Ua Fesili Mai le ʻAufaitau . . .

Po o le Tolutasi o se Aʻoaʻoga a le Tusi Paia?

▪ E tele auala e faamatalaina ai le talitonuga o le Tolutasi, ae o se tasi lenei o auala: “E tolu Peresona tauatua (le Tamā, le Alo, ma le Agaga Paia), o i latou uma taʻitoʻatasi e faavavau, malosi, leai se tasi e sili atu pe e maulalo ifo i le isi, o i latou foʻi taʻitoʻatasi o ni Atua, ae i le taimi e tasi o i latou o le Atua e tasi.” Po o se aʻoaʻoga lea a le Tusi Paia?

E masani ona faaaogā le Mataio 28:19 e lagolago ai lenei talitonuga. I le Tusi Paia o le King James Version, o loo sii mai ai upu a Iesu e faapea: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia.” E moni o loo taʻua uma le Tamā, le Alo, ma le agaga paia i lenei mau, peitaʻi, e lē o taʻua i lenei fuaiupu e tasi i latou. Na faatonu e Iesu ona soo Iutaia ina ia aʻoaʻo ma papatiso tagata i le suafa o le Tamā, le Alo, ma le agaga paia. O le ā na talitonu iai tagata Iutaia?

Ina ua maua e le nuu o Isaraelu le feagaiga o le Tulafono, lea e avea o se vaega o le Tusi Paia, na faatonuina i latou e faapea: “Aua lava neʻi fai mo oe ni atua ese e faatavā mai iā te aʻu.” (Teuteronome 5:7) E toʻafia peresona o loo talanoaina i inei? E leai ma se lavelave auā ua faapea mai le Teuteronome 6:4: “Isaraelu e, faalogo mai ia: O Ieova lo tatou Atua, o Ieova e toʻatasi lava ia”—ae e lē tolu peresona ae tasi lava i latou. E leʻi leva ona faasaʻoloto mai Isaraelu mai i Aikupito, lea e tapuaʻia ai atua e tolu ua tuu faatasi o Osiris, Isis, ma Huro (o loo i le ituagavale). O lea la, sa faatonuina Isaraelu ina ia tapuaʻi i le Atua e toʻatasi. Aiseā e tāua ai ona malamalama tagata i lenei faatonuga? Ua taʻua e se rapi e igoa iā Dr. J. H. Hertz: “O lenei faamatalaga manino e uiga i le tapuaʻia na o le atua e toʻatasi, ua feteenaʻi ma talitonuga e tele atua e tapuaʻi i ai.  . . E leʻi taʻua i le tatalo o le Sema le talitonuga o nisi Kerisiano e uiga i le tolutasi, ona e faalēaogā ai le tulaga Tutasi o le Atua.” *

Talu ai sa fanau mai Iesu o se Iutaia, na faatonuina foʻi la o ia ina ia usitaʻia lenei faatonuga. Ina ua mavae lona papatisoga, na faaosoosoina o ia e le Tiapolo ma na ia faapea atu: “Inā alu ese ia oe Satani, auā ua tusia, ʻE tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.’” (Mataio 4:10; Teuteronome 6:13) E lua ni manatu e tatou te aʻoaʻoina mai i inei. Muamua, na taumafai Satani e faaosooso Iesu e tapuaʻi i se isi e ese mai iā Ieova. O se faaosoosoga e lē talafeagai pe afai foʻi o Iesu o se Atua. Lona lua, na faamanino atu e Iesu e na o le toʻatasi le Atua e tatau ona tapuaʻi i ai, ina ua faapea atu e uiga iā Ieova, e “na o ia,” ae e leʻi faapea mai, o i “matou.” Atonu o lana faamatalaga lenā e ono fai, pe ana faapea o ia o se vaega o le Tolutasi.

Pe a iloa e tagata le poto saʻo e uiga i le Atua ma mananaʻo e auauna iā te ia, e papatisoina la i latou “i le suafa o le Tamā, ma le Atalii, ma le agaga paia.” (Mataio 28:19) E latou te malamalama ma talia le pule silisili a Ieova, ma le matafaioi a Iesu Keriso i le faataunuuina o fuafuaga a Ieova. (Salamo 83:18; Mataio 28:18) E latou te malamalama foʻi i gaoioiga a le agaga paia o le Atua, po o lona mana galue.—Kenese 1:2; Kalatia 5:22, 23; 2 Peteru 1:21.

E tele tausaga o fenuminumiaʻi tagata i le aʻoaʻoga o le Tolutasi. I le isi itu, na faamalamalama ma taʻitaʻia e Iesu ona soo i “le Atua moni e toʻatasi,” o Ieova.—Ioane 17:3.

[Faaopoopoga i lalo]

[Ē Ana le Ata i le itulau 23]

Musée du Louvre, Paris