E Leʻi Mafai e Pā Pupuni i Tuaoi Ona Taofia

O loo taumafai malosi Molimau a Ieova e soloia pā pupuni i le va o tagata. E latou te usitaʻia mataupu silisili na faamamafa i fetalaiga a Iesu i ona soo: “O le ʻauuso uma outou.” (Mataio 23:8) Na faataʻitaʻia moni lenei mea i ni nofoaga se lua e tapuaʻi ai Molimau—o le tasi i Potukali a o le isi i Sepania.

I LE itu i mātū o Potukali, o loo iai le aai o Valença do Minho, o loo siʻoina i se pā, lea na fausia i taimi faigatā. I luga o ona aupā e iloa atu ai le Vaitafe o le Minho, e tuaʻoi ai Sepania ma Potukali. O le isi itu o le Vaitafe, e iai le aai Sepania o Tui, ma lona falesa tele e foliga mai o se ʻolo. O ʻolo tetele o Tui ma Valença, na fausia i le senituri lona 17 a o vatau Sepania ma Potukali.

I le 1995, na talepe ai fale na tutū i le tuaoi o atunuu nei e lua o le Iuni a Europa, lea sa faaaogā i tiute ma leoleoga. Peitaʻi, e sili atu ona tāua le autasia o tagata, faapea mafaufau ma loto, nai lo o le talepeina o nei mea sa avea ma pā pupuni i tuaoi. I Valença, o loo tū ai se tamaʻi fale manaia e feiloaʻi ai tagata sa faigatā ona feiloaʻi, ona o pā pupuni sa tuaoi ai nei atunuu. O lenei fale o se nofoaga mo tapuaʻiga—o le Maota mo Sauniga a Molimau a Ieova—o loo faaaogā e faapotopotoga e lua o Molimau, a Sepania ma Potukali.

Na amata lenei tala i le 2001, ina ua manaʻomia e Molimau i Tui se Maota fou mo Sauniga. Sa tatau ona ō ese mai i le nofoaga sa latou lisiina, ae e lē lava tupe e toe fausia ai se maota fou. E latou te leʻi gafatia foʻi le lisiina o se isi fale, ona e toʻaitiiti le faapotopotoga. O lea, na talosaga atu ai Molimau i Sepania i o latou uso Molimau i Valença i Potukali, pe e mafai ona latou faaaogā faatasi le maota, lea e lē mamao ese mai i le ogatotonu o Tui.

Na faapea mai Eduardo Vila, o se sui o le faapotopotoga i Tui i Sepania: “Sa matou talanoaina le mataupu ma uso mai i Potukali i le fono iā Tesema 2001. Ina ua ou tuua le fono, na ou iloa ai ua pāʻia e Ieova loto o uso i Potukali.  Na latou faia ni faataulaga se tele i le fausia o lenei Maota matagofie mo Sauniga, ma ua lotomalilie e matou te faaaogāina faatasi ma i latou.”

Na faapea mai Américo Almeida o se Molimau Potukali, o lē sa auai i lenei lava sauniga: “Na matou faafeiloaʻia uso mai i Sepania i lo matou Maota mo Sauniga. E matou te talitonu ua faamanuia e Ieova lenei faatulagaga, ma ua matou lotomalilie faatasi i lenei faaiʻuga.” Ua faifaimea faatasi nei Molimau mai itu e lua o le tuaoi. Na faapea mai Paolo mai i Valença: “E ui ina eseese atunuu e matou te ō mai ai, ae e leʻi amanaʻia e se isi. O i matou o le ʻauuso faaleagaga.”

O se tasi o mea na mātauina e tagata asiasi i le Maota mo Sauniga, o ni uati se lua o loo i le pito i tua o le Maota e eseese taimi. E tasi le itula e muamua ai Sepania nai lo o Potukali, ma e na o le pau lenā o le mea e eseese ai o loo vaaia i le Maota mo Sauniga. Ina ua manaʻomia ona toe faafou le maota, na vaavaai sui o le Komiti o Faugāfale o le Vaipanoa o loo faamautū i Sepania, i ni ʻaufaigaluega malolosi mai i nei faapotopotoga. Na toe faapea mai Paolo, “O le toʻatele o uso ma tuafafine e lava le poto masani, e ō mai i Sepania ina ia fesoasoani iā i matou, o nisi o i latou e sili atu i le 100 maila (160 km) le mamao o le mea e malaga mai ai. O lenei fuafuaga, ua mafai ona matuā  faamausalī ai le autasi, ma ua saga faamalosia ai foʻi le alofa i le va o nei faapotopotoga.”

Seʻi o tatou iloiloina la le isi faaaʻoaʻoga lona lua, o le foʻiaina o luʻi i le va o tuaoi.

Autasi i se Vanu Fevaevaeaʻi

O Puigcerdá, o se aai e tuaoi ai Sepania ma Falani. E tū i le ogatotonu o se vanu lafulemu e siʻomia e atumauga o Pyrenees. O lenei vanu atoa e lauiloa o Cerdaña, na avea muamua ma vaega o Sepania. Ae i le 1659, na sainia ai se feagaiga o le filemu e taʻua o le Treaty of the Pyrenees, ma tuu atu ai e Sepania le afa o le vanu iā Falani.

I aso nei, e ō atu tagata Falani e fai faatauga i Puigcerdá, le aai autū o le vanu. Ma talu mai le 1997, na talia ai foʻi e Molimau mai i Puigcerdá o latou uso mai i Falani e faaaogā lo latou Maota mo Sauniga. I lenā tausaga, sa tatau ai ona tuua e Molimau i Falani le fale mautotogi na latou faaaogāina. O le Maota mo Sauniga e aupito i sili ona latalata i Falani, e tusa e tasi le itula e malaga atu ai i le taavale, ma o le auala, e ui atu i luga o mauga e masani ona ufitia i le kiona i masina o le tau mālūlū.

Ina ua faamatala atu e uso Molimau i Falani le manaʻomia vave o se nofoaga mo sauniga, na ofo atu loa e uso Molimau i Sepania lo latou Maota mo Sauniga. Na manatua e le uso o Prem e faapea, “Na fiafia uso uma mai i Sepania, ona ua mafai ona latou faaaogā faatasi le maota. O le mea moni, o lenei agaga na latou maua mai i toleniga faale-Tusi Paia na aʻoaʻoina mai i le tele o tausaga. I le lua vaiaso mulimuli ane, na amata loa ona latou faaaogā faatasi le Maota mo Sauniga, ma e 13 tausaga o matou faifaimea faatasi pea.”

Ua faamatala e Eric, o se ovasia i le faapotopotoga faa-Falani: “Na avea Puigcerdá ma nofoaga talafeagai mo i matou e fai ai se Maota mo Sauniga. Ma ou te manatua pea la matou feiloaʻiga māfana ma le faapotopotoga faa-Sepania. Na teuteuina lo latou maota i ni teu fugālaau mananaia, ma se faailoilo e faapea, ʻAfifio mai, o matou uso ma tuafafine pele.’”

Na toe faapea mai Eric: “Na manatu tagata, o le tapunia o le Maota mo Sauniga i Falani, o lona uiga o le a lē toe iai se faapotopotoga. Ae o lo matou talaʻia e lē aunoa o lenei vaipanoa, e aofia ai ma le tufatufaina atu o valaaulia e auai i a matou sauniga i Sepania, na iloa vave ai e sesē lenā manatu. Na olioli tagata lotofiafia e ō mai i le maota i Sepania. E lē gata i lea, o le faaaogā faatasi o le maota ma uso i Sepania, na atili ai ona matou vavalalata. E moni, sa matou iloa e iai se faapotopotoga i Sepania i le isi itu o le tuaoi, ae sa itiiti lava ni fesootaʻiga ma i latou. A o lenei ua maua soo feiloaʻiga, ua  lagona ai le lē tuua na o i matou i lenei atumauga maotua.”

Pe na avea pā pupuni faaleaganuu ma mea na faigatā ai ona fesootaʻi? Na faapea mai se Molimau i Falani ua 80 nei ona tausaga, “Sa ou popole ina ua ou iloa o le a faia a matou sauniga i le isi itu o le tuaoi i Sepania. Ae faafetai i le talilelei mai ma uiga faaleuō o uso i Puigcerdá, ma e leʻi tulaʻi mai ai se faafitauli. Nai lo o lenā, ua avea lea ma avanoa e faamausalī ai le autasi faavaomalo o tagata o Ieova.”

Le Faavae o Fesootaʻiga Vavalalata

Na faapea mai ē na faavaeina fesootaʻiga i le iuni o Malo o Europa, “e tatau i atunuu uma o loo fai ma sui o nei iuni ona maumauaʻi e faataatia se faavae, ina ia vavalalata uma ai tagata o Europa.” O le talepeina o fale sa tutū i tuaoi i le 1980 ma le 1990, sa faia ina ia faavave ai lenei fuafuaga. Ae e manaʻomia foʻi ona foʻia pā pupuni o mafaufauga.

E galulue mamafa Molimau a Ieova e soloia le faaituʻau ma le lē fefaatuatuaaʻi. Ua latou malamalama e aogā le eseese o talaaga o uso, ma “e lē faailogaina tagata e le Atua.” (Galuega 10:34) I a latou tauaofiaga faavaomalo, ma i totonu o o latou Maota mo Sauniga, ua latou vaaia ai e “maʻeu le lelei ma le matagofie pe a nonofo faatasi o uso i le autasi!” (Salamo 133:1) O le autasi o uso Molimau i Valença ma Puigcerdá, ma o latou uso i nuu tuaoi, o se faamaoniga ola lea o lenā mea.

[Faamatalaga faaopoopo i le itulau 13]

“E ui ina eseese atunuu e matou te ō mai ai, ae e leʻi amanaʻia e se isi. O i matou o le ʻauuso faaleagaga”

[Faamatalaga faaopoopo i le itulau 14]

“O lenei fuafuaga, ua mafai ona matuā faamausalī ai le autasi, ma ua saga faamalosia ai foʻi le alofa i le va o nei faapotopotoga”

[Faamatalaga faaopoopo i le itulau 15]

“Maʻeu le lelei ma le matagofie pe a nonofo faatasi o uso i le autasi!” SALAMO 133:1

[Ata i le itulau 13]

Le vaaiga i le aai o Tui ma le Vaitafe o Minho, mai i le pā o le aai o Valença do Minho

[Ata i le itulau 14]

Toe faafou le Maota mo Sauniga

[Ata i le itulau 15]

Atumauga o Pyrenees ma le vanu o Cerdaña

[Ata i le itulau 15]

O toeaina mai i faapotopotoga e lua—Sepania ma Falani—o loo feiloaʻi i le Maota mo Sauniga i Puigcerdá