O le ā se Tali a Iesu?

E manatu le toʻatele o tagata e matataʻu i le Atua, e tatau ona auai lotu i faiga faapolotiki. E latou te talitonu e mafai ona iai se vaega tāua a lotu i le foʻiaina o faafitauli o tagata. Peitaʻi, e manatu isi tagata tapuaʻi faamaoni e lē tatau ona auai lotu i faiga faapolotiki. Ae o le ā sou oe lava manatu i le vaegafai a lotu i faiga faapolotiki? Pe e tatau ona galulue soosootauʻau na faalapotopotoga malolosi?

UA FAAMATALAINA Iesu Keriso o sē “ua sili atu ona taaʻina le talafaasolopito o lotu.” Seʻi faapea o lea e tatou te fesili atu iā te ia, Pe e tatau ona auai lotu i faiga faapolotiki? Faamata o le ā lana tali mai? A o iai Iesu i le lalolagi, sa ia taliina lenā fesili e ala i upu ma gaoioiga. O se faaaʻoaʻoga, i lana Lauga taʻutaʻua i le Mauga, sa avatu ai e Iesu ni taʻiala e fesoasoani ai i ona soo, ina ia iloa la latou matafaioi i vaipanoa o loo nonofo ai. Seʻi o tatou talanoa i nisi o manatu mai i lana lauga taʻutaʻua.

 Aafiaga Lelei i Olaga o Isi

Na faamatalaina e Iesu le uiga sa tatau ona faaalia atu e ona soo i isi tagata. Na faapea mai o ia: “O outou o le masima o le lalolagi; ae afai e magalo le masima, e faapefea ona toe faamāi? E leai se mea e toe aogā i ai, ua na ona lafo i fafo ma solia e tagata. O outou o le malamalama o le lalolagi. . . . Ia faapea foʻi ona susulu atu lo outou malamalama i luma o tagata, ina ia latou iloa a outou galuega lelei ma vivii atu ai i lo outou Tamā o i le lagi.” (Mataio 5:13-16) Aiseā na faatusa ai e Iesu ona soo i le masima ma le malamalama?

Na faailoa mai i upu a Iesu, na pei ona soo o ni masima i tagata uma, ae e lē i se vaega toʻalaiti. E pei i latou o le malamalama mo tagata uma o loo mananaʻo e manino la latou vaai, ae e lē na o se vaega faatapulaaina. O le faaaogāina o lenā talafaatusa, ua manino mai ai e leʻi manaʻo Iesu i ona soo ina ia faaesea i latou mai i isi tagata. Aiseā?

Mātau manatu nei: E lē mafai ona umi le aogā o se meaʻai pe afai e lē ave i ai le masima. E lē mafai ona faamalamalama e se molī se potu pogisa, pe afai o loo mamao ese le molī mai i le potu. O le māfuaaga lenā na lē faatonu ai e Iesu ona soo, ina ia faaesea i latou lava i se isi itu o le lalolagi, ina ia faia aʻe ai se vaega e na o tagata tapuaʻi. Nai lo lea, e pei ona manaʻomia ona ave le masima i se meaʻai, ma manaʻomia ona faamalamalama e le molī le pogisa, e faapena foʻi ona manaʻomia ona iai ni aafiaga lelei o Kerisiano i olaga o isi tagata.

“E lē o ni Tagata o le Lalolagi”

Peitaʻi, o le faatonuga a Iesu e faapea e tatau ona feutagaʻi ona soo ma isi tagata, ua lāgā ai se fesili tāua e uiga i le manatu o Kerisiano, e tusa ai ma faiga faapolotiki. Aiseā? A o toeitiiti oo i lona maliu, na tatalo Iesu i le Atua mo ona soo e faapea: “Ou te talosaga atu iā te oe, e aua neʻi aveesea i latou mai le lalolagi, a ia leoleo iā i latou ona o lē ua leaga. E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioane 17:15, 16) O lea, e faapefea ona lē avea Kerisiano ma tagata o le lalolagi, ae o loo manatu mamafa i latou mo le lelei o vaipanoa o loo nonofo ai? Ina ia iloa le tali, seʻi o tatou iloiloina nisi o fesili e tolu:

• O le ā le manatu o Iesu i faiga faapolotiki?

• O le ā e tatau ona fai e Kerisiano i aso nei?

• E faapefea ona aogā i tagata aʻoaʻoga a Kerisiano?

[Faamatalaga faaopoopo i le itulau 4]

Na faamanino mai e Iesu lona lē manaʻo i ona soo ina ia faaesea i latou mai i tagata