻi atu ona o le alofa, e ui lava ina latou sesē i nisi taimi. (Faataoto 27:11) O i latou ia o “mea ua manaʻomia” o loo faamamaluina le Atua, ma e pele iā te ia la latou tapuaʻiga ma le auaunaga maelega. Po o oe o se tasi o i latou na?

Atonu e faigatā ona talitonuina le manatu e faapea, e manaʻomia e Lē na Faia le aoao o mea ia tagata faimea sesē. Ua uunaʻia i tatou e lenei mea moni, e talia le valaau māfana mai i le Atua, ia mafuta vavalalata atu iā te ia.—Isaia 55:6; Iakopo 4:8.

“O Oe o Sē ua Faapelepeleina”

Ina ua afu le soifua o le perofeta o Tanielu, e mataʻina se mea na tupu iā te ia i se afiafipō. A o tatalo, na taunuu faafuaseʻi se mālō faaaloalogia. O lona igoa o Kaperielu, ma sa iloa e Tanielu o ia o se agelu a Ieova ona sa la feiloaʻi muamua. Na taʻua e Kaperielu le māfuaaga o lana asiasiga: “Tanielu e, ua ou sau e aʻoaʻo oe ina ia mafai ona e maua le tofā mamao ma le malamalama . . . auā o oe o sē ua faapelepeleina.”—Tanielu 9:21-23.

I se tasi aso, na faapea mai se agelu a Ieova: “Tanielu e, o oe o le tagata ua faapelepeleina.” Ina ia faamalosia Tanielu, na toe faapea mai le agelu: “Le tagata faapelepeleina e, aua e te fefe. Ia iā te oe le filemu.” (Tanielu 10:11, 19) E faatolu ona taʻua Tanielu o sē ua “faapelepeleina.” E uiga atu foʻi lenei faaupuga i le “matuā alofagia” po o le “matuā aloaʻia.”

E mautinoa, na vavalalata Tanielu i le Atua ma iloa ai na talia e Ieova lana auaunaga faamaoni. Ae o lenā faailoaga o le alofa tele o le Atua lea na ala mai i ana agelu avefeʻau, na mautinoa le faalaeiauina ai. O le māfuaaga lenā na tali atu ai Tanielu: “Ua e faamalosi mai iā te aʻu.”—Tanielu 10:19.

 Ua tusia lenei tala faamāfanafanaloto i le Afioga a le Atua mo lo tatou lelei, e uiga i le alofa o Ieova i ana perofeta faamaoni. (Roma 15:4) O le manatunatu i le faaaʻoaʻoga a Tanielu, e tatou te iloa ai mea e ao ona fai ina ia avea ai o sē e manaʻomia e lo tatou Tamā alofa i le lagi.

Suʻesuʻe e Lē Aunoa le Tusi Paia

Sa filigā Tanielu e suʻesuʻe i le Tusi Paia, auā na ia tusia: “Ua ou iloa mai i tusi . . . le aofaʻiga o tausaga mo le faataunuuina o le faatafunaina o Ierusalema.” (Tanielu 9:2) O tusi na ia mauaina atonu na aofia ai tusitusiga paia a Mose, Tavita, Solomona, Isaia, Ieremia, Esekielu ma isi perofeta. E lē taumatea na matuā suʻesuʻe ma faatusatusa e Tanielu nei tusi tāʻai e tele, i upu faavaloaga e faatatau i le toe faafoʻisia o le tapuaʻiga moni i Ierusalema. Na ia manatunatu loloto i le uiga o ia fuaiupu a o nofo i le potu pito i luga o le fale, ma e leai se isi na faalavelave atu. O ana suʻesuʻega loloto na faamalosia ai lona faatuatua ma atili ai ona vavalalata atu iā Ieova.

O le suʻesuʻeina o le Afioga a le Atua na suia ai uiga o Tanielu ma iai se aafiaga lelei i lona olaga. E lē taumatea o aʻoaʻoga faale-Tusi Paia na ia maua a o laʻitiiti, na maumauaʻi ai o se talavou e tausia le Tulafono a le Atua i meataumafa, lea na talafeagai i lenā taimi. (Tanielu 1:8) Mulimuli ane, na ia taʻu atu ma le lē fefe le feʻau a le Atua i taʻitaʻi o Papelonia. (Faataoto 29:25; Tanielu 4:19-25; 5:22-28) E mataʻina lona filigā, faamaoni ma le maufaatuatuaina. (Tanielu 6:4) Na sili aʻe iā Tanielu le faatuatua atoatoa iā Ieova, i lo o le solia o faatulagaga a Ieova ina ia faasaoina ai lona ola. (Faataoto 3:5, 6; Tanielu 6:23) E lētioa la a pele o ia i le Atua!

E iai auala ua faigofie ai ona tatou suʻesuʻeina le Tusi Paia i aso nei, nai lo o aso o Tanielu. Ua iai tusi e faigofie ona faaaogā, nai lo o tusi tāʻai ia sa iai muamua. Ua iā i tatou le Tusi Paia atoa, lea e aofia ai nisi tusi o loo faamatalaina ai le faataunuuga o nisi o valoaga a Tanielu. Ua tatou maua foʻi le tele o tusi e fesoasoani i le suʻesuʻeina o le Tusi Paia ma isi mea mo saʻiliʻiliga atili. * Po ua e faaaogāina nei fesoasoani? Po ua e faatulaga ni taimi e faitau ai ma mafaufau i le Tusi Paia? E mautinoa foʻi lou mauaina o ni iʻuga lelei e pei o Tanielu. O le a malosi lou faatuatua ma lelei le lua mafutaga ma Ieova. O le a avea le Afioga a le Atua ma taʻitaʻiga malosi i lou olaga, ma e mautinoa ai e alofa le Atua iā te oe.

Finafinau i le Tatalo

Sa tāua iā Tanielu le tatalo, o lea sa ia faia ai talosaga talafeagai i le Atua. A o talavou o ia, sa faamataʻuina i le oti pe afai e na te lē faamatalaina le miti a le tupu Papelonia o Nepukanesa. E leʻi toe faatali Tanielu, ae na talosaga atu loa iā Ieova mo le fesoasoani ma le puipuiga. (Tanielu 2:17, 18) Ina ua mavae le tele o tausaga, o lona iloaina ma le lotomaulalo o lona faimea sesē, na ia taʻutino ai lana agasala faatasi ma agasala a lona nuu, ma augani atu iā Ieova mo le faamagaloga. (Tanielu 9:3-6, 20) Na ōle atu Tanielu i le Atua mo le fesoasoani ina ua lē malamalama i mea na tuuina atu iā te ia e ala i le agaga paia. Ina ua asiasi atu se tasi o agelu iā Tanielu ina ia avatu nisi faamalamalamaga, na ia faapea atu: ‘Na faafofogaina au upu.’—Tanielu 10:12.

E lē na o ōlega na faia e Tanielu i le Atua. Ua taʻua i le Tanielu 6:10: “E faatolu i le aso ona ia . . . tatalo ma avatu viiga i lona Atua, e pei ona ia masani ai.” E tele mea na faafetaia  ma viia ai e Tanielu Ieova, ma sa faia e lē aunoa. Ioe, sa avea le tatalo ma vaega tāua o lana tapuaʻiga, ma e na te leʻi tuua e ui ina lamatia ai lona ola. E mautinoa le alofagia o ia e Ieova ona o lona maumauaʻi.

Maʻeu le matagofie o lenei meaalofa o le tatalo! Aua neʻi misia se aso e te talanoa atu ai i lou Tamā i le lagi. Ia faafetaia ma viia o ia ona o lona agalelei. Aua e te matamuli e taʻu atu ou popolega ma faafitauli. Ia manatua au talosaga ua uma ona taliina ma faafetaia o ia, ma aua le faatopelaua au tatalo. Pe a faaali atu iā Ieova mea o i o tatou loto e ala i le tatalo, o le a tatou lagona ai lona alofa. Maʻeu se faalaeiauga matagofie ina ia “finafinau i le tatalo”!—Roma 12:12.

Faamamaluina le Suafa o Ieova

E lē mafai ona tumau se faigāuō pe afai e manatu faapito se tasi. E faapena foʻi la tatou mafutaga ma Ieova. Sa iloa e Tanielu lenei mea moni. Seʻi manatu i lona matuā faatāuaina o le faamamaluina o le suafa o Ieova.

Ina ua taliina e le Atua lana tatalo e ala i le faailoa mai o le miti a Nepukanesa ma lona uiga, na taʻua e Tanielu: “Ia faamamaluina le suafa o le Atua e mai i le faavavau, e oo atu i le vavau, auā o ia e ona le atamai ma le mana.” Mulimuli ane, ina ua faamatala atu e Tanielu iā Nepukanesa le miti ma lona uiga, na ia viiviia ai pea Ieova, ma faapea atu ua na o Ia “o Lē e na te faaali maia mea lilo.” Ina ua augani atu foʻi Tanielu mo le faamagaloga ma le laveaʻiga, na tatalo o ia: “Loʻu Atua e, . . . o lou lava suafa ua faaigoa ai lou aai, atoa ma lou nuu.”—Tanielu 2:20, 28; 9:19.

E tele foʻi avanoa e faataʻitaʻi ai iā Tanielu i lenei itu. Pe a tatalo, tatou te faaali atu lo tatou faanaunauga ia “faapaiaina” le suafa o le Atua. (Mataio 6:9, 10) E tatou te lē mananaʻo e faalumaina le suafa paia o Ieova ona o a tatou amio. Tau ina ia tatou faamamaluina pea Ieova, e ala i le faailoa atu i isi o le tala lelei o lona Malo.

E moni ua leai se alofa ma se manatu mamafa mo isi i lenei lalolagi e tatou te soifua ai. Ae e faamāfanafanaina i tatou i le iloaina, e alofa mai Ieova i ē tapuaʻi atu iā te ia. Ua taʻua e le faisalamo: “E fiafia Ieova i lona nuu. Ua ia faamatagofie foʻi o ē e agamalu i le faaolataga.”—Salamo 149:4.

[Faamatalaga pito i lalo]

[Faamatalaga faaopoopo i le itulau 21]

Na faaalia le alofa o le Atua iā Tanielu i le auina mai o le agelu o Kaperielu e faamalosia o ia

[Faamatalaga faaopoopo i le itulau 23]

O le filigā o Tanielu e suʻesuʻe ma tatalo na faaleleia ai ona uiga ma alofagia ai e le Atua