E te Silafia?

Na faapefea ona faatupeina auaunaga i le malumalu o Ieova i Ierusalema?

▪ Sa faatupeina auaunaga eseese o le malumalu e ala i lafoga, aemaise lava i sefuluaʻi e tatau ona totogi e tusa ai ma le tulafono. Ae sa faaaogā foʻi isi ituaiga o lafoga. O se faataʻitaʻiga, i le taimi sa fausia ai le faleʻie paia, sa faatonuina e Ieova Mose e aoina se ʻafa sekeli o siliva mai tagata Isaraelu uma ua lesitalaina, e avea ma “foaʻi . . . iā Ieova.”—Esoto 30:12-16.

E foliga mai o se tū masani mo Iutaia taʻitoʻatasi, le foaʻi o lenei aofaʻiga o tupe faatulagaina o se lafoga mo le malumalu i tausaga taʻitasi. O le lafoga lenei na faatonu e Iesu Peteru e totogi i le tupe siliva na maua i le gutu o le iʻa.—Mataio 17:24-27.

I ni nai tausaga ua mavae, sa maua ai i Ierusalema ni ituaiga o tupe siliva faapena se lua, lea na faaaogā e totogi ai lafoga o le malumalu. O se tasi o nei tupe siliva na faia i Turo i le 22 T.A., na maua i se alāvai i lalo o le eleele na iai i le uluaʻi senituri. I le tasi itu o lenei tupe siliva, o loo iai le ata o le ulu o Melkart, po o Paala le atua sili o Turo, ae i le isi itu o loo iai se ata o se aeto o loo tū i luga o le taumua o se vaa. O le tupe siliva lona lua, na maua i faaputuga o mea ua faaleagaina o le malumalu, o loo tusia ai le uluaʻi tausaga o le fouvalega a Iutaia faasaga iā Roma, i le 66-67 T.A. O loo iai i lenei tupe siliva se ata o se ipu e faaaogā i sauniga faalelotu, ma ni rimoni se tolu e leʻi mātala. O loo tusia ai faaupuga nei, “ʻAfa Sekeli” ma “Ierusalema Paia.” Ua faapea mai le polofesa o Gabriel Barkay, e tusa ai ma nei mea na maua, o le tupe “e foliga mai na faaleagaina i se afi, atonu o le afi na faatamaʻia ai le Malumalu Lona Lua i le 70 T.A.”

Ua faapefea ona mataʻina fale na fauina e Nepukanesa, le tupu o Papelonia?

▪ Ua faamauina i le tusi o le Tusi Paia o Tanielu, le faamatalaga lenei a Nepukanesa: “Pe e lē o Papelonia tele ea lenei na ou fausia i loʻu malosi tele e fai ma fale o le tupu ina ia viia ai loʻu mamalu?” (Tanielu 4:30) Pe na avea moni lava lenei aai anamua ma aai sili?

Ua viviia Nepukanesa e tusitala o talafaasolopito ona o le fausia o malumalu, maota o tupu, pā o aai, ma se togālaau matagofie. O le malumalu autū e tu i le ogatotonu o Papelonia, e iai se ʻolo atonu e sili atu i le 230 futu (70 m) lona maualuga. Ae ua faapea mai le tusi Babylon—City of Wonders: “O le mea e sili ona taʻutaʻua i galuega a Nepukanesa o le Processional Way ma le Ishtar Gate. O le Processional Way e ui atu i le Ishtar Gate, ma sa teuteu i ata o leona. O loo taʻua atili i lenā tusi lenei alatatala, o le auala e sili ona matagofie e ui atu ai i Papelonia e faapea: “Sa faia atoa i piliki ilaila lanu moana, ma teuteu i faatusa o le faitau selau o povi ma tarako o loo savavali, o se vaaiga e lē mafai ona faagaloina e se tagata e asiasi atu i le laumua o le aai anamua.”

I le amataga o le 20 senituri, na eli aʻe e tagata suʻesuʻe i le eleele le faitau afe o toega o le Processional Way ma le Ishtar Gate, ma toe fausia na mea i le falemataʻaga i Perelini, i Siamani.

[Ata i le itulau 12]

Foliga moni o tupe siliva

[Ata i le itulau 12]

Pito i luga: Clara Emit, Courtesy of Israel Antiquities Authority; pito i lalo: Zev Radovan

[Ata i le itulau 12]

O le toe fausiaina o le Ishtar Gate