Ia Mafuta Atu i le Atua

“Ua E Matuā Naunau”

O SE tulaga e ootia ai le vaai atu i sē e pele o maʻi tigāina, ma e lagona le faavauvau pe a maliu o ia. Ae e faamāfanafanaina i tatou i le iloa, e malamalama Ieova Lē na faia i tatou i o tatou tigā. E lē gata i lea, e naunau o ia e faaaogā lona malosi tele, e toe faafoʻisia ai le ola i ē ua maliliu. Mātau le faamoemoe ua faailoa mai i upu o loo i le Iopu e 14:13-15.

Manatu i le tulaga o Iopu, o se tagata e mataʻina lona faatuatua, na oo i ai tofotofoga ogaoga, e aofia ai le aveesea o ana meafaitino, le maliliu o lana fanau pele, ma maua i se maʻi tigā. I lona tigāina tele na valaau atu ai i le Atua: “Ia e natia aʻu i le Tuugamau.” (Fuaiupu e 13) Sa manatu Iopu i le tuugamau, o se mapusaga ona o le a natia ai o ia e le Atua e pei o se oloa tāua, e mapu ai mai i tigā ma faigatā. *

Po o le a iai pea Iopu i le tuugamau? E lē o le talitonuga lenā o Iopu. Ua faaauau lana tatalo: “E! . . . ia e atofaina mai se taimi mo aʻu ma manatua mai ai aʻu!” Sa faamoemoe Iopu, e na o sina taimi e iai i le tuugamau, ma o le a lē faagaloina o ia e Ieova. Sa faatusaina e Iopu le taimi o le a iai i le tuugamau e pei o se taimi ua atofaina e faatalitali ai. Mo le ā le umi? Ua faapea mai o ia: “Seʻia oo ina tuusaʻoloto aʻu.” (Fuaiupu e 14) O le uiga o le tuusaʻoloto mai i le tuugamau, ua toetū mai i le oti!

Aiseā e talitonu ai Iopu o le a tuusaʻoloto o ia? Auā ua ia iloa le alofa o Lē na faia i tatou, i ona tagata tapuaʻi faamaoni ua maliliu. Ua faapea mai Iopu: “E te valaau mai, ona ou tali atu ai lea iā te oe. Auā ua e matuā naunau i le galuega a ou aao.” (Fuaiupu e 15) Ua faailoa mai e Iopu, na faia o ia e le Atua. Ona o le Foaʻi Ola na afuafuaina Iopu i le manava o lona tinā, e mafai foʻi ona ia toe faatūina mai Iopu pe a maliu.—Iopu 10:8, 9; 31:15.

Ua tatou aʻoaʻoina se lesona e uiga i le alofa o Ieova mai i upu a Iopu: E alofa faapitoa o ia i ē e faatuatua iā te ia e pei o Iopu, ma e na te aʻoaʻo ma faatonutonu i latou ia avea ma tagata e finagalo malie i ai. (Isaia 64:8) E tāua iā Ieova ona tagata tapuaʻi faamaoni. E “naunau” o ia i ona tagata faamaoni ua maliliu. O le manatu o se tasi tagata poto e tusa o le upu Eperu e faaliliu mai ai lenei upu, e faapea, “e mautinoa o se upu e sili ona malosi e faamatala ai faalogona i se mea o loo moomoo i ai.” Ioe, e lē gata ina manatua e Ieova ona tagata tapuaʻi, ae e naunau foʻi ia toe faatutūina mai i latou i le ola.

O le mea e lelei ai ona i le tusi o Iopu, o se tusi o le Tusi Paia na uluaʻi tusia, o loo taʻua ai e Ieova lana fuafuaga e toe faatutū mai ē ua maliliu. * E finagalo o ia, ia outou toe faatasi ma ē e pele ua maliliu. O lenā manatu, ua faaitiitia ai le faanoanoa ona o sē e pele ua maliu. E lelei pe a aʻoaʻo atili e uiga i lenei Atua alofa ma le auala e na te faatonutonu ai oe, ina ia avea ma sē e vaaitino i le faataunuuina o Lona finagalo.

Faitauga Tusi Paia mo Mati

▪ Eseta 1-10–Iopu 1-15

[Faaopoopoga i lalo]