Ia Mafuta Atu i le Atua

O ā ni Lagona o Ieova i Mea e Tatou te Faia?

FAAMATA e lagona e Ieova le fiafia po o le tigā ona o mea e tatou te faia? Sa manatu tagata popoto anamua, e lē aafia le Atua i mea e tatou te faia, ona e leai ni ona faalogona. Ae ua ese ai le aʻoaʻoga a le Tusi Paia. O loo taʻua ai, e alofa mai Ieova ma e manatu mai iā i tatou ma mea e tatou te faia. Seʻi iloilo manatu o loo aumaia i le Salamo 78:40, 41.

Ua taʻua i le Salamo e 78 le auala na feagai ai le Atua ma le nuu o Isaraelu. Na folafola atu e Ieova i le nuu o Isaraelu le avea o i latou ma ona nuu ina ua ia laveaʻiina i latou mai Aikupito. Afai e latou te usitaʻia ana tulafono, o le a avea i latou ma ana “oloa tāua” e faatinoina ai lona finagalo. Na ioe i ai le nuu ma osia ai e le Atua le feagaiga o le Tulafono ma i latou. Pe na tausisi le nuu i la latou upu?—Esoto 19:3-8.

Ua faapea mai le faisalamo: “Na masani ona latou fouvale iā te ia i le toafa.” (Fuaiupu 40) E le gata i lea, “na latou tofotofo pea lava pea i le Atua.” (Fuaiupu 41) O loo taʻua e le faisalamo le masaniga leaga a Isaraelu, lea na amata a o leʻi leva ona laveaʻiina i latou mai i Aikupito. Sa latou muimui i le Atua ona na latou lē talitonu e mafai ona tausia e ia i latou. (Numera 14:1-4) Ua taʻua i se lomifefiloi mo ē e faaliliuina le Tusi Paia, o le faaupuga “fouvale iā te ia,” e iai foʻi le uiga o le “faauamaaa i le Atua,” pe “fai atu ʻLeai’ i le Atua. ” Peitaʻi o le alofa mutimutivale o Ieova na ia faamagaloina ai ona tagata ina ua latou salamō, ae na latou toe foʻi i a latou amioga masani, o le fouvale ma faaonoono iā te ia.​—Salamo 78:10-19, 38.

O ā ni lagona o Ieova i le femoumouaʻi ma le fouvale o ona tagata? Ua taʻua i le fuaiupu e 40, “na latou faatigā foʻi iā te ia.” Ua faaupu faapea e se isi tusi: “O amioga a tagata Eperu na faatigā ai i le Atua, e pei o se tamaitiiti e faalogogatā ma faatuʻiese.” E pei ona tigā mātua ona o mea e fai e se tamaitiiti faalogogatā, e faapena foʻi ona faatigā le nuu fouvale o Isaraelu i “Lē e Paia o Isaraelu.”​—Fuaiupu e 41.

O le ā se lesona mo i tatou mai i lenei salamo? Ua faalaeiauina i tatou ona ua faaalia ai, e alofa Ieova i ona tagata ma e lē fiugofie iā i latou. Ae e tāua ona manatua, o mea e tatou te faia e lagona ai e Ieova le fiafia po o le tigā. O le ā la sou manatu i lea mea? Pe e lē uunaʻia ai ea oe e faia le mea tonu?

Ia filifili e faia le mea tonu ma faafiafia o ia, ae aua le faia mea sesē ona e tigā ai lona finagalo. O le mea tonu lenā ua ia finagalo e faia e ona tagata tapuaʻi: “Loʻu atalii e, ia atamai oe ma faafiafia ai loʻu loto.” (Faataoto 27:11) O le mea sili e tatou te faia mo Ieova, o le ola lea i se auala e fiafia ai lona finagalo.

Faitauga Tusi Paia mo Iulai:

▪ Salamo 60-86

[Ata i le itulau 10]

O le mea sili e tatou te faia mo Ieova, o le ola lea i se auala e fiafia ai lona finagalo.