Ua Fesili Mai le ʻAufaitau . . .

O Ai na Auina Mai le “Fetu”?

▪ Po ua e vaai i ni tala o loo faatino e tamaiti, o loo iai ni tupu se toʻatolu, po o ni tamāloloa popoto se toʻatolu, o loo ō atu e asiasi i le pepe fou ua faatoʻā fanau mai o Iesu, o loo taoto i le mea e tuu ai meaʻai a manu? E tusa ai ma le tala, na faaaogā e le Atua se fetu e taʻitaʻia atu ai i latou i le fale o manu o loo i Peteleema. I nisi o atunuu, e aʻoaʻo ai tamaiti e tauloto igoa o nei tupu e toʻatolu, o Melchior, Caspar, ma Baltazar. Peitaʻi, pe e ōgatusa lenā tala taʻutaʻua ma le aʻoaʻoga a le Tusi Paia? E leai. E tele ni māfuaaga e lē moni ai lenā tala.

Muamua lava, o ai nei tamāloloa? I uluaʻi tusitusiga Eleni, e lē o taʻua i le Tusi Paia nei tamāloloa o ni tupu po o ni tagata atamamai. O i latou nei o ni makoi, po o ni tagata e saʻiliʻili i fetu. O i latou o ni tagata e faia faiga faataulāitu faapaupau e faavae i tulaga o fetu. E lē o taʻua i le Tusi Paia igoa po o le aofaʻi o nei tagata asiasi.

Lona lua, o anafea na asiasi ane ai na tamāloloa? E lē i le taimi a o pepe Iesu ma o loo i le fale o manu. E faapefea ona tatou iloa lenā mea? Ua faapea mai le tusitala o le Evagelia o Mataio: “Ua latou ō atu i le fale, ma ua vaaia ai le tamaitiiti ma Maria lona tinā.” (Mataio 2:11) Mātau mai, e lē o toe pepe Iesu ae ua avea o se “tamaitiiti.” E lē o toe nonofo Iosefa ma Maria i le fale o manu, ae ua nonofo nei i se fale.

Lona tolu, o ai na auina mai le “fetu” na taʻitaʻia ai tagata e saʻiliʻili i fetu? E tele ina aʻoaʻo e taʻitaʻi lotu e faapea o le Atua na auina mai le “fetu.” Pe e moni lenā manatu? Ia manatua, e leʻi taʻitaʻia muamua e lē “fetu” tagata e saʻiliʻili i fetu i Peteleema. Nai lo lea, na taʻitaʻia atu i latou i Ierusalema i le tupu o Herota. Na latou faailoa atu le fanau mai o Iesu i se fasioti tagata lotoleaga ma malosi, ma na matuā atili ai ona faatuputeleina lona ita i le tamaitiiti, o lē o le a avea ma “tupu o tagata Iutaia.” (Mataio 2:2) Na faia e Herota se taupulepulega, ma fai atu i nei tamāloloa e toe foʻi mai iā te ia ma taʻu mai le nofoaga tonu o loo iai le tamaitiiti, ona e fia alu atu foʻi e ifo i le tamaitiiti. Mulimuli ane, ona taʻitaʻia loa lea e le “fetu” i latou iā Iosefa ma Maria. O lea la, o le gaoioiga na faia e le ʻau saʻiliʻili i fetu na ono fasiotia ai le tamaitiiti pe ana faapea e lē faasalavei ane le Atua. O le matuā ita tele o Herota ina ua lē toe foʻi mai tagata e saʻiliʻili i fetu, na ia faatonuina ai le fasiotia o pepe tama uma e lua tausaga pe e i lalo ifo, i Peteleema, ma isi nuu tuaoi.—Mataio 2:16.

Na mulimuli ane taʻua e Ieova Iesu o “loʻu Atalii pele lenā, o lē ua malie i ai loʻu loto.” (Mataio 3:17) Ia mātau: Po o le a filifilia e lenā Tamā alofa ma amiotonu o Ieova, ni tagata faapaupau e saʻiliʻili i fetu, o ē e faia faiga faataulāitu o loo faasāina i lana Tulafono, e avea ma ana avefeʻau? (Teuteronome 18:10) Po o le a ia faaaogā se fetu ina ia taʻitaʻia ai i latou i se fasioti tagata mataʻutia ma malosi i le nuu, ma taʻu atu se feʻau e sasao aʻe ai le lotoleaga ma le matauʻa o Herota? Po o le a faaaogā e le Atua lenā lava fetu, ma na lava tagata e saʻiliʻili i fetu, ina ia faailoa mai ai le nofoaga o loo taoto ai si ona alo ua faatoʻā fanau mai?

O se faaaʻoaʻoga: Ua auina atu e se taʻitaʻiʻau lelei lana fitafita lelei e faataunuu se tofiga faigatā i le mea o loo iai le fili. Po o le a ia faailoa atu i le fili le nofoaga o loo iai lana fitafita? E mautinoa e leai. I se tulaga tutusa, na auina mai e Ieova lona Alo i se lalolagi e matuā mataʻutia. Po o le a Ia faailoa atu i le tupu leaga o Herota le mea o loo taoto ai Lona Alo, ma faigofie ona osofaʻia ai o ia? E lē taitai ona ia faia faapea!

O ai la na auina mai le “fetu”? O ai e sili ona manaʻo e fasiotia le tamaitiiti o Iesu, ina ia lē mafai ona tuputupu aʻe ma faataunuuina lana galuega i le lalolagi? O ai o taumafai e taʻitaʻisesē tagata ma faapogaia pepelo, faiga sauā, ma le fasioti tagata? Na faailoa mai e Iesu lava ia, o Satani le Tiapolo, o lē e “pepelo ma le tamā o le pepelo,” ma o ia o le “fasioti tagata talu le amataga.”—Ioane 8:44.