O se Tusi Mai Rusia

Saʻilia o Oloa Tāua i Atumauga Lanu Auro o Altay

O SE aso lagilelei iā Me i Altay Republic, o se nofoaga matagofie i saute i sisifo o Siberia. E ma te iloa mai i lo ma faamalama se vaomatua o loo iai i tua se mauga e toʻa ai le kiona i le tumutumu. O se nuu lafulafuā ma maotua o tagata Altai, o ni tagata Asia e iai la latou lava gagana. E ola aʻe lava i latou i Atumauga o Altai, lea e faaigoa i se upu i le gagana Turkic-Mongolian, e uiga atu i le “auro.”

E na o ni nai tausaga na ma aʻoaʻoina ai ma loʻu toʻalua le Gagana Faagūgū Rusia, ae amata loa ona ma asiasi i faapotopotoga ma vaega toʻaitiiti o Molimau a Ieova e iai tagata logonoa. I lenei atunuu, e silia ma le 100 ituaiga eseese o tagata, 70 aganuu e latou te faaaogā le gagana Rusia. Ae o tagata logonoa sa matou feiloaʻi, e latou te faaaogāina le Gagana Faagūgū Rusia. E māfana le va o tagata logonoa, ma o le toʻatele na matou feiloaʻi e naunau e faailoa mai o latou talaaga iā i matou, ma faaalia mai le agaga talimālō. O le tulaga moni lenā o tagata i Altay.

A o iai i le aai o Gorno-Altaysk, sa ma iloa ai e iai ni nai tagata logonoa e nonofo i se nuu laʻitiiti e 155 maila (250 km) le mamao ese. Na ma iloa e iai ni nai Molimau i inā, ae e lē iai se tasi o i latou e iloa le faagūgū. Na ma mananaʻo e feiloaʻi ma tagata Altai e logonoa, o lea na ma filifili ai e ō i le nuu. O lo ma naunau na mananaʻo ai se ulugalii e logonoa o Yury ma Tatyana e matou te ō. Na uta i se tamaʻi veni a matou DVD mo le gagana faagūgū, ma se masini e faaali ai DVD. Na ave foʻi se fagu tī (thermos), sanuisi e fai i sosisi, ma se kuka Rusia e tai pei o se pai e ave iai kapisi ma pateta. Mulimuli ane, sa matou faaaogā se fagu e uu ai o matou tino ma fana ai ofu ma seevae ina ia puipuia ai mai utufiti, ona sa taatele le fiva ʻafuʻafu i le faiʻai (encephalitis) e māfua mai i nei utufiti.

Na matou uia se auala e ui atu i le va o mauga, lea e na o le manogi o laau o le jasmine ma le lilac e te lagonaina, ma na mafai ona faafouina ai i matou. Sa faagaeetia i matou ina ua vaaia se lafu ʻaila Siberia o aai fifilemu i le mutia. O fale i Altay e faia i laupapa ma e ato i ʻapa. I autafa o le tele o fale, e tutū ai ni tamaʻi fale laupapa e taʻua o ayyl, lea e ono tulimanu ma lona taualuga e tai pei o se falelogo. O nisi fale e ato o latou taualuga i paʻu o laau. O le tele o aiga i Altay e  nonofo i ayyl mai i le masina o Me seʻia oo iā Setema, ae e toe foʻi i o latou fale mautū pe a oo i le taumālūlū.

Na faafeiloaʻi ma le māfana i matou e Molimau e nonofo i le nuu, ma faasino i matou i se ulugalii Altay e logonoa. Na fiafia i laʻua ina ua vaai mai ma na fia iloa po o fea e matou te ō mai ai, ma po o le ā la matou mea o fai. Ona e iai se la komepiuta, o lea, ina ua vaai mai i le DVD, na mananaʻo i laʻua e faaali le ata i le la komepiuta. E leʻi umi, ae lē toe tautala se tasi, ma e peiseaʻī e matou te lē o iai i inā. Na pulatoʻa atu i laʻua i le ata ma faataʻitaʻi taga faagūgū o loo faaali mai, e faailoa ai lo la talisapaia o le ata. Sa faigatā ona talanoa atu ona sa naunau i laʻua i le DVD, o lea sa matou taofia ai le ata ma talanoa auauaʻi i vaaiga sa matamata i ai, e pei o le ata o se parataiso matagofie i le lalolagi. Sa matou talanoa i mea o le a faia e le Atua i tagata, ma ituaiga o tagata o le a ola e faavavau i le tulaga o loo la vāai atu iai. Na faalaeiauina i matou i lo la fiafia, ma ina ua uma la matou talanoaga, ona la taʻu mai lea o se isi ulugalii logonoa foʻi e nonofo i le isi nuu, e tusa ma ni nai itula le mamao e malaga ai.

Na matou tuua inā ae ui atu i se auala maamaā ma fepiʻopiʻoaʻi i le va o mauga, ma oo atu ai i se nuu laʻitiiti. Na talia ma le fiafia i matou e se ulugalii e logonoa, e logonoa foʻi le tinā o le avā, ma le la tama tama. Na matou ulufale atu i lo latou fale (ayyl), ma matou lagonaina le manogi o laupapa ma le manogi o le pata o le susu. E iai se pu i le tumutumu o le taualuga o le fale e susulu mai ai le malamalama. E tu la latou ogaumu i le tulimanu, ma e siʻo totonu o le fale i ʻie mūmū. Na ofo mai e le ulugalii se taumafataga Altay mo i matou, o se tamaʻi tonati e falai ma se ipu tī. Na matou fesili atu pe e latou te manatu e mafai ona avea i latou ma uō a le Atua. Na faamatala mai e le tinā o le avā e faapea e masani ona alu i taimi o laʻitiiti e ave meaʻai i se nofoaga i le mauga, e ofo atu mo atua. Na faamimigi ona tauʻau ma ʻata ma faapea mai: “Ua na o se tū masani, ae ou te lē iloa po o le ā le uiga.”

Na matou matamata i se DVD e uiga i lenei mataupu ma na matuā fiafia ai i latou. Na naunau e faaauau le talanoaga, ae o le a faapefea ona faaauau? E ui e faigofie ona lafo atu iā i latou se feʻau tusitusia e ala i le telefoni, ae e lē faaaogāina ni telefoni feaveaʻi i lenā vaipanoa. O lea, na fai ai se tonu o le a matou fesootaʻi e ala i le fetusiaʻi.

Ina o le a goto le lā, na matou toe foʻi atu ai i Gorno-Altaysk. Na lagona le vaivai, ae sa faamalieina i matou. I se taimi mulimuli ane, sa matou fesili atu i se Molimau e uiga i lenei aiga, ma matou iloa ai e taʻilua vaiaso ma malaga atu le tane i le aai, ma o i inā e fesoasoani ai iā te ia se tuafafine e iloa faagūgū, e suʻesuʻe le Tusi Paia ma auai i sauniga. Maʻeu lo matou fiafia i le iloaina ua fua mai a matou taumafaiga!

O le saʻilia o tagata logonoa e lotofaamaoni e faatusaina i ni oloa tāua o loo tanumia i se mauga. E tele itula na faaaluina ae na faafuaseʻi lava ona maua se oloa tāua. O le a tumau pea ona avea le atumauga o Altay e pei o se auro iā i matou, e faamanatu mai ai tagata faamaoni sa matou feiloaʻi i se vaipanoa lafulafuā.