Pe e Tutusa le Tusi Paia ma Isi Tusi Uma?

“O Tusitusiga Paia uma e mai i le agaga o le Atua, ma e aogā . . . , ina ia matuā agavaa ai le tagata o le Atua, e lava saunia mo galuega lelei uma.”—2 TIMOTEO 3:16, 17.

E LĒ o tagata uma e ioe i le manatu o loo i luga e uiga i le Tusi Paia. Ae faapefea oe? O lē fea o manatu o loo mulimuli mai e uiga i le Tusi Paia e te ioe i ai?

• E na o se tusi e manaia i le faitau

• O se tusi e tutusa le tāua ma isi tusi faalelotu

• O se tusi o talatuu o loo iai ni lesona mo amioga tatau

• O le Afioga a le Atua

E ono lāgā se fesili e tusa ai ma lea tulaga, Pe e tāua mea e te talitonu i ai? Mātau le manatu o le Tusi Paia lava ia: “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) O loo taʻua i le Tusi Paia, o lona fuafuaga, o le faatonuina lea o i tatou, faamāfanafana, ma aumaia se faamoemoe.

Peitaʻi, pe afai o le Tusi Paia ua na o se tusi e manaia i le faitau pe e tutusa foʻi ma isi tusi faalelotu, po o le a e maufaatuatuaina la le Tusi Paia ina ia faatonuina oe, ma taʻitaʻia lou aiga, aemaise lava pe afai e ese manatu o loo iai mai i mea o loo e manatu e saʻo? Pe afai o le Tusi Paia o se tuufaatasiga o talatuu, po o le a e maua la se faamāfanafanaga ma se faamoemoe mai i folafolaga o loo taʻua ai?

I le isi itu, e faitau miliona tagata o ē na suʻesuʻeina le Tusi Paia, ua latou talitonu o le Afioga tutasi lea a le Atua. Aiseā? O le ā le itu ua ese ai le Tusi Paia mai i isi tusi uma? E matou te valaaulia oe ina ia mātau ni vala se lima ua tutasi ai le Tusi Paia, e pei ona faamatalaina i mataupu o loo mulimuli mai.