Pe na Silafia e le Atua o le a Agasala Atamu ma Eva?

O LOO fia iloa e le toʻatele o tagata le tali o lenei fesili. Pe a lāgā le mataupu i le pogai ua lē taofia ai e le Atua le amioleaga, e vave lava ona manatua le agasala a le uluaʻi ulugalii i Etena. O le manatu e faapea ‘e silafia e le Atua mea uma,’ e ono manatu ai nisi na muaʻi silafia e le Atua o le a lē usiusitaʻi Atamu ma Eva iā te ia.

Pe afai na muaʻi silafia e le Atua o le a agasala lenei ulugalii lelei atoatoa, o le ā ua taʻu mai ai? Pe afai e moni lenei manatu, o lona uiga la e tele uiga lē lelei o le Atua. E foliga mai e lē alofa, lē amiotonu, ma lē faamaoni o ia. Atonu e manatu nisi o se agaleaga le tofotofoina o le uluaʻi ulugalii, ae na muaʻi silafia e leaga lona iʻuga. O lona uiga la e foliga mai na faapogaia e le Atua pe na iai foʻi sana vaega, i mea leaga uma ma puapuaga ua tutupu. O nisi ua manatu e lē atamai le Atua.

Po o faamatalaina i le Tusi Paia Ieova le Atua i se auala lē lelei faapena? Ina ia iloa le tali, seʻi o tatou talanoaina le mea ua taʻua i le Tusi Paia e faatatau i foafoaga ma uiga o Ieova.

“Ua Matuā Lelei Lava”

Ua taʻua i le Kenese e tusa ai o foafoaga a le Atua, e aofia ai ma le uluaʻi ulugalii: “Ua silasila atu le Atua i mea uma na ia faia, tagaʻi foʻi! Ua matuā lelei lava.” (Kenese 1:31) Sa lelei atoatoa ona faia Atamu ma Eva ina ia nonofo i le lalolagi. Sa leai se faalētonu i o la tino. Talu ai na “matuā lelei” ona faia i laʻua, sa faigofie la ona la usiusitaʻi i mea na poloaʻia i laʻua e fai. Na faia i laʻua “i le faatusa o le Atua.” (Kenese 1:27) Sa mafai ona la faaalia atu uiga o le Atua e pei o le atamai, alofa faamaoni, faamasinotonu ma le mataalofa. O na uiga sa ono fesoasoani e la te faia ai faaiʻuga e aogā iā i laʻua ma faafiafiaina ai lo la Tamā i le lagi.

Sa tuu atu e Ieova iā i laʻua le filifiliga saʻoloto. O lea la, e leʻi faapolokalameina i laʻua e pei o se masini, ina ia faafiafia le Atua. Seʻi manatu i ai. O lē fea e sili iā te oe, o se meaalofa e aumai ona ua faamalosia e fai, po o se meaalofa ua faia mai i le lotomalie? E faigofie le tali. Pe ana filifili foʻi ma le lotomalilie Atamu ma Eva e usitaʻi i le Atua, semanū e tāua tele iā te ia lo la usiusitaʻi. Talu ai sa iai lo la saʻolotoga e filifili ai, sa mafai la ona la usiusitaʻi iā Ieova ona o le alofa.—Teuteronome 30:19, 20.

Amiotonu, Faimeatonu ma Lelei

Ua faailoa mai iā i tatou i le Tusi Paia uiga o Ieova. O nei uiga ua lē faia ai sana vaega i le agasala. Ua taʻua i le Salamo 33:5: ‘E fiafia Ieova i le amiotonu ma le faamasinogatonu.’ O lea ua taʻua ai i le Iakopo 1:13: “E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” Ona o le faimeatonu o le Atua ma le alofa iā Atamu, na ia lapataʻi atu ai iā te ia: “E mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kenese 2:16, 17) Sa tuu atu i le uluaʻi ulugalii e filifili i le ola e faavavau po o le oti. Pe e lē o se lē faamaoni ea mo le Atua le lapataʻia o i laʻua i se agasala patino, ae ua ia muaʻi  silafia e leaga lona iʻuga? Talu ai e fiafia Ieova “i le amiotonu ma le faamasinogatonu,” e lē mafai la ona ia faia se folafolaga pepelo.

E tele foʻi le lelei o Ieova. (Salamo 31:19) Na fetalai Iesu e uiga i le lelei o le Atua: “Po o ai se isi o outou e avatu i lona atalii se maa pe a talosaga mai i se falaoa? Pe e avatu ea iā te ia se gata pe afai e ōle mai mo se iʻa? E ui o outou o tagata leaga, ae e mafai lava ona outou avatu meaalofa lelei i a outou fanau. E sili atu la ona foaʻi mai e lo outou Tamā o i le lagi mea lelei i ē e ōle atu iā te ia!” (Mataio 7:9-11) E foaʻi mai e le Atua “mea lelei” i ana foafoaga ola. E faamaonia le lelei o le Atua i le auala na foafoaina ai tagata, ma le saunia o le Parataiso mo i laʻua. Po o se agalelei mo se Pule lelei faapena le saunia o se nofoaga matagofie, ae ua ia muaʻi silafia o le a toe aveesea? E leai. E amiotonu ma lelei Lē na faia i tatou, ma e lē tuuaʻia o ia i le fouvalega a le tagata.

“Atamai e Toʻatasi”

Ua taʻua foʻi i le Tusi Paia o Ieova e “atamai e toʻatasi.” (Roma 16:27) Na vaaia e agelu a le Atua i le lagi le tele o faamaoniga o lona atamai e lē faatuaoia. Na latou “alalaga i viiga” ina ua faia e Ieova le lalolagi ma tagata. (Iopu 38:4-7) E lētioa a matuā naunau nei agelu i mea na tutupu i le faatoʻaga i Etena. Pe e talafeagai la i se Atua atamai o lē na faia le lagi ma le lalolagi matagofie, ona faia ni tagata se toʻalua a o vaavaai atu ona atalii o agelu, ae ua ia silafia o le a lē usiusitaʻi? E mautinoa o se mea valea le fuafuaina o se mea e iloa e leaga le iʻuga.

Ae atonu e faapea mai se tasi, ‘E tatau ona iloa e se Atua atamai mea o le a tutupu.’ Ioe, ona o le atamai tele o Ieova, ua mafai ai ona ia silafia “mai le amataga le iʻuga.” (Isaia 46:9, 10) Peitaʻi, e iai taimi e na te lē fia silafia ai mea o le a tutupu, e pei ona ia lē faaaogā atoatoa i taimi uma lona mana. E filifili ma le atamai e Ieova le taimi e faaaogā ai lona muaʻi silafiaina o mea. E na te faaaogā pe a talafeagai ona faia faapea, ma fetaui ma tulaga o mea.

E mafai ona faataʻitaʻi le lē faaaogāina e Ieova o lona muaʻi silafia o mea, i se mea e faia e tagata i o latou fale. E mafai ona filifili se tasi o loo matamata i se taaloga na puʻeina, e matamata muamua le iʻuga o le taaloga ina ia iloa ai po o ai na manumalo. Ae e lē o taimi uma e tatau ai ona ia faia faapea. E leai se isi e faitio iā te ia pe a filifili e matamata le taaloga atoa mai i le amataga. E mautinoa foʻi e leʻi finagalo le Atua e na te muaʻi silafia mea o le a faia e Atamu ma Eva. Nai lo o lea, a o faagasolo mea na tutupu, sa faatalitali o ia ma silasila mai po o le ā le auala o le a amioaʻi ai lana fanau i le lalolagi.

E pei ona muaʻi taʻua, o le atamai o Ieova e na te leʻi faia ai Atamu ma Eva e pei o ni masini ua faapolokalameina e faia se mea. Peitaʻi, sa ia tuuina mai ma le alofa iā i laʻua le filifiliga saʻoloto. Pe a la filifili i le ala saʻo, e la te faaalia atu ai le alofa, lotofaafetai ma le usitaʻi, ma faafiafia ai pea i laʻua aemaise o Ieova lo la Tamā i le lagi.—Faataoto 27:11; Isaia 48:18.

E tele taimi ua faaalia i le Tusi Paia e leʻi muaʻi silafia ai e Ieova mea o le a tutupu. O se faaaʻoaʻoga, ina ua toetoe lava fasiotia e Aperaamo lona atalii e fai ai le taulaga, na fetalai mai Ieova: “Ua ou iloa nei o oe o sē e mataʻu i le Atua auā ua e lē taofia lou atalii, o lou atalii e toʻatasi, mai iā te aʻu.” (Kenese 22:12) Ae e iai foʻi taimi na faia ai e tagata mea leaga ma “faatigā” i le Atua. Pe e tatau  ona tigā o ia pe afai na ia silafia o mea na o le a latou faia?—Salamo 78:40, 41; 1 Tupu 11:9, 10.

O lea la, e talafeagai ona ioe e leʻi faaaogāina e le Atua atamai lona muaʻi silafiaina o mea, ina ia iloa ai o le a agasala o tatou uluaʻi mātua. E lē valea o ia e na te faia ai le lalolagi ma tagata, ae ua ia muaʻi silafia e lē iʻu i se lelei.

“O le Atua o le Alofa Lava Ia”

Na amata e le fili o le Atua, o Satani, le fouvalega i Etena lea ua iʻu ai i le agasala ma le oti. O lea na avea ai Satani ma “fasioti tagata.” Na avea foʻi o ia ma “sē e pepelo ma le tamā o le pepelo.” (Ioane 8:44) Ona o le leaga o ona faanaunauga, ua ia taumafai ai e faafoliga atu e leaga foʻi faanaunauga o lo tatou Atua alofa. E manaʻo o ia e tuuaʻia e tagata Ieova i le agasala o le tagata.

O le alofa, o le māfuaaga sili lea na filifili ai Ieova e na te lē muaʻi silafia o le a agasala Atamu ma Eva. O le alofa o le uiga autū lea o le Atua. Ua faapea mai le 1 Ioane 4:8: “O le Atua o le alofa lava ia.” E lē leaga le alofa, ae o se uiga lelei e uunaʻia ai e mātau mea lelei e uiga i isi. Ioe, o le alofa o Ieova le Atua, na finagalo ai i le mea e sili ona lelei mo le uluaʻi ulugalii.

E ui lava na mafai ona faia e le fanau a le Atua i le lalolagi se filifiliga lē saʻo, ae e leʻi masalosalo ai pe manatu lo tatou Atua alofa o le a faia e lenei ulugalii lelei atoatoa se mea leaga. Na ia tuuina mai iā i laʻua mea uma na la manaʻomia ma faailoa mai mea uma e ao ona la iloa. Na talafeagai ai la ona faatalitalia e le Atua o le a usiusitaʻi atu ma le alofa, ae e lē o le fouvale atu. Na ia silafia e mafai ona faamaoni Atamu ma Eva, e pei ona faamaonia mulimuli ane e tagata lē lelei atoatoa, e pei o Aperaamo, Iopu, Tanielu ma le isi toʻatele.

Na fetalai Iesu: “E mafaia e le Atua mea uma lava.” (Mataio 19:26) O se faamāfanafanaga lenā manatu. O le alofa o Ieova faatasi ai ma isi ona uiga autū o le faamasinotonu, atamai ma le mana, ua faamaonia ai e mafai ma o le a ia aveesea āuga uma o le agasala ma le oti.—Faaaliga 21:3-5.

E manino le mata o le vai, e leʻi muaʻi silafia e Ieova o le a agasala le uluaʻi ulugalii. E ui lava na tigā o ia ona o le lē usiusitaʻi o le tagata atoa ai ma iʻuga leaga ua iʻu i ai, ae na silafia e le Atua, o lenei tulaga lē tumau o le a lē taofia ai le faataunuuina o lona finagalo e faavavau mo le lalolagi ma tagata. O lea, e faalaeiauina oe ia suʻesuʻe atili i lenei mataupu, ma iloa le auala e te mauaina ai na faamanuiaga. *

[Faamatalaga pito i lalo]

[Faamatalaga faaopoopo i le itulau 14]

E leʻi faia e Ieova Atamu ma Eva e pei o ni masini ua faapolokalameina e faia se mea

[Faamatalaga faaopoopo i le itulau 15]

Na silafia e le Atua e mafai ona faamaoni Atamu ma Eva