Ia Faaaʻoaʻo i lo Latou Faatuatua

“Ua Ou Talitonu”

NA FAIGATĀ iā Mareta ona talitonu ua maliu si ona tuagane pele o Lasalo. E tū mai pea i ona luma le ana o loo teu ai o ia, o loo ufiufi le gutu i se maa. Ua avea lona faanoanoa e pei o se avega mamafatū. Ua fā aso talu ona maliu Lasalo, ae ua soloatoa aso iā Mareta ona e lē gata i lona mafatia, ae ona o le pisi i le toʻatele o ē alolofa na asiasi mai.

A o lenei ua taunuu lē e sili ona pele iā Lasalo. Ina ua iloa atu e Mareta Iesu ua atili ai lona faavauvau, auā e na o ia lava sa ono mafai ona laveaʻiina lona tuagane. E ui i lea, na faamāfanafanaina Mareta ona ua oo atu Iesu i si o latou tamaʻi aai o Petania. Na faamāfanafanaina atili foʻi i le vaaia o fofoga agaalofa o Iesu, ma faalaeiauina ai i ona uiga agalelei. Na fai atu e Iesu ni fesili e fesoasoani ai iā Mareta, ia taulaʻi atu ona manatu i le toetū. O lea, na faia ai e Mareta se tala e sili ona tāua: “Ua ou talitonu o oe o le Keriso, o le Alo o le Atua, o Lē ua maliu mai i le lalolagi.”​—Ioane 11:27.

O Mareta o se tagata e malosi lona faatuatua. E lē tele se tala a le Tusi Paia e uiga iā te ia, ae e tele lesona tāua e tatou te aʻoaʻoina ai ina ia faamalosia ai lo tatou faatuatua. O lea, seʻi o tatou toe tepa i le amataga o le masaniga a Mareta ma Iesu.

“Popole ma Atuatuvale”

I ni nai masina muamua atu, o loo malosi ma fiafia Lasalo ma ua lata ina asia lo latou aiga e Iesu Keriso, o se tagata e sili ona tāua. E manatu nisi tagata suʻesuʻe, e ulumatua Mareta, ona o ia e taliina malo ma i nisi taimi, e taʻu muamua mai lona igoa. (Ioane 11:5) E lē o iloa pe na faaipoipo se isi o i latou, ae na māfana uma iā Iesu. Sa faamautū o ia i lo latou aiga pe a talaʻi i Iutaia, le nuu sa tetee i lana galuega. E mautinoa lava lona talisapaia o le lagolagosua ma le filemu o lo latou aiga.

 E tele galuega a Mareta na faia auā le tausiga o malo. E foliga mai e tele ina pisi o ia ona o sē e toʻaga, ma na faapena foʻi ina ua asiasi atu Iesu. Sa ia fuafuaina loa se ʻaiga faapitoa mo lana malo aloaʻia, ma atonu foʻi ma nisi na latou malaga faatasi atu. Sa tāua tele le talimālō i na taimi. E taunuu loa se mālō, ona faafeiloaʻi lea o ia i le sogi i ai, tatala ese ona seevae ma mulumulu ona vae, ma uu lona ulu i se uu manogi, ma faamautinoa ua lelei se moega ma lava mea taumafa. (Luka 7:44-47)

E mautinoa na tele galuega a Mareta ma Maria. O Maria e iai le uiga e mafaufau loloto, ma e mautinoa na fesoasoani o ia iā Mareta i le amataga. Ae na taunuu loa Iesu, lē toe ano loa i ni feʻau, ona sa faaaogā e Iesu le avanoa e aʻoaʻo atu ai. E ese Iesu mai i taʻitaʻi lotu o lenā taimi, ona e āva o ia i fafine ma fiafia e aʻoaʻo i latou i le Malo o le Atua, le autū o lana faiva. Na fiafia lava i ai Maria ma saofaʻi loa i luma o Iesu ma uaʻi totoʻa atu iā te ia.

Peitaʻi, e lē faigatā ona iloa atu, ua amata ona lē fiafia Mareta. Ua popole o ia, ona e leʻi faia le tele o kuka ma isi mea e tatau ona fai mo mālō. A o fai ana feʻau ma tilotilo atu i le saofaʻi lelei o lona uso ae lē fesoasoani atu, faamata o ā ona foliga ma uiga na faaalia? E lē taumatea na faaʻūʻū o ia, ona e lē mafai ona ia faia toʻatasi le mau feʻau.

Na iʻu ina lē lava le onosaʻi o Mareta ma fai atu loa iā Iesu: “Le Alii e, e te lē manatu mai ea, auā ua tuu mai e loʻu uso na o aʻu e faia nei mea uma? Seʻi e fai ane iā te ia e sau e fesoasoani mai iā te aʻu.” (Luka 10:40) Ioe, ua fai sina malolosi o ana upu. Ona ia fai loa lea iā Iesu, e faatonu Maria e alu atu e fai a la feʻau.

E lē taumatea na faateʻia Mareta i le tali a Iesu, e pei foʻi o le toʻatele ua faitau ai i  le Tusi Paia. Na fetalai atu Iesu i se leo mālū: “Mareta, Mareta e, ua e popole ma atuatuvale i le tele o mea. Ae e itiiti lava ni mea e manaʻomia, pe e na o le tasi foʻi. A ua filifilia e Maria le mea lelei, ma e lē aveesea mai iā te ia.” (Luka 10:41, 42) O lea, o le ā le uiga o ana fetalaiga? Po o lona uiga ea, o loo faamuamua e Mareta mea faaletino? Pe lē tāua iā Iesu taumafaiga a Mareta e saunia se taumafataga manaia mo ia?

E lē o lenā, auā sa silafia lelei e Iesu uiga alofa ma le loto mamā o Mareta. E lē o manatu foʻi o ia, e leaga le tele o mea e tali ai mālō, ona e leʻi leva talu ona auai i se “faigaʻai tele” sa faia e Mataio mo ia. (Luka 5:29) E lē o le taumafataga o loo saunia e Mareta le faafitauli, ae o mea o loo ia faatāuaina. O lona pupū tele e fai se taumafataga tele, na galo ai iā te ia le mea e sili ona tāua. O le ā lea mea?

Ua afio mai Iesu, le Alo e toʻatasi o Ieova le Atua, i le fale o Mareta e aʻoaʻo atu le upu moni. E sili atu ona tāua lenā mea i lo o se taumafataga manaia. E mautinoa le faanoanoa o Iesu ona o le a misia e Mareta le avanoa faa-auro e faamalosia ai lona faatuatua, ae na tuu pea o ia e fai lana filifiliga. Peitaʻi, e lē tatau ona faalavelave atu o ia iā Maria, neʻi misia ai foʻi e ia lenei avanoa.

O lea, na faaalia e Iesu le agalelei i le auala na faasaʻo ai Mareta, i le taʻua faalua o lona igoa ina ia toʻa ai o ia, ma fai atu e aua le “popole ma atuatuvale i le tele o mea.” Ua lava ni kuka se tasi pe lua, ona e sili atu meaʻai faaleagaga. E lē o finagalo Iesu e aveesea “le mea lelei” ua filifilia e Maria, o lona aʻoaʻoina lea mai iā te ia.

E tele ni lesona o lea tala mo i latou e mulimuli iā Keriso i aso nei. Ia aua neʻi faatagaina se mea e faalavelave mai ma iʻu ai ina galo lo tatou “naunau i mea faaleagaga.” (Mataio 5:3) E tatou te fia faataʻitaʻi iā Mareta i lona agaga talimālō ma lona toʻaga. Ae aua le avea le ʻpopole ma le atuatuvale’ i na mea, ma itu e galo ai mea e sili ona tāua. O le ʻauga o lo tatou faatasitasi ma uso talitonu, ina ia fefaalaeiauaʻi ma fetufaaʻi faaleagaga, ae lē ona o taumafa faaletino mananaia. (Roma 1:11, 12) I taimi e faatasitasi ai faaleagaga ma faalaeiauina ai, ua lava sina taumafa faigofie.

O se Tuagane na Maliu ae ua Toetū Mai

Pe na talia e Mareta le aʻoaʻiga alofa a Iesu? Ioe, talu ai, ina ua taʻua e le aposetolo o Ioane le tala e uiga iā Lasalo, na ia faapea mai: “E alofa Iesu iā Mareta, ma lona uso, ma Lasalo.” (Ioane 11:5) Ua mavae ni nai masina talu lenā asiasiga a Iesu i Petania. E manino mai, e leʻi teulotoina e Mareta le aʻoaʻia o ia e Iesu ae na ia talia le fautuaga. Ua ia faataatia ai foʻi se faaaʻoaʻoga lelei mo i tatou, auā o i tatou uma lava e manaʻomia faasaʻoga.

Ina ua maʻi Lasalo, e mautinoa sa pisi Mareta i le tausiga o ia. Sa taumafai ia toe malosi si ona tuagane ma faaitiitia ona tigā. Peitaʻi, na faasolosolo ina tigāina Lasalo, ae e leʻi faavaivai ai Mareta ma Maria i le tausiga o lo la tuagane. A o fai ifo le malosi o Lasalo, sa tilotilo pea i ai Mareta ma mafaufau i le tele o tausaga o la latou mafutaga, i taimi fiafia ma taimi faanoanoa.

E tusa ma le lua aso le savaliga le mamao o le aai sa talaʻi ai Iesu. Ina ua iloa e Mareta ma Maria e lē toe foʻi le maʻi o Lasalo i se lelei, na la auina atu loa le feʻau iā Iesu: “Le Alii e, silasila foʻi, ua maʻi lē ua e  alofa faapelepele i ai.” (Ioane 11:1, 3) E talitonu i laʻua, e alofa Iesu i lo la tuagane ma e mafai ona fesoasoani iā te ia. Pe faamata na faamoemoe i laʻua ia oo atu Iesu a o leʻi maliu Lasalo? Afai o lea, e leʻi taunuu lenā faamoemoe.

Sa faavauvau Mareta ma Maria ona ua maliu lo la tuagane, ma sauniuni e teu o ia ma tali le mau tagata na ō atu mai Petania ma nuu tuaoi. Ae e leʻi maua lava se tala e uiga iā Iesu, ma ua lē malamalama Mareta pe aiseā ua tuai atu ai. E mavae le fā o aso talu ona maliu Lasalo, ae logotala loa Mareta ua toeitiiti taunuu Iesu. Na faatopetope atu loa o ia e faafeiloaʻi Iesu e aunoa ma le taʻuina iā Maria.​—Ioane 11:20.

O le taimi lava na feiloaʻi ai Mareta i lona Matai, na sasaa atu loa i ai ona mafatiaga: “Le Alii e, ana e iai i inei, semanū e lē oti loʻu tuagane.” Ae sa tumau pea le faatuatua o Mareta ma faapea atu: “Ua ou iloa lava, o mea uma e te talosaga atu ai i le Atua, e foaʻi mai lava e le Atua iā te oe.” Na faalaeiau atu loa lea o Iesu e faapea: “O le a toetū lou tuagane.”​—Ioane 11:21-23.

Na manatu Mareta o loo fetalai Iesu e uiga i le toetū i le lumanaʻi, ma tali atu, “Ou te iloa e toetū o ia i le toetū i le aso mulimuli.” (Ioane 11:24) E uiga ese lona faatuatua i lenā aʻoaʻoga, talu ai o nisi taʻitaʻi lotu Iutaia, po o le ʻau Satukaio, e lē talitonu i le aʻoaʻoga o le toetū, e ui o loo manino mai i le Tusi Paia. (Tanielu 12:13; Mareko 12:18) Peitaʻi, na iloa e Mareta na aʻoaʻo e Iesu le toetū ma na ia faatutūina foʻi nisi mai i le oti, e ui e na te leʻi faatūina mai se isi na umi se taimi o i le tuugamau, e pei o Lasalo. Ae e lē o iloa e Mareta le mea o le a faia e Iesu.

Na fetalai atu lea o Iesu i upu e lē mafai ona faagaloina: “O aʻu o le toetū ma le ola.” Ioe, ua tuuina atu e Ieova i lona Alo le pule e toe faatutūina ai tagata i le lalolagi i le lumanaʻi. Na fesili atu Iesu iā Mareta: “Pe e te talitonu i lenei mea?” Na tali Mareta i upu o loo taʻua i le amataga o le mataupu, ona na talitonu o ia, o Iesu le Mesia o le Alo o Ieova le Atua, ma na valoia e perofeta lona afio mai i le lalolagi.​—Ioane 5:28, 29; 11:25-27.

Pe e tāua iā Ieova le Atua ma lona Alo o Iesu Keriso se faatuatua e pei ona iai iā Mareta? E maua se tali manino mai i mea o le a tutupu. Na nanati atu loa Mareta e saʻili mai lona uso, ma na ia vaaia le faanoanoa o Iesu a o talanoa iā Maria ma isi na ō atu. Na ia iloa atu le tagi o Iesu ona o lona tigā alofa, ma lagona atu foʻi le faatonuga a Iesu e fuli ese le maa o loo pupuni ai le tuugamau o lona tuagane.​—Ioane 11:28-39.

Na faamanatu atu e Mareta, atonu ua manogi le tino o Lasalo ona ua fā aso talu ona maliu. Ae na fetalai atu Iesu: “Po ou te leʻi fai atu ea iā te oe, afai e te talitonu, e te vaai i le mamalu o le Atua?” Na talitonu Mareta, ma na ia molimauina le mamalu o Ieova le Atua. O le taimi lava lea na tuuina atu ai e le Atua le mana i lona Alo e toe faatū Lasalo mai i le oti! E mautinoa e leʻi faagaloina e Mareta nei mea ofoofogia seʻia oo i lona maliu, aemaise le valaau atu o Iesu i se leo malosi, “Lasalo e, inā sau ia i fafo!” A o tau savali mai Lasalo i fafo, na lagona atu le gasēsē ona o loo sai pea o ia i ʻie. Ina ua fetalai Iesu, “Ia tatala o ia ma tuu atu e alu,” na tamomoʻe atu loa Mareta ma Maria ma fusi mai lo la tuagane. (Ioane 11:40-44) Na vave ona mou atu le faanoanoa o Mareta!

Ua faaalia i lenei tala, e taunuu moni lava le toetū, ma o se aʻoaʻoga e faamāfanafanaina  ai mai i le Tusi Paia, ma ua faamaonia i mea na tutupu anamua. E naunau Ieova ma lona Alo e tauia tagata faatuatua, e pei o Mareta, Maria, ma Lasalo. O le a e maua foʻi se taui matagofie pe a e atiaʻe se faatuatua malosi e pei o Mareta. *

“Ua Tautua Mareta”

E faatasi ona toe taʻua Mareta i le Tusi Paia, i le amataga o le vaiaso mulimuli o Iesu i le lalolagi. Na silafia lelei e Iesu faigatā o i luma, ma na filifili ai e toe faamautū i Petania ona e maua ai lona filemu. E na o le lua maila (3 km) le mamao mai i Ierusalema. Sa tausasami Iesu ma Lasalo i le fale o Simona le lepela, ma o le taimi mulimuli lea ua toe taʻua ai Mareta, a o tautua ai i inā.​—Ioane 12:2.

Maʻeu le toʻaga o lenei fafine, ona o le taimi muamua ma le taimi mulimuli na taʻua ai Mareta i le Tusi Paia, o loo galue. Ua faamanuiaina faapotopotoga Kerisiano i aso nei ona o tuafāfine e pei o Mareta, e taofimau i le upu moni ma limafoaʻi, ma faatino lo latou faatuatua e ala i le auauna atu i isi. E mautinoa na faaauau ona faia faapea e Mareta, ma na aogā lea iā te ia, auā o le a feagai ma ni mafatiaga mulimuli ane.

E leʻi umi ae oo se maliu tigā iā Iesu lona Matai pele. E lē gata i lea, o taʻitaʻi lotu faafiaamiotonu na fasiotia Iesu, sa taumafai foʻi e fasioti Lasalo, ona sa avea le toetū o Lasalo ma mea e faamalosia ai le faatuatua o le toʻatele. (Ioane 12:9-11) E mautinoa foʻi, na faamutaina e le oti le mafutaga a Mareta, Maria ma Lasalo. E lē o taʻua i le Tusi Paia le taimi na tupu ai na mea faigatā, ae e mautinoa na mafai e Mareta ona onosaia ona o lona faatuatua. O se faaaʻoaʻoga lelei lea mo Kerisiano.

[Faaopoopoga i lalo]

[Ata i le itulau 11]

E ui ina faavauvau Mareta, ae na uaʻi atu iā Iesu a o talanoa mai i mataupu e faamalosia ai lona faatuatua

[Ata i le itulau 12]

E ui ina “popole ma atuatuvale” Mareta, ae na ia talia le faasaʻoina o ia

[Ata i le itulau 15]

Na tauia le faatuatua o Mareta iā Iesu ina ua faatūina mai lona tuagane