E te Silafia?

O le ā le fata faitaulaga i “le Atua e Lē Iloa,” lea na vaaia e le aposetolo o Paulo i Atenai?—Galuega 17:23.

▪ E toʻatele tusitala Eleni anamua e masani ona latou faasino atu i na ituaiga o fata faitaulaga. O se faaaʻoaʻoga, na taʻua e se tusitala o le talafaasolopito, ma o sē e suʻesuʻe i faafanua i le senituri lona lua T.A. e suafa iā Pausanias, sa iai i Olimipia “se fata faitaulaga i atua e Lē Iloa.” Na taʻua foʻi e se failauga ma o se faifilosofia e igoa iā Philostratus mai i Atenai, sa faia “fata faitaulaga ina ia faamamalu ai e oo lava i atua e lē iloa.”

I le senituri lona tolu T.A., na taʻua ai e le tusitala o Diogenes Laertius se uputuu e faamatala ai le tupuaga o “ fata faitaulaga e leai ni igoa.” O lenei tala na amata mai i le senituri lona 6 po o le lona 7 T.L.M., ona o taumafaiga a se tagata e suafa iā Epimenides e taofia se faamaʻi na iai i le aai o Atenai. Na tusi Diogenes: “Na ia [Epimenides] ave ni mamoe . . . i Areopako; ma sa ia tuu atu mamoe e ō i so o se mea lava ma faatonu nisi e mulimuli i mamoe taʻitasi. O le mea lava e taoto ai le mamoe, o i inā e faia ai se fata faitaulaga i le atua o le aai. O le faia faapea o le a taofia ai le faamaʻi. E oo mai lava i aso nei o loo maua pea le tele o fata faitaulaga i le tele o vaega o Attica, ae e lē o iai ni igoa.”

Ua taʻua i le The Anchor Bible Dictionary, o se tasi o māfuaaga na fausia ai na fata faitaulaga i atua e lē iloa, ona sa “fefefe tagata ina neʻi latou lē avatu le viiga i atua ma atua fafine e lē iloa, ona oo mai ai lea o toʻasā o atua iā i latou, ae lē o ni faamanuiaga.”

Aiseā na inosia ai le ʻauaolafoga e tagata Iutaia i le uluaʻi senituri?

▪ E lē fiafia tagata i le ʻauaolafoga. I Isaraelu i le uluaʻi senituri, na manatu i le ʻauaolafoga o ni ē e inosia ma o tagata leaga.

Na poloaʻia e le pulega a Roma tagata ina ia totogi ni lafoga tetele. Na aoina e alii sili o Roma lafoga o fanua, ma lafoga tuusaʻo. O le tagata lava e tele ana tupe e totogi i le malo o Roma, o ia lenā e filifilia e aoina lafoga mo oloa mai isi atunuu, o oloa e faatau ese atu, po o oloa foʻi e ui mai i le atunuu ina ia avatu i isi atunuu. Na totogi e tagata faipisinisi ni tupe ina ia maua ai le aiā e ao ai lafoga mai i ni vaipanoa patino. Ua faapea mai le Cyclopædia a M’Clintock ma Strong, i le avea ai o nei tagata ma ni ē e faigaluega mo Roma, na matuā inosia ai i latou e tagata Iutaia, ma na manatu iā i latou o ni ē e “faalata ma o ni ē ua fulitua i le upu moni, ona na galulue ma tagata faapaupau.”

Na lauiloa le ʻauaolafoga i le lē faamaoni ma na maumea i latou ona o tupe na latou aoina mai i o latou uso Iutaia. Na sii e nisi le tau o se oloa ina ia latou maua ai se tupe faasili, a o isi na latou faia ni moliaga sesē ina ia maua ai ni tupe mai tagata matitiva. (Luka 3:13; 19:8) O le iʻuga, na taʻua i le The Jewish Encyclopedia e faapea, na manatu i le ʻauaolafoga o ni ē e tutusa lelei ma tagata agasala, ma e “lē mafai ona avea ma ni faamasino po o se molimau.”—Mataio 9:10, 11.

[Ata i le itulau 18]

O toega o mea o le fata faitaulaga i se atua e lē iloa i Pergamum, i Take

[Ata i le itulau 18]

O se ata o se aolafoga roma i le senituri lona 2 po o le 3 T.A.

[Ē Ana le Ata]

Erich Lessing/Art Resource, NY