O le ā “le I‘uga”?
O le ā “le Iʻuga”?
“. . . ona oo mai ai lea o le iʻuga.”—MATAIO 24:14.
E TELE tala eseese e faatatau i le iʻuga o le lalolagi. O loo faaata mai i tusi, ata tifaga, mekasini o tala mālie ma mekasini faasaienisi, mala eseese i le taimi o le iʻuga. E aofia ai le faaumatiaga i taua faaniukilia, le fetoʻai o tamaʻi paneta, faamaʻi oti, suiga mataʻutia o le tau, po o osofaʻiga a meaola mai i isi paneta.
E eseese foʻi manatu faalotu, ona ua aʻoaʻo e le tele o lotu e faapea, i le taimi o “le iʻuga,” o le a faaumatia ai ola uma i le lalolagi. Ua manatu se tasi failotu e faatatau i le Mataio 24:14 e faapea: “O se tasi lenei o fuaiupu e sili ona tāua i le Afioga a le Atua . . . Ua fesagaʻi nei lo tatou tupulaga ma se faaumatiaga o loo faaloloʻi mai, e toʻaitiiti tagata e iloa lona mataʻutia.”
Ua lē amanaʻia e na tagata le mea moni, o Ieova le Atua na “faatumauina” le lalolagi, “na ia lē foafoaina fua ae na ia faia ina ia ʻainā.” (Isaia 45:18) O lea ina ua taʻua e Iesu “le iʻuga,” e leʻi faapea mai o le a faaumatia le lalolagi, ma tagata uma. Ae e na o ē e amioleaga o le a faaumatia, o ē e lē mananaʻo e ola e tusa ma taʻiala alofa a Ieova.
O se faaaʻoaʻoga. Seʻi faapea e iai sou fale manaia ma o loo nonofo fua ai ni tagata. O nisi o i latou, e nonofo fifilemu faatasi ma isi ma vaai lelei lou fale. A o isi e na o le faatupu faalavelave, feʻainaʻi, ma faatigā i tagata lelei. Ua latou faaleaga lou fale ma mumusu e faalogo iā te oe.
O le ā lau mea e fai e faalelei ai le mataupu? E te tago e talepe lou fale? Ailoga. Atonu o le a e tutuliesea tagata leaga ma toe faalelei mea na latou faaleagaina.
E tai faapena foʻi le mea e faia e Ieova. Na ia faagaeeina le faisalamo e tusi: “Auā e faaumatia o ē e fai mea leaga, a o ē e faamoemoe iā Ieova, o i latou ia e fai mo i latou le lalolagi. Ua toeitiiti lava ona lē toe iai lea o le tagata amioleaga; e te mafaufau foʻi i le mea sa iai o ia, a ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:9-11.
O le mataupu foʻi lenā na talanoa i ai le aposetolo o Peteru. Na faagaeeina o ia e tusi: “Sa iai le lagi i aso anamua, ma na mautū foʻi le laueleele ma manu aʻe mai i le vai, ma sa i totonu foʻi o le vai, ona o le afioga a le Atua; o mea foʻi ia na oo ai le faaumatiaga i le lalolagi i lenā taimi, ina ua lofia i le vai.” (2 Peteru 3:5, 6) Sa faasino le aposetolo i le Lolo i aso o Noa. Na faaumatia le lalolagi o tagata e lē matataʻu i le Atua, ae e leʻi faaumatia le laueleele. O lenā Lolo, ua avea ma “faaaʻoaʻoga i mea o le a oo mai i tagata faalēmataʻu.”—2 Peteru 2:6.
Ona toe faapea mai lea o Peteru: “Ua tuu ai le lagi ma le lalolagi o loo iai i le taimi nei mo le afi.” Afai e gata ai i inā lau faitau, e te lē o maua la le manatu saʻo. Mātau, ua faapea atili mai le mau: “Ma le faaumatiaga o tagata faalēmataʻu.” E lē o le faaumatiaga o le laueleele, a o tagata faalēmataʻu. Ona ā lea? Na tusi Peteru: “E tatou te faatalitali i le lagi fou [Malo faa-Mesia o le Atua] ma le lalolagi fou, [o le sosaiete o tagata amiotonu] e tusa ma lana folafolaga, e mau ai le amiotonu.”—2 Peteru 3:7, 13.
Ua faaalia foʻi i valoaga o le Tusi Paia, ua lata mai “le iʻuga.” Faitau le Mataio 24:3-14 ma le 2 Timoteo 3:1-5 e iloa ai vala e faamaonia ai lenei mea. *
Pe e faateʻia oe ona o le tele o le fenuminumiaʻi e uiga i le Mataio 24:14, o se mau e oo lava i se tamaitiiti e mafai ona malamalama i ai? E iai māfuaaga o lenei mea. Ua faatauaso e Satani tagata i upu moni tāua o le Afioga a le Atua. (2 Korinito 4:4) E lē gata i lea, ua natia e le Atua ana fuafuaga i ē faamaualuluga ae faaalia i ē lotomaulalo. O le mea lea na fetalai ai Iesu: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e natia nei mea mai i tagata popoto ma ē e atamamai, a ua faaalia i tamaiti.” (Mataio 11:25) Maʻeu se faaeaga o le iai faatasi ma ē lotomaulalo e malamalama i le Malo o le Atua, ma faamoemoe atu i faamanuiaga e maua e i latou e lagolagoina le Malo!
[Faaopoopoga i lalo]
^ pala. 11 Mo nisi faamatalaga, tagaʻi i le mataupu e 9 o le tusi O ā Aʻoaʻoga Moni a le Tusi Paia? lomia e Molimau a Ieova.
[Ata i le itulau 9]
I le taimi o “le iʻuga,” o le a faaumatia ai e le Malo tagata amioleaga uma i le lalolagi