O Anafea na Faaumatia ai Ierusalema Anamua?—Vaega Muamua
O Anafea na Faaumatia ai Ierusalema Anamua?—Vaega Muamua
Māfuaaga e Tāua ai; o Mea ua Faaalia Mai i Faamaoniga
O le mataupu muamua lenei o se faasologa o mataupu e lua o loo i lomiga o “Le Olomatamata,” lea o loo talanoaina ai fesili faaleaʻoaʻoga, e uiga i le tausaga tonu na faaumatia ai Ierusalema anamua. O lenei faasologa o mataupu e lua, o loo faaalia ai ni tali na faia i ai saʻiliʻiliga māeʻaeʻa, ma e faavae mai i le Tusi Paia, e tali ai fesili ua lē mautonu ai nisi o le ʻaufaitau.
“E masani ona manatu tusitala o talafaasolopito ma ē e suʻesuʻeina toega o mea, na faaumatia Ierusalema i le tausaga e 586 po o le 587 T.L.M. * Aiseā e talitonu ai Molimau a Ieova na tupu lenā mea i le tausaga e 607 T.L.M.? O le ā le faavae o lo outou talitonuga e faatatau i lea tausaga?”
O LE faamatalaga lenā a se tasi o le ʻaufaitau. Ae aiseā e naunau ai e fia iloa le tausaga tonu na faaumatia ai e le tupu Papelonia o Nepukanesa II, le aai o Ierusalema? Muamua lava, ona na faailogaina ai se suiga mataʻina e tāua i le talafaasolopito o tagata o le Atua. Na taʻua e se tusitala o talafaasolopito, na oo atu lenā mea i “se faalavelave mataʻutia, ioe, o se faalavelave e matuā mataʻutia.” O le tausaga lenā na faaleagaina ai le malumalu, lea sa avea ma nofoaga autū o le tapuaʻiga i le Atua o Lē e ona le malosi uma lava, mo le silia ma le 400 tausaga. Na taʻua ma le faanoanoa e se faisalamo i le Tusi Paia: “Le Atua e, . . . ua latou faaleagaina lou malumalu paia. Ua latou faia foʻi Ierusalema ma faupuʻega o mea ua faatafunaina.”—Salamo 79:1. *
Lona lua, o le a faamalosia ai lou maufaatuatuaina o le Afioga a le Atua, pe a e malamalama i le tausaga tonu lava na amata ai lenei “faalavelave matuā mataʻutia,” ma le auala na mafai ai e le toe faafoʻisiaga o le tapuaʻiga moni i Ierusalema ona faataunuuina ai se valoaga patino i le Tusi Paia. Ae aiseā la e talitonu ai Molimau a Ieova i se tausaga, lea e 20 tausaga e ese mai ai i le faasologa o taimi e talitonu i ai le toʻatele? O le mea moni, ona o faamaoniga mai i le Tusi Paia lava ia.
“Tausaga e Fitu Sefulu” mo Ai?
Mo le tele o tausaga a o leʻi oo i le faaumatiaga o Ierusalema, na faailoa mai ai e le perofeta Iutaia o Ieremia se fesoasoani sili, ina ia malamalama ai i le faasologa o taimi o loo i le Tusi Paia. Na ia lapataʻia “ē uma o loo nonofo i Ierusalema” e faapea: “E avea lenei laueleele uma ma mea e faatafunaina, . . . e auauna foʻi nei atunuu i le tupu o Papelonia i tausaga e fitu sefulu.” (Ieremia 25:1, 2, 11) Na ia taʻua atili: “O le mea lenei ua fetalai mai ai Ieova, ʻPe a atoa tausaga e fitu sefulu i Papelonia, ona ou liliu atu lea iā te outou, ma ou faataunuuina iā te outou laʻu upu lelei i le toe faafoʻisia mai o outou i lenei mea.’” (Ieremia 29:10) O le ā le tāua o “tausaga e fitu sefulu”? E faapefea ona fesoasoani lenei vaitaimi iā i tatou e iloa ai le tausaga na faaumatia ai Ierusalema?
Nai lo o le faapea mai e 70 tausaga “i Papelonia,” ae o loo taʻua i le tele o faaliliuga o le Tusi Paia e faapea, “mo Papelonia.” (New International Version) O lea la, e fai mai nisi tusitala o le talafaasolopito, o loo faatatau atu le vaitaimi o le 70 tausaga i le Emepaea o Papelonia. E tusa ai ma isi faamaumauga o faasologa o taimi, na pulea e le ʻau Papelonia laueleele o Iuta anamua ma Ierusalema pe ā ma le 70 tausaga, mai i le 609 T.L.M. seʻia oo i le 539 T.L.M. ina ua faatoʻilaloina le laumua o Papelonia.
Peitaʻi, o loo faaalia i le Tusi Paia o le a avea le 70 tausaga o se vaitaimi o faasalaga ogaoga mai i le Atua, lea na taulaʻi tonu lava i tagata o Iuta ma Ierusalema, o ē sa osia se feagaiga e usitaʻia o Ia. (Esoto 19:3-6) Ina ua latou mumusu e suia o latou ala leaga, ona fetalai atu lea o le Atua: “Ou te auina atu ai le feʻau . . . iā Nepukanesa . . . le tupu o Papelonia, . . . e tau ma lenei nuu, o ē o loo nonofo ai, ma atunuu uma o loo siʻomia ai.” (Ieremia 25:4, 5, 8, 9) E ui lava e mafatia ai foʻi atunuu e lata ane i le maʻemaʻeā o Papelonia, ae na taʻua e Ieremia le faaumatiaga o Ierusalema ma le 70 tausaga e faaaunuua ai, o le “faasalaga . . . [o] loʻu nuu,” ona ua “matuā agasala lava” Ierusalema.—Auega 1:8; 3:42; 4:6.
E tusa ai la ma le Tusi Paia, o le 70 tausaga o se vaitaimi lea o faasalaga mo Iuta, ma na faaaogāina e le Atua le ʻautau a Papelonia e faaoo mai ai lenei faasalaga ogaoga. Peitaʻi, na fetalai atu le Atua i tagata Iutaia: “Pe a māeʻa tausaga e fitu sefulu, . . . o le a ou . . . toe aumaia outou i lenei nofoaga”—le laueleele o Iuta ma Ierusalema.—Ieremia 29:10, New International Version.
O Anafea Na Amata ai “Tausaga e Fitu Sefulu”?
Na tusi le tusitala o talafaasolopito o Esera, o lē na soifua ina ua mavae le 70 tausaga talu ona faataunuuina le valoaga a Ieremia, e uiga i le tupu o Nepukanesa e faapea: “O e na totoe na sao i le pelu na tāfea e ia i Papelonia; sa i ai latou ia te ia ma ona atalii e fai ma auauna ua oo i ona po o le pule o le malo o Peresia; ina ia taunuu le afioga a le ALII na fai mai e Ieremia, ua oo ina faaatoatoaina e le laueleele ona sapati; o aso uma sa gaogao ai sa fai ai sapati, e faaatoatoaina o tausaga e fitugafulu.”—2 Nofoaiga a Tupu 36:20, 21, O le Tusi Paia Samoa—Lomiga 1969.
O lea la, na tatau ona avea le 70 tausaga o se vaitaimi e fiafia ai tagata o Iuta ma Ierusalema i mālōlōga o le “sapati.” O lona uiga, sa lē tatau ona galueaʻiina le laueleele—e lē lūlūina ni fatu pe teuina foʻi togāvine. (Levitiko 25:1-5, New International Version) Ona o le lē usiusitaʻi o tagata o le Atua, lea atonu na aofia i a latou agasala le lē taulau ona faamanatuina o tausaga o le Sapati, na faasalaina ai i latou e ala i le lē galueaʻiina ma le faatafunaina o lo latou laueleele mo le 70 tausaga.—Levitiko 26:27, 32-35, 42, 43.
O anafea na faatafunaina ma lē galueaʻiina ai le laueleele o Iuta? E pe ā ma le sefulu tausaga e va ai taimi e lua na osofaʻia ai Ierusalema e le ʻautau a Papelonia, lea na taʻitaʻia e Nepukanesa. O anafea na amata ai le 70 tausaga? E mautinoa lava e leʻi amata i le taimi muamua na siʻomia ai Ierusalema o le a osofaʻia e ʻautau a Nepukanesa. Aiseā? E ui lava e toʻatele tagata mai i Ierusalema na ave faapagota e Nepukanesa i Papelonia, ae na iai pea tagata o le laueleele e na te leʻi aveina. E na te leʻi faaumatia foʻi le aai. Mo le tele o tausaga talu mai lenā taimi muamua na ave faapagota ai tagata, na galueaʻiina ai e ē na totoe i Iuta, po o “tagata faatauvaa o le nuu,” le laueleele ina ia maua ai mea mo lo latou ola. (2 Tupu 24:8-17) Peitaʻi, e leʻi umi ae matuā suia le tulaga o mea.
Na toe foʻi ʻautau a Papelonia i Ierusalema, ona o se fouvalega a tagata Iutaia. (2 Tupu 24:20; 25:8-10) Na latou faaumatia le aai, e aofia ai ma lona malumalu paia, ma ave faapagota le toʻatele i Papelonia. I totonu o le lua masina, “o tagata uma lava [o ē na iai pea i le laueleele] mai i ē e iti e oo i ē e matutua, faatasi ma taʻitaʻi o ʻautau, ua sosola atu i Aikupito, ona o le fefefe i ʻautau a Papelonia.” (2 Tupu 25:25, 26, New International Version) O lea la, i lenā tausaga, i le masina lona fitu faa-Iutaia o Tisahiri (Setema/Oketopa), na faatoʻā mafai ai ona olioli tagata Iuta lea sa faatafunaina ma lē galueaʻiina lo latou laueleele, i mālōlōga o le Sapati. Na fetalai atu le Atua i tagata Iutaia na sulufaʻi i Aikupito, e ala iā Ieremia: “Ua outou vaaia le mala uma na ou aumaia i luga o Ierusalema ma luga o aai uma o Iuta, ma ua avea nei o se mea ua faatafunaina i le aso nei, ua leai foʻi se isi e nofo ai.” (Ieremia 44:1, 2) Ua iā i tatou māfuaaga e talitonu ai o i inā na amata ai le vaitaimi o le 70 tausaga. O le ā la lenā tausaga? Ina ia maua le tali, e ao ona tatou iloa po o anafea na iʻu ai lenā vaitaimi.
O Anafea Na Iʻu ai “Tausaga e Fitu Sefulu”?
O le perofeta o Tanielu, o lē na soifua pea seʻia oo “ina pule le malo o Peresia,” na iai i Papelonia ma na ia faamatalaina le taimi e iʻu ai le 70 tausaga. Na tusi o ia: “O aʻu o Tanielu na ou iloa ai i tusi le faitau o tausaga, e tusa ai ma le fetalaiga a le ALII iā Ieremia le perofeta, ia faaatoaina ai le faatafunaina o Ierusalema, o tausaga e fitu sefulu ia.”—Tanielu 9:1, 2, English Standard Version.
Sa toe mafaufau Esera i valoaga a Ieremia, ma na ia faasino atu le faaiʻuga o “tausaga e fitugafulu,” i le taimi na “faaosoina ai e le ALII le manatu o Kuresa le tupu o Peresia ina ia faia se folafolaga.” (2 Nofoaiga a Tupu 36:21, 22, New International Version) O anafea na faasaʻolotoina ai tagata Iutaia? I “le tausaga muamua o Kuresa le tupu o Peresia,” na avatu ai sana poloaʻiga ina ia faasaʻoloto tagata Iutaia. (Tagaʻi i le pusa “O se Tausaga Iloga i le Talafaasolopito.”) O lea, i le tau e afu ai mea i le 537 T.L.M., na toe foʻi ai tagata Iutaia i Ierusalema ina ia toe faafoʻisia le tapuaʻiga moni.—Esera 1:1-5; 2:1; 3:1-5.
E tusa ai la ma le faasologa o taimi i le Tusi Paia, o le 70 tausaga o se vaitaimi moni lava, lea na faaiʻuina i le 537 T.L.M. Pe a toe faitau i tua le 70 tausaga, ona oo atu ai lea i le 607 T.L.M., o le tausaga lea na amata ai lenā vaitaimi.
Ae aiseā la e tausisi ai pea le toʻatele o isi tagata i le tausaga e 587 T.L.M., e ui lava o loo manino faamaoniga mai i Tusitusiga paia o le 607 T.L.M., o le tausaga lea na faaumatia ai Ierusalema? E faavae o latou talitonuga mai i puna o faamatalaga se lua—o tusitusiga a tusitala o talafaasolopito anamua, ma le lisi o tupu a Ptolemy. Pe e sili atu ona maufaatuatuaina nei puna o faamatalaga nai lo o le Tusi Paia? Seʻi o tatou vāai.
Pe e Saʻo Aʻiaʻi Tusitala o Talafaasolopito Anamua?
E eseese faamatalaga a tusitala o talafaasolopito o ē na soifua e latalata i le taimi na faaumatia ai Ierusalema, e uiga i le faasologa o tupu o le Emepaea Lona Lua a Papelonia. * (Tagaʻi i le pusa “O Tupu o le Emepaea Lona Lua a Papelonia.”) E feteenaʻi faaiʻuga o a latou suʻesuʻega i taimi na tutupu ai mea, ma faamatalaga a le Tusi Paia. Pe e maufaatuatuaina a latou faamatalaga?
O se tasi o tusitala o talafaasolopito na soifua e lata i le vaitaimi o le pulega a le Emepaea Lona Lua a Papelonia, o Berossus, o se tagata Papelonia na avea ma “ositaulaga a Pele.” Na leiloa lana uluaʻi tusitusiga e taʻua o le Babyloniaca, lea na tusia pe tusa o le 281 T.L.M., ma e na o ni vaega o lenā tusitusiga o loo taʻua i tusitusiga a isi tusitala o talafaasolopito. Na faapea mai Berossus, na ia faaaogāina “tusi ia na teu lelei i Papelonia.”1 Pe e moni ea o Berossus o se tusitala o talafaasolopito e saʻo aʻiaʻi? Seʻi o tatou iloilo se faataʻitaʻiga.
Na tusi Berossus e faapea, na sosoo le nofoaiga a Sanerivi le tupu o Asuria “ma le nofoaiga a [lona] uso”; ma “ina ua mavae lenā ona soloaʻi ane lea o lona atalii [Esarata lea sa pule mo le] 8 tausaga; ona mulimuli ane lea o le pulega a Sammuges [Shamash-shuma-ukin] mo le 21 tausaga.” (III, 2.1, 4) Peitaʻi, e tusa ma faamaumauga o talafaasolopito o Papelonia ua leva ona tusia a o leʻi oo i taimi o Berossus, o loo taʻua ai na sosoo le nofoaiga a Sanerivi ma le nofoaiga a lona tamā, o Sarekona II, ae e lē o lona uso; e 12 tausaga na pule ai Esarata, ae e lē 8 tausaga; ma e 20 tausaga na pule ai Shamash-shuma-ukin, ae e lē 21 tausaga. E ui lava na faailoa mai e le tagata atamai o R. J. van der Spek, lona talisapaia o le faaaogāina e Berossus o faamaumauga o nofoaiga o tupu a Papelonia, ae na ia tusi e faapea: “E leʻi avea lenā ma itu e taofia ai o ia mai le faaopoopo i ai o ona lava manatu, ma ana lava faaliliuga.”2
O le ā le manatu o isi tagata atamamai iā Berossus? Ua faapea mai S. M. Burstein, o lē na suʻesuʻeina ma le māeʻaeʻa tusitusiga a Berossus: “I taimi ua teʻa, sa masani ona manatu iā Berossus o se tusitala o talafaasolopito.” Ae na faaiʻu lana faamatalaga e faapea: “O ana tusitusiga na faia, e leʻi lava e faamaonia ai o ia o se tusitala o talafaasolopito e agavaa. E oo lava i vaega na totoe o le Babyloniaca, na iai le tele o mea sesē i ana faamaumauga . . . O se matuā luma mo se tusitala o talafaasolopito le iai o ni mea sesē i ana tusitusiga, peitaʻi e leʻi matuā naunau Berossus i talafaasolopito.”3
O le ā sou manatu e tusa ai ma nei faamatalaga? Pe e tatau ona manatu e saʻo aʻiaʻi pea faamaumauga a Berossus? Ae faapefea isi tusitala o talafaasolopito anamua, o ē na tele ina faavae a latou faamaumauga o taimi na tutupu ai mea, mai i tusitusiga a Berossus? Pe e maufaatuatuaina moni ea iʻuga o a latou suʻesuʻega o talafaasolopito?
O le Lisi o Tupu a Ptolemy
O loo faaaogāina foʻi le Lisi Aloaʻia o Tupu a Claudius Ptolemy, o se tagata suʻesuʻe i le vateatea i le senituri lona lua T.A., e lagolagoina ai le tausaga 587 T.L.M., lea ua tausisi i ai le toʻatele. Ua manatu tagata i le lisi o tupu a Ptolemy, o le faavae autū lea o le faasologa o taimi na tutupu ai mea i le talafaasolopito anamua, e aofia ai ma le vaitaimi o le pulega a le Emepaea Lona Lua a Papelonia.
Sa tuufaatasia e Ptolemy faamatalaga mo lana lisi, pe tusa ma le 600 tausaga talu ona faaiʻuina le vaitaimi o le pulega a le Emepaea Lona Lua a Papelonia. Sa faapefea la ona ia iloa le taimi na amata ai le nofoaiga a le tupu muamua o loo i lana lisi? Na taʻua e Ptolemy, pe a faaaogāina suʻesuʻega o le vateatea, lea e faavae mai i isi vaega o suʻesuʻega o le gasetoto o le masina, “ona tatou taunuu ai lea i le amataga o le nofoaiga a Nabonassar,” o le tupu muamua lea o lana lisi.4 O lea, na faapea mai ai Christopher Walker o le British Museum, o le lisi o tupu a Ptolemy, “o se faamaumauga na faatogafiti ona fai ina ia saunia ai se faasologa o taimi, ina ia fetaui lelei ma iʻuga o suʻesuʻega a ē e suʻesuʻeina le vateatea,” ma “e leʻi saunia ai faamaumauga saʻo aʻiaʻi mo tusitala o talafaasolopito, e uiga i le amataga o nofoaiga a tupu ma le taimi na maliliu ai.”5
Na tusi Leo Depuydt, o sē na matuā lagolagoina Ptolemy e faapea: “Ua leva ona iloa le maufaatuatuaina o lea Lisi o Tupu a Ptolemy pe a fua i suʻesuʻega o mea i le vateatea, ae e lē faapea ai la ua maufaatuatuaina e tusa ai ma talafaasolopito.” Na faapea mai atili le polofesa o Depuydt, e faatatau i lenei lisi o tupu: “E tusa ai ma tupu anamua [lea e aofia ai tupu o le Emepaea Lona Lua a Papelonia], e tatau la ona faatusatusa le Lisi o Tupu a Ptolemy ma tusitusiga o loo i papamaa, ina ia iloa ai le taimi o nofoaiga a tupu taʻitasi.”6
O ā mea e aofia ai i nei “tusitusiga o loo i papamaa,” lea e mafai ai ona fesoasoani i a i tatou e faatusatusa pe e saʻo aʻiaʻi le talafaasolopito o le lisi o tupu a Ptolemy? O loo iai faamaumauga o nofoaiga o tupu a Papelonia, lisi o tupu, ma papamaa o loo iai faamaumauga e iloa ai le tulaga o le tamaoaiga—o tusitusiga na tusia i papamaa e le ʻautusiupu, o ē na soifua a o pule le Emepaea Lona Lua a Papelonia, po o le lata foʻi i lenā vaitaimi.7
E faapefea ona faatusatusa le lisi a Ptolemy ma tusitusiga o loo i papamaa? O loo faaalia i le pusa “Faatusatusaga o le Lisi o Tupu a Ptolemy ma Papamaa Mai Anamua” (o loo i le pito i lalo) se vaega o le lisi o tupu a Ptolemy ma faatusatusa i se papamaa anamua o loo iai faamatalaga. Ia mātau e na o le fā tupu o loo lisiina e Ptolemy, lea e va ai igoa o tupu Papelonia o Kandalanu ma Naponita. Peitaʻi, i le Lisi o Tupu a Uruk—o se vaega o tusitusiga o loo i papamaa—o loo faaalia ai e fitu tupu na pule ai i le va o nofoaiga a na tupu e toʻalua. Pe na puupuu ma leai ni mea iloga na tutupu i nofoaiga a tupu o loo misia mai i le lisi a Ptolemy? E tusa ai ma tusitusiga o loo i papamaa e iloa ai le tulaga o le tamaoaiga, na pule se tasi o na tupu mo le fitu tausaga.8
O loo iai foʻi se faamaoniga sili mai i tusitusiga o loo i papamaa e faapea, a o leʻi pule Napopolasa (le tupu muamua o le Emepaea Lona Lua a Papelonia), sa iai se isi tupu (Ashur-etel-ilani) na pule i Papelonia mo le fā tausaga. Aemaise, e silia ma le tausaga sa leʻi iai se tupu na pule i le laueleele.9 Peitaʻi, o nei faamatalaga uma e leʻi tuuina e Ptolemy i lana lisi o tupu.
Aiseā na leʻi tuuina ai e Ptolemy isi tupu i lana lisi? Na manatu o ia e leʻi avea moni i latou na ma ni tupu o Papelonia.10 O se faataʻitaʻiga, e na te leʻi tuuina i lana lisi Labashi-Marduk, o se tupu i le vaitaimi o le Emepaea Lona Lua a Papelonia. Ae e tusa ai ma tusitusiga o loo i papamaa, na pule moni lava i Papelonia na tupu e leʻi tuuina e Ptolemy i lana lisi.
E manatu le toʻatele e saʻo aʻiaʻi le lisi o tupu a Ptolemy. Ae pe e tatau ona faaaogā pea ina ia iloa ai le faasologa saʻo o taimi na tutupu ai mea i le talafaasolopito, e ui lava na aveesea nisi o tupu mai i lenā lisi?
O le Faaiʻuga e Faavae Mai i Nei Faamaoniga
O se aotelega: O loo manino ona faailoa mai i le Tusi Paia, sa iai se vaitaimi na faaaunuua ai mo le 70 tausaga. O loo iai faamaoniga maumaututū—ma e talitonu i ai le toʻatele o tagata atamamai—e faapea, o tagata Iutaia ia na ave faapagotaina, e oo ane i le 537 T.L.M. ua toe nonofo i latou i lo latou laueleele. Pe a toe faitau la i tua le 70 tausaga mai i le 537 T.L.M., ona tatou taunuu lea i le 607 T.L.M. lea na faaumatia ai Ierusalema. E ui lava o lenei tausaga e lē o faamaonia e tusitala o talafaasolopito anamua ma le lisi o tupu a Ptolemy, ae ua lāgā ai ni fesili tāua e tusa ai ma le saʻo aʻiaʻi o a latou tusitusiga. O le mea moni lava ia, e lē lava na faamaoniga e lua e faapea atu ai e sesē le faasologa o taimi i le Tusi Paia.
Peitaʻi, o loo iai pea nisi fesili. Pe e moni lava la e leai se faamaoniga mai i le talafaasolopito, e lagolagoina ai le tausaga 607 T.L.M. o loo taʻua i le Tusi Paia? O ā faamaoniga ua tatou maua mai i tusitusiga o loo i papamaa, lea na tele ina tusia e ē na soifua ai i lenā vaitaimi? O le a tatou talanoaina nei fesili i le isi lomiga o sosoo mai.
[Faaopoopoga i lalo]
^ pala. 4 O loo taʻua uma nei tausaga e lua i totonu o faamaumauga e ese mai i le Tusi Paia. Ina ia faafaigofie ona malamalama, o le a talanoaina i lenei faasologa o mataupu e lua le tausaga e 587 T.L.M. O le uiga o le T.L.M., o le “Tausaga a o Lumanaʻi le Mesia.”
^ pala. 5 Ua saunia e Molimau a Ieova se faaliliuga maufaatuatuaina o le Tusi Paia e taʻua, O Le Tusi Paia—O le Faaliliuga a le Lalolagi Fou. Peitaʻi, pe afai e lē o oe o se Molimau a Ieova, atonu e te filifili e faaaogā isi faaliliuga pe a iloiloina mataupu faale-Tusi Paia. O loo faaaogāina i lenei mataupu le tele o mau o loo maua i isi faaliliuga o le Tusi Paia, lea e faaaogāina e le toʻatele.
^ pala. 23 Na amata le pulega o le Emepaea Lona Lua a Papelonia i le nofoaiga a Napopolasa le tamā o Nepukanesa, ae faaiʻuina i le nofoaiga a Naponita. E mataʻina lea vaitaimi i tagata atamamai, ona o loo aofia ai se vaega tele o tausaga e 70 o le faatafunaina.
[Ata i le itulau 28]
O SE TAUSAGA ILOGA I LE TALAFAASOLOPITO
O le tausaga 539 T.L.M. lea na faatoʻilaloina ai e Kuresa II Papelonia, e maua mai i le faaaogāina o faamaoniga nei:
▪ O faamatalaga o talafaasolopito anamua ma tusitusiga o loo i papamaa: Na tusi Taitolo mai i Sisili (c. 80-20 T.L.M.) e faapea na avea Kuresa ma tupu o Peresia, “i le amataga o le tausaga lona Lima Sefulu Lima o le Olimepeka.” (Historical Library, Book IX, 21) O le tausaga lenā e 560 T.L.M. Na taʻua e Herodotus o se tusitala o talafaasolopito mai i Eleni (c. 485-425 T.L.M.) e faapea, na fasiotia Kuresa ina ua “mavae tausaga e lua sefulu iva o lana nofoaiga,” o lona uiga na maliu o ia a o faagasolo le tausaga lona tolu sefulu o lana nofoaiga i le 530 T.L.M. (Histories, Book I, Clio, 214) Ua faaalia mai i tusitusiga o loo i papamaa e faapea, mo le iva tausaga a o leʻi maliu Kuresa, sa avea ai o ia ma tupu i le vaipanoa sa pulea e le emepaea muamua a Papelonia. Pe a faitau le iva tausaga a o leʻi oo i le maliu o Kuresa i le 530 T.L.M., ona taunuu ai lea i le 539 T.L.M. lea na faatoʻilaloina ai e Kuresa Papelonia.
Faamautinoaga na maua mai i tusitusiga o loo i papamaa: Ua faamautinoa atili mai i se papamaa na maua i Papelonia (BM 33066) o loo iai ni tusitusiga e faatatau i mea o le vateatea, le maliu o Kuresa i le tausaga 530 T.L.M. E ui o loo iai ni faamatalaga sesē e tusa ai ma tulaga o mea i le vateatea, ae o loo aofia ai ni faamatalaga e uiga i taimi e lua na vaaia ai le masina ua gasetoto, lea o loo taʻua i le papamaa na tutupu i le tausaga lona fitu o le nofoaiga a Kamasese II, o lē na soloaʻi ane i le nofoaiga a lona tamā o Kuresa. O vaaiga nei na iloa ina ua gasetoto le masina i Papelonia iā Iulai 16, 523 T.L.M., ma Ianuari 10, 522 T.L.M., lea ua faasino atu ai i le amataga o le tau e totogo ai mea i le 523 T.L.M., e faapea o le amataga lenā o le tausaga lona fitu o le nofoaiga a Kamasese. O lona uiga, o le 529 T.L.M. le tausaga muamua o lana nofoaiga. O lea la, o le 530 T.L.M. le tausaga mulimuli o le nofoaiga a Kuresa, ma ua avea ai le tausaga 539 T.L.M., ma tausaga muamua na avea ai o ia ma tupu i le vaipanoa na pulea e le emepaea muamua o Papelonia.
[Ata i le itulau 28]
Papamaa: © The Trustees of the British Museum
[Ata i le itulau 31]
O SE AOTELEGA PUUPUU
▪ E masani ona manatu tusitala o talafaasolopito e ese mai i le Tusi Paia e faapea, na faaumatia Ierusalema i le 587 T.L.M.
▪ Ua faaalia mai ma le mautinoa i le faasologa o taimi i le Tusi Paia e faapea, na faaumatia Ierusalema i le 607 T.L.M.
▪ Na faavae faaiʻuga a tusitala o talafaasolopito e ese mai i le Tusi Paia, mai i tusitusiga a tusitala o talafaasolopito anamua ma le lisi o tupu a Ptolemy.
▪ E lē o taimi uma e tutusa ai tusitusiga a tusitala o talafaasolopito anamua, ma faamaumauga o loo i papamaa ʻele.
[Ata i le itulau 31]
Faamatalaga
1. Babyloniaca (Chaldaeorum Historiae), Book One, 1.1.
2. Studies in Ancient Near Eastern World View and Society, itulau e 295.
3. The Babyloniaca of Berossus, itulau e 8.
4. Almagest, III, 7, na faaliliuina e G. J. Toomer, i le tusi Ptolemy’s Almagest, lomia i le 1998, itulau e 166. Na iloa e Ptolemy, sa faaaogāina e tagata suʻesuʻe i le vateatea a Papelonia auala faamatematika, ina ia “iloa” ai le gasetoto o le masina i taimi ua mavae ma i le lumanaʻi, talu ai sa latou maua mai i a latou suʻesuʻega e taʻi 18 tausaga ma vaaia le gasetoto o le masina.—Almagest, IV, 2.
5. Mesopotamia and Iran in the Persian Period, itulau e 17-18.
6. Journal of Cuneiform Studies, Volume 47, 1995, itulau e 106-107.
7. O le cuneiform, o se ituaiga o auala e tusitusi ai lea e faaaogā e se tusiupu se peni e faia mai i le laau po o le uʻamea, e oomi ai ni faailoga faatafa tolu i papa ʻele susū.
8. Na avea Sin-sharra-ishkun ma tupu mo tausaga e fitu, ma e 57 papamaa o loo iai faamaumauga e iloa ai le tulaga o le tamaoaiga o lenei tupu, mai i le vaitaimi na faatoʻā avea ai o ia ma tupu seʻia oo i le tausaga lona fitu o lana nofoaiga. Tagaʻi i le Journal of Cuneiform Studies, Volume 35, 1983, itulau e 54-59.
9. Na tusia i le tausaga lona fā o le nofoaiga a Ashur-etel-ilani, le papamaa C.B.M. 2152 lea o loo iai faamaumauga e iloa ai le tulaga o le tamaoaiga. (Legal and Commercial Transactions Dated in the Assyrian, Neo-Babylonian and Persian Periods—Chiefly From Nippur, na tusia e A.T. Clay, 1908, itulau e 74.) I le Harran Inscriptions of Nabonidus, (H1B), I, laina lona 30, o loo taʻua ai foʻi Ashur-etel-ilani, ona sosoo lea ma le igoa o Napopolasa. (Anatolian Studies, Vol. VIII (1958), itulau e 35 ma le 47.) Mo le vaitaimi na lē iai se tupu, tagaʻi i le Chronicle 2, laina lona 14, o le Assyrian and Babylonian Chronicles, itulau e 87-88.
10. Ua faapea mai nisi tagata atamamai, na iai tupu na aveesea e Ptolemy mai i lana lisi—o lē sa faapea e tatau ona lisiina na o tupu o Papelonia—ona sa taʻua i latou o “Tupu o Asuria.” Peitaʻi, i le pusa o loo i le itulau e 30, o loo faaalia ai le tele o tupu o loo aofia i le lisi o tupu a Ptolemy, na taʻua foʻi o “Tupu o Asuria.” Ua faaalia manino i papamaa o loo iai faamaumauga e iloa ai le tulaga o le tamaoaiga, ma tusitusiga mai anamua, na pulea Papelonia e tupu nei o Ashur-etel-ilani, Sin-shumu-lishir, ma Sin-sharra-ishkun.
[Siata/Ata i le itulau 29]
O TUPU O LE EMEPAEA LONA LUA A PAPELONIA
Pe afai e maufaatuatuaina nei tusitala o talafaasolopito, aiseā la e lē tutusa ai a latou faamatalaga?
Tupu
Napopolasa
BEROSSUS c. 350-270 T.L.M. (21)
POLYHISTOR 105-? T.L.M. (20)
JOSEPHUS 37-?100 T.A. (-)
PTOLEMY c. 100-170 T.A. (21)
Nepukanesa II
BEROSSUS c. 350-270 T.L.M. (43)
POLYHISTOR 105-? T.L.M. (43)
JOSEPHUS 37-?100 T.A. (43)
PTOLEMY c. 100-170 T.A. (43)
Amel-Marduk
BEROSSUS c. 350-270 T.L.M. (2)
POLYHISTOR 105-? T.L.M. (12)
JOSEPHUS 37-?100 T.A. (18)
PTOLEMY c. 100-170 T.A. (2)
Neriglissar
BEROSSUS c. 350-270 T.L.M. (4)
POLYHISTOR 105-? T.L.M. (4)
JOSEPHUS 37-?100 T.A. (40)
PTOLEMY c. 100-170 T.A. (4)
Labashi-Marduk
BEROSSUS c. 350-270 T.L.M. (9 masina)
POLYHISTOR 105-? T.L.M. (-)
JOSEPHUS 37-?100 T.A. (9 masina)
PTOLEMY c. 100-170 T.A. (-)
Naponita 17
BEROSSUS c. 350-270 T.L.M. (17)
POLYHISTOR 105-? T.L.M. (17)
JOSEPHUS 37-?100 T.A. (17)
PTOLEMY c. 100-170 T.A. (17)
Le umi (o tausaga) o nofoaiga a tupu e tusa ai ma faamatalaga a tusitala o talafaasolopito anamua
[Ē Ana le Ata]
Photograph taken by courtesy of the British Museum
[Siata/Ata i le itulau 30]
FAATUSATUSAGA O LE LISI O TUPU A PTOLEMY MA PAPAMAA MAI ANAMUA
E leʻi tuuina e Ptolemy nisi o tupu i lana lisi. Aiseā?
LISI O TUPU A PTOLEMY
Nabonassar
Nabu-nadin-zeri (Nadinu)
Mukin-zeri ma Pul
Ululayu (Shalmaneser V) “Tupu o Asuria”
Merota-palata
Sarekona II “Tupu o Asuria”
Vaitaimi Muamua e Leʻi Iai se Tupu
Bel-ibni
Ashur-nadin-shumi
Nergal-ushezib
Mushezib-Marduk
Vaitaimi Lona Lua e Leʻi Iai se Tupu
Esarata “Tupu o Asuria”
Shamash-shuma-ukin
Kandalanu
Napopolasa
Nepukanesa
Sin-shumu-lishir
Amel-Marduk
Neriglissar
Labashi-Marduk
Naponita
Kuresa
Kamisese
O LE LISI O TUPU A URUK E PEI ONA MAUA I PAPAMAA MAI ANAMUA
Kandalanu
Sin-shumu-lishir
Sin-sharra-ishkun
Napopolasa
Nepukanesa
[Ata i le itulau 30]
O faamaumauga o nofoaiga o tupu a Papelonia, o se vaega lea o tusitusiga o loo i papamaa, lea e fesoasoani iā i tatou ina ia iloa pe e saʻo aʻiaʻi le lisi o tupu a Ptolemy
[Ē Ana le Ata]
Photograph taken by courtesy of the British Museum
[Ē Ana le Ata i le itulau 31]
Photograph taken by courtesy of the British Museum
