Ia Aʻoaʻo Lau Fanau

O le Taimi e Tatau Ona Tatou Mataala Ai

ATONU e te iloa e tāua le mataala pea pe a e auai i le aʻoga. E toʻatele e fia momoe a o faia le vasega, ae e tāua ona mataala pea pe afai e fia aʻoaʻoina se mea aogā. O se isi taimi tāua e tatau ona mataala ai, o taimi e aʻoaʻoina ai oe e uiga i le Atua ma le Tusi Paia. Atonu e te auai foʻi i sauniga ina ia suʻesuʻeina ai le Tusi Paia.

O le ā se mea e te manatu e mafai ona e faia ina ia e mataala ai pea?— * Ia taumafai e vave ona moe i le pō. Atonu o le a fesoasoani foʻi le faia o sina mālōlōga i le aoauli. Seʻi o tatou vāai po o le ā se mea e tatou te aʻoaʻoina mai i le mea na tupu i se talavou, na tautulemoe i le leva o le pō a o faia se lauga a le aposetolo o Paulo. Ina ia iloa le mea na tupu, tagaʻi i le Tusi Paia i le Galuega mataupu e 20, fuaiupu e 7 e oo i le 12.

Sa asiasi atu Paulo i le faapotopotoga o Teroa, o se taulaga e tulata i le sami. Ua faapea mai le Tusi Paia, “o le a alu ese o ia [Paulo] i le aso e sosoo ai” i se vaa. O lea na “faaumiumi foʻi lana lauga seʻia oo i le vaeluapō.” E tatou te faitau e faapea: “O se tasi tama talavou e igoa iā Eutiko, ua nofo o ia i le faamalama. Ua moe o ia a o faaauau pea ona lauga atu Paulo.” O le ā le isi mea na tupu?—

Na paʻū mai Eutiko mai le faamalama o le “fogāfale lona tolu” o se fale. Na vave ona tamomoʻe Paulo ma isi i lalo i le fasitepu. O loo taatia mai Eutiko—ua maliu! Pe e mafai ona e mafaufau i lo latou faanoanoa na iai?— Ua taʻua mai i le Tusi Paia na opo e Paulo Eutiko, ona alaga lea o Paulo ma le fiafia: ʻAua le popole, o loo lelei mea uma!’ Ua toe faatūina Eutiko e le Atua!

 O le ā ua tatou aʻoaʻoina e uiga i le Atua mai i le mea na tupu iā Eutiko?— O se tasi o mea, e mafai e lo tatou Tamā i le lagi o Ieova, ona toe faatutūina ē uma ua maliliu e aofia ai ma fanau iti. E sili atu ona malamalama lelei ma alofa Ieova iā te oe, nai lo o ou mātua. A o iai Iesu i le lalolagi, sa ia faaalia uiga o lona Tamā e ala i le tago atu ma sii mai tamaiti, ma faamanuia iā i latou. Na ia faatūina foʻi tamaiti, e aofia ai se teineitiiti e 12 ona tausaga.

O ā ou faalogona i le iloaina e alofa lou Tamā i le lagi iā te oe?— Ioe, e uunaʻia ai i tatou e alolofa atu iā Ieova, ma usiusitaʻi i Ona ala. Pe e te iloa ni auala e mafai ai ona faaali atu lo tatou alofa iā te Ia?— O se tasi o auala, o le faapea atu lea e tatou te alolofa iā te ia. Na faapea mai Iesu: “Ou te alofa i le Tamā.” Ae na faia e Iesu nisi mea e sili atu, nai lo o le tau ina faapea e alofa i le Atua. Na ia faaalia lona alofa e ala i mea na ia faia.

Sa usitaʻi Iesu i le Atua. Ua faapea mai Iesu: “Ou te faia pea mea e fiafia i ai lona finagalo.” Afai e tatou te faia faapea, o le a tatou faia le mea e sili e mataala ai pea i le aʻoga ma i sauniga faa-Kerisiano, ina ia faafiafiaina le finagalo o Ieova ma lona Alo, o Iesu.

Faitau i lau Tusi Paia

Galuega 20:7-12

Luka 8:49-56

Ioane 8:29; 14:31

[Faaopoopoga i lalo]