Aʻoaʻoga a le Tusi Paia

E Faapefea Ona Tatou Faamanatuina le Maliu o Iesu?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O le ā le auala e tatau ona faamanatu ai le maliu o Iesu?

Na fetalai atu Iesu i ona soo ina ia faamanatu lona maliu e ala i se talisuaga tāua, e faaaogā ai le areto (falaoa) ma le uaina. E avea le areto ma faatusa o le tino o Iesu, a o le uaina na fai ma faatusa o lona toto.—Faitau le Luka 22:19, 20.

Na faaaogā e Iesu le areto e lē faafefeteina. I le Tusi Paia, e masani ona faaaogā le mea faafefete e fai ma sui o le agasala. O lea la, sa talafeagai le areto lea na fai ma faatusa o le tino lelei atoatoa o Iesu. Na ofo mai lona tino e fai ma taulaga, lea na faaiʻuina ai taulaga sa faia i manu e pei ona iai i le Tulafono a Mose. (Eperu 10:5, 9, 10) Na avea le uaina ma faatusa o le toto tāua o Iesu lea na faamaligiina e fai ma togiola mo a tatou agasala.—Faitau le 1 Peteru 1:19; 2:24; 3:18.

2. O afea e tatau ona tatou faamanatu ai le maliu o Iesu?

Na maliu Iesu i le aso o le Paseka iā Nisani 14. O aso faa-Iutaia, e amata pe a goto le lā. Na taumafaina e Iesu ma ona aposetolo le talisuaga o le Paseka i le afiafipō, a o lumanaʻi lona maliu, ma sa ia faia ai se talisuaga o se faamanatuga fou, e faamanatu ai lona maliu.—Faitau le Luka 22:14, 15.

I aso nei, o loo faamanatu e tagata o le Atua lana sauniuniga e ala iā Iesu, ina ia tuusaʻoloto ai le lalolagi atoa mai i le agasala ma le oti. (Esoto 12:5-7, 13, 17) E pei lava ona faatasi i le tausaga ona faamanatu le Paseka, e faapena foʻi ona faatasi i le tausaga ona faamanatu le maliu o Iesu, pe a goto le lā iā Nisani 14, e tusa ai ma le kalena faale-tausaga a le Tusi Paia.—Faitau le Ioane 1:29.

  3. O ai e tatau ona taumafaina le areto ma le uaina?

Ina ua avatu e Iesu i ona soo le uaina, sa faapea atu o ia: “O lenei ipu, o le faatusa lea o le feagaiga fou.” (1 Korinito 11:25) O le feagaiga fou ua suia ai le feagaiga o le Tulafono a Mose, lea na folafola atu e le Atua i le nuu o Isaraelu, pe afai e latou te matuā usiusitaʻi iā te ia, ona avea lea o i latou ma ona tagata. (Esoto 19:5, 6) Peitaʻi, e leʻi usiusitaʻi Isaraelu i le Atua, ma o le ala lea na saunia ai se feagaiga fou.—Faitau le Ieremia 31:31.

E ala i le feagaiga fou, ua saunia ai e Ieova le tele o faamanuiaga mo tagata uma e ala i se vaega toʻaitiiti. E na o le 144,000 e iai i lenei feagaiga fou. E ala iā i latou, ua faamanuiaina ai le faitau miliona mai i atunuu uma i le ola e faavavau i le lalolagi parataiso. O nisi e iai i lenei feagaiga, o loo auauna atu iā Ieova i le lalolagi i aso nei. E na o i latou na e tatau ona taumafaina le areto ma le uaina, auā ua osia e Ieova se feagaiga fou ma i latou, e ala i le toto o Iesu.—Faitau le Luka 12:32; Faaaliga 14:1, 3.

4. E faapefea ona tatou maua aogā mai i le Faamanatuga?

O le Faamanatuga o le maliu o Iesu i tausaga taʻitasi e faaloloto ai pea lo tatou talisapaia mo le alofa silisili o Ieova. Na ia foaʻi mai lona Alo ina ia maliu mo a tatou agasala. O lea la, pe a auai i le Faamanatuga, e tatau ona tatou manatunatu i le uiga o le maliu o Iesu mo i tatou. E tatau ona iloa le auala e faaali atu ai lo tatou lototalisapaia, mo le sauniuniga ua faia e Ieova ma Iesu mo i tatou.—Faitau le Ioane 3:16; 2 Korinito 5:14, 15.

Mo nisi faamatalaga, tagaʻi i le itulau e 206-208 o lenei tusi, O ā Aʻoaʻoga Moni a le Tusi Paia?, ua lomia e Molimau a Ieova.