E Mafai e Aʻoaʻoga Moni Ona Suia Lou Olaga

ATONU na e faalogo pe aʻoaʻoina foʻi oe i se tasi o nei aʻoaʻoga pepelo e uiga i le Atua, lea e pei ona faaalialia e lenei faasologa o mataupu. Peitaʻi, atonu e te faatalatū lava e suia ou talitonuga, aemaise pe afai na e talitonu lava i se tasi o nei aʻoaʻoga mo se taimi umi.

E faigofie ona malamalama i lenā tulaga. E lē tāua i nisi o lotu le faatusatusaina o a latou aʻoaʻoga ma le aʻoaʻoga a le Tusi Paia. A o isi ua taumafai e puipuia o latou talitonuga sesē, e ala i le faapea mai e lavelave le Tusi Paia, ma e lē tatau ona malamalama ai fua tagata. Peitaʻi, o le toʻatele o soo o Iesu o ni tagata faatauvaa e leʻi lava ni aʻoaʻoga, ma sa faigofie ona taliaina mea na aʻoaʻoina ai i latou.—Galuega 4:13.

Atonu e te manatu ua lē lava lou faatuatua, pe afai e te iloiloina totoʻa pe e moni ou talitonuga. Ae pe e talafeagai le mafaufau faapea o le a lē fiafia mai le Atua pe a e saʻili i le Tusi Paia, o lana feʻau lea mo le fanau a tagata, ina ia malamalama ai i lona finagalo? E leai, auā o loo faalaeiauina oe i lana Afioga ina ia suʻesuʻe le Tusi Paia, e ala i le faapea mai: “Ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.”—Roma 12:2.

O le aʻoaʻoina o le upu moni e uiga i le Atua, e lē na o le tau ina ia e iloa ai se isi mea fou, ae e mafai foʻi ona suia ai lou olaga mo le lelei. (Ioane 8:32) O Deanne lea na taʻua i le mataupu muamua, ua faamalosia nei lona faatuatua i le Afioga a le Atua. Ua ia faapea mai: “Na faatoʻā ou iloaina le manino o le manatu o le Tusi Paia ina ua amata ona ou suʻesuʻe i ai. O lea ua ou iloa nei, e lē gata o Ieova o se Atua e māfana, ae o ia foʻi o loʻu Tamā alofa i le lagi. Ua iai se uiga moni o loʻu olaga.”

Atonu na e suʻesuʻeina muamua le Tusi Paia ma le manatu e faapea e leai se aogā. Afai o lea, aua le fiu. O le taumafai ina ia malamalama i le Tusi Paia, ae ua uma ona aʻoaʻoina oe i aʻoaʻoga pepelo e uiga i le Atua, ua pei lava o le taumafai e faaleleia se masini e ala i le faaaogāina o se tusi o faatonuga e lē talafeagai mo le masini. Atonu e te faaleleia nisi vaega o le masini, ae o le a e fiu pe afai e lē mafai ona e faaleleia ona vaega uma. O lea, ia faaaogā le tusi saʻo o faatonuga, ona faatoʻā mafai lea ona e faaleleia atoatoa le masini.

Pe e te fia iloa le aʻoaʻoga moni e uiga i le Atua? E matou te faalaeiau oe e faafesootaʻi Molimau a Ieova i la outou vaipanoa, pe tusi atu i se tuatusi talafeagai o loo i le itulau e 4 o lenei mekasini, mo se suʻesuʻega mai i le Tusi Paia e aunoa ma se totogi.

[Faamatalaga faaopoopo i le itulau 9]

“Ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.”—ROMA 12:2