E Mafai e le Tusi Paia Ona Suia Olaga

O LE Ā na fesoasoani i se fafine mai i Filipaina ina ia tuua le faaaogā sesē o le ʻava malosi, ae faaleleia le olaga o lona aiga? Aiseā na mafai ai ona avea se tasi mai i Ausetalia na fiafia i le karate, o se tagata talaʻi toʻafilemu o le tala lelei? Faitau i a la tala.

“E leʻi faafuaseʻi ona iai suiga.”—CARMEN ALEGRE

TAUSAGA FANAU: 1949

ATUNUU: FILIPAINA

TALAAGA: INU TELE

OLAGA SA IAI: Sa ou fanau i San Fernando, o se nuu e i le itumalō o Camarines Sur. Ae o le tele o loʻu olaga ina ua ou matua, sa ou nofo ai i Antipolo i le itumalō o Rizal. O lenei nuu e i vaega maugā ma lanulauava, ma e tele ai laau. Ina ua faatoʻā ou siitia mai i inei, e lē masani ona e vaaia se tagata o fealuaʻi solo pe a pō. Peitaʻi, ua suia nei Antipolo ma ua avea o se aai tele e toʻatele tagata e nonofo ai.

E leʻi leva ona ou faamautū i Antipolo, ae ma feiloaʻi ma se alii e suafa iā Peniamina, ma na mulimuli ane o ma faaipoipo. Na oo ina ou iloa, e sili atu ona faigatā le olaga faaipoipo nai lo o le mea sa ou faatalitalia. Na amata ona ou inu tele i le ʻava malosi e tau faagalo ai oʻu faafitauli. Na oo ina faigatā tele oʻu uiga, ma na iloa i le auala na ou feagai ai ma laʻu tane ma laʻu fanau. Sa lē lava loʻu onosaʻi, ma lē mafai ai ona pulea le auala na ou feutagaʻi ai ma i latou. Ou te lē faaaloalo i laʻu tane, ma sa leai se fiafia i lo matou aiga.

SUIA E LE TUSI PAIA LOʻU OLAGA: O le tuafafine o loʻu toʻalua o Editha, o se Molimau a Ieova, sa manaʻo e ma te suʻesuʻeina ma Peniamina le Tusi Paia, faatasi ma Molimau. Na ma talia lana ofo ma faamoemoe o le a fesoasoani e faaleleia ai lo matou aiga.

A o suʻesuʻe i le Tusi Paia, na ma aʻoaʻoina ai le tele o upu moni matagofie. Na matuā pāʻia loʻu loto i upu o le Faaaliga 21:4 e faatatau i tagata o le a nonofo i le lalolagi parataiso i le lumanaʻi, i lalo o le pulega a le Malo o le Atua e faapea, o le a ʻsoloiesea foʻi e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’ Na ou manaʻo ia ou iai faatasi ma tagata o le a mauaina na faamanuiaga.

Na ou iloa ai e tatau ona ou faia ni suiga tetele i laʻu amio ma aʻu masaniga. E leʻi faafuaseʻi ona iai suiga, ae na faasolosolo mālie lava ona ou taulau manuia i le tuua o le faaaogā sesē o le ʻava malosi. Na ou iloa foʻi faaalia le agalelei ma le onosaʻi i le auala e feutagaʻi ai ma loʻu aiga. E lē gata i lea, na ou faaalia foʻi le faaaloalo i laʻu tane, ma lagolagosua atu a o taʻimua o ia i lo matou aiga.

 Ina ua ma auai ma Peniamina i sauniga a Molimau a Ieova, na ma matuā maofa lava i mea na ma vaaia. E leai ni tagata Molimau e taaalo i taaloga faitupe, inu tele i le ʻava malosi, pe e faailogatagata foʻi. E latou te feagai ma tagata uma i se auala faaaloalo. O i inā na ma talitonu ai ua ma maua le tapuaʻiga moni.—Ioane 13:34, 35.

AOGĀ IĀ TE AʻU: Na faasolosolo ina faaleleia le tulaga o mea i si o matou aiga. Ua ma maua ma Peniamina se aiga fiafia, ma olioli i le aʻoaʻoina o isi i le Tusi Paia. Ua amata foʻi ona suʻesuʻe i le Tusi Paia la ma fanau tama e toʻalua ma o la taʻitoʻalua. E ma te faamoemoe e iai se taimi o le a matou auai faatasi ai i le auaunaga iā Ieova. O le olaga sili lava lenei e ola ai.

“Na ou manatu e leai se tasi e mafai ona faatoʻilaloina aʻu.”—MICHAEL BLUNSDEN

TAUSAGA FANAU: 1967

ATUNUU: AUSETALIA

TALAAGA: FIAFIA I LE KARATE

OLAGA SA IAI: Na ou ola aʻe i Albury, o se aai matagofie ma mauoloa i Niu Sa Uelese. E ui lava o Albury o se aai e saogalemu e nofo ai, ae e taatele ai foʻi le solitulafono e pei o isi aai.

Sa lelei loʻu olaga tuputupu aʻe. E ui lava na teteʻa oʻu mātua a o fitu oʻu tausaga, ae na la faamautinoa e maua uma e aʻu, o loʻu uso, ma oʻu tuafāfine mea uma e matou te manaʻomia. Na ou alu i se aʻoga tumaʻoti e sili ona lelei i lo matou vaipanoa, ma na manaʻo loʻu tamā ina ia maua saʻu galuega faipisinisi pe a māeʻa laʻu aʻoga. Peitaʻi, sa sili atu ona ou fiafia i taaloga, ma na ou lelei tele i le tiʻetiʻe uila ma le karate. Na iʻu ina ou faigaluega i se faleoloa e faaleleia ai taavale, ina ia lava le taimi ma loʻu malosi ou te uaʻi atu ai i aʻu taaloga.

Na ou naunau e faamalositino ina ia manaia ma malosi loʻu tino. E iai taimi ou te manatu ai e leai se tasi e mafai ona faatoʻilaloina aʻu. Sa iloa lelei e loʻu faiaʻoga karate sa ou faaaogā sesē loʻu malosi ina ia maua ai so o se mea mai i se tasi. O lea, sa ia aʻoaʻia ai aʻu ina ia pulea lelei loʻu malosi ma ia faia ni amioga tatau, ma faamanatu mai pea le tāua o le gauaʻi ma le faamaoni.

SUIA E LE TUSI PAIA LOʻU OLAGA: Ina ua ou suʻesuʻe i le Tusi Paia, na ou iloa ai e inosia e Ieova faiga sauā. (Salamo 11:5) I le taimi muamua, na ou mafaufau o le karate e lē o se faiga e sauā, ae o se taaloga e faia i se auala saogalemu. Na ou manatu o tapulaa ma mea o loo faatāua i le karate, e taitutusa ma aʻoaʻoga a le Tusi Paia. Na matuā onosaʻi mai lava si ulugalii lea sa matou suʻesuʻe faatasi. E la te leʻi faapea mai e tatau ona ou tuua le karate, ae na faaauau pea ona la aʻoaʻoina aʻu i upu moni o le Tusi Paia.

A o tuputupu pea loʻu malamalama i le Tusi Paia, na amata ai ona sui oʻu manatu, ma ua  vavalalata ai la ma faauōga ma Ieova. Na faateʻia aʻu ina ua ou aʻoaʻoina le faaaʻoaʻoga na faataatia e le Alo o Ieova, o Iesu. E ui na matuā tele le mana o Iesu, ae e leʻi fiafia o ia i faiga sauā. Na matuā pāʻia loʻu loto i ana fetalaiga o loo i le Mataio 26:52 e faapea: “O i latou uma e tago i le pelu, e faaumatia i le pelu.”

O le tele lava o mea na ou aʻoaʻoina e uiga iā Ieova, o le faateleina foʻi lenā o loʻu alofa ma loʻu faaaloalogia o ia. Na matuā faalaeiauina aʻu i le manatu e mafai e Lē na foafoaina mea uma, e atamai, ma e tele lona mana, ona manatu mamafa mai iā te aʻu. Na pāʻia loʻu loto i le iloa, e tusa lava pe ou te faia mea e faanoanoa ai Ieova, po ou te manatu foʻi ua faigatā tele le tulaga o mea ma ua ou lagona le faavaivai, ae e lē taitai ona fiu Ieova, pe a ou taumafai pea. Na faamāfanafanaina aʻu i lana folafolaga: “O aʻu o Ieova lou Atua, o loo uuina lou lima taumatau, o Lē e fai atu iā te oe, ʻAua e te fefe. Ou te fesoasoani iā te oe.’” (Isaia 41:13) Ina ua ou iloa o loo ia faaalia mai lenā ituaiga o alofa, ou te leʻi toe lagona le faavaivai.

Na ou iloa, o le tuua o le karate o se mea lea e sili ona faigatā. Ae na ou iloa foʻi, o le a faafiafiaina ai le finagalo o Ieova, ma na ou talitonu o le auauna atu iā te ia e sili atu ona aogā nai lo o so o se mea lava na ou faataulagaina. Ou te manatu o se mea na sili ona faatalitonu ai aʻu, o upu a Iesu o loo i le Mataio 6:24: “E lē mafai ona pologa se tasi i ni matai se toʻalua.” Na ou iloa ai e lē mafai ona ou auauna atoatoa atu iā Ieova ma faaauau pea ona karate, auā e iʻu lava ina ou toe faamuamua le karate. Ua oo mai le taimi e tatau ai ona ou filifili po o ai loʻu matai.

E leʻi faigofie ona tuua le karate, ma na ou tauivi ma le tele o faalogona lē mautonu. Na ou fiafia i le iloaina o loo oʻu faia le mea e faafiafia ai Ieova, ae na ou manatu foʻi e peiseaʻī ua ou fouvale i loʻu faiaʻoga karate. E masani ona manatu i latou e taaalo i le karate, o le fouvale o se agasala e lē mafai ona faamagalo, ma o nisi e sili ai le pule i o latou ola nai lo o le tauaveina o le luma.

E leʻi mafai ona ou faamatala i loʻu faiaʻoga karate le māfuaaga o loʻu alu ese. O lea na ou lē toe fesootaʻi ai ma loʻu faiaʻoga, po o se tasi o aʻu uō, o ē e karate foʻi. Na ou iloa ua ou faia le mea saʻo, ae na ou lagona foʻi le nofosala ona ua ou misia le avanoa e faamatala atu ai oʻu talitonuga fou i isi. Na ou lagona e peiseaʻī ua ou lē taulau i le faafiafiaina o Ieova, a o lea e leʻi amataina laʻu auaunaga iā te ia. O nei mea uma na matuā ou mafatia ai. E tele ni taimi na ou taumafai ai ou te tatalo iā Ieova, ma na iʻu ina ou tagi ona o le tigā o lenā mea.

Atonu na silafia mai e Ieova se mea lelei iā te aʻu, auā na ia uunaʻia uso ma tuafāfine o le faapotopotoga e fesoasoani mai. Na mataʻina lo latou alofa, le faamāfanafana, ma la latou faauōga. Na ou maua foʻi se faamāfanafanaga i le tala o loo i le Tusi Paia e uiga iā Tavita ma Patesepa. E ui ina faia e Tavita ni agasala matuiā, ae na faamagalo o ia e Ieova ina ua salamō moni. O loʻu mafaufau i lenā tala, na fesoasoani ina ia foʻia ai oʻu vaivaiga.

AOGĀ IĀ TE AʻU: A o leʻi suʻesuʻeina le Tusi Paia, ou te leʻi popole i se tasi ae e na o aʻu lava. Ae e ala i le fesoasoani a Ieova ma si aʻu avā, o lē ua fitu nei tausaga talu ona ma faaipoipo, ua mafai ai ona ou atiaʻe le tele o le alofa. Ua faamanuiaina i maʻua i le faaeaga o le suʻesuʻe o le Tusi Paia ma le toʻatele o tagata, e aofia ai ma nisi na oo i ni tulaga matuiā. O le vaaia o le auala ua suia ai e le alofa o Ieova olaga o isi, ua aumaia ai iā te aʻu le fiafia e sili atu nai lo o le avea ma siamupini o le karate.

[Faamatalaga faaopoopo i le itulau 14]

“Na matuā faalaeiauina aʻu i le manatu e mafai e Lē na foafoaina mea uma, e atamai, ma e tele lona mana, ona manatu mamafa mai iā te aʻu”

 [Pusa/​Ata i le itulau 15]

“Faafetai Lava mo Lenei Faasologa o Mataupu Matagofie!”

Pe na e fiafia e faitau i mea na tutupu o loo taʻua i lenei mataupu? O nisi nei o tala e lua mai i tala e silia ma le 50, ia ua lomia i Le Olomatamata talu mai Aokuso i le 2008. O le faasologa o mataupu “E Mafai e le Tusi Paia ona Suia Olaga,” ua avea o se tasi o mataupu e sili ona fiafia i ai la tatou ʻaufaitau. Aiseā ua fiafia tele i ai nisi?

E eseese talaaga o tagata taʻitoʻatasi o loo taʻua i nei mataupu. A o leʻi aʻoaʻoina e uiga iā Ieova le Atua, sa taulau manuia olaga o nisi, ae e leʻi iai se uiga moni o o latou olaga. O nisi na feagai ma luʻi faigatā e pei o uiga sauā, po o le faaaogā sesē o fualaau faasāina ma le ʻava malosi. E iai foʻi nisi na soifua aʻe ma iloa Ieova, ae na latou tuua lana tapuaʻiga mo se taimi. O nei mea uma na tutupu, ua iloa ai e mafai ona faia ni suiga ina ia faafiafia ai le Atua, ma o le faia faapea, e mautinoa e maua ai aogā. O le ā se aafiaga o nei tala i la tatou ʻaufaitau?

Ua faamatala mai e se tasi o le ʻaufaitau le auala na fesoasoani ai le mataupu o loo i le lomiga o Fepuari 1, 2009, i nisi o loo i le falepuipui o tamaʻitaʻi.

▪ Ua faapea mai o ia: “O le toʻatele o pagota e malamalama i faalogona o lē o loo taʻua i le mataupu. Sa sili ona aogā ata o loo faaalia mai ai le ʻtaimi ua teʻa’ ma le ʻtaimi nei,’ aemaise foʻi le talaaga o le olaga sa iai. E faapena foʻi olaga o le toʻatele o pagota, ma e toʻalua ni pagota na suʻesuʻeina le Tusi Paia ina ua la faitau i lenei tala.”—C. W.

O tala o loo taʻua i lenei faasologa o mataupu e matuā pāʻia ai loto o nisi o le ʻaufaitau. O se faaaʻoaʻoga, o loo taʻua i le lomiga o Aperila 1, 2011 le mea na tupu iā Guadalupe Villarreal, o lē na tuua se olaga o faiga faatauatane ina ia auauna iā Ieova. Seʻi mātau ni tusi se lua, mai i le tele o tusi na tusi mai ai le ʻaufaitau, e faatatau i lea tala.

▪ “Na matuā pāʻia lava loʻu loto i le mea na tupu iā Guadalupe. Maʻeu le matagofie o le iloaina e mafai e le alofa mo Ieova ma lana Afioga, ona suia atoatoa ai se tagata!”—L. F.

▪ “I le taimi ua mavae, sa ou taumafai e faasoa atu oʻu talitonuga i tagata uma, e aofia ai ma ē e faia faiga faatauatane. Ae talu ai nei, na ou iloa ai ua ou manatu faatauvaa ma lē toe fia talaʻi atu i a i latou na. O le mataupu tonu lava lea sa ou manaʻomia. Ua fesoasoani iā te aʻu e manatu i a i latou na e pei ona silasila i ai Ieova—e mafai ona avea i latou ma Ona tagata tapuaʻi.”—M. K.

O se tasi o mea na tupu sa sili ona fiafia i ai le ʻaufaitau, o le tala lea e uiga iā Victoria Tong, o loo i le lomiga o Aokuso 1, 2011. Na faamatala e Victoria le leaga o lona olaga a o tuputupu aʻe. Sa ia faailoa mai le faigatā ona talitonu e alofa mai Ieova iā te ia, e ui ua mavae ni tausaga talu ona auauna iā Ieova. Na ia taʻua le mea na faasolosolo mālie ona fesoasoani iā te ia e talia ai le alofa o Ieova. Mātau faamatalaga a nisi o la tatou ʻaufaitau e uiga i lea tala.

▪ “E fetaui tonu lava iā te aʻu le mea na tupu iā Victoria. Ua oo le tele o tulaga faigatā i loʻu olaga. E ui ua tele tausaga talu ona ou papatiso e avea ma Molimau, ae sa iai pea ni oʻu mafaufauga lē lelei. O le tala iā Victoria, na ou taumafai malosi ai e vaai iā te aʻu e pei ona silasila mai i ai Ieova.”—M. M.

▪ “A o ou laʻitiiti, na ou taumafai e ʻalofia le matamata i ata matagā. Ae e leʻi leva talu ai nei na ou toe matamata ai i na ata. Na ou saʻili atu mo le fesoasoani a toeaina Kerisiano, ma na fesoasoani iā te aʻu ina ia foʻia ai loʻu faafitauli. Na faamautinoa mai e toeaina le alofa mutimutivale o Ieova iā te aʻu. Peitaʻi, e iai taimi ou te lagona ai le lē aogā, ma e peiseaʻī e lē mafai ona alofa mai Ieova iā te aʻu. O le faitauina o le tala iā Victoria na fesoasoani iā te aʻu. Ua ou iloa nei, pe a ou faapea atu e lē mafai e Ieova ona alofa mai iā te aʻu, e taitutusa lava lenā ma loʻu faapea atu, e lē lava le taulaga togiola a lona Alo e faamagalo ai aʻu agasala. Na ou ʻoti ese lenei tala ma teuina ina ia ou faitau ma manatunatu loloto i ai, i so o se taimi lava e oo mai ai lagona lē aogā. Faafetai lava mo lenei faasologa o mataupu matagofie!”—L. K.