“E Lē Mafai!”—O le ā Lona Uiga?

O LE vaa o le Titanic lea na amata ana faigāmalaga i le tausaga e 1912, sa sili ona telē ma matuā taugatā i ona taimi. Ona o le lelei o lona fausaga, na manatu ai tagata “e lē mafai ona goto.” Peitaʻi ua tatou iloa uma le mea na tupu. I lana folauga muamua, na taia ai le vaa i se poloka aisa telē i mātū o Atalani, ma magoto ai, faatasi ma tagata e toʻa 1,500 mai i lana pasese. I ni nai itula, ae mou atu loa le vaa na manatu i ai tagata e lē mafai ona goto.

Atonu e tele māfuaaga e tatou te manatu ai “e lē mafai” ona tupu pe faia se mea. E tatou te ono manatu i se mea e lē mafai ona fai ona e lē oo iai lo tatou malosi, po o le malamalama. O le tele o mea faatekinolosi ua iai i aso nei, sa manatu i ai e lē mafai ona fai, ona sa lē oo iai le tomai o tagata i na taimi. O le auina atu o se tagata i le masina, o le auina atu o se masini i le paneta o Mars ae faatonutonu atu i le lalolagi, o le faavasegaina o vaega eseese o sela o le tagata, ma le matamata i tala fou i nisi o mea o loo tutupu i le taimi lava lenā i le isi itu o le atunuu po o le lalolagi, o ni mea ia na manatu i ai i le 50 tausaga ua mavae, e lē mafai ona fai. Na aotele mai lenei tulaga e Ronald Reagan, o lē sa avea ma peresitene o Amerika, i lana faamatalaga na fai atu i se vaega o tagata e tomai i mataupu eseese o le faasaienisi e faapea: “Ona o le tekinolosi, ua mafai ai ona outou faia i aso nei mea na manatu i aso ua mavae e matuā le mafai ona fai.”

Pe a manatu i le tele o mea mataʻina ua tutupu, na faapea mai le polofesa o John Brobeck: “E lē o toe mafai ona faapea mai ma le mautinoa se saienitisi e lē mafai ona faia se mea. E pau le mea e latou te iloa, atonu e lē mafai ona faia lenā mea. Ae e mafai ona ia faapea mai, e lē o mafai ona faamatala i le taimi nei lenā mea, ona e leʻi oo iai lo tatou malamalamaga i aso nei. Na faapea atili mai le polofesa, pe afai e iai se mea e tatou te manatu e lē mafai ona fai, e “pau la le mea e manaʻomia, o se puna o le malosiaga e lē mafai ona faatonutonuina e lo tatou tomai faasaienisi. I Tusitusiga Paia, o lenei puna o le malosi o loo taʻua o le mana o le Atua.”

E Mafaia Mea Uma e le Atua

A o leʻi taitai ona faia lenā faamatalaga e le polofesa o Brobeck, ae ua leva ona fetalai Iesu mai i Nasareta, o lē o loo faamatalaina  o le tagata silisili o ē uma na soifua mai e faapea: “E mafaia mea uma e le Atua.” (Luka 18:27) O le agaga paia o le Atua, o le mana lea e silisili ona malosi i le vateatea. E lē mafai ona fuaina le malosi o lona mana i se auala faatekinolosi. O le agaga paia, e mafai ai ona tatou faia mea ia e lē mafai i so tatou lava malosi.

Ona o ni tagata, e masani ona tatou feagai ma tulaga e tatou te manatu e lē mafai ona fesagaʻia. O se faaaʻoaʻoga, e ono toesea se tasi e pele iā i tatou pe atonu ua mafatia olaga o o tatou aiga, ma ua oo ai ina tatou fememeaʻi ma manatu e leai se mea e mafai ona fai. E tatou te lagona le leai o se faamoemoe ma le lē mautonu. O le ā e mafai ona tatou faia?

O loo taʻua i le Tusi Paia e faapea, o le tagata e faatuatua i Lē e ona le malosi uma lava, tatalo mo Lona agaga paia, ma faia mea uma lava e faafiafia ai o Ia, e mafai ona ia maua le fesoasoani e foʻia ai faafitauli tetele, ia e manatu e lē mafai ona foʻiaina. Mātau upu faamautinoa nei a Iesu: “E moni ou te fai atu iā te outou, o se tasi e fai atu i lenei mauga, ʻIa siitia oe ma lafo i le sami,’ ma e lē masalosalo lona loto, ae e faatuatua, o le a taunuu lava mea ua ia fai atu ai, e faapea lava ona taunuu!” (Mareko 11:23) E leai se tulaga e faigatā ona fesagaʻia, pe afai e tatou te faalagolago i le mana o le Afioga a le Atua ma lona agaga paia e taaʻina o tatou olaga.

O se faaaʻoaʻoga, seʻi manatu i se tamāloa ua 38 tausaga talu ona faaipoipo, ae maliu loa lana avā ona o le kanesa. Na matuā mafatia o ia. Sa manatu e lē mafai ona ola e tusa ai ma lea tulaga. E iai taimi na manatu ai e sili ai lona oti nai lo o le ola na o ia. Na faapea mai, na ia lagona e peiseaʻī o loo savali i se mea e matuā pogisa. Pe a toe tepa i tua, e talitonu o ia o le tatalo atu iā Ieova ma loimata ma faailoa atu lona lotomafatia, o le faitauina o le Tusi Paia i aso taʻitasi, atoa ai ma le saʻili atu i le taʻitaʻiga a le agaga o le Atua, ua mafai ai ona ia feagai ma le tulaga na manatu e lē mafai ona fesagaʻia.

Na oo le faaipoipoga a se tasi o ulugalii i se tulaga e matuā ogaoga. Na matuā faasauā le tane, ma e tele ni ana masaniga leaga. Na foliga mai ua lē mafai e le avā ona ola i lea olaga, ma taumafai ai loa e pule i lona ola. Mulimuli ane, na suʻesuʻe le tane ma Molimau a Ieova i le Tusi Paia. O mea na ia aʻoaʻoina, na fesoasoani iā te ia e tuu ai ana masaniga leaga sa iai ma ona uiga faasauā. Na matuā maofa lana avā i nei suiga na manatu i ai “e lē mafai” ona fai.

Ua faamatala mai e se tasi tane e faapea, na matuā mafatia lona olaga ona sa ia faaaogāina fualaau faasāina ma faia feusuaʻiga lē mamā. Na faapea mai o ia: “Na ou lagona le lē toe aogā.” Na tatalo faatauanau o ia i le Atua: “Le Alii e, ou te iloa o loo e soifua. Faamolemole fesoasoani mai iā te aʻu!” O lana tatalo na iʻu ai ina suʻesuʻe o ia i le Tusi Paia ma Molimau a Ieova, ma iʻu ai i ni suiga mataʻina i lona olaga. Na faapea mai o ia: “E masani ona oo iā te aʻu lagona nofosala ma le lē aogā. E iai taimi e matuā mafatia ai loʻu loto. Peitaʻi, ua fesoasoani le Afioga a le Atua iā te aʻu ina ia foʻia nei faalogona. Pe a lē mafai ona ou moe i nisi o pō, ou te mafaufau pea i mau o le Tusi Paia na ou aʻoaʻoina, ma na matuā fesoasoani nei mau e faateʻa ai nei mafaufauga.” I le taimi nei, ua faaipoipo o ia ma ua fiafia lona olaga. O loo galulue o ia ma lana avā e fesoasoani i isi ina ia faatuatua i le mana o le Afioga a le Atua. A o talavou, atonu na manatu o ia e lē mafai ona tutupu nei suiga ua iai i le taimi nei.

O nei faaaʻoaʻoga ua faaalia ai e moni lava e malosi le Afioga a le Atua, ma e mafai e lona agaga paia, ona faataunuu so o se mea e tatou te manatu “e lē mafai” ona fai i o tatou olaga. Ae e te ono faapea mai, “E manaʻomia le faatuatua ina ia faia ai lenā mea!” O le mea moni lenā, auā o loo faapea mai le Tusi Paia, “a aunoa ma le faatuatua e lē mafai ona faafiafiaina [le Atua].” (Eperu 11:6) Ae seʻi manatu i le tulaga lenei: Ua fai atu iā te oe sau uō mamae, o lē  atonu e pule i se faletupe pe e i se isi tulaga maualuga e faapea: “Aua e te popole, e so o se mea e te manaʻo ai ona e sau lea iā te aʻu.” E mautinoa o le a faamāfanafanaina oe i lenā folafolaga. Ae e faanoanoa lava, ona e masani ona lē taulau tagata i le tele o taimi. Atonu ua suia le tulaga o lau uō, ma ua lē mafai ai ona ia faataunuu lana folafolaga. Pe afai e maliu lau uō, o le a mou atu ona faanaunauga lelei ma ona tomai, ia e mafai ona fesoasoani iā te oe. Ae e lē faapena Ieova, auā e lē mafai e ni mea e tutupu faafuaseʻi ona taofia lona tomai e faataunuu ai mea. Ua faamautinoa mai e le Tusi Paia iā i tatou e faapea: “E leai lava se mea e tasi e lē mafaia e le Atua.”—Luka 1:37, O le Tusi Paia Samoa-Lomiga o le 1969.

“Pe E te Talitonu i Lenei Mea?”

E tele mea na tutupu o loo faamauina i le Tusi Paia, e faamaonia ai le moni o le faamatalaga o loo taʻua i luga. Mātau nisi o faaaʻoaʻoga.

Na ataata Sara, o se tinā e 90 tausaga, ina ua taʻu atu o le a ia fanaua se tama tama. Ae o lea ua faamaonia le moni o lenā folafolaga, ona na tupuga mai ai tagata Isaraelu. O se tane na folo e se iʻa lapoʻa mo le tolu aso, na mafai ona toe faasaoina mai o ia ma tusia le mea na tupu iā te ia. O lona suafa o Iona. O Luka o se fomaʻi, ma e na te iloa lelei le eseesega o le matapogia ma le maliu. Sa ia faamauina le tala e uiga i se alii talavou e igoa iā Eutiko, o lē na paʻū mai i le faamalama o se fale maualuga ma oti ai, ma na mulimuli ane toe faatūina o ia. O nei tala e lē o ni tala fatu. O le iloiloina totoʻa o nei tala, o le a iloa ai o ni mea moni lava na tutupu.—Kenese 18:10-14; 21:1, 2; Iona 1:17; 2:1, 10; Galuega 20:9-12.

Na fai atu e Iesu lenei fetalaiga mataʻina i lana uō o Mareta: “O ē o loo ola ma faatuatua mai iā te aʻu, e lē oti lava.” E tusa ai ma lenei folafolaga, lea e foliga mai e lē mafai ona taunuu, na toe fesili atili atu Iesu i se fesili tāua e faapea: “Pe e te talitonu i lenei mea?” O loo tāua pea lo tatou manatunatu loloto i lenā fesili.—Ioane 11:26.

Ola e Faavavau i le Lalolagi—Pe e Mafai?

I se suʻesuʻega faasaienisi, na tusi mai ai ni tusitala e faapea: “E lē o toe umi ae mafai loa ona tatou ola mo se taimi umi, ma atonu e ola e faavavau.” Ua faamatalaina i le The New Encyclopædia Britannica e faapea, e leai se māfuaaga e ala ai ona faasolo ina matua le tino ma oo atu i le oti. Ae o loo iai se mea i totonu o le tino o le tagata, e lē o malamalama ai saienitisi, e māfua ai ona matua le tino o le tagata ma oti. * Ua taʻua ai e faapea: “E foliga mai e māfua ona faasolo ina matua le tino ma oti le tagata, ona ua lē toe gaoioi se malosiaga e faatonutonuina le ola i le tino.”

E ui lava e mananaia nei manatu, ae ua aumaia i le Tusi Paia se māfuaaga e sili ona tāua e talitonu ai i le ola e faavavau, nai lo o se isi lava mea o loo taʻua i suʻesuʻega faasaienisi. O Ieova le Atua, o Lē na foafoaina i tatou, ma o le Puna o le ola, ua ia folafola mai e faapea, “o le a faaumatia e ia le oti e faavavau.” (Salamo 36:9; Isaia 25:8) Pe e te talitonu i lenei mea? O lenā folafolaga e mai iā Ieova, ma e lē mafai ona tala pepelo.—Tito 1:2.

[Faaopoopoga i lalo]

[Faamatalaga faaopoopo i le itulau 27]

ʻUa mafai ona faia i aso nei mea na manatu i aso ua mavae e matuā le mafai ona fai.’​—RONALD REAGAN

[Faamatalaga faaopoopo i le itulau 28]

O ai e te sulu i ai, pe a foliga mai e iai se mea i o tatou olaga ua lē mafai ona fesagaʻia?

[Ē Ana le Ata i le itulau 27]

Ata mai le NASA