Aiseā ua Lē Taofia ai e le Faafofoga Tatalo Puapuaga?

E UI lava e tatalo nisi o tagata, ae e tumau pea ona latou lē mautonu pe e iai moni se Atua. Aiseā? Atonu ona o le tele o mafatiaga o loo latou vaaia i le lalolagi. Pe na iai se taimi na e manatu ai pe aiseā ua lē taofia ai e le Atua puapuaga?

Pe na foafoaina e le Atua tagata ina ia lē lelei atoatoa ma oo iai mafatiaga? E lē mafai ona tatou faaaloalogia se atua e manaʻo e mafatia tagata. Ae seʻi mātau le mea lenei: Pe afai e te matamata ma le maofa i se taavale fou e manaia lava, ae teʻi ua e vaaia ua faaleagaina le isi itu, pe e te manatu o le auala lenā na fausia ai lenā taavale? E leai! Atonu e te manatu sa faia e le fale gaosi mea lenā taavale i se tulaga “lelei atoatoa,” ae e iai se tasi na faaleagaina.

I se tulaga taitutusa, o le ā lo tatou manatu e tatau ona iai, pe a mātauina le ofoofogia o le auala ua foafoaina ma faatulaga ai mea o le natura, ae e toe vaaia ai foʻi le tele o faafitauli ma tulaga ua mafatia ai tagata? Ua aʻoaʻoina i le Tusi Paia na foafoaina e le Atua le uluaʻi ulugalii e lelei atoatoa, ae o i laʻua lava na faapogaia tulaga ua mafatia ai. (Teuteronome 32:4, 5) O le mea e lelei ai, ua folafola mai e le Atua o le a ia faaleleia tulaga ua mafatia ai, e ala i le toe faafoʻisia o le tulaga lelei atoatoa i tagata usiusitaʻi. Aiseā la ua umi ai ona faatali o ia?

Aiseā ua Umi Ai?

E fesootaʻi atu le tali, i le fesili po o ai e tatau ona pulea tagata. E leʻi finagalo Ieova e pulea e tagata i latou lava, auā e tatau ona avea o ia ma o latou Pule. Ua taʻua i le Tusi Paia: “E lē o i le tagata foʻi e savali, ona faatonuina le mea e ui ai o ia.” (Ieremia 10:23) O le tulaga e faanoanoa  ai, na filifili le uluaʻi ulugalii e fouvale i le pulega a le Atua, ma avea ai ma tagata agasala. (1 Ioane 3:4) O le iʻuga, ua lē toe lelei atoatoa i laʻua, ma ua faapogaia ai mafatiaga iā i laʻua faapea ma a la fanau.

Ua faitau afe nei tausaga o faataga e Ieova tagata e pulea i latou lava, ma ua faaalia i le talafaasolopito le leai o se tomai e latou te faia ai faapea. E manino mai, ua faapogaia e faigāmalo uma faaletagata mafatiaga. E leai ma se faigāmalo ua aveesea atoatoa taua, le solitulafono, lē faamasinotonu, ma faamaʻi.

E Faapefea Ona Faaleleia e le Atua Mea ua Faaleagaina?

Ua folafola mai i le Tusi Paia, e lē o toe umi ona aumaia lea e le Atua se lalolagi fou amiotonu. (2 Peteru 3:13) E na o ē e faaaogā lo latou saʻolotoga e filifili ai e faaalia le alofa i isi ma le Atua, o le a soifua i lenā lalolagi.—Teuteronome 30:15, 16, 19, 20.

O loo taʻua foʻi i le Tusi Paia, i “le aso faamasino” lea ua lata tele mai, o le a aveesea atoatoa ai e le Atua mafatiaga, ma ē o loo faapogaia. (2 Peteru 3:7) Mulimuli ane, o le a pulea tagata usiusitaʻi e le Tupu tofia a le Atua, o Iesu. (Tanielu 7:13, 14) O ā mea o le a faataunuuina e le pulega a Iesu? Ua taʻua i le Tusi Paia: “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—Salamo 37:11.

I le avea ma Tupu i le lagi, o le a toe faaleleia e Iesu tulaga ua mafatia ai, e aofia ai maʻi, le soifua matua, ma le oti, ia ua māfua ona o le fouvale o tagata iā Ieova, “le puna o le ola.” (Salamo 36:9) O le a faamālōlō e Iesu i latou uma e talia lana pulega alofa, lea o le a faataunuuina ai folafolaga nei a le Tusi Paia:

 ▪ “E lē fai mai foʻi se tasi ua nofo ai: ʻOu te maʻi.’”Isaia 33:24.

▪ ʻE soloiesea foʻi e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’—Faaaliga 21:4.

Pe e lē o se faamāfanafanaga le iloa, e lē o toe umi ona faataunuuina lea e le Atua lana folafolaga e aveesea mafatiaga uma? I le taimi e tasi, e lē tatau ona mou atu lo tatou mautinoa o loo faafofoga mai o Ia i a tatou tatalo, ona e na te lē o taofia mafatiaga.

O loo soifua le Atua ma e faafofoga mai, e oo lava i taimi e te mafatia ma faanoanoa ai. E naunau foʻi o ia e silasila mai o e ola fiafia, i le taimi o le a mou atu ai le lē mautonu ma mafatiaga.