E Mafai e le Tusi Paia Ona Suia Olaga

NA FAAPEFEA ona suia le olaga o se tamaʻitaʻi na galue i se falepia, o lē sa tautala i upu masoā, inutele, ma faaaogā fualaau faasāina? Na faapefea ona avea ma faifeʻau se faipolotiki na lē fiafia i lotu? O ā faigatā na feagai ma se leoleo Rusia o lē na aʻoina isi i le auala e faafetaiaʻi ai fetauaʻiga, ina ia avea ai ma Molimau a Ieova? Faitau i tala a nei tagata.

“Ua toe māfana la ma faiā ma loʻu tinā.”—NATALIE HAM

TAUSAGA FANAU: 1965

ATUNUU: AUSETALIA

TALAAGA: FAAAOGĀ FUALAAU FAASĀINA

OLAGA SA IAI: Na ou ola aʻe i Robe, o se tamaʻi taulaga o faiga faiva, i Ausetalia i Saute. I na nuu, e avea le faletalimālō ma nofoaga e tafafao ai. E tele ina faaalu taimi o mātua i le faletalimālō, ma ola aʻe ai a latou fanau i siʻomaga e faaaogā ai le ʻava malosi, tautala i gagana masoā, ma le ulaula tapaa.

E oo ane i le 12 o oʻu tausaga, ua ou ulaula ma ua faaaogā gagana masoā, ma e tele ina ma misa ma loʻu tinā. O le 15 o oʻu tausaga na teteʻa ai oʻu mātua, ma i le 18 masina mulimuli ane, na ou tuua ai loʻu aiga. Na ou faaaogā sesē le ʻava malosi, faaaogā fualaau faasāina ma ola ai i se olaga lē mamā. Na ou ita ma ou lē iloa le mea e fai i loʻu olaga. Ae i le lima tausaga na ou toleni ai i mea tau karate ma puipuiga o fafine, na ou lagona ai e mafai lava ona ou puipuia aʻu. Peitaʻi, pe a leai saʻu mea e fai, na lofitūina aʻu i le faanoanoa ma ou tatalo ai i le Atua e fesoasoani mai. Ou te fai atu iā te ia, “Tau lava ina ia aua neʻi e fai mai ou te alu i se lotu.”

Mulimuli ane, na aumai ai e saʻu uō e talitonu i le Atua ae lē lotu, se Tusi Paia iā te aʻu. E na te faaaogā fualaau faasāina e pei o isi aʻu uō. Peitaʻi, na faapea mai, o ia e talitonu i le Atua, ma e tatau ona ou papatiso. Na ia ave aʻu ma papatiso i se vaituloto. Na amata mai i lenā taimi ona ou lagona, ua iai sa ma faiā faapitoa ma le Atua. Ae peitaʻi, e leai soʻu taimi e faitau ai i le Tusi Paia.

SUIA E LE TUSI PAIA LOʻU OLAGA: I le 1988, na tuʻituʻi mai ai ni Molimau a Ieova se toʻalua i loʻu fale. Na fesili mai se tasi o i laʻua, “E te iloa le suafa o le Atua?” Na faitau e le Molimau le Salamo 83:18 mai i lana Tusi Paia e faapea: “Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” Na ou teʻi! Ae ina ua ō i laʻua, na ou alu loa i laʻu taavale i le 35 maila  (56 km) i se faletusi faalelotu, e siaki isi faaliliuga o le Tusi Paia ma suʻe le suafa o le Atua i se lomifefiloi. Ina ua ou mautinoa o Ieova le suafa o le Atua, sa ou taumānatu ai, po o ā nisi mea ou te lē o iloa.

Na fai mai loʻu tinā e ese lava Molimau a Ieova latou. E lē tele soʻu iloa e uiga iā i latou, ma na ou manatu ai, e tele a latou faasāsāga ma e lē mananaʻo i mea faafiafia. Sa ou manatu, afai e ō mai i loʻu fale, ona faafoliga atu lea ou te lē o iai. Ae na toe sui loʻu mafaufau ina ua ō mai Molimau a Ieova. Na ou valaaulia i laʻua i le fale ma amata loa ona matou suʻesuʻe le Tusi Paia.

E uma loa se suʻesuʻega, ona ou faamatala lea i laʻu uō tama o Craig mea ua ou aʻoaʻoina. I lona fia iloa atili, na tago mai ai o ia seʻi atu le tusi ma faitau. E leʻi atoa le tolu vaiaso ae fai mai, ua ia maua le upu moni e uiga i le Atua. Sa oo ina ma lē toe tagofia fualaau faasāina pe faaaogā sesē le ʻava malosi, ma tuu foʻi laʻu galuega i le falepia. Ina ia ōgatusa o ma olaga ma tapulaa a le Tusi Paia, na ma faaipoipo ai loa.

AOGĀ IĀ TE AʻU: I le taimi na amata ai ona matou suʻesuʻe ma Molimau a Ieova i le Tusi Paia, na toeitiiti lava a faauma la ma faigāuō ma Craig. Ae i aso nei, ua avea o ia ma tane e sili ona lelei, ma e toʻalua la ma fanau aulelei. Ua iai foʻi a ma uō pele e tutusa o matou talitonuga.

I le taimi muamua, na ita ai loʻu tinā ina ua iloa ua ma Molimau a Ieova. Ae peitaʻi, o lona lē malamalama na ala ai ona popole. I le taimi nei, ua toe māfana la ma faiā ma loʻu tinā. Ua ou lagona ua aogā loʻu olaga ma ua iai se uiga. Ua faamalieina foʻi oʻu manaʻoga faaleagaga.—Mataio 5:3.

‘Na faateʻia aʻu i mea na ou aʻoaʻoina i le Tusi Paia.’—ISAKALA PAENIU

TAUSAGA FANAU: 1939

ATUNUU: TUVALU

TALAAGA: O SE FAIPOLOTIKI

OLAGA SA IAI: Na ou fanau i Nukulaelae, o se motu manaia i le Pasefika, lea ua avea nei ma vaega o Tuvalu. Sa pulea le olaga i le motu e faifeʻau Samoa, o ē sa aʻoʻoga i se kolisi faafaifeʻau i Samoa. O le galuega matua a tagata o le motu i aso uma le fafaga o faifeʻau ma o latou aiga, ma saunia fale e nonofo ai. O le mea moni, e avatu iā i latou mea e sili ona lelei. E tusa lava pe lē lava meaʻai a tagata o le motu, ae sa tatau lava ona fafaga le faifeʻau.

Sa pulea le aʻoga a le nuu e le faifeʻau, ma aʻoaʻo mataupu faalelotu, matematika, ma tala o le lalolagi. Ou te manatua loʻu vaai o sasa faamoʻamoʻa e le faifeʻau tamaiti, ma lavatoto ai o latou tino. Ae e leʻi iai se isi na faitio, e oo lava i mātua, ona sa pei le faifeʻau o se Atua.

Ina ua sefulu oʻu tausaga, na ou tuua ai loʻu aiga ae ou alu i le aʻoga a le malo i le isi motu. Na ou galue mo le malo ina ua faauu  aʻu. Sa avea i le taimi lenā motu o Kiripati ma Elise ma kolone o Peretania. E eseese matagaluega na ou galue ai, a o leʻi avea aʻu ma faatonu o le nusipepa faalevaiaso a le malo. Sa sologa lelei mea uma seʻi oo ina ou faasalalauina se tusi mai i se tagata faitau, na faitioina ai le faaaogā o tupe e sauniuni ai mo le asiasiga a le Perenise o Uelese. E ese le igoa na faaaogā e lē e ana le tusi, ma sa manaʻo loʻu pule e fia iloa le igoa moni o le tagata. Ou te leʻi fia taʻuina i ai, ma na lauiloa ai la ma feteenaʻiga.

E leʻi pine talu ona uma lenā mea, ae ou tuua loa le galuega i le malo ma auai i mea faapolotiki. Na ou manumalo i palota i Nukulaelae, ma tofia ai aʻu e avea ma Minisita o Fefaatauaʻiga ma Punaʻoa. Mulimuli ane, ina ua tutoʻatasi Kiripati ma Tuvalu (lea sa taʻu muamua o Elise) mai iā Peretania, na tofia aʻu e le kovana e avea ma taʻiulu o le malo o Tuvalu. Peitaʻi, ou te leʻi manaʻo e iloa e nisi e iai saʻu vaega i pulega faakolone. O lea na ou teena ai le ofo, ma ou tauvā ai loa i le palota mo se tofi minisita. Ae ou te leʻi maua. O lea, na ma toe foʻi loa ma laʻu avā i lo matou motu, ma ola e pei ona masani ai le nuu.

SUIA E LE TUSI PAIA LOʻU OLAGA: O le Aso Sā i atumotu, e manatu i ai tagata e paia, seʻi vaganā ai aʻu. O le aso lenā ou te alu ai e folaulau ma fagota. Ou te leʻi manaʻo e avea aʻu o se tagata lotu. Na fai mai loʻu tamā, e lē fiafia i latou ma isi tagata i aʻu mea ia e fai. Ae sa ou maumauaʻi ia aua neʻi pule mai le lotu iā te aʻu.

I se tasi o aʻu malaga i le laumua o Tuvalu o Funafuti, na valaaulia ai aʻu e loʻu uso laʻitiiti e ma te ō i le sauniga a Molimau a Ieova. Mulimuli ane, na aumai e se misionare Molimau le tele o mekasini, o le Olomatamata ma Ala Mai! ou te faitau ai. Na ia aumai foʻi iā te aʻu se tusi e faaalia ai le amataga faapaupau o le tele o aʻoaʻoga a lotu ua faapea mai o Kerisiano. E tele taimi na ou faitauina ai lenā tusi. Ma na faateʻia aʻu i le tele o mea na ou aʻoaʻo mai i le Tusi Paia, e aofia ai le aʻoaʻoga e lē se tiute tauave o Kerisiano le tausia o le Sapati faalevaiaso. * Na ou faamatala atu i loʻu toʻalua nei manatu, ma na lē toe lotu ai loa o ia.

Ae ou te lē fia alu lava i se lotu. E toeitiiti atoa le lua tausaga, e leʻi galo iā te aʻu mea na ou aʻoaʻoina. Mulimuli ane, na ou tusi atu i le misionare i Funafuti ma fai i ai, ua ou manaʻo e sui loʻu olaga. O le taimi lava na maua ai lana vaa, na sau ai e aʻoaʻo atili aʻu e uiga i le Tusi Paia. Na matuā ita loʻu tamā ina ua ia iloa ua ou manaʻo e avea aʻu ma Molimau a Ieova. Ae na ou fai atu i ai, e tele lava mea ua ou aʻoaʻoina mai i Molimau a Ieova e uiga i le Tusi Paia, ma ua uma ona fai laʻu filifiliga.

AOGĀ IĀ TE AʻU: I le 1986 na ou papatiso ai e avea o se tasi o Molimau a Ieova, ae na papatiso laʻu avā i le tausaga na sosoo ai. Na suʻesuʻe foʻi la ma fanau teine e toʻalua i le Tusi Paia, ma filifili ai e avea ma Molimau a Ieova.

I le taimi nei la, ua ou fiafia ua iai saʻu tapuaʻiga e pei o Kerisiano i le uluaʻi senituri, e lē faaeseeseina faifeʻau ma le ʻaulotu. (Mataio 23:8-12) E latou te mulimuli foʻi ma le lotomaulalo i le faaaʻoaʻoga a Iesu, ma talaʻi atu i isi le Malo o le Atua. (Mataio 4:17) Ou te faafetai iā Ieova le Atua, ona ua ou maua le avanoa e aʻoaʻo ai le upu moni e uiga iā te ia ma ona tagata!

 ‘E leʻi faamalosia aʻu e Molimau a Ieova i o latou talitonuga.’—ALEXANDER SOSKOV

TAUSAGA FANAU: 1971

ATUNUU: RUSIA

TALAAGA: LEOLEO E FAATOʻAFILEMU FOUVALEGA

OLAGA SA IAI: Na ou fanau i Moscow, le laumua o le Soviet Union i lenā taimi. Sa nonofo lo matou aiga i se fale telē, e iai potu e nonofo ai tagata. Ma o le toʻatele o o matou tuaoi, e faigaluega faatasi i se falegaosimea. Ou te manatua a latou tala e faapea, e ese loʻu ulavale, ma atonu ou te vave oti pe iʻu foʻi i le falepuipui. O le mea moni, e oo ane i le 10 o oʻu tausaga, a ua mau loʻu igoa i faila a leoleo.

Ina ua 18 oʻu tausaga na ave ai aʻu i le vaegaau ma ou galue ai o se leoleo i tuaoi o Rusia ma isi atunuu. Na ou toe foʻi mai i loʻu aiga ina ua mavae le lua tausaga, ma ou faigaluega i se falegaosimea, ae ou te leʻi fiafia ai. O lea na ou auai loa i le vaega a leoleo i Moscow e feagai ma tagata e faatupu fouvalega, i le aʻoina o le faafetaiaʻia o fetauaʻiga. Sa ou fesoasoani i le puʻeina o tagata solitulafono i Moscow, ma galue i vaipanoa e tutupu ai fouvalega i le atunuu. Na tumu aʻu i lagona feteenaʻi ma le popole. Pe a ou foʻi mai i le aiga, o nisi taimi e ma te lē momoe faatasi ai ma laʻu avā, ona ou te popole ina neʻi oʻu faamanuʻalia o ia a o ou moe.

SUIA E LE TUSI PAIA LOʻU OLAGA: Ina ua matou suʻesuʻe i le Tusi Paia ma Molimau a Ieova, na ou iloa ai o le olaga sauā lea ou te ola ai, e lē talafeagai ma tapulaa a le Tusi Paia. Na ou iloa foʻi e manaʻomia ona tuu laʻu ulaula ma pulea le ʻava malosi. Ae peitaʻi, na ou iloa e faigatā ona tuu laʻu galuega ona e leai ni oʻu tomai e maua ai se isi aʻu galuega e tausi ai loʻu aiga. Sa ou lagona foʻi, e lē taitai mafai ona ou talaʻi, e pei ona faia e Molimau a Ieova.

Ae sa oo lava ina ou talitonu, e saʻo aʻiaʻi faamatalaga a le Tusi Paia. Na faamāfanafanaina foʻi aʻu i upu o le Esekielu 18:21, 22. Ua faapea mai: ‘Ae o se tagata e amioleaga, afai foʻi ua liliuese mai i ana agasala uma na faia, o solitulafono uma na ia faia e lē toe lāgā mai e faasaga iā te ia.’

O le mea e lelei ai, ona e leʻi faamalosia aʻu e Molimau a Ieova e talitonu i o latou talitonuga, ae na fesoasoani iā te aʻu e mafaufau i mea ua ou aʻoaʻoina. E sili atu ma le 40 aʻu mekasini na tuu, ma e leʻi atoa le tolu vaiaso na ou faitauina ai. O mea na ou aʻoaʻoina na ou talitonu ai, ua ou maua le tapuaʻiga moni.

AOGĀ IĀ TE AʻU: Ae ma te leʻi suʻesuʻeina le Tusi Paia ma loʻu toʻalua, na toeitiiti lava a tatala la ma faaipoipoga. A o lea ua faaleleia. Na amata suʻesuʻe laʻu avā i le taimi na ou suʻesuʻe ai i le Tusi Paia, ma na ma filifili e auauna faatasi iā Ieova. Ua sili atu nei ona fiafia lo ma aiga. Sa ou maua foʻi se galuega e lē solia ai mataupu silisili o le Tusi Paia.

I le taimi muamua na ou talaʻi mai i lea fale i lea fale, ou te lagona lava le popole, ona e toe oso aʻe iā te aʻu faalogona sa iai pe a ou alu e taofi se vevesi. Ua ou mautinoa nei, e mafai ona ou toʻafilemu, e tusa lava pe faaita aʻu e se isi. A o faagasolo taimi, ua lava loʻu onosaʻi. Ua ou salamō ona sa tele ina faamaʻimau loʻu olaga, a o lea ua aogā i le taimi nei. Ua ou fiafia e tuu uma atu loʻu malosi e auauna ai iā Ieova le Atua, ma fesoasoani ai i isi.

[Faamatalaga pito i lalo]