Pe e Faasā e le Tusi Paia Taaloga Faitupe?

E MASANI ona faaatagia mai taaloga faitupe i ata lauiloa ma televise, aemaise lava i kasino, o nofoaga e tafafao i ai tagata aulelei, maumea ma taʻutaʻua. O le mea moni, e masani ona iloa e tagata matamata, e lē moni na ata.

A o le mea moni, o loo tauvā kasino ma lūlū, petipetiga ma taaloga faitupe i le initaneti i le taumafai e faatosina mai tagata. Ua taʻua i le tusi Internet Gambling, e uiga i taaloga faitupe, “o se masaniga leaga ua sasao faaafi, lea ua aafia ai le toetoe lava o le lalolagi atoa.” O se faataʻitaʻiga, ua avea le poka o se taaloga taatele i televise ma le Initaneti. E tusa ma se tasi nusipepa, o le manatu o tagata popoto i Amerika, i totonu o le 18 masina, ua faaluaina tagata e taaalo i le taaloga poka.

Ua faamatalaina taaloga faitupe, o se mea e faaalu ai tupe ae e lē mautinoa le iʻuga. E manatu le toʻatele, e leai se afāina o taaloga faitupe pe afai o tupe a le tagata lava ia, ma e lē faia soo. Ma ua taʻua i le New Catholic Encyclopedia, “e lē o se agasala [taaloga faitupe], seʻi vaganā ua lē faia ai e le tagata ona tiute.” Ae peitaʻi, e lē o taʻu maia ni mau o le Tusi Paia e lagolago ai lenā faamatalaga. O le ā la le vaaiga a se Kerisiano i lenei mataupu? Pe e faasā e le Tusi Paia taaloga faitupe?

Ia mātau, e lē o taʻu saʻo maia i le Tusi Paia taaloga faitupe. Ae peitaʻi, ua lē tuua ai i tatou e aunoa ma ni taʻiala i lenei mataupu. I lo o le avatu o ni tulafono e puleaina gaoioiga po o tulaga uma, ua uunaʻia i tatou e le Tusi Paia ina “ia malamalama po o le ā le finagalo o Ieova.” (Efeso 5:17) O le upu Eleni ua faaliliuina i le “malamalama,” e tusa ai ma le manatu o se tagata poto o le Tusi Paia o E. W. Bullinger, ua faailoa ai, o le tuufaatasia o vala o se mataupu e ala i le “mafaufau i ai, ma le malamalama e maua mai i le manatunatu loloto i ai.” O lea, ua iloa ai e se Kerisiano le finagalo o le Atua i lenei mataupu, e ala i le mafaufau i mataupu silisili o le Tusi Paia e fesootaʻi ma taaloga faitupe. A o e faitauina mau o le Tusi Paia o loo mulimuli mai, e lelei ona fesili ifo: ʻPo o lagolago e lenei mau taaloga faitupe? O le ā o faaalia mai i le Afioga a le Atua e tusa ma lona finagalo i lenei mataupu?’

Avea le Laki ma Mailei

Talu ai o taaloga faitupe e aofia ai petipetiga i ni mea e lē mautinoa, o le talitonu la i le laki, po o se mana lilo e faatonutonuina ai mea e tutupu, e telē se aafiaga aemaise lava pe a faaaogā ai tupe. O se faataʻitaʻiga, e filifilia numera laki mo pepa o le loto; e iai  upu e faasā ona fai e tagata taaalo i le paikau (taaloga faa-Saina); ma e feula maa o le taisi a o leʻi togiina i lalo. Aiseā? E masani ona talitonu tagata taaalo, atonu e fiti ai se laki.

Po o lona uiga, e lē afāina le faamoemoe, talosia ia laki i se taaloga? O lagona na o nisi tagata Isaraelu anamua. Sa latou manatu o le a latou maua ni manuia e ala i le laki. O ā ni lagona o Ieova le Atua e faatatau i lenā mataupu? Na taʻu atu e le Atua iā i latou e ala i lana perofeta o Isaia: “A o outou o ē ua tuua Ieova, o ē ua faagaloina loʻu mauga paia, o ē ua laulauina se laulau mo le atua o le Laki ma i latou foʻi o ē e faatumuina le ipu i le uaina ua suia mo le atua o Iʻuga Tuupōina.” (Isaia 65:11) O le silafaga a le Atua i le talitonu i le laki, o le ifo i tupua lava lea, ma e lē ōgatusa ma le tapuaʻiga moni. Ua atagia mai ai le faatuatua i se mana e lē moni nai lo o le Atua moni. E lē tatau la ona manatu ua suia le silafaga a le Atua.

Le Auala e Maua ai Tupe

Pe e taalo i taaloga faitupe i le initaneti, faatau se pepa loto, petipeti pe taalo i le kasino, e masani ona galo i le tagata taalo le mea e sau ai le tupe lea e tauvā i ai. E ese tupe e maua mai i taaloga faitupe i lo o tupe e maua i le galuega a se tagata, ona e ave uma e le tagata ua malo tupe ua gau a isi. * Ua taʻua i le Canada’s Centre for Addiction and Mental Health e faapea, “O le tagata ua milionea ona ua mālō i le loto, e maua mai i tupe ua gau a le faitau miliona o isi!” O ā mataupu silisili o le Tusi Paia e fesoasoani i se Kerisiano e malamalama ai i faalogona o le Atua i lenei mea?

Ua taʻua i le tulafono mulimuli o Tulafono e Sefulu na avatu i le nuu o Isaraelu: “Aua foʻi e te manaʻo i le avā a lou tuaoi, o lana tane pologa, ma lana teine pologa, o lana povi poʻa, ma lana asini, po o se isi lava mea a lou tuaoi.” (Esoto 20:17) O le manaʻo i mea a le tuaoi, o ana meatotino, oloa, ma tupe, o se agasala matuiā ma o loo taʻua faatasi ma le manaʻo i le avā a le tuaoi. Na toe taʻua mulimuli ane e le aposetolo o Paulo lenei tulafono mo Kerisiano: “Aua e te manaʻo  tele.” (Roma 7:7) Pe e lē o agasala ea se Kerisiano ona o lona manaʻo tele, i le taumafai e maua tupe ua gau a isi?

Ua taʻua e J. Phillip Vogel o le faatonu o se mekasini i taaloga faitupe, “Pe e latou [tagata taaalo] te taʻutino mai pe leai, ae a o leʻi faia se taaloga faitupe, e latou te faamoemoe ia maua se tupe telē mai sina tupe itiiti.” E latou te moomoo ia vave ona mauʻoa e aunoa ma se galuega e fai. E manino mai, e feteenaʻi lenei manatu ma le fautuaga a le Tusi Paia, e tatau i se Kerisiano ona “galue mamafa o ia, ma ia faia e ona lima galuega lelei, ina ia mafai ai ona ia avatu ni mea i se tagata mativa.” (Efeso 4:28) E manino upu a le aposetolo o Paulo: “Afai e lē fia galue se tasi, aua neʻi ʻai o ia.” Na ia toe faapea mai: “[Ia] aai i meaʻai na alu ai lo latou afu.” (2 Tesalonia 3:10, 12) Ae pe e tatau ona manatu i taaloga faitupe e tutusa ma se galuega totogi?

E ui e faigatā taaloga faitupe, ae o tupe e maua mai ai, o tupe o le manumalo ae lē ona o se galuega sa fai. I taaloga faitupe, e lē mailoa pe e te malo, ona e faalagolago tele i le laki, ma le faamoemoe e iai lava se taimi e te malo ai. I se isi faaupuga, e taumafai le tagata taalo ia maua se manuia ae leai sana mea na alu ai. I le isi itu, ua apoapoaʻia Kerisiano e galulue ma le faamaoni ina ia maua ai ni tupe. Na tusi le tupu poto o Solomona, “E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.” Ona ia toe faapea mai lea: ʻO le mea lenā, e mai i le aao o le Atua moni.’ (Failauga 2:24) Ioe, e lē tuu atu le faatuatuaga o auauna a le Atua i mea e lē moni, pe saʻili i auala e vave ona maua ai tupe, ae e faamoemoe i le Atua e maua ai le fiafia ma faamanuiaga.

“Se Mailei” e Tatau Ona ʻAlofia

E tusa lava pe malo le tagata taalo, ae e lelei ona mafaufau e lē na o le fiafia i le taimi lea ua manumalo ai, ae o āuga leaga o le a oo iai. Ua faapea mai le Faataoto 20:21: “Ua maua le tofi e ala i le matapeʻapeʻa i le amataga, a o lona lumanaʻi o le a lē faamanuiaina.” E toʻatele tagata na taaalo i le loto ma taaloga faitupe ua salamō, ona e lē o aumaia e tupe na latou manumalo ai se fiafia. Ae maʻeu le lelei o le utagia o fautuaga a le Tusi Paia, e aua tatou te faamoemoe i “ʻoa e lē tumau, ae i le Atua o lē e foaʻi maia le tele o mea iā i tatou ina ia tatou fiafia ai.”—1 Timoteo 6:17.

E iai le itu e sili atu ona leaga o taaloga faitupe i lo le manumalo ma le gau o tupe. Ua faapea mai le Afioga a le Atua: “O i latou o ē fia mauʻoa, e paʻuʻū i latou i le faaosoosoga ma le mailei, ma le tele o tuʻinanauga valea ma le tigā, ia e oo atu ai tagata i le faaumatiaga ma fano ai.” (1 Timoteo 6:9) Ua fuafuaina se mailei ina ia lavelavea ai se tagata. E lē mafaitaulia tagata e petipeti i ni tupe lāiti pe faataʻitaʻi ona taaalo mo sina taimi, ua oo ina maileia ai ma ua lē mafai ona tuu. Ua teʻa ai ma le galuega, afāina ai ē pele, ma malepelepe ai aiga.

Ina ua uma ona iloiloina le tele o mau e fesootaʻi atu i taaloga faitupe, po ua e manino la i le finagalo o le Atua i lea mataupu? Ua lapataʻia e le aposetolo o Paulo ona uso Kerisiano: “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” (Roma 12:2) E tatau ona taʻitaʻia le olaga o se Kerisiano i le finagalo o le Atua, ae lē o manatu o tagata lautele. Ona o Ieova o “le Atua fiafia,” e finagalo o ia ina ia tatou olioli i le olaga ma saʻoloto mai i iʻuga leaga o taaloga faitupe.—1 Timoteo 1:11.

[Faaopoopoga i lalo]

[Faamatalaga i le itulau 14]

E maua e auauna a le Atua tupe i le galulue ma le faamaoni

[Pusa i le itulau 13]

Fiafia Ona ua Malo

Po ua pulea oe e taaloga faitupe? Ina ua uma se iloiloga i le tali mai a tagata na manumalo ma gau i taaloga faitupe, na iloa ai e Dr. Hans Breiter, “o tupe e malo ai se tagata, e aafia ai le faiʻai e pei lava ona aafia i le fualaau faasāina o le cocaine.”

[Ata i le itulau 13]

O tupe a ai e maua e le tagata e manumalo?