E Faapefea Ona Aogā i Tagata Aʻoaʻoga a Kerisiano?

NA TAʻUA i mataupu na muamua atu māfuaaga e lē auai ai Kerisiano moni i faiga faapolotiki. Peitaʻi, e faapefea ona faaalia e Kerisiano, e manatu mamafa i le lelei o tagata o lo latou vaipanoa? O se tasi o auala, o le usitaʻia lea o le faatonuga a Iesu: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.”—Mataio 28:19, 20.

E iai se fesootaʻiga o le usitaʻia o le poloaʻiga a Iesu ia ʻfai tagata ma soo,’ ma le faataunuuina o lana faatonuga i le avea ma masima ma malamalama o le lalolagi. (Mataio 5:13, 14) O le ā le fesootaʻiga? O le ā le aogā o lenā galuega i tagata?

Le Feʻau a le Keriso —Faasaoina ma Faamalamalama

E mafai ona faasaoina ma puipuia e le masima se meaʻai mai i le faaleagaina. O i latou e talia ma faatatauina aʻoaʻoga a Iesu, ua puipuia i latou mai i le faaleagaina i tapulaa tau amio ia ua matuā faateteleina i aso nei. I le ā le itu? Ua latou iloa auala e ʻalofia ai masaniga e faaleagaina ai le soifua mālōlōina e pei o le ulaula. Ua latou atiaʻe foʻi uiga e pei o le alofa, filemu, faapalepale, agalelei, ma le mataalofa. (Kalatia 5:22, 23) O na uiga e fesoasoani iā i latou ina ia avea ai o ni tagata aogā i nofoaga o loo nonofo ai. O Kerisiano o ē o loo talaʻia lenei feʻau faasaoola i o latou tuaoi, o loo faia se sao tāua i o latou vaipanoa.

 Ae faapefea le talafaatusa i le malamalama? E pei lava ona faasusulu mai e le masina le malamalama mai i le lā, e faapena foʻi ona faasusulu mai e soo o Keriso le “malamalama” o Ieova le Atua. Ua latou faasusulu atu lenei malamalama mai i le Atua, e ala i galuega lelei o loo latou faia, ma le auai i le galuega talaʻi.—1 Peteru 2:12.

Na faailoa atili mai e Iesu le auala e taitutusa ai le avea ma malamalama, ma le avea ma soo: “Pe a tutu e tagata le molī ma tuu i luga o le tuugāmolī ae lē i lalo o se ato e fua ai mea, ona susulu atu ai lea i ē uma o i le fale. Ia faapea foʻi ona susulu atu lo outou malamalama i luma o tagata.” O se molī e tutu ma tuu i luga o se tuugāmolī, o le a iloa atu e tagata uma lona malamalama. I se tulaga taitutusa, o le galuega talaʻi ma galuega lelei o loo faia e Kerisiano moni, e tatau ona iloa e tagata uma. Aiseā? Na fetalai Iesu, o i latou uma e iloaina nei galuega lelei, o le a vivii atu i le Atua, ae e lē i Kerisiano.—Mataio 5:14-16.

O se Tiute Tauave Fai Faatasi

Sa talanoa atu Iesu i soo uma ina ua fetalai, “O outou o le malamalama o le lalolagi” ma “ia . . . susulu atu lou malamalama.” E lē mafai ona faataunuuina le faatonuga a Iesu e ni tagata toʻaitiiti ua taapeape solo i lotu eseese. Nai lo lea, o “le malamalama” e faasino atu i tagata tapuaʻi uma. E talitonu le toʻafitu miliona o Molimau a Ieova o loo i atunuu e 235, o lo latou tiute tauave fai faatasi, le asiasi i tagata uma ma talaʻi atu le feʻau o loo manaʻo Iesu e faia e ona soo.

O le ā le autū o le feʻau a Molimau a Ieova? Ina ua tuu atu e Iesu le faatonuga ina ia talaʻi, e na te leʻi faatonuina ona soo ina ia talaʻi atu faiga faapolotiki, mataupu i le lautele, o le tuufaatasia o Lotu ma Malo, po o se isi lava manatu faapolotiki. Nai lo lea, na ia valoia: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma.” (Mataio 24:14) O lea la, o le usiusitaʻi i le faatonuga a Iesu, ua faaauau ai pea ona talaʻi atu Kerisiano moni i aso nei i isi e uiga i le Malo o le Atua, auā e na o le pau lea o le malo e mafai ona faamutaina lenei faiga o mea amioleaga a Satani, ae aumaia se lalolagi fou amiotonu.

O le mea moni, pe a faitau i Evagelia, e lua ni mea autū e faatatau i le faiva a Iesu, ia e iai ni ona aafiaga i galuega a Kerisiano moni i aso nei. O le a taʻua na mea autū e lua i le mataupu o sosoo mai.

[Faamatalaga faaopoopo i le itulau 8]

E faapefea ona pei le feʻau a Kerisiano o se masima?

[Faamatalaga faaopoopo i le itulau 9]

E faapefea ona pei le feʻau a Keriso o le malamalama i se nofoaga pogisa?