Aʻoaʻoga a le Tusi Paia

Aiseā e Papatiso ai Kerisiano?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O le ā le uiga o le papatisoga o se Kerisiano?

O le papatisoga, o lau talosaga lea i le Atua ina ia maua se faiā lelei ma ia. O lea, e tatau ona papatiso se Kerisiano pe a matua o ia, ma aʻoaʻoina mea e uiga i le Atua, ma avea o se soo o Iesu, ae e lē i le taimi a o pepe. (Galuega 8:12; 1 Peteru 3:21) E avea i tatou ma soo o Iesu pe afai e tatou te aʻoaʻoina ma faia mea e poloaʻi mai ai o ia.—Faitau le Mataio 28:19, 20.

I aso o aposetolo o Iesu, e toʻatele tagata na vave gaoioi e aʻoaʻoina mea e uiga i le Atua ma Iesu. O se faaaʻoaʻoga, na vave lava ona avea se tamāloa ma soo o Iesu ina ua ia aʻoaʻoina, o le maliu o Iesu ua mafai ai ona ia maua le faaolataga. I aso nei, e toʻatele tagata faamaoni ua filifili e avea i latou ma soo o Iesu.—Faitau le Galuega 8:26-31, 35-38.

2. Aiseā na papatiso ai Iesu?

O le 30 o tausaga o Iesu na faatofu ai o ia e Ioane le Papatiso i le vaitafe o Ioritana. O le papatisoga o Iesu na faailogaina ai lana filifiliga e faataunuu le finagalo o le Atua mo ia. (Eperu 10:7) E aofia ai i lenei mea le faataulagaina o lona ola e fai ma taulaga mo agasala a tagata. E oo lava foʻi i le taimi a o leʻi afio mai Iesu i le lalolagi, sa alofa pea o ia ma usiusitaʻi i lona Tamā, o Ieova.—Faitau le Mareko 1:9-11; Ioane 8:29; 17:5.

  3. Aiseā e tatau ai ona papatiso se Kerisiano?

E eseese o tatou tulaga ma le tulaga o Iesu, ona na tatou fananau mai o ni tagata agasala. Peitaʻi, o le maliu faataulaga o Iesu ua mafai ai ona tatou maua se faiā lelei ma le Atua. (Roma 5:10, 12; 12:1, 2) Ua mafai ai foʻi ona avea i tatou ma sui o lona aiga. (2 Korinito 6:18) E faapefea ona tatou maua lenei faaeaga? E tatau ona e faia se tatalo e tuuina atu ai oe iā Ieova, ma tautō e faia lona finagalo i lou olaga atoa. Pe a uma ona faia lenā tuuina atu, ona faailogaina loa lea i le lautele e ala i le papatisoga.—Faitau le Mataio 16:24; 1 Peteru 4:2.

4. E faapefea ona e sauniuni mo le papatisoga?

E suʻesuʻe e Molimau a Ieova le Tusi Paia ma so o se tasi e manaʻo e mafuta vavalalata atu i le Atua. O le suʻesuʻeina o le Tusi Paia ma le auai i sauniga faa-Kerisiano, o le a atili faateleina ai lou alofa mo le Atua ma lou faatuatua iā te ia. O le a fesoasoani foʻi iā te oe ina ia atiaʻe ai uiga ma masaniga lelei. O le atiaʻe o le alofa, faatuatua, ma isi uiga e fiafia iai le Atua, o le a fesoasoani iā te oe e tausia lau tautoga ina ia auauna iā Ieova e faavavau.—Faitau le Ioane 17:3; Eperu 10:24, 25.

Mo nisi faamatalaga tagaʻi i le mataupu e 18 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.