Ua Fesili Mai le ʻAufaitau . . .

Pe e faasili e le Atua se lanu po o se ituaiga o tagata?

▪ E leai, auā ua faamanino mai i le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galuega 10:34, 35.

E sili ona maualuga manatu o le Atua e tusa o lenei mataupu. E manatu le toʻatele o tagata e sili lo latou lanu po o le ituaiga e ō mai ai, i lo o isi. Peitaʻi ua atagia mai i na uiga faailogatagata, manatu o le saienitisi e igoa iā Charles Darwin, o lē na tusi e faapea: “E iai se taimi i le lumanaʻi, . . . o le a faaumatia ai e atunuu malamalama atunuu faapaupau ma pulea mea uma.” O le tulaga leaga ua iai, ua sauāina nisi tagata ma o latou malo e isi ituaiga ona o le manatu, e sili i latou.

Pe e talafeagai ona manatu e sili lou ituaiga? Po ua faamaonia mai e saienitisi e sili nisi ituaiga i lo o isi? Ua faamatala mai e se saienitisi e igoa iā Bryan Sykes: “E leai se faamaoniga mai sela o ituaiga e lagolagoina ai le sili atu o isi i lo o nisi. . . . E masani ona fesiligia aʻu pe e iai se sela faapitoa mo tagata Eleni po o tagata Italia, ae o le mea moni, e leai. . . . E vavalalata sootaga o ituaiga uma o tagata eseese.”

Ua ōgatusa na manatu ma mea ua tatou faitau ai i le Tusi Paia. O loo taʻua ai, e tasi le tane ma e tasi foʻi le fafine na faia e le Atua, ma na tupuga mai iā i laʻua tagata uma o le lalolagi. (Kenese 3:20; Galuega 17:26) O lona uiga, e tutusa tagata uma i le silafaga a le Atua.

E lē tāua iā Ieova le lanu po o foliga o le tagata, ae e tāua iā te ia mea o i le loto. Na fetalai o ia: ʻAuā o le tagata e vaai i le tino; a o aʻu ou te vaai i le loto.’ (1 Samuelu 16:7) E matuā faalaeiauina i tatou i lenā manatu. I le ā le itu?

E tusa po o le ā le ituaiga e tatou te ō mai ai, ae e lē mafai ona suia le tele o mea i o tatou foliga vaaia e tatou te lē o fiafia i ai. Ae e mafai ona tatou suia mea e sili ona tāua, o manatunatuga ma lagona o o tatou loto. (Kolose 3:9-11) O le mea moni, o i tatou uma lava e iai le lagona e sili pe maualalo i tatou i lo o isi ituaiga. Peitaʻi, e ao ona tatou taumafai malosi e aveese na faalogona mai i o tatou loto, ona e lē o tusa ai ma le finagalo o le Atua.​—Salamo 139:23, 24.

E tatou te maua le fesoasoani a Ieova, pe a tatou pei o ia i le auala e manatu ai iā i tatou faapea ma isi. Ua faamanatu mai i le Tusi Paia: “E silasila solo fofoga o Ieova i le lalolagi uma, ina ia faaali atu lona malosi iā i latou e atoatoa o latou loto iā te ia.” (2 Nofoaiga a Tupu 16:9) O le mea moni lenā e tusa lava po o le ā le ituaiga e te sau ai.