Aiseā e Aogā ai le ola i Tapulaa a le Tusi Paia?

PO UA lē toe aogā ma soona faasāsā naʻuā manatu o le Tusi Paia e faatatau i feusuaʻiga? E leai. Peitaʻi, ua fesoasoani le manatu o le Tusi Paia iā i tatou ina ia ʻalofia ai:

▪ Faamaʻi pipisi ona o feusuaʻiga lē mamā

▪ Le maʻitō a o leʻi faaipoipo

▪ Iʻuga tigā o faaipoipoga malepelepe

▪ Se lotofuatiaifo ua ōia

▪ Faalogona ua lē toe aogā ona o le faaaogā e isi

E finagalo Lē na faia i tatou, o Ieova le Atua, * ina ia o tatou olioli ma maua mai aogā i le faaaogāina o ana meaalofa. O le Atua, “o Lē o loo aʻoaʻo oe i mea e aogā iā te oe.” (Isaia 48:17) O le tagata e ola i taʻiala a le Tusi Paia e faatatau i feusuaʻiga, e na te mauaina:

▪ Le finagalo malie o le Atua

▪ Le filemu o le mafaufau

▪ Faiā faaleaiga e māfana

▪ Se talaaga lelei

▪ Le faaaloalogia o ia lava

E faapefea la pe afai e te lē o ola i le taimi nei e tusa ma tapulaa tau amio a le Tusi Paia? Pe e mafai ona e suia lou olaga? Po o le a faamasinoina oe e le Atua ona o au amioga sa faia i aso ua mavae?

Seʻi mafaufau i lenei mea moni: Na faia aʻe le faapotopotoga Kerisiano i le uluaʻi senituri i ē sa avea muamua ma ē e faitaaga, mulilua, ma tauatane. Na latou filifili ina ia suia o latou olaga, ma na faamagaloina i latou e le Atua. (1 Korinito 6:9-11) I aso nei, ua faia foʻi e le faitau afe i le lalolagi atoa lea lava filifiliga. Ua saʻoloto i latou mai i se olaga lē mamā tau i feusuaʻiga,  ma ua latou tofo i aogā o le ola e tusa ai ma tapulaa tau amio a le Tusi Paia. O se faataʻitaʻiga, seʻi toe manatu i le faaaʻoaʻoga a Sara lea na taʻua i le mataupu amata.

“Na Vave Ona Pei e Matuu Atu se Avega Mamafa”

Na iloa e Sara e na te leʻi maua mai i lona olaga lē pulea, le saʻolotoga ma le olaga faamalieina lea sa ia moomoo i ai. Na faapea mai o ia: “Na oo ina maaa loʻu lotofuatiaifo, ma na ou māsiasi ma popole, ina neʻi oʻu tō pe maua foʻi i se faamaʻi leaga. Na tumau pea loʻu talitonuga o loo soifua le Atua, ma na ou iloa na ou faatigā iā te ia i le auala sa ou ola ai. Na ou lagona le lē mamā, ma na ōia ai loʻu lotofuatiaifo.”

Mulimuli ane, na maua e Sara le malosi e suia ai lona olaga. Na ia saʻili le fesoasoani a ona mātua o ni Molimau a Ieova. Na ia talosagaina foʻi le fesoasoani a toeaina agavaa Kerisiano i la latou faapotopotoga. Na taʻua e Sara: “Sa ou maofa i le agalelei ma le alofa na faaalia e oʻu mātua ma toeaina o le faapotopotoga. Na vave ona pei e matuu atu se avega mamafa.”

E toʻalua le fanau a Sara o loo ia tausia. Ua faapea mai Sara: “Ou te leʻi natia se mea mai i laʻu fanau, e faatatau i filifiliga sa ou faia. Na ou manaʻo ina ia la malamalama i aafiaga na oo iā te aʻu ona o le lē usitaʻia o tapulaa a le Atua. O loʻu faanaunauga o le fesoasoani lea iā i laʻua ina ia talisapaia aogā i le tino, le mafaufau, ma faalogona, ona o le ola e tusa ai ma tapulaa a le Atua e faatatau i feusuaʻiga. Ou te talitonu e ala ona aumaia e le Atua tapulaa tau amio, ona e lē fia silasila mai o ia o tatou mafatia.”

E mafai foʻi ona e maua aogā mai i le mulimuli i le taʻitaʻiga alofa a le Atua. Ua folafola mai i le Tusi Paia: “E tonu faatonuga mai iā Ieova, e olioli ai le loto; e mamā le poloaʻiga a Ieova, e malamalama ai mata. . . . E tele foʻi le taui pe a tausi i ai.”—Salamo 19:8, 11. *

[Faaopoopoga i lalo]

[Faamatalaga faaopoopo i le itulau 8]

O i latou e lē amanaʻia tapulaa a le Tusi Paia, e masani ona faatigā i faalogona o isi

[Faamatalaga faaopoopo i le itulau 9]

O ē e ola e tusa ai ma tapulaa a le Tusi Paia, e latou te maua se lotofuatiaifo mamā ma faiā māfana faaleaiga