Le Tala Lelei mo Ē e Matitiva

UA FAAMAUTINOA mai e le Afioga a le Atua: “E lē faagaloina pea o lē e mativa.” (Salamo 9:18) Ua faapea mai foʻi e faatatau i Lē na faia i tatou: “Ua e faamafola lou aao ma faamalie le manaʻo o mea ola uma lava.” (Salamo 145:16) E lē o se miti lea faamoemoe, auā e mafai e le Atua o Lē e ona le malosi uma lava ona aveesea le mativa. O lea la, o ā mea e manaʻomia e i latou e matitiva?

Na taʻua e se tagata Aferika e tomai i mataupu tau tamaoaiga e faapea, ina ia aveesea le mativa o atunuu, e manaʻomia ai sē e pule ma le alofa ma e iai le mana e faia ai suiga aogā. O lona uiga la, ina ia foʻia le mativa o le lalolagi, e manaʻomia ai sē e pulea le lalolagi atoa ina ia tutusa manuia e maua e atunuu uma. Aemaise ia iloa ona taulima o tatou uiga manatu faapito, ona o le pogai lea o le mativa. Faamata o fea e maua ai se pule faapena?

Na auina mai e le Atua Iesu ma le tala lelei mo ē e matitiva. Ina ua tulaʻi Iesu e faailoa atu lona tofiga mai i le Atua, na ia faitau e faapea: “Ua i oʻu luga le agaga o Ieova, auā ua ia faauuina aʻu e folafola le tala lelei i ē e matitiva.”​—Luka 4:16-18.

O le ā le Tala Lelei?

Ua tofia e le Atua Iesu e avea ma Tupu, o lea le tala lelei. O ia o le Pule e sili ona lelei e aveesea le mativa, auā (1) o le a pule i tagata uma lava ma e iā te ia le mana e faatino ai lana pulega; (2) e alofa o ia i ē matitiva ma aʻoaʻoina ona soo ia tausia i latou; ma lona (3) e na te aveesea uiga manatu faapito na fananau mai ma i tatou, o le pogai lea o le mativa. Seʻi o tatou iloiloina ni vaega se tolu o le tala lelei.

1. Le pulega a Iesu i atunuu uma Ua faapea mai le Tusi Paia e uiga iā Iesu: “Ua tuuina atu iā te ia le pule, . . . ina ia auauna iā te ia o tagata ma nuu ma gagana uma.” (Tanielu 7:14) E tele aogā o le pulea o le lalolagi uma e se malo e tasi. O le a lē toe tauvā pe feʻainaʻi malo i punaʻoa o le laueleele. E tutusa manuia o le a maua e tagata uma. Na faamautinoa mai e Iesu, o le a avea o ia ma Pule i le lalolagi, ma e iā te ia le mana e faatino ai lana pulega i le faapea mai: “Ua tuuina mai iā te aʻu le pule uma i le lagi ma le lalolagi.”​—Mataio 28:18.

2. E alofa Iesu i ē e matitiva Sa faaalia e Iesu le alofa i ē matitiva a o talaʻi i le lalolagi. O se faaaʻoaʻoga, o se fafine na faaalu uma ana tupe auā se togafitiga o lona maʻi, na paʻi atu i le ofu tele o Iesu ona o le fia mālōlō. E 12 tausaga o maʻi o ia i le punatoto, ma e mautinoa le matuā vaivai ai o lona toto. E tusa ai o le tulafono, e lē mamā se isi e paʻi atu iā te ia. Peitaʻi, na alofa i ai Iesu ma faapea atu: “Loʻu afafine e, ua e malosi ona o lou faatuatua. Alu ia ma le filemu, ma ia e mālōlō mai lou maʻi tigā.”​—Mareko 5:25-34.

O le malolosi o aʻoaʻoga a Iesu na suia ai amioga a tagata ina ia latou faaalia foʻi uiga alofa. O se faaaʻoaʻoga, seʻi mātau le tali a Iesu i se tamāloa na fia iloa le auala e maua ai le finagalo malie o le Atua. Na iloa lelei e le tamāloa e finagalo le Atua ina ia tatou alolofa i o tatou tuaoi, ae na ia fesili iā Iesu: “O ai la loʻu tuaoi?”

Ona faamatala lea e Iesu o se talafaatusa  lauiloa e uiga i se tamāloa na faimalaga mai i Ierusalema i Ieriko, o lē na faoa e tagata faomea ana mea ma tuua “ua toeitiiti a oti.” Na alu ane se ositaulaga ma iloa atu le tamāloa ona ui ane lea i le isi itu, ma e faapena foʻi se sā Levī. “A ua alu atu le tasi tagata Samaria, ua tau atu i le mea o iai o ia, ua iloa atu o ia, ona mutimutivale ai lea o lona alofa iā te ia.” Na ia faamamā i ona manuʻa, ave i le faletalimālō ma totogi lē e ana e tausia le tamāloa. Ae na fesili atu Iesu: “O ai . . . e foliga mai o le tuaoi o le tagata lea na maua e le ʻaufaomea?” O le tali: “O lē na alofa mutimutivale iā te ia.” Ona faapea atu lea o Iesu: “Inā alu ia, ma ia faapea ona e faia.”​—Luka 10:25-37.

Ua aʻoaʻoina e i latou ua avea ma Molimau a Ieova aʻoaʻoga a Iesu ma suia ai o latou manatu e uiga i le fesoasoani i isi. O se faataʻitaʻiga, o se tusitala mai Latvia na galue i nofoaga o faasalaga i Potma i Rusia mai le 1960-1970. Ina ua maʻi o ia, na ia taʻua i lana tusi Women in Soviet Prisons e faapea: “Na lelei le tausiga o aʻu e Molimau a Ieova. Ou te lē maua se tausiga e sili atu i lo lenā.” Na ia faaopoopo mai: “E manatu Molimau a Ieova o lo latou tiute le fesoasoani i tagata uma, e ui ina ese le lotu po o le atunuu e sau ai.”

Sa leai ni galuega po o ni tupe maua a nisi o Molimau a Ieova i Ancón i Ecuador ona ua faalētonu le tamaoaiga. O lea, na filifili ai nisi o Molimau e suʻe ni tupe mo i latou e ala i le saunia o meaʻai e faatau atu i tagata faifaiva pe a aʻe mai o latou faiva o le pō (ata i le itu taumatau). Na galulue uma le faapotopotoga e aofia ai ma fanau. Na amata la latou galuega i le tasi i le vaveao, ina ia aʻe mai faiva i le fā i le vaveao ae ua vela atu taumafa. O tupe na maua na faasoasoa mo le ʻauuso e tusa ma o latou manaʻoga.

O le malosi o faaaʻoaʻoga ma aʻoaʻoga a Iesu, ua suia ai uiga o tagata i le fesoasoani atu i isi e pei ona faaalia i na tala.

3. Le mana o Iesu e suia ai uiga o tagata Ua taatele le uiga faaletagata o le manatu faapito ma e taʻua e le Tusi Paia, o le agasala. Na tusi le aposetolo o Paulo: “O lenei ua ou iloa le tulafono ua iā te aʻu; pe a ou loto atu e fai le mea lelei, ae ua iā te aʻu le leaga.” Ona ia fesili lea: “O ai na te laveaʻiina aʻu mai i le tino e iʻu ai i loʻu oti? Ia faafetaia le Atua ona . . . o Iesu Keriso.” (Roma 7:21-25) Ua faatatau le tala a Paulo i le auala e laveaʻia ai e le Atua e ala iā Iesu tagata tapuaʻi moni mai i le agasala e iai le manatu faapito, le pogai autū o le mativa. E faapefea?

Ina ua mavae atu le papatisoga o Iesu, na faailoa atu e Ioane le Papatiso Iesu e faapea: “Faauta! O le Tamaʻi Mamoe a le Atua, o lē e na te aveeseina le agasala a le lalolagi!” (Ioane 1:29) E lē o toe mamao ona tumu lea o le lalolagi i tagata ua tuusaʻoloto mai i le agasala, e aofia ai le manatu faapito. (Isaia 11:9) Auā ua aveesea e Iesu le pogai o le mativa.

Maʻeu le olioli pe a mafaufau i le taimi o le a maua ai mea uma e tatou te manaʻomia. Ua faapea mai le Afioga a le Atua: “E taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.” (Mika 4:4) Ua faailoa mai i na upu, o le a iai galuega e faamalieina ai, le puipuiga ma le tele o avanoa e fiafia ai i se lalolagi e aunoa ma le mativa auā le viiga o Ieova.