E Mafai e le Tusi Paia Ona Suia Olaga

O LE ā na uunaʻia ai se faifaatoʻaga o le tapaa e suia lana galuega, ma tuua ona talitonuga faalotu na mauaa i lona loto? Na faapefea i se tasi sa pulea e le ʻava malosi ona maua le malosi e suia ai lona olaga? Ia faitau i a la tala.

“Ua ou fiafia i le avea o aʻu o se sui vaega o lenei aiga toʻatele.”—DINO ALI

TAUSAGA FANAU: 1949

ATUNUU: AUSETALIA

TALAAGA: FAIFAATOʻAGA O LE TAPAA

OLAGA SA IAI: Na siitia oʻu mātua mai i Alapania i le 1939 ma faamautū i Mareeba, o se taulaga laʻitiiti i Kuiniselani i Ausetalia. Na faamautū foʻi i inā tagata Bosnia, Eleni, Italia, ma Serbia, ma sa tofu i latou ma talitonuga eseese, o tū ma aganuu. Sa totō e oʻu mātua le tapaa, ona o Mareeba o se vaipanoa e faia ai faatoʻaga tapaa.

O i inā, na fanau ai loʻu tinā i loʻu tuafafine matua, o oʻu uso e toʻalua, ona sosoo ai lea ma aʻu. E faanoanoa lava, ona na maliu loʻu tamā i le maʻi fatu, ae faatoʻā tasi loʻu tausaga. Na toe faaipoipo loʻu tinā ma maua ai isi ana fanau tama e toʻafā, ma sa matou ola aʻe i le faatoʻaga tapaa a loʻu tamāfai.

Na ou tuua loʻu aiga a o ou talavou. I le lua sefulu ma ona tupu o oʻu tausaga, na ou faaipoipo ai i laʻu avā o Saime i se falesā Musalimi, auā o i maʻua uma o ni Musalimi. Na mulimuli uma oʻu tauaiga i le faatuatuaga faa-Isalama. Ou te faitau i le Koran ma se tusi e faatatau i le talaaga o le perofeta o Muhammad. I le taimi e tasi, ou te faitau foʻi i se tamaʻi Tusi Paia. O loo taʻua i le Koran perofeta o loo i le Tusi Paia, ma o le faitauina o le Tusi Paia na fesoasoani iā te aʻu e malamalama i le taimi na latou soifua ai.

Na asiasi mai Molimau a Ieova i loʻu fale ma e masani ona latou tuu mai ni mekasini ma tusi, lea na ma fiafia ma Saime e faitau iai. Ou te manatua le tele o taimi e matou te talanoa ai ma Molimau i ni mataupu eseese faalelotu. Nai lo o le taʻu mai o o latou lava manatu, e latou te faaaogā le Tusi Paia i taimi uma e tali mai ai aʻu fesili. Na telē se aafiaga o lenā mea iā te aʻu.

Na ofo mai Molimau e matou te suʻesuʻeina  le Tusi Paia ma valaaulia aʻu i a latou sauniga, ae ou te leʻi manaʻo iai. O loʻu sini sa iai, o le mauaina lea o saʻu faatoʻaga tapaa ma iai se aiga toʻatele. E ui e leʻi iai saʻu lava faatoʻaga tapaa, ae o aʻu o se tamā e alofa i laʻu fanau e toʻalima.

SUIA E LE TUSI PAIA LOʻU OLAGA: Ua mavae le iva tausaga talu ona matou feiloaʻi ma Molimau a Ieova, ae e leʻi suia ai lava oʻu talitonuga. Peitaʻi, sa ou fiafia e talia ma faitau a latou lomiga uma. O Aso Sa taʻitasi, e ma te faaavanoa ai ma Saime se taimi e faitau ai i nei lomiga. Na ma teuina mekasini uma na ma maua mo le tele o tausaga. Na fesoasoani tele nei lomiga ina ua taumafai nisi e tofotofo le faatuatua na tuputupu aʻe i loʻu loto.

O se faaaʻoaʻoga, na ou feiloaʻi i se faifeʻau faievagelia o lē na taumafai e uunaʻia aʻu e talia Iesu o loʻu Faaola. Na taulau o ia i le faatalitonuina o le tuagane o Saime ma le isi oʻu afa uso, e mulimuli iā te ia. E leʻi umi, ae taumafai tagata na ou masani i ai mai i isi lotu, e faatalitonu aʻu e liliu atu i a latou lotu. Na aumaia e nisi ni lomiga e taʻuleaga ai Molimau a Ieova. Na ou fesili atu i nei tagata faitio e faasino mai po o fea o le Tusi Paia e maua ai aʻoaʻoga faalelotu o loo latou aʻoaʻoina, ae e leʻi mafai ona latou taliina aʻu fesili.

O nei teteega na atili uunaʻia ai aʻu e suʻesuʻe loloto i le Tusi Paia ma fai isi saʻiliʻiliga, e faaaogā ai lomiga na ou maua mai i Molimau. Na ou iloa ane, ua tatau nei ona fai saʻu filifiliga ina ia suia loʻu olaga e tusa ai ma mea na ou aʻoaʻoina.

E leʻi faia saʻu suʻesuʻega faale-Tusi Paia ma Molimau, a ua amata ona ou auai i sauniga. I le taimi muamua, sa ou lagona le popole ma le matamuli, ae i na sauniga, na ou feiloaʻi ai i ni tagata e faaleuō o latou uiga ma sa ou fiafia i mea na ou aʻoaʻoina. Na tonu laʻu faaiʻuga e fia avea aʻu ma Molimau a Ieova, ma na faailogaina loʻu tuuina atu i le Atua i le 1981 ina ua ou papatiso.

E ui lava ina manatu laʻu avā i nisi taimi ua faasesēina aʻu, ae e leʻi tetee o ia i laʻu faaiʻuga ma na auai i loʻu papatisoga. Sa faaauau pea ona ou faasoa atu iā te ia le tele o upu moni sa ou aʻoaʻoina. I le pe ā ma se tausaga, ina ua ma foʻi mai i se faigāmālōlōga, sa faailoa mai ai e Saime lona faanaunauga e fia avea ma Molimau, ma na toeitiiti lavea la ma taavale ona na matuā faateʻia lava aʻu! Na papatiso o ia i le 1982.

E leʻi faigofie le faia o suiga na manaʻomia i o ma olaga. Sa lē tatau ona ou toe totōina le tapaa ona e feteenaʻi ma mataupu silisili o le Tusi Paia. (2 Korinito 7:1; Iakopo 2:8) Na umi se taimi ae faatoʻā maua ni a ma galuega e talafeagai, ma e lelei le totogi. E lē gata i lea, sa lē fia asiasi mai o ma tauaiga mo le tele o tausaga ona o na suiga. Na ma taumafai e feagai ma i latou e tusa ai ma mataupu silisili o le Tusi Paia, e ala i le faaalia atu pea o le alofa. Mulimuli ane, na toe lelei lo matou va ma ua lē o toe faasagatau mai.

 AOGĀ IĀ TE AʻU: O le feagai ma le tele o tofotofoga e pei o le matamuli, o le itu tau i seleni, po o le feagai foʻi ma teteega mai i aiga, na ou aʻoaʻoina ai le auala o loo onosaʻi mai ai Ieova le Atua, a o fesoasoani mai iā te aʻu e feagai ma faafitauli. O se faaaʻoaʻoga, ua avea nei aʻu ma toeaina o le faapotopotoga ma o le tele o taimi ou te aʻoaʻo mai ai i le pulelaa. O loo avea pea lenei mea ma luʻi ona e fesasiaʻi lava laʻu tautala ona o loʻu popole, ae ua mafai ona faataunuuina loʻu faaeaga, ona o le tatalo ma le fesoasoani a Ieova.

Ua māfana la ma faiā ma laʻu avā, ma e matuā tāua lava lenei faiā. E iai o ma sesē i le auala na tausia aʻe ai la ma fanau, ae na ma taumafai malosi e totō i o latou loto upu moni o le Tusi Paia na ma aʻoaʻoina. (Teuteronome 6:6-9) O le mea moni, o loo avea nei loʻu atalii matua ma lana avā ma misionare.

Ou te manatua se tasi o taimi ina ua faatoʻā amata ona matou auai o se aiga i sauniga a Molimau. Na paka la matou taavale ma tilotilo atu i tagata o loo faapotopoto i totonu o le Maota mo Sauniga. Sa ou fesili atu i loʻu aiga, “O le ā le mea o loo outou vāai atu i ai?” I totonu, o loo iai tagata mai i aganuu, talaaga, ma gagana eseese—tagata Apoliki, Alapania, Ausetalia, ma Croatia—ae o loo latou faifaimea faatasi ma le fiafia. Ua ou fiafia i le avea o aʻu o se sui o lenei aiga toʻatele faaleagaga, e lē gata i Ausetalia ae i le lalolagi aoao.—1 Peteru 5:9.

“E leʻi fiu loʻu uso iā te aʻu.”—YELENA VLADIMIROVNA SYOMINA

TAUSAGA FANAU: 1952

ATUNUU: RUSIA

TALAAGA: PULEA E LE ʻAVA MALOSI, TAUMAFAI E PULE I LE OLA

OLAGA SA IAI: Na ou fanau i Krasnogorsk, o se aai itiiti ma toʻafilemu e lata i Moscow. Na ou ola aʻe i se aiga e toʻatele ai faiaʻoga. Ou te lelei i le aʻoga ma sa aʻoaʻoina aʻu i le musika. E foliga mai o le a lelei loʻu lumanaʻi.

Ina ua ou faaipoipo, na ma siitia atu ma loʻu toʻalua i se vaipanoa e taatele ai le palauvale, onāga, ma le ulaula. Ou te leʻi iloa i lenā taimi sa iai se aafiaga leaga o le lenā siʻomaga iā te aʻu. I le taimi muamua, ou te alu i patī ou te pese ai ma tā ai le kitara. Peitaʻi, o le taimi lava ou te iai i inā, e mananaʻo tagata e matou te ulaula ma inu ʻava malosi faatasi, ma e leʻi umi ae avea ma aʻu masaniga le inu ʻava malosi.

O laʻu masaniga lea na matuā faaleagaina ai loʻu olaga. Na umi se taimi ae faatoʻā ou iloa ua matuā faalētonu lava loʻu olaga ma ua lē mafai ona ou ʻai. Na ou manaʻo ou te oti, ma na ou taumafai e pule i loʻu ola, ae e leʻi taunuu. Ou te lagona le lotofaafetai ona e leʻi tupu lenā mea.

E masani ona asiasi mai loʻu uso a o ou feagai  ma nei tulaga uma. Ua avea o ia ma Molimau a Ieova, ma sa taumafai e faamatala le auala e fesoasoani mai ai le Tusi Paia iā te aʻu. Sa ou lē manaʻo e toe asiasi mai o ia ona ou te lē fiafia i le Tusi Paia. Peitaʻi e leʻi fiu loʻu uso iā te aʻu. Sa ia faaalia le matuā onosaʻi ma le alofa, ma na ou ioe ai loa e suʻesuʻe i le Tusi Paia.

SUIA E LE TUSI PAIA LOʻU OLAGA: Ina ua ou suʻesuʻe i le Tusi Paia, sa faia loa saʻu faaiʻuga e tuu laʻu ulaula. I le taimi lenā, sa fasi leaga aʻu e lo matou tuaoi na onā, ma na taofia aʻu i le falemaʻi ona o oʻu manuʻa tugā. E fā oʻu ivi ʻasoʻaso na gaui, ma na leaga le vaega o loʻu mata e taʻua o le retina. E ui lava i lea, sa fesoasoani lenā taimi sa ou iai i le falemaʻi, ina ia taofi ai loʻu naunau i le ʻava malosi.

Sa ou tatalo e lē aunoa i lenā taimi. O se mau i le Tusi Paia na matuā faamāfanafanaina ai aʻu, o le Auēga 3:55, 56, lea e faapea: “Ieova e, na ou valaau atu i lou suafa mai i se lua e matuā maulalo lava. Ia e faafofoga mai i loʻu leo. Aua neʻi ʻalo ou fofoga i loʻu alaga atu mo se fesoasoani.”

Ou te talitonu na tali mai Ieova i aʻu tatalo. Sa ia aumaia iā te aʻu le malosi ina ia aua neʻi oʻu toe foʻi i loʻu olaga tuai. Na iai taimi sa faaosoosoina ai aʻu e toe amata laʻu inu, ae ou te fiafia e faailoa atu, ou te leʻi faia faapea.

A o faaauau ona ou suʻesuʻe i le Tusi Paia, na ou iloa ai e manaʻomia ona ou lagolagoina laʻu tane i lona tulaga o le ulu o le aiga. (1 Peteru 3:1, 2) E leʻi faigofie lenei mea auā e masani ona ou fia pule i laʻu tane, o lea sa ou tatalo ai iā Ieova mo lana fesoasoani. Na umi se taimi o tau fai nei suiga, ae na faasolosolo ina iai suiga lelei ma avea aʻu ma se avā e lagolagosua.

Na matuā maofa laʻu tane ina ua ia vaaia nei suiga. I lenā taimi, e leʻi fiafia lava o ia i le Tusi Paia. Ae ina ua ou filifili e tuu laʻu ulaula, sa faapea mai o ia: “O le a ou suʻesuʻe i le Tusi Paia, pe afai e tuu lau ulaula!” Sa tuu faatasi lava la ma ulaula.

AOGĀ IĀ TE AʻU: Na faataunuu e laʻu tane lana folafolaga ma amata loa ona suʻesuʻe i le Tusi Paia. O lea ua ma faitau faatasi le Tusi Paia i aso uma, manatunatu loloto iai, ma taumafai e faatatau na taʻiala i o ma olaga.

E lē mafai e upu ona faamatala le tulaga lelei o lo matou aiga ua iai, aemaise foʻi aogā ua iai i loʻu olaga. Ou te matuā lotofaafetai iā Ieova mo le tosina atu o aʻu iā te ia. (Ioane 6:44) Ou te lotofaafetai foʻi i si oʻu uso mo le lē fiu iā te aʻu. O le iʻuga, ua ou iloa nei e mafai e le Tusi Paia ona suia olaga.

[Faamatalaga faaopoopo i le itulau 11]

Na ou iloa ane, ua tatau nei ona fai saʻu filifiliga

[Faamatalaga faaopoopo i le itulau 13]

Sa faaalia e loʻu uso le matuā onosaʻi ma le alofa, ma na ou ioe ai loa e suʻesuʻe i le Tusi Paia