Le Malo o le Atua—Pe e i le Loto o le Tagata?

Na taʻua e Pope Penetito XVI i lana tusi e faatatau iā Iesu, Jesus of Nazareth: “E oo mai le Malo o le Atua pe a talia Iesu ma faatuatua iā te ia.” I nisi tagata, o le uiga lenā o le Malo o le Atua—o se suiga e faia e le tagata pe a talia Iesu ma faatuatua iā te ia. Po o lona uiga, o le Malo o le Atua ua na o se suiga i ʻlou loto’?

SA TĀUA tele iā Iesu le Malo. Ua fai mai Pope Penetito, o le Malo, “o le autū lea o le talaʻiga a Iesu.” I le taimi puupuu o lana faiva, sa tele ina femalagaaʻi Iesu ma “talaʻi atu le tala lelei o le Malo.” (Mataio 4:23) I lana talaʻiga ma vavega na ia faia, na faamanino ai e Iesu, o le Malo, e lē na o le talia o le Atua ma usiusitaʻi iā te ia. Ae e aofia ai se pulega, le faamasinogatonu, ma faamanuiaga e faavavau.

Pulega ma le Faamasinogatonu

I se tasi taimi i le faaiʻuiʻuga o le faiva a Iesu, na alu ane ai iā te ia le tinā o ona soo pele o Iakopo ma Ioane ma faapea atu: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou malo.” (Mataio 20:21) E mautinoa e leʻi faatatau lana tala i se mea sa i loto o lana fanau. Na malamalama o ia e faapea, o le Malo o se pulega e aofia ai ma Iesu, ma na manaʻo ia maua ai se tofi o lana fanau. E moni, na folafola atu e Iesu i ona aposetolo faamaoni e toʻa 11, o le a iai i latou i lona Malo, ma “nonofo i nofoālii” ma “faamasino” faatasi ma ia. (Luka 22:30) I manatu la o ona soo, o le Malo o Iesu, o se pulega moni.

Ae ā tagata lautele i aso o Iesu? Pe na malamalama i latou o le Malo ua na o se suiga i le tagata, pe na latou faatalitalia se isi mea e sili atu? Ina ua latalata i le Paseka o le 33 T.A., a o tiʻetiʻe atu Iesu i Ierusalema i le tamaʻi asini, na talia fiafia o ia e le motu o tagata ma alalaga atu nisi: “Matou te tatalo ia faaolaina le Alo o Tavita!” (Mataio 21:9) Aiseā na latou alalaga atu ai faapena? E lē taumatea ua latou iloa, o Iesu o le Mesia folafolaina, ma o le a foaʻi atu e le Atua iā te ia le Malo e faavavau, “le nofoālii o Tavita lona tamā.” Ua leva ona latou faanaunau i le faaolataga, filemu, ma le faamasinogatonu o le a aumaia e lenā Malo.—Luka 1:32; Sakaria 9:9.

Faamanuiaga e Faavavau

E oo lava i tagata e foliga mai e itiiti so latou naunau i le faiva a Iesu, sa latou iloa lana aʻoaʻoga e uiga i le Malo. Ina ua faasalaina i le oti Iesu, na ōle atu iā te ia se pagota sa tautau i ona autafa: “Iesu e, ia e manatua mai aʻu pe a e oo i lou malo.” O le ā le tali a Iesu? Na ia faamautinoa atu i le pagota: “O le a ta faatasi ma oe i le Parataiso.”—Luka 23:42, 43.

O le mea moni, na talitonu lenā pagota, o le a ulu atu Iesu i le Malo pe a toe faatūina mai o ia mai i le oti. E lē gata o le a maua e Iesu le pule e toe faatū ai le pagota, ma toe fuataʻi lona olaga faatasi ma le faitau miliona o isi, ae e naunau foʻi o ia e fai. Ioe, i le avea o Iesu ma Pule i le lagi, o le a aumaia e  ia faamanuiaga e faavavau i le lalolagi atoa e ala i le Malo.—Ioane 5:28, 29.

O Loo i lo Latou Lotolotoi le Malo

Pe e leʻi fetalai ea Iesu: “O loo i lo outou lotolotoi le malo o le Atua”? Ioe, o loo maua na fetalaiga a Iesu i le Luka 17:21. Ae o loo faapea mai isi faaliliuga o le Tusi Paia, “ua iai lava ia te outou le malo o le Atua,” a o isi, “o loo faatasi ma outou le Malo.” (Tagaʻi i le King James Version ma le The New English Bible.) O le ā le uiga o le fetalaiga a Iesu?

Ua faaalia i faamatalaga o loo siʻomia ai le mau, na fetalai atu Iesu i le ʻau Faresaio, o taʻitaʻi lotu tetee o Iutaia. E ese lava mea na latou faatalitalia e faatatau i le Mesia ma lona Malo. Na manatu i latou, o le a afio mai le Mesia “i ao o le lagi” o se Tupu mamalu e laveaʻiina tagata Iutaia mai iā Roma, ma toe faafoʻisia le malo iā Isaraelu. (Tanielu 7:13, 14) Ae peitaʻi, na faailoa atu e Iesu lo latou sesē, i le taʻu atu iā i latou: “E lē oo mai le malo o le Atua i se auala mataʻina.” Ona ia toe faaopoopo atu lea: “Faauta, o loo i lo outou lotolotoi le malo o le Atua.”—Luka 17:20, 21.

O aʻoaʻoga ma vavega na faia e Iesu, na faaalia manino ai o ia o le Tupu na valoia o lenā Malo, ae na atili ai ona tetee le ʻau Faresaio o ē e lē lelei o latou loto ma e lē faatuatua. E leʻi talitonu i latou o Iesu o le Mesia. O lea, na ia faaali atu ai iā i latou mea moni: ʻO loo i lo latou lotolotoi’ lē ua faauuina e fai ma Tupu i le lumanaʻi, o le sui o lenā Malo. E leʻi talosaga atu o ia, ia vaai i totonu o o latou loto. * Ae o loo tutū i o latou luma Iesu ma ona soo. Na fetalai atu o ia: “O loo iai iā te outou le Malo o le Atua.—Luka 17:21, Contemporary English Version.

Se Malo e Tāua i Lou Loto

E lē o iai i loto o tagata agasala le Malo o le Atua, ae e tatau ona avea o se mea e tāua i o tatou loto. E ala i ana aʻoaʻoga ma galuega mamana, sa taumafai ai Iesu e atiaʻe i loto o lana ʻau faalogologo le faatuatua i se pulega amiotonu, o le a aumaia le filemu ma le saogalemu. Sa finagalo o ia ia maua e i latou le faatuatua ma suia ai o latou olaga. O lea, na ia aʻoaʻo ai i latou ia tatalo: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) Na pāʻia loto o le toʻatele o le ʻaufaalogologo a Iesu i ana fetalaiga ma faatuatua ma uunaʻia ai i latou e mulimuli iā te ia, ina ia maua ai faamanuiaga o le Malo.

Pe e te fia maua se faatuatua faapena? O le ā la e tatau ona e faia ina ia atiaʻe ai lenā faatuatua? Ia manatua upu amata o le lauga taʻutaʻua a Iesu i luga o le Mauga: “E fiafia o ē e naunau i mea faaleagaga, auā e fai mo i latou le malo o le lagi.” (Mataio 5:3) Aiseā e lē talia ai le valaaulia ia suʻesuʻe le Tusi Paia ma Molimau a Ieova, o ē na avatua lenei mekasini iā te oe? E lē gata ina suia ai lou olaga ia lelei, ae e maua ai foʻi le faamoemoe i se Malo e faimeatonu, lea o le a aumaia le filemu ma le saogalemu i tagata uma.

[Faaopoopoga i lalo]

[Faamatalaga faaopoopo i le itulau 11]

Pe na iai le Malo o le Atua i loto maaa ma fia fasioti tagata o ē na tetee iā Iesu?