Ia Mafuta Vavalalata Atu i le Faafofoga Tatalo

O LE toʻatele ua taʻutino mai e talitonu i le Atua, e lē mafai ona faamatala le māfuaaga e latou te faatuatua ai, le pogai ua masani ai ona avea lotu ma taaʻiga leaga, ma pe aiseā foʻi ua lē taofia ai e le Atua puapuaga. E pau le mea o loo latou faia o le tatalo lea i se Atua e latou te lē iloa.

Peitaʻi, e mafai ona e mafuta vavalalata i le Atua, nai lo o le tau ina tatalo atu iā te ia. E mafai ona faamalosia lou faatuatua pe a e malamalama, o le Atua o loo faapogaia oe ina ia alofa iā te ia. O le faatuatua moni e faavae i faamaoniga. (Eperu 11:1) Pe a e aʻoaʻoina upu moni e uiga i le Atua, ona e iloa ai lea o ia ma talanoa i ai e pei o se uō. Mātau le faaaʻoaʻoga a nisi sa masani ona tatalo, e ui lava ina lē mautonu pe e iai moni se Atua.

▪ O Patricia lea na taʻua i le mataupu muamua. “I se tasi o aso, na matou talatalanoa ma aʻu uō e uiga i lotu. Na ou taʻu atu iā i latou, na ou alu ese mai i lo matou fale, ina ia aua neʻi oʻu faalogo i le talanoaga a loʻu tamā o lē e lē talitonu i se Atua, ma se tasi o Molimau a Ieova na asiasi atu. Ae na faapea mai se tasi o aʻu uō: ʻE leiloa pe e saʻo Molimau a Ieova.’

“Na faapea mai le isi: ʻE manaia pe a tatou ō i sa latou sauniga ina ia iloa ai pe e saʻo.’ O le mea tonu lenā na matou faia. E ui lava ina matou lē mautonu, ae na faaauau pea ona auai nisi o i matou ona na faaalia mai e Molimau ni uiga faaleuō.

“Peitaʻi, i se tasi o Aso Sa, sa ou faalogo ai i se mea na matuā suia ai loʻu mafaufau. Na faamatala e le failauga le māfuaaga ua mafatia ai tagata. Ou te leʻi iloa muamua na faia le tagata ina ia lelei atoatoa, ma ua tuufaasolo mai le maʻi ma le oti i tagata uma ona o le tagata e toʻatasi. Na faamatala foʻi e le failauga le pogai na manaʻomia ai ona maliu Iesu, ina ia toe faafoʻisia tagata i le tulaga sa iai muamua. * (Roma 5:12, 18, 19) Na vave lava ona ou malamalama i mea uma. Na ou tomānatu ifo: ʻE iai moni lava se Atua o loo alofa mai.’ Na faaauau ona ou suʻesuʻeina le Tusi Paia, ma o le taimi muamua lea i loʻu olaga ua ou tatalo atu ai i se tasi o loo iai moni lava.”

▪ O Aleni lea o loo taʻua foʻi i le mataupu muamua. “Na asiasi mai i lo matou fale i se tasi o aso ni Molimau a Ieova, ma na talia i laʻua e  laʻu avā, ona na fiafia i le manatu na la taʻua e uiga i le ola e faavavau i le lalolagi. Ae ou te leʻi fiafia i ai. O lea, e ui sa iai i laʻua i le potu mālōlō, ae na ou aumai loʻu toʻalua i le umukuka ma fai i ai, ʻAua e te faavalevalea. E lē tatau ona e talitonu i na mea!’

“Na tali mai o ia: ʻIa alu la oe e fai i ai ma faamaonia atu lo la sesē.’

“E leʻi mafai ona ou faamaonia so la sesē, ae na la faaalia le agalelei ma tuu mai se tusi o loo faamatala ai, pe na iai le ola ona o le foafoaga pe ona o le evolusione. Ona o le matuā manino o faamatalaga ma faamaoniga maumaututū o loo i le tusi, o lea na ou manaʻo ai ou te fia iloa atili e uiga i le Atua. Na ou suʻesuʻe loa le Tusi Paia ma Molimau, ma e leʻi umi ae ou iloa, e matuā eseese lava faamatalaga o loo iai, ma mea uma na ou manatu ai e uiga i lotu. A o ou aʻoaʻoina mea e uiga iā Ieova, na amata loa ona patino mea ou te tatalo atu ai. Sa iai nisi o oʻu uiga lē lelei, ma na ou tatalo atu mo lana fesoasoani. Ou te mautinoa na tali mai Ieova i aʻu tatalo.”

▪ O Aneterea mai i Egelani. “E ui sa malolosi oʻu manatu ma na ou matuā fiafia i le  faasaienisi, ae na ou talitonu i le evolusione ona sa faapea mai nisi e moni lenei aʻoaʻoga. Na ou lē talitonu i le Atua ona o le tele o mea leaga o loo tutupu.

“Peitaʻi, e iai taimi ou te mafaufau ai: ʻPe afai e iai se Atua, ou te fia iloa atili la o ia. Aiseā ua tele ai solitulafono ma taua?’ Pe a oo mai faigatā, e iai taimi ou te tatalo ai mo se fesoasoani, ae ou te lē iloa po o ai o loo oʻu tatalo i ai.

“Na tuu e se tasi i laʻu avā se sāvali na lomia e Molimau a Ieova e faapea: Po o le a Faasaoina ea Lenei Lalolagi? O le fesili tonu lava lenā e masani ona ou mafaufau iai. O lenā sāvali, na māfua ai ona ou mafaufau ʻpe e tāua le iloiloina o le Tusi Paia.’ Mulimuli ane, a o alu saʻu faigāmālōlōga, na tuu mai e se tasi iā te aʻu le tusi The Bible—God’s Word or Man’s? Ina ua ou iloa e tutusa manatu o le Tusi Paia ma nisi o manatu faasaienisi ua faamaonia le saʻo, na ou manaʻo ai loa e aʻoaʻoina atili le Tusi Paia. O lea, ina ua ofo mai se Molimau a Ieova e ma te suʻesuʻe, sa ou talia loa. A o faasolo ina ou malamalama i le fuafuaga a Ieova, sa ou lagona ua ou iloa moni lava o ia, ma e mafai ona ou talanoa saʻoloto i ai e ala i le tatalo.”

▪ O Jan, o lē na ola aʻe i le lotu Porotesano i Lonetona. “O le lē faamaoni o lotu ma le faateteleina o mafatiaga, na ou lē toe fia alu ai i se lotu. Na ou tuua laʻu aʻoga i le kolisi maualuga, ae amata ona ou pese ma tātā kitara ina ia maua ai se tupe. O le auala lenā na ma fetaui ai ma Pati, o lē sa ola aʻe i le lotu Katoliko, ma e lē o toe alu i se lotu e pei o aʻu.

“Na matou nonofo i se fale tuufua ma isi o ē na tuua foʻi a latou aʻoga, ma e fiafia i lotu mai i Sasaʻe. E matou te faaaluina le tele o itula e talatalanoa e oo lava i le leva o le pō, i le uiga o le olaga. E ma te leʻi talitonu ma Pati i le Atua, ae na ma manatu e tatau ona iai se ʻmalosiaga o loo aumaia ai le ola.’

“E leʻi leva ona ma siitia i le itu i mātū o Egelani e suʻe ni a ma galuega o ni tagata faifaaili, ae fanau loa la ma tama tama. I se tasi o pō a o maʻi tigāina o ia, na ou tatalo ai i se Atua ou te leʻi talitonu i ai. E leʻi umi ae faasolo ina leaga la ma faiā ma Pati, ma na ou alu ese ai ma ave si a ma tama. Sa ou toe tatalo foʻi mo se fesoasoani, ma faamoemoe atonu o loo faafofoga mai se tasi. Ou te leʻi iloa na faia foʻi faapea e Pati.

“I lenā lava aso, na asiasi atu ai ni Molimau a Ieova se toʻalua iā Pati, ma taʻu atu nisi o fautuaga aogā mai i le Tusi Paia. Na vili mai Pati pe ou te manaʻo e matou te suʻesuʻe faatasi i le Tusi Paia ma Molimau. E leʻi umi ae ma iloa, e tatau ona ma faaipoipo faaletulafono, ina ia faafiafia ai le Atua. E foliga mai o se laasaga faigatā lea, ona e lē o lelei la ma faiā i lenā taimi.

“Na ma mananaʻo e aʻoaʻo atili e uiga i le faataunuuga o valoaga o le Tusi Paia, le pogai o mafatiaga, ma le uiga o le Malo o le Atua. Na faasolosolo mālie ona ma iloaina e alofa mai le Atua, o lea na ma mananaʻo ai e faia le mea o loo poloaʻi mai ai o ia, ma ma faaipoipo ai loa. Na fesoasoani le atamai o le Afioga a le Atua e tausia ai la ma fanau e toʻatolu. E ma te mautinoa na faafofoga mai Ieova i a ma tatalo.”

Iloilo e Oe Lava ia Faamaoniga

E pei o le faitau miliona o isi tagata, ua iloa e i latou o loo taʻua i lenei mataupu le auala na faasesēina ai i latou e lotu sesē, ma le māfuaaga ua lē taofia ai e le Atua puapuaga. Pe e te mātauina mai i nei tala taʻitasi, o le malamalamaga saʻo na maua e i latou nei mai i le Tusi Paia, na talitonu ai e faafofoga moni mai lava Ieova i tatalo?

Pe e te manaʻo e iloilo faamaoniga e iloa ai e iai moni lava le Atua? E fiafia Molimau a Ieova e fesoasoani iā te oe ina ia aʻoaʻoina upu moni e uiga iā Ieova le “Faafofoga tatalo,” ma le auala e mafuta vavalalata atu ai iā te ia.—Salamo 65:2.

[Faaopoopoga i lalo]

[Faamatalaga faaopoopo i le itulau 10]

“A o faasolo ina ou malamalama i le fuafuaga a Ieova, sa ou lagona ua ou iloa moni lava o ia, ma e mafai ona ou talanoa saʻoloto i ai e ala i le tatalo”

[Ata i le itulau 9]

O le faatuatua moni, e faavae i faamaoniga ma se faanaunauga e iloa upu moni e uiga i le Atua