Ia Mafuta Atu i le Atua

‘Sa Ia Saʻilia le Finagalo Malie o Ieova’

UA TAʻUA e se tamāloa o lē na tuua le upu moni: “Na ou lagona le lē aogā.” Ina ua amata ona taumafai e suia lona olaga, na popole ina neʻi lē faamagaloina o ia e le Atua. Ae na faamāfanafanaina lenei tagata agasala ua salamō, i le tala i le Tusi Paia e uiga iā Manase, lea o loo i le 2 Nofoaiga a Tupu 33:1-17. Pe afai ua e lagona le lē aogā ona o agasala na e faia, o le a faamāfanafanaina foʻi oe i le faaaʻoaʻoga a Manase.

Na ola aʻe Manase i se aiga e tapuaʻi i le Atua. O lona tamā o Esekia o se tasi o tupu e sili ona lelei o Iuta. Na fanau Manase ina ua mavae le tolu tausaga, talu ona faavavega ona faaopoopo e le Atua tausaga o lona tamā. (2 Tupu 20:1-11) E lētioa a manatu Esekia i lenei atalii o se meaalofa ona o le alofa mutimutivale o le Atua, ma aʻoaʻo o ia e naunau i le tapuaʻiga mamā. Ae e lē o taimi uma e mulimuli ai fanau a mātua e tapuaʻi i le Atua, i faaaʻoaʻoga a o latou mātua. O le mea lenā na fai e Manase.

O le 12 o tausaga o Manase na maliu ai lona tamā. Ae e faanoanoa, ona na “faia [e Manase] mea leaga i le silafaga a Ieova.” (Fuaiupu 1, 2) Pe na taaʻina le tupu talavou i le ʻaufaufautua, o ē e leʻi naunau i le tapuaʻiga moni? E lē o taʻua mai i le Tusi Paia. Ae o loo taʻua na ia faia mea leaga e pei o le ifo i tupua ma le sauā. Na ia faatūina fata faitaulaga i atua sesē, fai taulaga i ona lava atalii, faia faiga faaagaga ma tuu se faatusa ua tā i le malumalu o Ieova i Ierusalema. O le lotomaaa o Manase na ia lē utagia ai lapataʻiga na aumaia pea e Ieova, e ui na fanau mai o ia ona o se vavega na faia e Ieova i lona tamā.—Fuaiupu e 3-10.

Mulimuli ane, na faataga e Ieova le saisaia o Manase i faamau ʻapamemea ma ave i Papelonia. A o nofo faapagota i inā Manase, sa toe mafaufau i mea na ia faia. Pe na ia iloa i lea taimi e leʻi puipuia o ia e ona tupua e leai ni mana? Pe na ia toe mafaufau i mea na aʻoaʻoina ai o ia e lona tamā a o laʻitiiti? Po o le ā lava le tulaga, ae na suia le loto o Manase. Ua taʻua i le tala: “Ona ia saʻili lea ia maua le finagalo malie o Ieova lona Atua, ma ua matuā faamaulalo pea o ia . . . Ua ia tatalo atu pea iā te Ia.” (Fuaiupu e 12, 13) Ae pe e mafai ona faamagalo e le Atua se tagata na faia ni agasala matuiā faapena?

Na ootia le finagalo o Ieova i le salamō moni o Manase. Na faafofoga le Atua i ana ōlega mo le alofa mutimutivale, ma “toe faafoʻisia o ia i Ierusalema i lona tofi o le tupu.” (Fuaiupu e 13) Ina ia faaalia le salamō o Manase, na taumafai ai e toe faasaʻo mea sesē na ia faia, e ala i le aveesea o tupua ma uunaʻia ona tagata “ia auauna iā Ieova.”—Fuaiupu e 15-17.

Pe afai ua e lagona le lē aogā ona o ni agasala na e faia, ia faalaeiauina oe i le faaaʻoaʻoga a Manase. O lenei tala e mai i le Afioga Paia a le Atua. (Roma 15:4) E manino mai, e finagalo Ieova e tatou te iloa o loo ia “nofosauni e faamagalo” mai. (Salamo 86:5) E lē tāua iā te ia le agasala, ae o le loto o lē ua agasala. O le tagata agasala e tatalo ma se loto salamō, lafoaʻi ona ala sesē ma taumafai malosi e fai le mea saʻo, e mafai ona ia “maua le finagalo malie o Ieova” e pei o Manase.—Isaia 1:18; 55:6, 7.

Faitauga Tusi Paia mo Ianuari:

▪ 2 Nofoaiga a Tupu 29-36–Esera 1-10