Se Talanoaga Faale-Tusi Paia—Po o Iesu o le Atua?

E FIAFIA Molimau a Ieova e talanoa ma tagata i le Tusi Paia. Pe e iai se mataupu faale-Tusi Paia o loo e mafaufau i ai? Po o e fia iloa talitonuga po o faiga faaletapuaʻiga a Molimau a Ieova? Pe afai o lea, ia talanoa atu i se Molimau i se taimi e te toe feiloaʻi i ai. O le a fiafia o ia e te lua talanoa i lenā mataupu.

O le talanoaga o loo mulimuli mai, o se talanoaga e masani ona fai e se Molimau a Ieova ma se tagata i le talaʻiga. Seʻi faapea ua alu atu le Molimau e igoa iā Mele i le fale o se fafine e igoa iā Tina.

Pe e Moni e Tou te lē Talitonu iā Iesu?

Tina: Na fai mai la matou faifeʻau e lē talitonu Molimau a Ieova iā Iesu. E saʻo?

Mele: Ou te fia faamautinoa atu iā te oe, e matou te talitonu iā Iesu. E matou te talitonu, o le faatuatua iā Iesu e tāua tele i le mauaina o le faaolataga.

Tina: O loʻu talitonuga foʻi lenā.

Mele: O lenā la e tutusa taʻua i le tulaga lenā. Ae o loʻu igoa Mele, o ai foʻi lou suafa?

Tina: O Tina. Malo lava le soifua.

Mele: Malo foʻi le soifua Tina. Atonu o loo e taumānatu, ʻAfai e talitonu moni lava Molimau a Ieova iā Iesu, aiseā la e ese ai faamatalaga a tagata?’

Tina: Ioe, o lea ou te fia iloa atili e uiga i lenā tulaga.

Mele: E tele ni manatu ou te fia taʻu atu a o lea o le a faapuupuu atu. E matou te faatuatua atoatoa iā Iesu, ae e matou te lē talitonu i mea uma o loo talitonu ai isi tagata e uiga iā te ia.

Tina: E mafai ona e aumai se faaaʻoaʻoga?

Mele: Ioe. O nisi tagata e faapea mai o Iesu ua na o se tagata lelei, ae e matou te lē talitonu i lenā manatu.

Tina: Ou te lē talitonu foʻi iai.

Mele: E tutusa la o ta manatu. O se isi faaaʻoaʻoga, e lē talitonu Molimau a Ieova i aʻoaʻoga, e feteenaʻi ma faamatalaga a Iesu lava ia e uiga i lana faiā ma lona Tamā.

Tina: O le ā le uiga o lau tala?

Mele: E tele lotu o loo aʻoaʻoina o Iesu o le Atua. Atonu na aʻoaʻoina foʻi oe i lenā manatu.

Tina: Ioe, na fai mai la matou faifeʻau e tutusa le Atua ma Iesu.

Mele: Pe e te ioe o le auala sili e aʻoaʻoina ai upu moni e uiga iā Iesu, o le iloiloina lea o ana faamatalaga e uiga iā te ia lava?

Tina: Ou te ioe i lenā manatu.

O le ā le Faamatalaga a Iesu?

Mele: Seʻi o ta iloiloina se fuaiupu mai i le Tusi Paia e fesoasoani iā i taʻua e malamalama ai i le mataupu. Mātau mai le Ioane 6:38. Na fetalai Iesu: “Na ou sau mai i le lagi e fai le finagalo o lē na auina mai aʻu, ae e lē o loʻu loto.” O lea, e fai si faigatā o lenā manatu pe afai o Iesu o le Atua.

 Tina: O le ā le uiga o lau tala?

Mele: Ia mātau le fetalaiga a Iesu, e leʻi sau o ia mai i le lagi ina ia faia lona lava loto.

Tina: Ioe, o lea e fai mai na sau e faia le finagalo o Lē na auina mai o ia.

Mele: Pe afai la o Iesu o le Atua, o ai la na auina mai o ia mai i le lagi? Aiseā la na faia ai fua e Iesu le finagalo o Lē na auina mai o ia?

Tina: O lea ua ou tau maua atu le uiga o lou manatu. Ae atonu e lē mafai e lenā fuaiupu e tasi ona faamaonia ai e lē o Iesu o le Atua.

Mele: Seʻi mātau mai se isi faamatalaga na faia e Iesu, e taitutusa ma le faamatalaga na ia faia muamua. Pe e mafai ona e faitauina mai le Ioane 7:16 faamolemole?

Tina: Ia ua lelei. “Ona tali atu lea o Iesu ma fetalai atu: ʻO mea ua ou aʻoaʻoina atu, e lē o ni oʻu manatu, a o manatu o lē na auina mai aʻu.’”

Mele: Faafetai lava. E tusa ai ma le mau, pe na aʻoaʻo atu e Iesu ni ona lava manatu?

Tina: E leai, na faapea mai o ia o ana aʻoaʻoga e mai i Lē na auina mai o ia.

Mele: Saʻo lelei. O lea la ua toe lāgā foʻi nisi fesili: ʻO ai na auina mai Iesu? O ai na tuuina atu iā te ia upu moni sa ia aʻoaʻoina mai?’ Pe e sili atu o Ia lenā nai lo o Iesu? Auā e sili atu lē e auina mai se tasi, nai lo o lē ua auina mai.

Tina: E ese le manaia o lenā manatu. Ou te leʻi faitau muamua lava i lenā mau.

Mele: Seʻi toe tagaʻi i upu a Iesu o loo i le Ioane 14:28: “Ua outou faalogo na ou fai atu, ou te alu ma ou te toe sau iā te outou. Afai tou te alolofa mai iā te aʻu, tou te olioli i loʻu alu atu i le Tamā, auā e sili le Tamā iā te aʻu.” E tusa ai ma le mau, o le ā le manatu o Iesu e tusa ai ma lana faiā ma lona Tamā?

Tina: O lea na faapea mai e sili lona Tamā nai lo o ia. O lona uiga na manatu e sili le Atua.

Mele: O lenā tonu lava. O se isi faaaʻoaʻoga, mātau le faamatalaga a Iesu i ona soo o loo faamauina i le Mataio 28:18. Ua faapea mai le mau: “Ua tuuina mai iā te aʻu le pule uma i le lagi ma le lalolagi.” Po o faapea mai Iesu o ia lava e iai le pule uma?

Tina: E leai, o lenā e fai mai na tuuina atu iā te ia.

Mele: Ae afai o Iesu o le Atua, e faapefea la ona tuuina atu iā te ia le pule uma? O ai na tuuina atu iā te ia?

Tina: Seʻi oʻu toe mafaufau i lenā manatu.

O Ai sa Talanoa i ai o Ia?

Mele: E iai foʻi se isi manatu e faigatā ona talitonu iai pe afai o Iesu o le Atua.

Tina: O le ā lenā manatu?

Mele: O le tala e faatatau i le papatisoga o Iesu. Mātau le manatu o loo i le Luka 3:21, 22. Pe e te fiafia e faitau mai lenā mau?

Tina: “Ua uma ona papatisoina tagata uma ma ua papatisoina foʻi Iesu. A o tatalo o ia, ona avanoa ai lea o le lagi ma ua i ona luga le agaga paia ua tino mai e pei o se lupe, ua oo mai foʻi le siʻufofoga mai le lagi e faapea: ʻO loʻu Atalii pele oe, ua malie loʻu loto iā te oe.’”

Mele: Pe e te mātauina le mea na faia e Iesu i lona papatisoga?

Tina: Sa tatalo o ia.

Mele: Ioe. O lea la, e tatou te taumānatu, ʻPe afai o Iesu o le Atua, o ai la na tatalo atu i ai o ia?

Tina: Manaia lau fesili. Ae seʻi oʻu alu e fesili i la matou faifeʻau.

Mele: E iai se isi mea e tatau ona tatou mafaufau i ai, mātau, ina ua alu aʻe Iesu mai i le vai, na fetalai atu iā te ia se tasi mai i le lagi. Pe e te mātauina o le ā le fetalaiga a Lē na fetalai mai?

Tina: Na fetalai mai o Iesu o Lona Alo, ua Ia alofa i ai, ma ua Ia finagalo malie i ai.

Mele: Saʻo oe. Ae afai o Iesu o le Atua, o ai la lea na fetalai mai i le lagi?

Tina: Ou te leʻi mafaufau muamua i lenā tulaga.

 Aiseā ua Faatusa ai i se “Tamā” ma lona “Atalii”?

Mele: Seʻi mātau se isi manatu lenei: Na ta faitau i mau o loo taʻua ai e Iesu le Atua, o lona Tamā i le lagi. Ma ina ua papatiso Iesu, na faapea mai se siʻufofoga mai i le lagi o Iesu o Lona Atalii. Na taʻua patino e Iesu, o ia o le Atalii o le Atua. O lea la, pe afai e te manaʻo e aʻoaʻo aʻu e uiga i ni tagata se toʻalua e tutusa, o le ā le ituaiga o faiā faaleaiga o le a e faaaogā e faaaʻoaʻo mai ai lenā manatu?

Tina: Ou te ono faaaogāina se ʻauso.

Mele: Saʻo lelei—atonu foʻi e faaaogā se masaga. Peitaʻi, sa faasino atu Iesu i le Atua o lona Tamā, a o ia o le Atalii. O lea la, o le ā le manatu na taumafai Iesu e aʻoaʻo mai?

Tina: O lea ua ou iloa atu lou manatu. O lea na faamatala e Iesu le isi, o sē e matua ma e sili atu lana pule nai lo o le isi.

Mele: O lenā tonu lava. Seʻi mafaufau i le mea lenei: O lea na mafai ona e mafaufau i ni faaaʻoaʻoga o ni tagata e tutusa lelei, e pei o se ʻauso po o se masaga. Pe afai o Iesu moni lava o le Atua, pe e te lē manatu la sa tatau iā Iesu o le Faiaʻoga Sili, ona mafaufau i se faaaʻoaʻoga e pei ona ta manatu iai, po o se faaaʻoaʻoga foʻi e manino, ina ia iloa ai le tutusa o le faiā a ni tagata se toʻalua?

Tina: Ioe e tatau.

Mele: Peitaʻi sa ia faaaogā le upu “Tamā” ma le “Atalii” ina ia faamatala ai lana faiā ma le Atua.

Tina: E ese le manaia o le manatu na e taʻua.

O ā Manatu o Uluaʻi Soo o Iesu?

Mele: Ae ou te leʻi alu, ou te fiafia e talanoaina ma oe se isi manatu e uiga i lenei lava mataupu pe afai e talafeagai.

Tina: Manaia foʻi.

Mele: Pe afai o Iesu moni lava o le Atua, pe e te lē ioe la e tatau ona taʻua manino mai e ona soo lenā manatu?

Tina: Ioe.

Mele: Peitaʻi, e leai ma se mau o loo taʻua ai lenā manatu. Ae seʻi mātau le tala a le aposetolo o Paulo, o se tasi o uluaʻi soo o Iesu. Na tusi o ia i le Filipi 2:9, ma faamatala mai le mea na faia e le Atua ina ua mavae le maliu ma le toetū o Iesu. “Ua faaeaina ai foʻi o ia [Iesu] e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma.” E tusa ai ma lenei mau, o le ā na faia e le Atua mo Iesu?

Tina: Ua faapea mai na faaeaina e le Atua Iesu i se tulaga e sili ona maualuga.

Mele: Ioe. Pe afai na tutusa Iesu ma le Atua a o leʻi maliu, ma mulimuli ane tuuina atu e le Atua iā te ia se tulaga e sili ona maualuga, po o lona uiga la ua sili atu Iesu nai lo o le Atua? E faapefea i se tasi ona sili atu nai lo o le Atua?

Tina: E lē mafai ona tupu lenā mea.

Mele: Ou te ioe i lenā manatu. E tusa ai la ma nei faamaoniga uma, pe e te manatu o loo aʻoaʻoina i le Tusi Paia, o Iesu o le Atua lava lenā?

Tina: E leai, e lē o le tulaga lenā. O loo fai mai le Tusi Paia o ia o le Alo o le Atua.

Mele: E moni. Seʻi oʻu faamautinoa atu iā te oe Tina, e matuā faaaloalogia lava e Molimau a Ieova Iesu. E matou te talitonu o lona maliu e tusa ai ma lona tulaga o le Mesia na folafolaina mai, ua tatala ai le avanoa e maua ai e tagata faamaoni uma le faaolataga.

Tina: O loʻu talitonuga foʻi lenā.

Mele: Atonu la e te mafaufau, ʻE faapefea ona tatou faaalia atu iā Iesu e tatou te talisapaia le foaʻiina mai o lona soifua mo i tatou?’ *

Tina: Sa ou taumānatu i lenā tulaga.

Mele: E mafai la ona ou toe asiasi mai ma talanoaina ma oe le tali mai i le Tusi Paia. E te avanoa i le taimi lava lenei i le vaiaso a sau?

Tina: Ioe, ou te avanoa.

Mele: Manaia tele, o le a ta feiloaʻi la i le la vaiaso.

[Faaopoopoga i lalo]