E Mafai e le Tusi Paia Ona Suia Olaga

O LE Ā na uunaʻia ai se alii e toe foʻi i ona talitonuga faalelotu na ola aʻe ai? Na faapefea i se alii talavou ona maua se ituaiga o tamā, lea na ia moomoo iai i lona olaga atoa? Ia faitau i a la tala.

“Ua tatau ona ou toe foʻi iā Ieova.”—ELIE KAHLIL

TAUSAGA FANAU: 1976

ATUNUU: KUPERU

TALAAGA: ATALII FAAMAUMAUʻOA

OLAGA SA IAI: Na ou fanau i Kuperu ae sa ou ola aʻe i Ausetalia. O oʻu mātua o ni Molimau a Ieova, ma na la taumafai malosi ina ia totō iā te aʻu se alofa mo Ieova ma lana Afioga, le Tusi Paia. Peitaʻi na amata ona ou fouvale i taimi o loʻu talavou. Ou te sola ese mai i le fale i le pō ina ia matou ō ma isi talavou. E matou te gaoia taavale ma faatupuina le tele o faalavelave.

I le taimi muamua, sa ou faia faalilolilo na mea ona o loʻu fefe neʻi lē fiafia oʻu mātua, ae na faifaimālie lava ona mou atu loʻu fefe. Sa ou faauō i tagata e matutua atu iā te aʻu ma e lē alolofa iā Ieova, ma e telē se aafiaga leaga sa oo ai iā te aʻu. Na oo ina ou fai atu i oʻu mātua, ou te lē toe fia auai i la la tapuaʻiga. Ae na la taumafai ma le onosaʻi e fesoasoani mai iā te aʻu, peitaʻi sa ou teena. Na matuā mafatia lava loto o oʻu mātua.

Ina ua ou alu ese mai i loʻu aiga, sa amata loa ona ou faaaogāina fualaau faasāina, ma totō ma faatau atu le tele o mariuana. Sa ou ola i se olaga lē mamā ma faaalu le tele o loʻu taimi i fale kalapu. Na amata foʻi ona lē pulea loʻu ita. Pe afai e fai e se tasi se tala po o se gaoioiga ou te lē fiafia i ai, e vave lava ona oso aʻe loʻu ita ma e masani ona ou ee atu pe fasi foʻi i latou. O le mea moni, sa ou faia mea uma lava sa ou iloa e lē tatau ona faia e se Kerisiano.

SUIA E LE TUSI PAIA LOʻU OLAGA: Na amata ona ma uō lelei ma se alii e faaaogāina fualaau faasāina, ma sa maliu lona tamā a o laʻitiiti lava o ia. E masani ona ma talatalanoa i le leva o le pō. O nisi o pō e talanoa ma taʻu mai ona faalogona moni i lona misia tele o lona tamā. Ona sa ou ola aʻe ma ou iloa le faamoemoe o le toetū, na vave lava ona ou talanoa atu iā te ia e uiga iā Iesu, o lē na faatūina mai ē ua maliliu ma ua ia folafola mai o le ia toe faia faapea i le lumanaʻi. (Ioane 5:28, 29) Sa ou fai atu iā te ia: “Seʻi mafaufau i le taimi o le a e toe vaai ai i lou tamā, ma e mafai e i tatou uma lava ona ola e faavavau i se Parataiso i le lalolagi.” Na pāʻia le loto o laʻu uō i na faamatalaga.

 O isi taimi e talanoa mai ai i mataupu e pei o aso e gata ai ma le aʻoaʻoga o le Tolutasi. Ou te faaaogāina lana Tusi Paia ma faasino atu iā te ia mau eseese, o loo faailoa mai ai upu moni e uiga iā Ieova le Atua, o Iesu, ma aso e gata ai. (Ioane 14:28; 2 Timoteo 3:1-5) O le tele lava ou te talanoa atu ai i laʻu uō e uiga iā Ieova, o le tele foʻi lenā o loʻu mafaufau iā Ieova.

Na faasolosolo mālie ona tuputupu aʻe fatu o le upu moni i totonu o loʻu loto, o ni fatu sa taumafai malosi oʻu mātua e totōina. O se faaaʻoaʻoga, i nisi o taimi a o ou iai i ni patī ma matou faaaogāina ni fualaau faasāina ma aʻu uō, e teʻi lava ua ou mafaufau iā Ieova. O le toʻatele o aʻu uō e faapea mai e alolofa i le Atua, ae e lē tusa ai ma a latou amioga. O loʻu lē manaʻo ou te faapena, na ou iloa ai le mea e manaʻomia ona ou faia. Ua tatau ona ou toe foʻi iā Ieova.

O le mea moni, e faigofie ona iloa le mea e tatau ona fai, ae e sili atu ona faigatā ona faatino. Sa faigofie ona faia nisi o suiga e pei o le taofi o le faaaogāina o fualaau faasāina. Na motusia foʻi a matou faauōga ma aʻu uō, ma amata ona suʻesuʻe le Tusi Paia ma se toeaina Kerisiano.

Peitaʻi, sa matuā faigatā ona faia isi suiga, aemaise lava i le lē pulea o loʻu ita. O nisi taimi e mafai ona ou pulea ai, ae o isi taimi ou te lē taulau. Ou te matuā lagona le lotovaivai, ma mafaufau e lē taitai ona ou taulau, o lea na ou talanoa atu ai i le toeaina na ma suʻesuʻe i le Tusi Paia. O lona onosaʻi ma le agalelei na avea ma puna moni o faalaeiauga mo aʻu. I se tasi o taimi, sa ia tuu mai iā te aʻu se mataupu o Le Olomatamata ou te faitauina, ma sa faatatau atu i le tāua o le lē fiu gofie. * Na ma talanoaina laasaga e mafai ona ou faia pe a lagona le ita. O le manatuaina o lenā mataupu faatasi ai ma le tatalo iā Ieova, na mafai ai ona ou pulea loʻu ita. I a Aperila i le 2000, na ou papatiso ai loa ma avea o se Molimau a Ieova, ma na matuā faatumulia ai oʻu mātua i le fiafia.

AOGĀ IĀ TE AʻU: Ua ou maua le filemu o le mafaufau ma se lotofuatiaifo mamā, i le iloaina e lē o toe faaleagaina loʻu tino i fualaau faasāina ma feusuaʻiga lē mamā. Ua sili atu loʻu fiafia po o ā lava mea ou te faia, a lē i le galuega, auai i sauniga faa-Kerisiano, po o faigāmālōlōga foʻi. Ua iai iā te aʻu se vaaiga lelei i loʻu olaga.

Ou te faafetai iā Ieova ona e leʻi galo aʻu i oʻu mātua. Sa ou mafaufau foʻi i fetalaiga a Iesu o loo i le Ioane 6:44: “E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.” E pāʻia loʻu loto pe a ou mafaufau, ua mafai ona ou toe foʻi iā Ieova ona ua ia toe tosina atu aʻu.

“Sa ou moomoo ina ia iai soʻu tamā.”—MARCO ANTONIO ALVAREZ SOTO

TAUSAGA FANAU: 1977

ATUNUU: CHILE

TALAAGA: SUI O SE ʻAU FAAILI O MUSIKA FAA-SATANI

 OLAGA SA IAI: Sa tausia aʻe aʻu e loʻu tinā i Punta Arenas, o se aai i le Strait o Magellan e tū latalata i le taufaasiʻusiʻuga i saute o Amerika i Saute. Na teteʻa oʻu mātua a o lima oʻu tausaga, ma na oo iā te aʻu faalogona o le tuulafoaʻiina. Sa ou moomoo ina ia iai soʻu tamā.

Na suʻesuʻe loʻu tinā ma Molimau a Ieova i le Tusi Paia, ma ave aʻu i sauniga faa-Kerisiano e faia i le Maota mo Sauniga. Peitaʻi, e ese loʻu musu e auai, ma ou te faalii atu lava seʻia oo i le sauniga, o lea na ou lē toe auai ai ina ua 13 oʻu tausaga.

I lenā taimi, sa amata ona ou fiafia i le musika, ma na avea ma aʻu taleni. O le 15 o oʻu tausaga na ou tāina ai pese malomaloā ma pese faa-Satani i nisi o faatasiga, o pa pia, ma nisi o faafiafiaga. O loʻu faauō atu i tagata e talenia i le musika, na ou fiafia ai i musika taualoa (classical). Na amata ona ou aʻoga i se aʻoga musika. I le 20 o oʻu tausaga, na ou siitia atu ai i le laumua o Santiago, ina ia faaauau ai aʻu aʻoaʻoga. Na ou tātā foʻi i se ʻau faaili e tāina musika malomaloā ma musika faa-Satani.

I na taimi uma, sa iā te aʻu faalogona gaogao. Ina ia faateʻa ese na faalogona, e matou te onanā faatasi ma aʻu uō i le ʻau faaili o ē na ou manatu iai o loʻu aiga, ma faaaogā fualaau faasāina. Sa iloa i oʻu foliga oʻu uiga fouvale. Ou te ofuina ofu uli, faatutupu laʻu ʻava, ma faauumi loʻu lauulu e toeitiiti oo i loʻu sulugātiti.

E mai i lea taimi i lea taimi, sa ou auai i ni fusuaga ma solia le tulafono ona o le leaga o laʻu amio. I se tasi o taimi na ou onā ai, sa ou osofaʻia ai se vaega e faaaogāina fualaau faasāina ona sa latou faasoesa mai iā te aʻu ma laʻu uō. Sa fasi faamoʻamoʻa aʻu e nei tagata ma gau ai loʻu auvae.

Peitaʻi, na faia e i latou na ou vavalalata i ai se mea sa sili ona ou tigā ai. I se tasi o aso, sa ou iloa ai ua tele tausaga talu ona faifaimea laʻu uō teine ma laʻu uō mamae, ae sa nanā e isi aʻu uō uma. Na matuā tigā ai oʻu faalogona.

Na ou toe foʻi i Punta Arenas, ma amata ai ona oʻu aʻoaʻo isi i le musika ma faigaluega o se tagata e tāina le selo. Sa faaauau foʻi ona ou tāina ma puʻeina musika malomaloā ma faa-Satani. Na ma feiloaʻi ma se tamaʻitaʻi lalelei e suafa iā Susana, ma na ma nonofo faapouliuli. Mulimuli ane, na iloa e Susana e talitonu lona tinā i le aʻoaʻoga o le Tolutasi ae ou te lē talitonu i ai. Na fesili mai o ia: “O fea la le mea moni?” Na ou tali atu iā te ia, ou te iloa e sesē le aʻoaʻoga o le Tolutasi ae e lē mafai ona ou faamaonia mai i le Tusi Paia. Peitaʻi, na ou iloa tagata e mafai ona faia faapea. Sa ou faapea atu, e mafai e Molimau a Ieova ona faasino atu iā te ia upu moni mai i le Tusi Paia. Ona ou tatalo loa lea i le Atua mo lana fesoasoani, o se mea ua leva tausaga ou te leʻi toe faia.

Ina ua mavae ni nai aso, na ou vaai ai i se tamāloa ou te tau masani i ona foliga, ma sa ou fesili atu po o ia o se Molimau a Ieova. E ui na fefe i oʻu foliga vaaia, ae sa ia taliina ma le agalelei aʻu fesili e faatatau i sauniga e faia i le Maota mo Sauniga. Ou te talitonu o le tali lea o  laʻu tatalo. Sa ou alu i le Maota mo Sauniga ma sa ou nofo i le pito i tua ina ia leai se isi e iloa mai aʻu. Peitaʻi, e toʻatele sa iloa o aʻu lea sa masani ona auai i sauniga a o ou laʻitiiti. Na ou lagona le toʻafilemu ona sa latou faafeiloaʻia aʻu ma faaalia mai le alofa. Na peiseaʻī ua ou toe foʻi mai i loʻu aiga. Ina ua ou vaaia le tamāloa sa aʻoaʻoina aʻu i le Tusi Paia a o ou laʻitiiti, ona ou talosaga atu loa lea iā te ia e ma te toe suʻesuʻe i le Tusi Paia.

SUIA E LE TUSI PAIA LOʻU OLAGA: I se tasi o aso, na ou faitau ai i le Faataoto 27:11: “Loʻu atalii e, ia atamai oe ma faafiafia ai loʻu loto.” Na ou maofa ona e mafai e se tagata faatauvaa, ona faafiafia le finagalo o Lē na faia le vateatea. O i inā na ou iloa ai o Ieova le ituaiga o Tamā lea na ou moomoo iai i loʻu olaga atoa!

Na ou manaʻo e faafiafia loʻu Tamā i le lagi ma faia lona finagalo, ae sa avea aʻu ma pologa i fualaau faasāina ma le ʻava malosi mo le tele o tausaga. Na amata ona ou malamalama i le aʻoaʻoga a Iesu o loo i le Mataio 6:24 e faapea, “e lē mafai ona pologa se tasi i ni matai se toʻalua.” A o ou taumafai e faia ni suiga, na matuā pāʻia loʻu loto i le manatu o loo i le 1 Korinito 15:33: “O aumea leaga e faaleagaina ai mea lelei ua masani ai tagata.” Na ou iloa e lē mafai ona tuu aʻu masaniga leaga pe afai e faaauau ona ou alu i na nofoaga, ma faifaimea faatasi ma tagata sa ou masani i ai. Na manino le fautuaga a le Tusi Paia: E tatau ona ou faia ni suiga tetele ina ia vavaeese mai i mea na faaleagaina ai aʻu.—Mataio 5:30.

O loʻu fiafia i le musika na matuā faigatā ai ona ou tuua le tāina ma le faalogologo i musika malomaloā. Ae sa mafai ona ou tuua ona o le fesoasoani a aʻu uō i le faapotopotoga. Na tuu laʻu inu ma le faaaogāina o fualaau faasāina. Na ʻoti foʻi loʻu lauulu, sele laʻu ʻava, ma lē toe ofu i na o ofu uli. Na fia iloa e Susana po o le ā o loo ou aʻoaʻoina mai i le Maota mo Sauniga, ina ua ou fai i ai ou te manaʻo e ʻoti loʻu lauulu. Na fai mai o ia: “E ta te ō i le Maota mo Sauniga, seʻi oʻu vaai po o le ā o loo e aʻoaʻoina mai ai!” Na fiafia o ia i mea na vaai i ai ma e leʻi umi ae suʻesuʻe loa i le Tusi Paia. Mulimuli ane, sa ma faaipoipo ma papatiso i le 2008 e avea ma Molimau a Ieova. E ma te fiafia ona ua toe autasia i maʻua ma loʻu tinā i le auaunaga iā Ieova.

AOGĀ IĀ TE AʻU: Ua ou vavaeese mai i se lalolagi o loo iai fiafiaga e lē tumau ma uō taufaaʻoleʻole. O loo tumau pea ona ou fiafia i musika, ae e na o musika e talafeagai. Ou te faaaogā oʻu tomai ina ia aogā i loʻu aiga ma isi, aemaise lava i talavou. Ou te manaʻo e latou te iloa, o le tele o mea o loo i le lalolagi e foliga mai e matagofie, ae o le mea moni ua na o ni “otaota ia mea.”—Filipi 3:8.

Ua ou maua ni uō faamaoni i le faapotopotoga Kerisiano, lea o loo maua ai le alofa ma le filemu. E sili atu i lenā, o le faalatalata atu iā Ieova, ua ou maua ai se Tamā.

[Faaopoopoga i lalo]

[Faamatalaga faaopoopo i le itulau 13]

“Ua mafai ona ou toe foʻi iā Ieova ona ua ia toe tosina atu aʻu”