E te Silafia?

O le ā le tū masani i le aoina o mea i le seleselega, ma o ai na aogā i ai?

▪ Na faasā i le Tulafono a Mose ona ao uma e faifaatoʻaga fua o o latou laueleele. Ma o ē sa faia le seleselega, e lē tatau ona ao uma pito o o latou fanua. O ē na aoina fua o vine, e lē tatau ona tau uma fua o totoe pe toe foʻi e tau mai fua e leʻi matua. O ē foʻi e sasa i lalo fua o olive, e tatau ona tuu ai pea fua e leʻi matua. (Levitiko 19:9, 10; Teuteronome 24:19-21) Ina ia ō atu ē e matitiva, o ē mātuaoti, fafine ua oti a latou tane ma tagata ese, e ao mai fua o totoe o le seleselega.

O lenei tulafono e faatatau i le aoina o fua o le seleselega, sa aogā mo le nuu atoa o Isaraelu. Ina ia faalaeiau ai ē e ona fanua ina ia limafoaʻi, ia lē manatu faapito, ma ia faalagolago i le faamanuiaga a le Atua. E faalaeiau ai foʻi i latou e ō e ao mai fua, ina ia toʻaʻaga, auā e faigatā lea galuega. (Ruta 2:2-17) O le ao mai o fua, e faamautinoa ai, e lē o fia aai tagata matitiva pe avea ma avega mamafa i le nuu. Ma e latou te lē lagona ai foʻi le mā ona o le ʻaisi pe e faalagolago i mea e foaʻi mai e isi.

Aiseā na aumai mamao ai e Solomona laupapa mai i Lepanona e fausia ai le malumalu i Ierusalema?

▪ Ua faamatalaina i le 1 Tupu 5:1-10 se maliega na faia e Solomona ma Hiramo le tupu o Turo. E tusa ai ma lenā maliega, na aumai ai i le sami laau o arasi ma perosi mai i Lepanona i Isaraelu, e fausia ai le malumalu.

O le arasi o se laau e tāua mo fefaatauaʻiga i Sasaʻe Tutotonu anamua. I Aikupito ma Mesopotamia, e masani ona faaaogā le arasi e fai ai utupoto ma faʻalo ai malumalu ma maota o tupu. O loo faamaonia mai i tusitusiga tāua a malo ma isi tusitusiga, le faatau mai pea o arasi i aai i saute o Mesopotamia, o nisi taimi e aumai ai o ni mea e maua i le vete, pe faameaalofa. Sa faaaogā nei laau i Aikupito e fausia ai lagisi a le tupu, o pusa maliu, ma isi mea e faaaogā i maliu.

Sa sili ona lauiloa arasi o Lepanona ona o le anagatā, e mananaia, e manogi lelei, ma e lē ʻatia foʻi e iniseti. O lea, na faaaogā ai e Solomona laau e aupito sili ona lelei mo le malumalu. I aso nei, e lē o toe tele ni arasi i mauga o Lepanona, ua na o ni nai togā arasi e tū tū solo.

[Ata i le itulau 15]

Ata mai i le maota o le tupu o Asuria, laʻuina o arasi mai Lepanona

[Ē Ana le Ata]

Erich Lessing/Art Resource, NY