E Mafai e le Tusi Paia Ona Suia Olaga

NA FAAPEFEA i se fafine talavou na ola aʻe i se olaga faigatā a o laʻitiiti, ona maua se olaga fiafia? Na faapefea i se tagata faipolotiki sauā, ona avea ma faifeʻau toʻafilemu o se lotu? E maua le tali pe a faitau i tala nei.

“Na ou naunau lava e fia maua le alofa ma se faamāfanafanaga.”—INNA LEZHNINA

TAUSAGA FANAU: 1981

ATUNUU: RUSIA

TALAAGA: OLAGA FAIGATĀ

OLAGA SA IAI: Na ou fanau mai e logonoa, i ni mātua logonoa. Sa manaia lava uluaʻi tausaga e ono o loʻu olaga. Ae na oo ina teteʻa oʻu mātua. E ui ina sa ou laʻitiiti, ae na ou malamalama i le uiga o le teteʻa, ma na ou matuā tigā ai. Ina ua tatala le faaipoipoga a oʻu mātua, sa nonofo pea loʻu tamā ma loʻu tuagane matua i Troitsk, ae alu loʻu tinā ma ave aʻu i Chelyabinsk. Na toe faaipoipo loʻu tinā. Na pulea loʻu tamāfai e le ʻava malosi, ma e masani ona ia fasia i maʻua.

I le 1993, na malemo ai loʻu tuagane matua e pele iā te aʻu, ma na matuā faateʻia ai lo matou aiga. Na iʻu ina inu ʻava loʻu tinā ma aufaatasi ma loʻu tamāfai i le faileagaina o aʻu, ma amata ai ona ou saʻili i se olaga lelei. Na ou naunau lava e fia maua le alofa ma se faamāfanafanaga. Na amata loa ona ou auai i lotu eseese e saʻili se faamāfanafanaga, ae e leʻi maua.

SUIA E LE TUSI PAIA LOʻU OLAGA: Ina ua 13 oʻu tausaga, na faamatala mai e se tamaitiiti Molimau a Ieova e ma te vasega ni tala mai i le Tusi Paia. Sa ou fiafia i le iloaina o tagata o le Tusi Paia e pei o Noa ma Iopu, o ē na auauna i le Atua e ui i tulaga faigatā. E leʻi pine, ae matou suʻesuʻe loa i le Tusi Paia ma Molimau, ma amata ona ou auai i a latou sauniga.

O le suʻesuʻeina o le Tusi Paia, na ou iloa ai le tele o upu moni matagofie. Na pāʻia loʻu loto ina ua ou iloa e iai le suafa o le Atua. (Salamo 83:18) Sa ou maofa i le saʻo aʻiaʻi o valoaga o le Tusi Paia, e faatatau i tulaga o le a iai i “o aso e gata ai.” (2 Timoteo 3:1-5) Sa matuā faafiafiaina aʻu ina ua ou iloa le faamoemoe o le toetū. E mautinoa o le a ou toe vaai i loʻu tuagane!—Ioane 5:28, 29.

Peitaʻi, e lē o tagata uma na fiafia i loʻu  talitonuga fou. Na matuā feita loʻu tinā ma loʻu tamāfai i Molimau a Ieova. Sa la taumafai e uunaʻia faamalosi aʻu e tuu laʻu suʻesuʻega faale-Tusi Paia. Ae na ou fiafia i mea na ou aʻoaʻoina, ma ou te leʻi manaʻo ai e tuu.

E leʻi faigofie ona ou feagai ma teteega mai i loʻu aiga. O le isi mea faigatā, ona na malemo foʻi loʻu tuagane laʻitiiti sa masani ona ma ō i sauniga a Molimau a Ieova. Peitaʻi, sa iai pea Molimau a Ieova e fesoasoani mai iā te aʻu. Na latou faaalia le alofa, ma aumaia faamāfanafanaga sa ou moomoo i ai i loʻu olaga atoa. Na ou iloa o le lotu moni lenei, ma na avea aʻu ma Molimau a Ieova ina ua ou papatiso i le 1996.

AOGĀ IĀ TE AʻU: Ua ono nei tausaga talu ona ou faaipoipo i se tamāloa e ese le lelei, e igoa iā Dmitry. I le taimi nei o loo ma auauna faatasi i le ofisa o le lālā o Molimau a Ieova i St Petersburg, ma ua suia uiga o oʻu mātua e faatatau i oʻu talitonuga.

Ou te matuā lotofaafetai ona ua ou iloa Ieova! O le auauna iā te ia, ua ou maua ai se olaga e fiafia moni.

“E tele fesili na tuʻifesili ai aʻu.”—RAUDEL RODRÍGUEZ RODRÍGUEZ

TAUSAGA FANAU: 1959

ATUNUU: CUBA

TALAAGA: O SE TAGATA FOUVALE I LE MALŌ

OLAGA SA IAI: Sa ou fanau i Havana i Cuba, ma na ou ola aʻe i se siʻomaga matitiva, lea e masani ona tauaʻifusu tagata i le auala tele. A o ou tuputupu aʻe, na amata ona ou fiafia i le judo ma isi taaloga faatautavā.

O aʻu o se tamaitiiti atamai, ma na faalaeiau aʻu e oʻu mātua ou te alu i le iunivesite. A o iai i inā, na ou lagona ai e manaʻomia ona suia le faigāmalo a loʻu atunuu. O lea, na ou filifili ai ou te fouvale. Na  ma osofaʻia ma laʻu uō e ma te vasega faatasi se leoleo ma le faamoemoe e fao lana fana. O le tauiviga lea na matuā manuʻa leaga ai le ulu o le leoleo. Na lafo i maʻua i le falepuipui, ma tuu mai le faasalaga oti, lea o le a tafana ai i maʻua e fitafita. O le taimi lenā ua faatoʻā 20 oʻu tausaga, a o lea o le a ou oti!

I le taaligoligoa o le sela o le falepuipui, na ou faataʻitaʻia ai le auala o le a ou amioaʻi ai i luma o fitafita o le a tafanaina i maʻua. Ou te leʻi manaʻo e faaali atu ua ou fefe. Ae i le taimi e tasi, e tele fesili na oo mai i loʻu mafaufau. Na ou faapea ifo: ʻAiseā ua tele naʻuā ai le lē faamasinotonu i le lalolagi? Po ona pau ea lenei o le olaga?’

SUIA E LE TUSI PAIA LOʻU OLAGA: Na suia lo ma faasalaga oti i le 30 tausaga i le falepuipui. I le taimi lea, sa ou feiloaʻi ai i ni Molimau a Ieova sa i le falepuipui ona o o latou talitonuga faalotu. Na ou matuā maofa lava i lo latou lototetele ma le toʻafilemu. E ui ina faafalepuipui i moliaga sesē, ae e leʻi feita pe tigā ai.

Na aʻoaʻo aʻu e Molimau e iai se fuafuaga a le Atua mo le fanau a tagata. Na latou faaali mai iā te aʻu mai i le Tusi Paia, o le a avea le lalolagi ma parataiso, ma e lē toe iai ni solitulafono ma se faamasino lē tonu. Na latou aʻoaʻoina aʻu o le a tumu le lalolagi i tagata lelei, o ē o le a maua le avanoa e ola ai e faavavau i ni tulaga lelei atoatoa.—Salamo 37:29.

Na ou fiafia i mea na ou aʻoaʻoina mai i Molimau, ae e lē tutusa o matou uiga. Na ou manatu o le solitū i faiga faapolotiki po o le liliu atu o le isi alafau, e lē taitai mafai ona ou faia. O lea, na ou filifili ai e faitau e aʻu lava ia le Tusi Paia. Ina ua uma, na ou iloa ai e na o Molimau a Ieova e pei a latou amio o uluaʻi Kerisiano.

O le suʻesuʻeina o le Tusi Paia, na ou iloa ai e manaʻomia ona faia ni suiga tetele i loʻu olaga. O se faaaʻoaʻoga, sa tatau ona mamā upu ou te tautala ai, auā sa masani ona ou tautala i upu masoā. Sa manaʻomia foʻi ona tuu laʻu ulaula, ma aua le faaituʻau i mataupu faapolotiki. E leʻi faigofie ona faia nei suiga, ae o le fesoasoani a Ieova na ou taulau ai.

O se tasi o suiga sa sili ona faigatā, o le pulea lea o loʻu ita, ma o loo ou tatalo pea ina ia ou faia faapea. E tele fesoasoani ua ou maua mai i mau o le Tusi Paia, e pei o le Faataoto 16:32 lea e faapea mai: “E sili o lē e faagesegese lona ita nai lo o le toa, e sili foʻi o lē e na te pulea lona loto, nai lo o lē na te faatoʻilaloina se aai.”

Na ou papatiso o se Molimau a Ieova i le 1991. Na faia le papatisoga i se kalone vai i le falepuipui. I le tausaga na sosoo ai, na magalo ai nisi o i matou ma aauina atu i Sepania. Ina ua ou taunuu i Sepania, na ou auai loa i sauniga a Molimau a Ieova. Sa talileleia aʻu e Molimau e pei ua tele tausaga o matou masani, ma fesoasoani iā te aʻu e amata se olaga fou.

AOGĀ IĀ TE AʻU: Ua ou fiafia nei ma o loo ma auauna i le Atua faatasi ma laʻu avā, ma la ma fanau teine e toʻalua. O se faaeaga iā te aʻu le faaalu o se taimi e fesoasoani ai i isi ia iloa le Tusi Paia. I nisi o taimi, ou te toe mafaufau ai i le aso na toeitiiti a ou oti ai a o ou talavou, ma ou te faafetaia ai le tele o mea na ou iloaina talu mai lenā taimi. E lē gata ua ou maua le ola, ae ua iai foʻi ma se faamoemoe. Ou te vaavaai atu i luma i le Parataiso ua folafola mai—i le taimi o le a olaola ai le faamasinotonu ma “lē toe iai se oti.”—Faaaliga 21:3, 4.

[Faamatalaga faaopoopo i le itulau 19]

“Na pāʻia loʻu loto ina ua ou iloa e iai le suafa o le Atua”

[Ata i le itulau 20]

E ma te fiafia ma laʻu tane e tufa atu lomiga i le gagana faagūgū i ē e logonoa