Aʻoaʻoga a le Tusi Paia

O le ā o le a Tupu i Lotu?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Pe e lelei lotu uma?

O loo iai i lotu le toʻatele o tagata faamaoni e mananaʻo e faafiafia le Atua. O loo silafia mai e le Atua i latou na, ma e manatu mamafa mai i ai. Peitaʻi e faanoanoa lava, ona ua faaaogā e nisi o tagata ia lotu mo ni fuafuaga lē lelei. I aso ua mavae, na faataugā e taʻitaʻi lotu tagata na tetee atu iā i latou. (2 Korinito 4:3, 4; 11:13-15) I aso nei, e tusa ai ma tala fou, ua faaauiluma e nisi o taʻitaʻi lotu faiga faatupu faalavelave, lagolago taua, po o le sauāina ma le faileagaina o tamaiti i feusuaʻiga matagā.—Faitau le Mataio 24:3-5, 11, 12.

O loo aʻoaʻo mai i le Tusi Paia, e lua ituaiga o lotu—o le lotu moni ma le lotu sesē. E lē aʻoaʻoina e le lotu sesē upu moni e uiga i le Atua. Peitaʻi, e finagalo Ieova le Atua ina ia iloa e tagata upu moni e uiga iā te ia.—Faitau le 1 Timoteo 2:3-5.

2. O le ā o le a tupu i lotu?

E lē finagalo le Atua ina ia faasesēina tagata e ala i lotu o loo faapea mai e alolofa i le Atua, ae e lē o aʻoaʻoina upu moni e uiga iā te ia. O le mea moni, e fiafia tagata o na lotu e faauō i le lalolagi o loo pulea e Satani le Tiapolo. (Iakopo 4:4; 1 Ioane 5:19) Ua faamatalaina i le Afioga a le Atua lotu o loo lagolagoina malo faaletagata, e pei o se fafine talitane. O loo faaigoa i le Tusi Paia lenei fafine talitane, o “Papelonia le Aai Tele,” o le aai na amata mai ai tapuaʻiga sesē ina ua mavae le Lolo i aso o Noa. E lē o toe umi ona aumaia loa lea e le Atua le faaumatiaga i lotu o loo faasesēina ma faapologaina tagata.—Faitau le Faaaliga 17:1, 2, 5, 17; 18:8, 23, 24.

  3. O le a faapefea ona aumaia e le Atua le olioli i le lalolagi atoa?

O le faamasinoga o lotu lea o loo loma nei, o se tala lelei. O le a aumaia ai se mapusaga mo tagata uma o loo mafatia i le lalolagi. O le a lē toe faasesēina pe e feʻainaʻi tagata ona o lotu. O le a autasia tagata uma lava i le tapuaʻiga i le Atua moni e toʻatasi.—Faitau le Isaia 11:9; Faaaliga 18:20, 21; 21:3, 4.

4. O le ā e tatau ona faia e tagata faamaoni?

E lē o faagaloina e Ieova tagata faamaoni uma o loo iai i lotu sesē i le lalolagi atoa. Ua ia aoaoina nei nisi o i latou ina ia autasi e ala i le aʻoaʻoina o le upu moni.—Faitau le Mika 4:2, 5.

E talileleia e Ieova i lona aiga i latou o loo mananaʻo e auauna iā te ia. E tusa lava pe e lē fiafia a tatou uō ma tauaiga pe a tatou auauna iā Ieova, ae o loo tele pea ni faamanuiaga o le a tatou maua. O le a tatou maua se faauōga ma le Atua, o se “aiga” fou e alolofa, faapea le faamoemoe o le ola e faavavau.—Faitau le Mareko 10:29, 30; 2 Korinito 6:17, 18.

Mo nisi faamatalaga, tagaʻi i le mataupu e 15 ma le 16 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.

[Ē Ana le Ata i le itulau 16]

The Complete Encyclopedia of Illustration/J. G. Heck