E Mafai Ona E Filifilia se Lumanaʻi e Taulau Manuia—E Faapefea?

E FAAPEFEA ona e maua se olaga e taulau manuia? O se tasi o auala, o le faaaogā lea o le tomai mataʻina o loo iā te oe, e iloilo ai iʻuga tumau e ono oo i ai au filifiliga o loo faia i le taimi lenei.

O le mea moni, e ono faigatā iā te oe ona faia ni filifiliga e te maua ai aogā i lou olaga atoa. Aiseā? Ona o le toʻatele o tagata i aso nei e mananaʻo vave ia maua mea o loo latou faanaunau i ai. O se faaaʻoaʻoga, atonu o loo e iloa, o le faatatauina o fautuaga a le Tusi Paia e fesoasoani e faamalosia ai faiā i aiga. (Efeso 5:22–6:4) Peitaʻi, ina ia faia faapea, e tatau ona faaavanoa pea sou taimi mo lou aiga, ae ʻalofia le faaalu uma o le taimi i le galuega, o faigāmālōlōga, po o faafiafiaga. I le tele o vala o le olaga, e tatau ona e filifili pe e te manaʻo i mea e puupuu le taimi e aogā ai, po o mea e umi se taimi o aogā. E faapefea ona e maua le malosi talafeagai, ina ia filifili ai le ala atamai? Ia mulimuli i laasaga nei e fā.

1 Ia Mafaufau i le Iʻuga o Au Filifiliga

Pe a feagai ma filifiliga, ia vave ona mafaufau i iʻuga o le a oo i ai. Ua fautua mai le Tusi Paia: “O lē ua iai le utaga mamao e na te iloa atu le mala ma lafi ai.” (Faataoto 22:3) Pe afai e te iloiloina ma le faamaoni iʻuga e oo i ai, e ono uunaʻia la oe e ʻalofia le uia o se ala e faaleagaina ai. I le isi itu, o le a faamalosia oe e faia se filifiliga atamai, pe afai e te mafaufau i aogā tumau e maua mai i lenā filifiliga.

Fesili ifo iā te oe lava: ʻO le ā le iʻuga o le a oo i ai laʻu filifiliga o loo faia i le taimi nei pe a mavae se tausaga, 10 po o le 20 foʻi? O le ā lona aafiaga i oʻu faalogona ma loʻu soifua mālōlōina? E faapefea i laʻu filifiliga ona aafia ai loʻu aiga ma isi e pele iā te aʻu?’ Ae e sili atu ona tāua, ia fesili ifo: ʻPo o le a fiafia le Atua i laʻu filifiliga? O le a faapefea ona aafia ai laʻu faauōga ma ia?’ Talu ai na faagaeeina e le Atua le Tusi Paia, o lea la, e mafai ona fesoasoani le Tusi Paia iā te oe e iloa po o le ā le mea e fiafia i ai le finagalo o Ieova, ma lapataʻia foʻi oe i tulaga leaga e te ono manatu māmā i ai.—Faataoto 14:12; 2 Timoteo 3:16.

2 Iloilo e Oe Lava Manatu e Filifili Mai Ai

Nai lo o le faia o a latou lava filifiliga, o le toʻatele o tagata e faataʻitaʻi i mea o loo faia e isi. Peitaʻi e lē faapea a taatele se ituaiga o olaga, ona taulau manuia ai lea o lenā olaga. Ia iloilo e oe lava nisi o manatu e mafai ona filifili mai ai. O se faaaʻoaʻoga o Natalie. * Sa ia faapea mai: “Sa ou manaʻo e maua se paaga lelei. Peitaʻi, sa ou iloa e lē mafai ona taunuu loʻu manaʻo ona o le auala o loo oʻu ola ai. O aʻu uō uma sa iai i le kolisi maualuga o ni tagata e atamamai. Ae sa faaauau pea ona latou faia ni filifiliga leaga i o latou olaga. E masani ona fesuisuiaʻi a latou uō tama ma uō teine. Sa tele foʻi ni aʻu uō tama e pei o i latou, ma o lenā ituaiga o olaga na matuā tigā ai oʻu faalogona.”

Na amata ona suʻesuʻe Natalie i le Tusi Paia ma Molimau a Ieova ma na ia faapea mai: “Sa ou vaaia i Molimau ni talavou fiafia ma ni faaipoipoga taulau manuia. E ui lava e leʻi faigofie, ae na faasolosolo mālie ona ou suia loʻu olaga ma mea ou te faatāuaina.” O le ā le iʻuga? Na faapea mai  Natalie: “Sa ou manaʻo lava ou te faaipoipo atu i se tasi ou te alofa i ai. O lea, sa ou faaipoipo atu ai i se tane e tutusa o ma talitonuga. Sa ou lagona ua aumaia e le Atua iā te aʻu se aiga e sili atu ona lelei, nai lo o le mea na ou moomoo i ai.”

3 Iloilo Aafiaga o Lou Lumanaʻi Ona o Filifiliga o Loo E Faia i le Taimi Nei

Ina ia ʻalofia le mafaufau i mea e puupuu se taimi e aogā ai, e tatau ona manino iā te oe le ituaiga o lumanaʻi o loo e manaʻo i ai, ma le auala e te mauaina ai. (Faataoto 21:5) Aua neʻi gata mai lau vaai i le 70 po o le 80 tausaga. Nai lo lea, ia vaai faalemafaufau i le ola e faavavau lea o le a e olioli ai i le lumanaʻi, e pei ona faamatalaina i le Tusi Paia.

Ua faamatala mai i le Tusi Paia e faapea, e ala i le taulaga togiola a Iesu Keriso, ua aumaia ai e le Atua le avanoa e maua ai e tagata le ola e faavavau. (Mataio 20:28; Roma 6:23) Ua folafola mai e le Atua, e lē o toe umi ona faataunuuina loa lea o lana uluaʻi fuafuaga sa iai mo le fanau a tagata. O i latou e alolofa i le Atua, o le a olioli i le ola e faavavau i le lalolagi lea o le a toe faafoʻisia i se tulaga matagofie. (Salamo 37:11; Faaaliga 21:3-5) O le a e maua lenā olaga, pe afai e te iloilo aafiaga o lou lumanaʻi ona o au filifiliga i le taimi nei.

4 Galue ia Ausia Ou Sini

E faapefea ona e ausia lenā lumanaʻi ua folafolaina mai? Muamua lava, e tatau ona e iloa lelei le Atua. (Ioane 17:3) O le mauaina o le poto saʻo i le Tusi Paia, o le a fesoasoani e atiaʻe ai lou mautinoa i le moni o folafolaga a le Atua mo le lumanaʻi. O lenā ituaiga o faatuatua, e faamalosia ai oe e faia so o se suiga ina ia maua ai le finagalo malie o le Atua.

Seʻi mātau le mea na tupu iā Mikaele. Na faapea mai o ia: “Na amata ona ou faaaogāina le ʻava malosi ma fualaau faasāina i le 12 o oʻu tausaga. Na ou auai i se kegi ma na ou faatalitalia ou te oti a o leʻi 30 oʻu tausaga. O loʻu ita ma loʻu lē fiafia, na ou taumafai ai i le tele o taimi e pule i loʻu ola. Na ou moomoo ina ia iai se isi mea e sili atu i lenei olaga, ae e leʻi mafai ona ou mauaina.” A o iai Mikaele i aʻoga maualuluga, na amata ona suʻesuʻe e se tasi o la latou kegi le Tusi Paia ma Molimau a Ieova, ma na malie Mikaele e faia foʻi faapea.

O mea na aʻoaʻoina e Mikaele mai i le Tusi Paia, na suia atoa ai le auala na vaai ai i iʻuga o ana filifiliga. “Ua ou iloa ai, o le a toe faafoʻisia le lalolagi e avea ma parataiso i le lumanaʻi, ma o le a nonofo ai ma le filemu tagata, e aunoa ma le popole. O lea la, na ou manatu ai o loʻu lumanaʻi lenei. Na fai ma oʻu sini le atiaʻe o se faauōga ma Ieova. Peitaʻi, sa lē mafai ona ou faafiafiaina le finagalo o Ieova i taimi uma. E ui ina ou suʻesuʻeina le Tusi Paia, ae sa ou onā lava i nisi o taimi, ma e faatasi ona ma feusuaʻi ma se teine.”

Na faapefea ona foʻia e Mikaele lona faafitauli ma taulau i le suia o le auala e ola ai? Na faapea mai o ia: “Na faalaeiau aʻu e loʻu faiaʻoga o le Tusi Paia ina ia faitau le Tusi Paia i aso taʻitasi, ma auaufaatasi ma i latou e mananaʻo e faafiafia le Atua. Na ou iloa ai, o loʻu auaufaatasi ma aʻu uō i le kegi na taaʻina ai loʻu olaga. E ui lava na pei i latou o soʻu aiga, ae na ou lē toe aufaatasi atu iā i latou.”

Na faataatitia e Mikaele ni sini lāiti ma mea e fesoasoani iā te ia ina ia ausia lona sini autū, o le faaōgatusa lea o lona olaga ma tapulaa a le Atua. E mafai foʻi ona e faia faapea. Ia tusi i lalo nisi o ou sini o loo iai mo le lumanaʻi, ma nisi o laasaga e mafai ona e faia i le taimi nei ina ia ausia ai. Ia faailoa atu ou sini iā i latou o le a fesoasoani iā te oe, ma talosaga atu pe e mafai ona latou mātauina mai po o lelei lou agaʻigaʻi i luma.

Aua e te faatuai i le aʻoaʻoina o mea e uiga i le Atua, ma ia faatatauina i lou olaga ana taʻiala. Ia fai ni taumafaiga e atiaʻe lou alofa mo le Atua ma lana Afioga le Tusi Paia. Ua faapea mai le Afioga a le Atua e uiga i le tagata e faatatauina mataupu silisili o le Tusi Paia: “E taulau manuia mea uma e na te faia.”—Salamo 1:1-3.

[Faaopoopoga i lalo]