Aʻoaʻoga a le Tusi Paia

Aiseā e Tatau ai Ona Tatou Faaaogā le Suafa o le Atua?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā ua faia ai e le Atua se igoa mo ia lava?

E mautinoa e te manaʻo e valaau oe e tagata i lou igoa nai lo o ni taʻu e pei o le “tamāloa,” “tama,” “tamaʻitaʻi,” po o le “fafine.” O se igoa, e fesoasoani ina ia mātaulia ai se tasi. Ua avatu i le Atua nisi o taʻu e pei o le “Alii Pule Silisili Ese,” “Atua, o Lē e ona le malosi uma lava,” ma “Lē e Sili na Foafoaina” mea. (Kenese 15:2; 17:1; Failauga 12:1) Ae ua ia faia foʻi se igoa mo ia lava, ina ia fesoasoani iā i tatou e atiaʻe se faiā ma ia. O le suafa o le Atua, o Ieova.—Faitau le Isaia 42:8.

E ui e toʻatele tagata faaliliu o le Tusi Paia ua suia le suafa o le Atua i nisi o taʻu e pei o le “Atua” ma le “Alii,” ae e toetoe 7,000 taimi o loo taʻua ai lenā suafa i manusikulipi anamua o le Tusi Paia, i le gagana Eperu. E manino mai, e finagalo le Atua ina ia faailoa atu lona suafa.—Faitau le Isaia 12:4.

2. Aiseā e tāua ai le iloa o le suafa o le Atua?

O le iloa o le suafa o le Atua, e sili atu nai lo o le tau ina faaleo. O le iloa o le Atua i lona suafa, e uiga atu i le mauaina o se faiā vavalalata ma ia. O le uiga o le suafa o Ieova, “E Gaoioi o Ia e Tusa ai ma Tulaga Manaʻomia.” O lea la, o le suafa o le Atua, ua faamautinoa mai ai o le a avea o ia ma so o se mea e manaʻomia ina ia faataunuu ai ana fuafuaga. O le iloa la o le suafa o le Atua, e aofia ai le talitonu o le a ia faataunuuina ana folafolaga. (Salamo 9:10) O le faatuatua o tagata o loo iloa ma faaaogāina le suafa o le Atua, ua uunaʻia ai i latou ia maufaatuatuaina ma faamuamua o ia i o latou olaga. O le a puipuia i latou e Ieova le Atua.—Faitau le Salamo 91:14.

  3. Aiseā e finagalo ai le Atua ina ia iloa e tagata lona suafa?

E finagalo le Atua ina ia iloa e tagata lona suafa, ona e maua ai aogā. O le a mafai ai ona avea i latou ma uō a le Atua, atoa ai ma le faamoemoe o le ola e faavavau. E lētioa finagalo Ieova ina ia tatou faailoa atu lona suafa!—Faitau le Ioane 17:3; Roma 10:13, 14.

Na faailoa atu e Iesu le suafa o le Atua e ala i le aʻoaʻoina o tagata i ala o le Atua, o Ana tulafono, ma Ana folafolaga. I aso nei, o loo faaauau e soo o Iesu le galuega, o le faailoa atu o le suafa o le Atua i atunuu uma. E latou te faia faapea o ni tagata autasi “mo lona suafa.”—Faitau le Galuega 15:14; Ioane 17:26.

4. O le a faapefea ona faamamalu e le Atua lona suafa?

E finagalo Ieova le Atua ina ia faamamaluina lona suafa, ona ua taʻuleagaina. O se faaaʻoaʻoga, ua faapea mai nisi, e leʻi aumaia e le Atua le ola, ma e lē manaʻomia ona tatou usiusitaʻi iā te ia. Ua fai mai nisi e lē alofa mai le Atua iā i tatou, ma o ia le pogai o mafatiaga. Ua taʻuleagaina e nei tagata le suafa o le Atua. Ae o le a lē tumau e faavavau ona latou faia faapea, auā o le a faaumatia e le Atua i latou e lē o faamamaluina lona suafa.—Faitau le Salamo 83:17, 18.

O le a faamamaluina e Ieova lona suafa, pe a faaumatia e lona Malo ia faigāmalo uma faaletagata, ma toe faafoʻisia le filemu ma le saogalemu mo tagata. (Tanielu 2:44) E lē o toe umi ona iloa lea e tagata uma, o Ieova o le Atua moni.—Faitau le Esekielu 36:23; Mataio 6:9.

O le ā e tatau ona e faia? Ia mafuta vavalalata atu i le Atua e ala i le suʻesuʻeina o lana Afioga, ma auaufaatasi ma tagata e alolofa iā te ia. O le a manatua e Ieova ana auauna faamaoni, pe a ia faamamaluina lona suafa.—Malaki 3:16.

Mo nisi faamatalaga, tagaʻi i le mataupu 1 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.

[Ata i le itulau 16]

Le suafa o le Atua i se manusikulipi Eperu mai anamua