Aʻoaʻoga a le Tusi Paia

Po o Valoia e le Tusi Paia le Lumanaʻi?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Pe e patino valoaga o le Tusi Paia?

E na o le Atua e ona le malosi uma lava e mafai ona silafia mea uma i le lumanaʻi. (Amosa 3:7) O se faaaʻoaʻoga, ua leva ona Ia valoia le afio mai o le Mesia, po o le Keriso. O le Mesia o le suli mai i le gafa o Aperaamo, le tagata faatuatua. O le a avea o ia ma Tupu ina ia maua ai e tagata usiusitaʻi faamanuiaga o se olaga manuia, e aunoa ma maʻi. (Kenese 22:18; Isaia 53:4, 5) O lenei tama o le folafolaga e tatau ona sau mai i Peteleema.—Faitau le Mika 5:2.

Na faamaonia o Iesu o le Mesia. I le silia ma le 7 senituri muamua atu, sa valoia ai i le Tusi Paia o le a fanau mai le Mesia i se taupou ma o le a fasiotia. O le a foaʻi atu lona soifua mo agasala a le toʻatele, ma o le a tanu faatasi ma ē e mauʻoa. (Isaia 7:14; 53:3, 9, 12) Na folafola mai i le Tusi Paia i le silia ma le 5 senituri muamua atu, o le a afio atu o ia i Ierusalema o loo tiʻetiʻe i le asini, ma o le a faalataina i le 30 tupe siliva. Na taunuu moni lava nei mea uma.—Faitau le Sakaria 9:9; 11:12.

2. Po o valoia e le Atua aso?

E sili atu i le 5 senituri muamua atu, na valoia ai e le Tusi Paia le tausaga tonu o le a aliaʻe mai ai le Mesia. Na fua lona taunuu mai i vaiaso o tausaga, o le umi o le “vaiaso” e tasi, e fitu tausaga. E faaopoopo vaiaso e 7 i vaiaso e 62, ona maua ai lea o le 69 vaiaso o tausaga. E tusa lenā ma le 483 tausaga. O anafea na amata ai le faasologa o na tausaga? E tusa ai ma le Tusi Paia, na amata lenā vaitaimi ina ua taunuu le auauna a le Atua o Neemia i Ierusalema, ma toe fausia lenā aai. Na faamaonia i le talafaasolopito o Peresia, o lenā tausaga o le 455 T.L.M. (Neemia 2:1-5) I le 483 tausaga mulimuli ane, na papatiso ai Iesu i le 29 T.A. e avea ma Mesia, o le taimi tonu lenā na valoia.—Faitau le Tanielu 9:25.

  3. Po ua taunuu moni i aso nei valoaga o le Tusi Paia?

Na valoia e Iesu ni mea mataʻina o le a tutupu i o tatou taimi. Na ia taʻua le tala lelei o le Malo o le Atua, lea o le a aumaia ai se mapusaga i le lalolagi aoao, i tagata e alolofa i le Atua. O le a faaiʻuina e le Malo lenei faiga o mea amioleaga o loo tatou ola ai.—Faitau le Mataio 24:14, 21, 22.

Ua faamatala auʻiliʻili i valoaga o le Tusi Paia le faaiʻuiʻuga o lenei faiga o mea. E ui ina faatalitalia o le a faasolo ina lelei le tulaga o mea, ae ua taʻua i le Tusi Paia o le a faaleagaina e tagata le lalolagi. O le a faateteleina mafatiaga ona o taua, oge, mafuiʻe, ma faamaʻi pipisi. (Luka 21:11; Faaaliga 11:18) O le a agaʻi ina leaga tele le tulaga tau amio. I nei aso faigatā, o le a talaʻia ai e soo o Iesu le tala lelei o le Malo o le Atua i atunuu uma.—Faitau le Mataio 24:3, 7, 8; 2 Timoteo 3:1-5.

4. O le a faapeʻī le lumanaʻi o tagata?

E iai mea lelei ua saunia e le Atua e ona le malosi uma lava mo tagata faamaoni. O Iesu Keriso le Mesia ma ē ua filifilia, o le a pule mai i le lagi i le lalolagi. O le a faia aʻe iā i latou nei le Malo i le lagi, lea o le a pule mo le afe tausaga. O le a toe faatutūina ē ua maliliu ma maua le avanoa e faamasinoina ai, po ua agavaa mo le ola e faavavau. O le a faamālōlōina foʻi e le Malo i latou uma o le a soifua i lenā taimi. O le a lē toe iai ni maʻi ma le oti.—Faitau le Faaaliga 5:10; 20:6, 12; 21:4, 5.

Mo nisi faamatalaga tagaʻi i le itulau e 23-25 ma le 197-201 o le tusi lenei, O Ā Aʻoaʻoga Moni A Le Tusi Paia?