O Ai ua Māfua ai Mea Leaga Uma?

O NA o sauāga faamanu na vaaia e se taʻitaʻi o se ʻautau o le Malo Aufaatasi i Rwanda i le 1994 na ia faapea mai ai, na pei ua ia vaai i le tiapolo. Na taʻua foʻi e se tasi na vaaitino i na sauāga ogaoga: “Afai e lē talitonu se tasi e iai Satani, e lelei la pe a alu i Rwanda ma tagaʻi i nofoaga na lafoaʻi ai le tele o tino oti.” Pe moni lava o le Tiapolo na māfua ai na sauāga faamanu?

E manatu le toʻatele, o le amioleaga ma sauāga faamoʻamoʻa, e lē o faapogaia e se foafoaga agaga leaga e lē vaaia. O loo talitonu le toʻatele ua māfua nei mea ona o se uiga leaga na fananau mai ma i tatou, ma ua avea o tatou lava faanaunauga lē lelei ma pogai autū o mea leaga. Ae ua fafau aʻe e isi se manatu e faapea o loo iai se vaega malosi o tagata mauʻoa, e pei o se faalapotopotoga faalilolilo o loo taumafai e pulea le lalolagi, e ala i le faasesēina o tagata mo le tele o tausaga. I le taimi e tasi, o loo tuuaʻia e isi ia taʻitaʻi ma malo o atunuu, mo faiga lē tonu ma mafatiaga uma o loo latou vaaia.

Ae o le ā sou manatu? Aiseā ua faateteleina ai i le lalolagi i aso nei mea leaga, sauāga faamanu, ma mafatiaga e ui i taumafaiga ina ia taofia? Aiseā e foliga mai ai ua paʻū atu le fanau a tagata i se ala e faaleagaina ai, ma faataligatuli e ui i le tele o lapataʻiga? O ai ua māfua ai nei mea uma? O ai moni lava o loo pulea le lalolagi? E ono faateʻia oe i le tali.