Auala e Ola ai pe a Faaitiitia Tupe Maua

O OPETA o se tamā e toʻalua lana fanau. Sa faigaluega o ia mo le sefulu tausaga i se faletalimālō taugatā i se aai telē o Aferika, ma e leʻi faigatā ona tausia manaʻoga o lona aiga. E iai taimi e na te aveina ai lona aiga e tafafao i nofoaga e faasao ai manu feʻai. Peitaʻi, na muta nei mea uma ina ua lē toe iai sana galuega, ona ua tau leai nisi e ō atu i le faletalimālō.

Na siitia le tulaga o Stephen ma avea o se pule o le faletupe na faigaluega ai mo le silia ma le 22 tausaga. O nisi o faamanuiaga na ia maua mai i lana galuega, o se fale telē, o se taavale, o ni auauna i le fale, ma na ō lana fanau i se aʻoga taugatā. Peitaʻi, na vāea o ia mai i lana galuega ina ua toe fetuunaʻi fuafuaga a lona fale faigaluega. Na faapea mai Stephen: “Na matuā mafatia lava loʻu aiga. Sa oo iā te aʻu faalogona lotovaivai, lototigā, ma le popole.”

O nei tala, o ni tulaga e masani ona tutupu. Ona o le faaauau pea ona paʻū maulalo o le tamaoaiga o le lalolagi atoa, ua tatou vaaia ai tagata o ē na lelei totogi, ua leai ni a latou galuega. O le toʻatele o i latou ua maua galuega, ua onosaia le laʻitiiti o le totogi, a o feagai ai ma le faatupulaʻia o le taugatā o le soifuaga. E tusa lava pe e tau atiaʻe se atunuu pe e leai foʻi, ae e leai se atunuu i le lalolagi e sao mai i tulaga faigatā o le tamaoaiga.

Manaʻomia le Atamai Aogā

E faigofie lava ona lofitūina i tatou i mafaufauga lē lelei, pe a faaitiitia pe e leai foʻi se tupe maua. O le mea moni, e lē mafai e se tasi ona matuā ʻalofia le popole. Peitaʻi, na faapea mai se tane atamai: “Po ua e lotovaivai ea i le aso o le puapuaga? O le a itiiti lou malosi.” (Faataoto 24:10) Nai lo o le popolevale pe a feagai ma tulaga faigatā o le tamaoaiga, e tatau ona tatou faia le mea o loo apoapoaʻi mai ai le Afioga a le Atua: ʻIa teua le atamai aogā.’—Faataoto 2:7.

E ui lava o le Tusi Paia e lē o se tusi taʻiala mo mataupu tautupe, ae o fautuaga aogā o loo iai e tusa ai o lenei mataupu, ua mafai ona fesoasoani i le faitau miliona i le lalolagi. Seʻi o tatou iloilo nisi o taʻiala faigofie o loo i le Tusi Paia.

Faitau tupe o le a faaalu. Mātau upu nei a Iesu o loo i le Luka 14:28: “O ai foʻi se tasi o outou e manaʻo e fau se ʻolo, e lē muamua ea ona nofo i lalo ma faitau tupe o le a faaalu, ina ia iloa ai po ua lava mea e faauma ai?” O le faatatauina o lenei fautuaga e aofia ai le faasoasoa lelei o tupe, ma ia tausisi i ai. Peitaʻi, e pei ona taʻua e Opeta, e faigatā tele ona faia lenei mea. Ua faapea mai o ia: “A o leʻi vāea aʻu mai i laʻu galuega, e masani ona matou faatauina le tele o oloa e matou te lē manaʻomia. E lē taitai ona matou faasoasoa lelei tupe, ona sa tele tupe e faatau ai so o se mea e mananaʻo i ai.” O le fuafua lelei, o le a mafai ai ona faaalu tatau le seleni itiiti lea ua maua, i mea o loo manaʻomia moni e le aiga.

Ia fetuutuunaʻi lou olaga. E mautinoa o se luʻi le ola i se olaga faigofie, ae o le mea lea e tatau ona fai. Ua faapea mai se faataoto o le Tusi Paia: “O lē ua iai le utaga mamao e na te iloa atu le mala ma lafi ai.” (Faataoto 22:3) Ua faapea mai Stephen: “Ina ia sefe le tupe, sa tatau  ona siitia atu loʻu aiga i si o matou tamaʻi fale, lea e leʻi uma ona faatotoga totonu. Sa tatau foʻi ona ō laʻu fanau i se aʻoga e lelei aʻoaʻoga ae e lē taugatā.”

E tāua tele le talanoa o le aiga pe afai e mananaʻo e faamasani i lo latou olaga fou o le a iai. Ua faapea mai Austin, o lē na faigaluega mo le iva tausaga i se kamupani e faafaigaluega ai tupe, a o leʻi vāea mai i lana galuega: “Sa ma talanoa ma laʻu avā ma faamaumau mea e matou te manaʻomia moni lava. Na manaʻomia ona faaitiitia le faatauina o meaʻai taugatā, o le ō e tafafao, ma le faatauina o ofu fou e lē manaʻomia. Ou te fiafia ona sa galulue faatasi lo matou aiga a o feagai ai ma nei suiga.” O le mea moni, atonu e lē malamalama lelei le fanau iti i le māfuaaga o nei fetuunaʻiga, ae e mafai e mātua ona fesoasoani iā i latou ina ia malamalama.

Ia talia so o se galuega. Pe afai ua e masani i se galuega faaofisa, atonu la e faigatā iā te oe ona faia ni galuega mamafa ma palapalā. Ua faapea mai Austin: “Sa matuā faigatā i loʻu mafaufau ona talia le faia o galuega faatauvaa, ona ua ou masani i le tulaga pule i se kamupani telē.” E lē o se manatu lea e faateʻia ai ona o loo taʻua i le Tusi Paia i le Faataoto 29:25: “O le fefe i tagata o le mailei lea.” O le amanaʻia fua o tala a isi tagata, o le a e lē maua ai se tupe e tausia ai lou aiga. O le ā e fesoasoani iā te oe ina ia ʻalofia na mafaufauga lē lelei?

E tāua tele le lotomaulalo. Ina ua vāea Opeta mai lana galuega i le faletalimālō, ona ofo atu lea e se tasi o ana uō e fai sona faleoloa e faaleleia ai taavale, se galuega mo ia. Sa aofia ai i lenei galuega le savali i auala pefua ma mamao e faatau ma suʻe ni vali ma totoga o taavale. Na taʻua e Opeta: “Ou te leʻi fiafia i le galuega, ae e leai se mea na mafai ona fai i ai. Na fesoasoani le lotomaulalo iā te aʻu ina ia fetuutuunaʻi loʻu tulaga, ma talia se galuega e matuā itiiti lava le totogi nai lo o loʻu totogi muamua, ae o loo mafai ona tausia ai loʻu aiga.” Pe e mafai ona aogā iā te oe lea uiga?

Ia lotomalie. Ua faamatalaina i se tasi o lomifefiloi le tagata lotomalie e faapea, o sē e “fiafia ma faamalieina i mea ua maua.” Atonu e lē moni lenā ituaiga o faamatalaga i se tasi o loo feagai ma faigatā tau i le tamaoaiga. Peitaʻi, mātau upu a Paulo, o se misionare na oo moni lava i le tulaga mativa: “Ua aʻoaʻoina aʻu, e tusa lava po o ā tulaga e oo iā te aʻu, ae ia lotomalie i mea ua ou maua. O le mea moni, ua ou tofo i le lē tagolima, ua ou tofo foʻi i le tele o mea e maua.”—Filipi 4:11, 12.

E ui lava e ono mafai ona maua se olaga e sologa lelei, ae ona o le suiga o le tulaga o mea, e mafai ai ona tatou oo atu i se tulaga e matuā leaga lava. E mafai moni ona tatou maua aogā pe a teuloto fautuaga faagaeeina a Paulo: “E moni, e tele mea e maua mai le faamaoni i le Atua ma le lotomalie. O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” E aunoa ma le fautuaina o le paiē, sa faailoa mai i inei e Paulo le auala e faatulaga ai meafaitino, i le tulaga e tatau ona iai.—1 Timoteo 6:6, 8.

Le Puna o le Fiafia Moni

E lē maua le fiafia moni mai i le mauaina o mea uma o loo tatou mananaʻo ai, po o le ola foʻi i se olaga toʻafilemu ma mauʻoa. O Iesu lava ia na fetalai: “E sili le fiafia e maua i le foaʻi atu i lo o le talia mai.” Ioe, e maua le fiafia ma le faamalieina pe a faaaogā mea o loo tatou maua ina ia fesoasoani ai i isi, ma avea o se faalaeiauga mo i latou.—Galuega 20:35.

E silafia lelei e Ieova le Atua o Lē na foafoaina i tatou, mea uma e tatou te manaʻomia. I lana Afioga le Tusi Paia, ua ia aumaia ai fautuaga atamai e fesoasoani ai i le toʻatele ina ia faaleleia o latou olaga, ma faateʻa ai le popolevale i mea e lē manaʻomia moni. O le mea moni, e lē faafuaseʻi ona iai ni iʻuga lelei, pe e faaleleia foʻi le tulaga o le tamaoaiga o se tasi. Peitaʻi, ua faamautinoa mai e Iesu i ē o loo “saʻili muamua le malo ma le amiotonu a le Atua,” o le a latou maua mea uma o loo manaʻomia i aso taʻitasi.—Mataio 6:33.