Aiseā e Leaga ai Faiga Faaagaga?

A o laʻitiiti Palepa, * sa ia vaai i faaaliga, faalogo i leo, ma talitonu ai o loo fesootaʻi ma tagata o lona aiga ua maliliu. E faitau o ia ma lana tane o Ioakima i tusi o faiga faataulāitu, ma sa lelei i laʻua i le faaaogāina o le pelē e suʻe ai le lumanaʻi. Sa faailoa atu e le pelē o le a tele ni a la tupe e maua e ala i la la pisinisi, ma na taunuu lenā mea. I se tasi o aso, sa lapataʻia i laʻua e le pelē o le a ō atu ni tagata leaga i lo la fale, ma na faailoa atu foʻi le auala e la te puipuia ai i laʻua.

E UI e manatu i faiga faataulāitu o se mea faaanamua, ae toʻatele tagata ua fiafia i faiga e faaaogā ai se mana uiga ese. Ua faaaogā e tagata i le lalolagi aoao ni tapui, laupapa e fesootaʻi i faiga faataulāitu, ma le talanoa foʻi i agaga leaga ina ia suʻe ai lo latou lumanaʻi, pe e puipuia ai foʻi i latou mai i mea leaga. I se mekasini Siamani o le Focus, o loo iai le mataupu “Laptop and Lucifer” ma o loo faapea mai: “Ua fesoasoani le Initaneti i le faateteleina o faiga faataulāitu.”

Pe e te iloa o loo taʻua i le Tusi Paia faiga faaagaga? E ono faateʻia oe i le manatu o le Tusi Paia e uiga i lea mataupu.

Le Manatu o le Tusi Paia e Uiga i Faiga Faaagaga

O loo taʻua i le tulafono a Ieova na tuuina atu i ona tagata i Isaraelu anamua e faapea: “Aua neʻi maua iā te oe o se tasi . . . e faia valovaloga faataulāitu o sē e faia faiga faaagaga, po o se tasi e saʻili i ni faailoilo o mea o le a tutupu po o se faataulāitu, po o se tasi e na te faalauatau i isi, po o se tasi e alu atu i sē e saʻili i agaga, po o lē e vavalo i mea e tutupu i le lumanaʻi, po o se tasi e fesili atu i ē ua oti. E inosia e Ieova i latou uma e faia na mea.” (Teuteronome 18:10-12) Aiseā ua matuā teena ai e le Tusi Paia nei faiga faaagaga?

E pei ona taʻua i luga, e toʻatele e talitonu e mafai e tagata ola ona fesootaʻi ma ē ua maliliu, ma o faamatalaga o loo maua i faiga faataulāitu e mai iā i latou ua maliliu. O na talitonuga e māfua mai i aʻoaʻoga a lotu e faapea, o loo ola le tagata ua oti i se nofoaga o agaga. Ae e feteenaʻi lenā manatu ma le faamatalaga manino a le Tusi Paia: “A o ē ua oti, latou te lē  iloa se mea.” (Failauga 9:5) O loo faamatalaina ai se tagata oti e pei o loo moe gase, ma e mātua lē iloa se mea o tupu. * (Mataio 9:18, 24; Ioane 11:11-14) Afai o le tulaga lenā, e te ono fesili, Ae e faapefea la nisi o mea o loo tutupu, lea e faaaogā moni ai lava e tagata ni mana uiga ese? O le ā le puna o na fesootaʻiga?

Fesootaʻiga ma le Nofoaga o Agaga

Ua faaalia i tusi o le Evagelia le talanoa atu o Iesu i agaga a o iai o ia i le lalolagi. O loo taʻua i le Mareko 1:23, 24 le faapea atu o se “agaga leaga” iā Iesu: “Ua ou iloa . . . oe.” E mautinoa e iloa e agaga leaga po o ai oe, ae po o e iloa i latou?

A o leʻi foafoaina e le Atua tagata, na ia foafoaina le tele o atalii agaga, po o agelu. (Iopu 38:4-7) E maualuga atu agelu i lo o tagata. (Eperu 2:6, 7) O i latou o ni ē e malolosi, atamamai, ma na foafoaina e fai le finagalo o le Atua. Na pese le faisalamo: “Ia vivii atu iā Ieova, outou o ana agelu o ē e malolosi tele ma faataunuuina lana afioga, e ala i le faalogo atu i lona siʻufofoga.”—Salamo 103:20.

Ua faaalia mai i le Tusi Paia, sa iai se taimi na fesootaʻi ai agelu ma tagata i se auala e lē tusa ma le finagalo o le Atua. O le ā le fuafuaga? O le agelu muamua na faia faapea, o lē sa faasesēina uluaʻi tagata o Atamu ma Eva, ma taʻitaʻi ese i laʻua mai i le Atua o Lē na foafoaina mea uma. O lona faia faapea sa ia faia ai o ia lava ma Satani le Tiapolo, o lē e taufaaleaga ma tetee i le Atua.—Kenese 3:1-6.

Mulimuli ane, na “tuua [e nisi agelu] le mea na latou nonofo ai” i le lagi, liu i tino tagata, ma faiavā i fafine lalelei i le lalolagi. (Iuta 6; Kenese 6:1, 2) Na faatupu e nei agelu fouvale ma a latou fanau itulua le tele o faalavelave i tagata, ma ua “tumu [ai] le lalolagi i faiga sauā.” Atonu ua e iloa le auala na faamutaina ai e le Atua le amioleaga i lenā taimi, e ala i le Lolo i aso o Noa.—Kenese 6:3, 4, 11-13.

O le oo mai o le lolo na faamalosia ai nei agelu ina ia faamataa o latou tino faaletino, ae toe foʻi atu i le nofoaga o agaga. Ae e leʻi faatagaina i latou e Lē na faia mea uma ina ia toe foʻi atu i le ʻmea na latou muaʻi nonofo ai.’ Nai lo lea, na noanoatia i latou i se nofoaga maulalo e faatusa atu i se “lua e matuā pogisa.” (2 Peteru 2:4, 5) Ua taʻua i le Tusi Paia nei agelu fouvale o “temoni.” (Iakopo 2:19) O i latou nei o loo uunaʻia faiga faaagaga.

Le Sini o Temoni

O le sini muamua o temoni o loo fesootaʻi ma tagata, o le taofia lea o i latou mai i le tapuaʻi i le Atua moni, o Ieova. O le mana o loo i tagata e faia faiga faataulāitu, ua taaʻina ese ai tagata mai i le mauaina o le poto saʻo e uiga i le Atua, ma le iai o se faiā ma ia.

E tatou te iloa le sini lona lua o temoni, i le mātauina o le faaosoosoga na tuu atu e lo latou taʻitaʻi o Satani iā Iesu. Na ofo atu e Satani iā Iesu “malo uma o le lalolagi ma o latou mamalu.” O le ā le mea na manaʻo iai Satani? Na faapea atu o ia: ʻIa e faapaʻū ma tapuaʻi mai iā te aʻu.’ Ioe, e faanaunau Satani ma temoni ina ia tapuaʻi atu iā i latou, ae na teena e Iesu le manatu e tuua le Atua ma le tapuaʻiga moni.—Mataio 4:8-10.

E seāseā ona feutagaʻi tuusaʻo faapena agaga leaga ma tagata i aso nei. Nai lo lea, e latou te faaaogā auala faatogafiti e maileia ai  tagata, e pei o polo tioata, lau o le tī, pelē e suʻe ai le lumanaʻi, fua faatautau, ma le saʻili i fetu. Ia aua lava nei faasesēina oe e nei faiga! O nei faiga e lē o se auala lea e tau atu ai i se isi lalolagi. E faaaogā e agaga leaga le uiga fia iloa o le tagata i faiga faataulāitu, e faatosina ma maileia ai tagata, ma taʻitaʻi ese ai mai i le tapuaʻi iā Ieova. Pe afai e lē taulau le sini o nei agaga leaga, ona latou matuā faalavelave lea ma faatigā i tagata o loo saisaitia i a latou faiga. Pe afai o le mea lenā o loo tupu iā te oe, o le ā e mafai ona e faia ina ia saʻoloto mai i a latou taaʻiga?

Auala e Sao ai Mai i Faiga Faaagaga

Ia aua neʻi faasesēina oe, auā o agaga leaga e fesootaʻi ma tagata, o fili na o le Atua ma e iʻu atu i le faaumatiaga. (Iuta 6) O i latou o ni ē e pepelo ma e faafoliga mai i tagata ua maliliu. O ā ou faalogona pe a e iloa ane o loo faasesē oe e se tasi o au uō, ona e lē o manaʻo e te iʻu lelei? O le ā lau gaoioiga e fai pe a e iloa ua amata se lua faauōga i le Initaneti, ma se tagata e na te faaleagaina isi i amioga matagā tau i feusuaʻiga? E matuā mataʻutia taaʻiga a temoni. E tatau ona e faia mea uma lava e te mafaia ina ia ʻalofia ai fesootaʻiga ma nei faiga. O le ā e mafai ona e faia?

Ina ua iloa e nisi o tagata i Efeso anamua le aʻoaʻoga o loo i Tusitusiga Paia e uiga i faiga faaagaga, sa latou iloa ai e tatau ona faatamaʻia a latou tusi o faiga faataulāitu e ui lava ina taugatā. Ona latou “susunu ai i le afi i luma o tagata uma.” (Galuega 19:19, 20) I aso nei, o mea e fesootaʻi atu i faiga faataulāitu e lē gata e aofia ai tusi, tapui, o laupapa e fesootaʻi ma faiga faataulāitu, ae o faamatalaga foʻi e maua mai i so o se fesootaʻiga faaonapōnei. Ia fulitua i so o se mea e fesootaʻi atu i faiga faaagaga.

Seʻi manatu i le ulugalii na taʻua i le amataga o le mataupu. Na faailoa mai i le pelē e suʻe ai le lumanaʻi, o le a iai ni tagata leaga o le a ō atu i lo la fale, ae e lē tatau ona la faalogo pe e talia se mea mai iā i laʻua. Ae peitaʻi, ina ua asiasi ane Connie ma Gudrun o ni Molimau a Ieova ma faapea atu o loo la talaʻia atu le tala lelei e uiga i le Atua, na filifili Ioakima ma Palepa e faalogologo. Na oo la latou talanoaga i le mataupu i faiga faaagaga, ma na faailoa atu e Connie ma Gudrun faamatalaga moni mai i le Tusi Paia e faatatau i lea tulaga, ma o inā na amata ai loa se suʻesuʻega faale-Tusi Paia faifai pea.

E leʻi umi ae filifili Ioakima ma Palepa e motusia a la fesootaʻiga ma temoni. Na faamatala atu e Molimau o le a lē fiafia temoni i la la filifiliga. O le mea moni, na feagai Ioakima ma Palepa ma le tele o faafitauli ma na mafatia i osofaʻiga a temoni. Na fefefe i laʻua i pō uma, seʻia oo i le aso na la siitia atu ai i lo la fale fou ma maua ai se mapusaga. A o faagasolo nei taimi faigatā, na tumau pea le mautinoa o lenei ulugalii i upu o loo i le Filipi 4:13: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” Na faamanuia e Ieova a la taumafaiga maumauaʻi, ma na lē toe faalavelave agaga leaga iā i laʻua. O loo tapuaʻi nei ma le fiafia Ioakima ma Palepa iā Ieova le Atua moni.

Ua timaʻi mai le Tusi Paia i ē e fia maua faamanuiaga a Ieova: “Ia outou gauaʻi atu i le Atua ae ia tetee atu i le Tiapolo, ona sola ese ai lea o ia mai iā te outou. Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:7, 8) E mafai ma e finagalo Ieova le Atua ina ia fesoasoani iā te oe e saʻoloto mai i taaʻiga a temoni, pe afai e te manaʻo iai. Pe a toe manatu i lo la saʻoloto mai i faiga faaagaga, e ioe ma le lotoatoa Ioakima ma Palepa i upu o le Salamo 121:2: “O loʻu fesoasoani e mai iā Ieova lea.”

[Faaopoopoga i lalo]

[Faamatalaga faaopoopo i le itulau 21]

O faiga faataulāitu ua taofia ai tagata mai i le mauaina o se faiā lelei ma le Atua

[Faamatalaga faaopoopo i le itulau 22]

“Ia outou mafuta vavalalata atu i le Atua, ona mafuta vavalalata mai lea o ia iā te outou.”—IAKOPO 4:8